الموضوع: Getz Club

المشاركة الأصلية كتبت بواسطة zoza08

عندي سؤال يا جيتزاوية غطا الكارتيرة عندي كان نصه كده واقع فاخويا الناصح راح خلعه خااالص هو ده يضر العربية في حاجة انا رايحة اعملها صيانة قريب اركب غيرها ولا مش ضروري و هي تعملها كم كده؟

مافيش حاجة في العربية مش مفيدة والا مكانوش عملوها .
غطاء الكارتيرا مفيد انه بيمنع التراب يدخل على الموتور من تحت وعلى الرفرف من تحت عشان مايحصلش صدا مثلا .
لو كارتيرا خلفي انا جبتها مرة بـ 45 لكن لو امامي سعرها حوالى 150 ( دي اسعار توكيل )
انصحك انك تركبيها عشان تحافظي على العربية جديدة .

السلام عليكم ورحمة الله وبركاته
ازيكوا يا جماعة عاملين ايه ؟
يارب تكونوا كويسين كلكوا وفي احسن حال
احكيلكوا بقى على المرمة اللى انا عملتها لزقزوقة

بسم الله

اولا انا بشكر المهندس هاني صاحب موضوع سبيد سيرفيس اللى معانا هنا في المنتدى على المجهود اللى قام بيه معايا وهو بصراحة صديق عزيز عليا ومش بيتاخر عني في اي حاجة هو وكل الصنايعية اللى شغالين معاه في المركز بتاعه .

ثانيا اقولكوا على انا كنت بشتكى منه في العربية والاعراض اللى كنت بحس بيها وبعدين اقولكوا اشتريت ايه .
العفشة عندي كانت بتخبط جامد واقل مطب كنت بحس بشخاليل كده والعربية مش مظبوطة وخصوصا ان العربية معايا من حالة الزيرو فكنت حاسس ان في اختلاف رهيب عن الحالة الحالية وايام زمان ( يا سلام على ايام زمان ) .

لو ماشي على طريق سفر او على الدائري في هوا جامد على الطريق كانت العربية بتعوم والهواء بيلعب بالعربية زي ماهو عايز ولو تريلا عدت من جنبي بحس ان العربية اتحركت بالجنب كده .
كل دي مؤشرات على ان المساعدين بقت في البليلة . وكان عندي حاجة اسمها مسمار ميزان بايظ وبيض الطرف والمقصين الاماميين .
وتيل الفرامل كان محتاج يتغير لان الفرامل كانت ضعيفة غير الصيانة العادية للعربية وكمان الصيانة المش عادية وهي تغيير السيور لان العربية عندي عاملة 186000 كيلو وانتوا عارفين ان السيور دي بتتغير كل 60 الف كيلو ودي كانت المرة الثالثة اللى اغير فيها طقم السيور .

انا روحت اشتريت الاتي :
طقم مساعدين اصلي بتاع الجيتز سعرهم 1500 ( سعر التوكيل 1800 )
طقم تيل فرامل امامي كوري بـ 100 وده المهندس هاني هو اللى رشحهولي لانه الشركة اللى عاملاه هي هي الشركة اللى بتعمل تيول هيونداي الاصلية واسمها ( موبس ) وهو فعلا كويس وبيمسك كويس ومش بيعمل صفارة او حكة .
طقم تيل خلفي كوري بـ 150 .
2 مسمار ميزان بـ 150 ( على ما اذكر )
طقم سيور ( كاتينة وتكييف وباور ودينامو ) + بلية كاتينة وبلية شداد بـ 400 تقريبا
بوجيهات بـ 50 فلتر هواء اي كلام بـ 25 ( انا جبت الفلتر عشان اركبه مؤقتا لغاية لما انضف الفلتر الـ k&n )

وكمان قررت اني اغير الزيت وجبت ليكوي مولي اخيرا . وعشان انا عربيتي عاملة كيلو متر عالي فطلع الزيت المناسب ليا وبيعيش 10000 كيلو سعره 195 جنيه + منظف الموتور وبيشيل الرواسب بـ 35 جنيه .
ولما وريت الزيت للمهندس هاني شافه ومسكه بايديه كده وقالي الزيت ده هايل ودرجة اللزوجة بتاعته حلوة اوي.

كان نفسي اجيب مقصين امامي ( كوري الاتنين بـ 420 ) بس للاسف كان لازم اشحت بقى عشان الم فلوس لاني بقيت على الابيض .

وتولكت على الله وروحت على المهندس هاني من الساعة 2 الظهر لغاية الساعة 11 بليل .
بصراحة تعبوا معايا اوي واشتغلوا جامد وطلع حوار فك العفشة ده مش سهل خالص خصوصا الامامية لان عشان تفك المساعد لازم تفك الجزء البلاستيك اللى راكب فيه المساحات كله وتشيله خالص .

النتيجة :
العربية مسكت نفسها ومابقاش في التخبيط بتاع الاول ( لكن مش بالدرجة اللى انا كنت متوقعها )
الفرامل بقى احسن بكتييييييييييييير ( حاسس اني بقيت ايه بي اس )
صوت الموتور اختلف تماما بعد تغيير السيور والبلي والزيت والبوجيهات .

مكنتش مبسوط اوي من العفشة خصوصا ان مافيش حاجة ناقصة غير المقصين ويبقى كده غيرت العفشة كلها لان الجيتز من الخلف على دنجل يعني مافيش مقصات ولا بيض ولا اي حاجة . هو دنجل وراكب فيه المساعدين والسوست وشكرا . يعني انا كده غيرت العفشة ورا كلها وقدام ناقص مقصيين فقط ويبقى كده كله كومبليت .
فمكنتش مصدق بصراحة ان ممكن اسمع اصوات تاني وبدأت اشك ان المساعدين بايظة .
رجعت تاني للمهندس هاني وكشف على علبة الدركسيون وكانت الفاجعه ان العلبة عندي تعبانة ومحتاجة تتغير .
والفاجعه الكبري انه مش موجودة خالص ( احمد سعيد ودمشق والتوفيقية وعند اكبر التجار ) لا يوجد .
والفاجعه الاكبر ان سعرها في التوكيل 7000 بلبل .

ده كل اللى انا عملته في العربية والحمد لله روحت بيها الساحل ورجعت والعربية اخر حلاوة بغض النظر عن بعض الاصوات البسيطة الناتجة عن علبة الدركسيون دي .