الموضوع: Getz Club

المشاركة الأصلية كتبت بواسطة mohamedenzo

ليا بس سؤالين يعنى ايه بالضبط مليت التيل الخلفى؟ املاه ازاى؟ الملى ده بيكون تبع مين بالضبط؟
احسن مقاس جنط للعربية ايه؟ 16 ولا المضمون 15 ؟

انا بفكر اجرب نصيحة 95 على فكرة ان افول التنك 95 واطلع سفرية محترمة انظف التنك بكل دائرة البنزين ونشوف هانوصل لايه وربنا يسهل

بص يا باشا
التيل الخلفي عبارة عن قطعة حديد على شكل هلالي او نصف دائري وبيكون عليها طبقة التيل متركبة ببرشام كده . في ناس بتغير التيل كله يعني بتغير قطعة الحديد كمان ودول سعرهم اخر مرة سالت عليهم كانوا 450 (غبور ) . لكن في ناس بتملى التيل ودول كتير اوي لو حضرتك ساكن قريب من الحرفيين انا اعرف واحد هناك كويس جدا ومحترم وخبير وهو اللى انا مليت عنده التيل وعلى فكرة ده مش اختراع جديد . انا طول عمرى وكل اصحابي ومعارفي كله بيملى التيل الوراني يعني بيفك البرشام بتاع التيل القديم ويركب طبقة تيل جديدة على الحديدة الاصلية .
انصحك بجنوط 15 وده اللى مكتوب على العتب بتاع الباب ومقاس الكاوتش هايكون 15-185\55 بس انا عايز اسال حد بيفهم عن هل ممكن يحصل حاجة لو خليت الكاوتش 195 بدل 185؟ اذا عرفت الاجابة هاقولك
بص انت ممكن تركب 16 و17 كمان بس صدقني هاتيجي بعد 6 شهور كده وهاتلاقي العفشة في الباي الباي . فعلى ايه احنا مش حمل العفشة .
انت عارف وانا بصلح العربية اخر مرة كان في عندي طقطقة كده وانا طالع وكانوا شاكين في راس الكوبلن الداخلية فقولتله دي بكام قالي 325 . قولتله اصلي بتاعة غبور . قالي لا دي ياباني ومصنوعة للجيتز بس مش مصنه هيونداي لان غبور بيبع الكوبلن كامل على بعضه بالراس الداخلية والخارجية بـ 2500 جنيه .
فياريت تحافظ على العربية عشان احنا لسة مادخلناش في القطع التقيلة ويارب مانغيرها ابدا.
انا برضه في حد قالي على موضوع البنزين ال 95 ده بس مش عارف مش داخل دماغي يعني بس مش هاتخير حاجة . جرب

المشاركة الأصلية كتبت بواسطة mohab555

انا ان شاء الله رايح بكرة ابو رواش علشان صيانة ال 40 الف الواحد يعمل حسابة ف كام و هو رايح ؟؟؟
و هتاخد وقت قد ايه بالتقريب مثلا ؟؟؟ علشان لو كدة الواحد يشوف حته يروحها لو الموضوع هيطول ....
هما ادونى معاد الساعة 10 ...

المشاركة الأصلية كتبت بواسطة mohab555

انت فين يا mada ??? انت زعيم الجتزاوية

يا باشا ربنا يعزك انا ولا زعيم ولا حاجة . هي بس عشان الواحد بيحب العربية دي فبحب اعرف عنها كل حاجة .
المهم انت ربنا معاك النهاردة وياريت تحكيلنا عملت ايه هناك ؟

المشاركة الأصلية كتبت بواسطة mohamedenzo

على رايك يارب ما نغيرهاش ابدا فعلا
هو انت ايميلك ايه على الفيس بوك؟ يعنى عشان بقى الواحد يعرف حضرتك بقى
ان شاء الله بالنسبة لحوار الطنابير سالت الميكانيكى تبعى قالى ممكن تتخرط باذن الله ومش اشترى واحدة جديدة
اللى عايز احكيلك عنه انا لسه الخميس اللى فات منضف الايديل بنفسى لقيته النهارده اسود برضه مش عارف ايه القصة بنزين زفت يافلتر بقى الله اعلم حوارى بقى هو الرجة شكلى هاروح عند حد تانى ابص عليها باذن الله
وهاخد بكلامك فى موضوع الملى باذن الله وفى حوار الجنط انا قولت برضه 15 لكن اعتقد هاخلى الكوتش اعرض شوية

ياباشا يكون ليا الشرف وايميلي اهه
ahmed_na76@hotmail.com

هو طبعا البنزين زي الزفت والهواء زفت وكله بيرمي جوه العربية .
انا كنت فاكر ان انت مثلا خرطت الطنابير دي قبل كده مرتين ولا حاجة . ياباشا الطنابير دي لسة بدري عليها عشان تقول يا تغيير . انا بدأت اشك في الميكانيكي بتاعك .
انا لما روحت مليت التيل عند نفس الراجل خرطت الطنابير وهي مش خرط خرط يعني ده اسمها الحقيقي عملية جلخ يعني بيسنفر الطنبورة على جهاز كده عشان يشيل منها اي تعاريج ويركب التيل على نضافة . والعملية دي بتتعمل مرتين وممكن 3 كمان لو سمك الطنبورة يستحمل . صدقني حوار الطنابير الخلفية والتيل يخلصوا بي 70 جنيه و20 حنيه فك وتركيب عند الميكانيكي اللى جنبه .

هاتخلي الكاوتش كام يعني 205 ولا ايه ؟ اكيد كده هايبقى عريض اوي
والله بص انا ليا راي في موضوع الجنوط والكاوتش . في ساعات تلاقي عربية مجنطة والكاوتش بارز من الرفرف ولما تبص عليه تلاقي عرضه 195 مع انه عريض اوي بس ده بيرجع للجنط . بيكون الجنط نفسه عريض وفي جنط تاني تلاقيه عادي مهما تركب عليه كاوتش عريض تحس انه بياكل العرض ده جواه .
انا راي انك تشوف الاول شكل الجنط وتركب عليه مقاس 185 وتخلي الراجل يركب الفردة كده على العربية ولو معجبتكش غيرها وحط 195 وجرب وعادي لو اتكلم انت بفلوسك يا باشا وقوله هاديك حق الفك والتركيب بس عشان تبقى شوفت بعنيك كل الاشكال .

المشاركة الأصلية كتبت بواسطة mohab555

لا يا mada انت زعيم الجتزاوية بجدارة
أقولكم على مشوار نهاردة مع غبور ابو رواش و صيانة ال 40 الف ...
--------------------
- وصلت الساعة 10 تمام على حسب المعاد دخلت و خدت رقم و قالى انت مع المهندسة نهى قولت ماشى و دخلت بدور عليها جوة فى الاستقبال مش لاقيها قالولى بره بتشوف عربيات و استنها ... ماشى
10 دقائق و لقيت المهندسة جت و معاها بتاع 5 اومر شغل و قالتى سوانى و هبقى معاك و قعدت بتاع 10 دقائق كمان بتشتغل لحد ما جاء المنقذ ربنا يكرمه المهندس احمد و قالى تمام يا فندم انا معاك اتفضل نشوف العربية و فعلا خرجنا شوف العربية و بدأ فى كتابة امر الشغل و بعد ما كتب صيانة 40 الف و محتواها هو :
- تغيير زيت و فلتر ( سألته عايز احط زيت ال 5 الاصفر قالى خلصان و مفيش غير الترا قولت ماشى مش مشكلة )
- تغيير فلتر هواء
- تغيير فلتر بنزين
- تغيير بوجيهات
- مراجعة تيل الفرامل لو محتاج يتغير يغيره
- تغيير مياه الريداتير
- تغيير زيت الفتيس

و بعدين قلى فى مشاكل معاك قولتة على الرجه الجامدة الى فى العربية و السنتر فاصل قالى تمام بالنسبة للهزة دى كذة سبب و هتشوف الفرق بعد الصيانة علشان ممكن يكون العيب بوجيهات مرطبة او فى حساس متوسخ او كدة و قولتوا على القواعد قالى مش ممكن تكون قولعد و انت لسه ماجبتش ال 40 الف و على العموم علشان تطمن هتتحط على الجهاز و كتب فى امر الشغل وضع السيارة على الجهاز و اصلاح السنتر
و قالى خلاص تمام التكلفة هتبقى من 900 الى 1100 جنيه على حسب الى هيتغير و العربية هتستلمها الساعة 4.30 يعنى 6 ساعات مش عارف ليه الصراحة بس مش مشكلة قولتوا تمام .
بعديها ب 10 دقائق خدوا العربية و دخلت الورشة .....
و طلعت اتفرجت عليها شوية وبعدين قلت اروح داندى اتمشى شوية علشان الموضوع هيطول ..
و رجعت على الساعة 4 كدة و ببص لقيتهم بيقفل فى السنتر قولت تمام و فجأه لقيت الفنى ام مدور العربية و رجع بدهرة و لف و قعد يجرى بيها ورا واحد زميلة بفيرنا فضى و بيلعبوا بالكلاكس و كان ناقص يشد هند و ياخد دريفتاية هو و صحبة قلت مش مشكلة الولد بيجرب ..
و قام خارج راكن العربية بره و بعدين اختفى ...
و قولت خلاص بقه تمام هستلم و ان اسمى يتنادى ولا هنا و كل شوية اروح اسأل يقولى لسه يا فندم
لحد الساعة 5 الا عشرة مهندسة محترمة ربنا يباركلها سألتها قالتلى سوانى و قعدت تدور فى اوامر الشغل لقيت امر الشغل و العربية خلصانة من 4 و عشرة و البيه الفنى قام حاطط امر الشغل بتاع عربيتى مع الناس الى نفضت و هتستلم بكرة و لقيت المهندسة بتقولى معلش احنا مغيرناش ميه الريداتير علشان خلصانة من عندنا و مش مشكلة تتغير الصيانة الجاية والعربية طلعت على الجهاز و زى الفل و التيل لسه فيه و المرة الجاية ان شاء الله يتغير انا اقتنعت بكلامها و شكرتها ورحت ادفع ,,

و خلصت الحسابات و دفعت بالضبط 875 جنية و خرجت لقيت العربية و المهندس احمد قابلنى و انا خارج و طلع جرب العربية معايا و قالى لو فى اى حاجة قول و انا هعملهالك و العربية الحمد لله اختلفت تماما بعد الصيانة الحمد لله بس بردة فى رعشة بسيطة جدا بس قلت عن الاول كتير و المهندس قالى طبيعى مفيش حاجة و شكرته و روحت .

و كانت الاسعار كالاتى :
-------------
- زيت شل الترا = 227 ج
- فلتر زيت = 18 ج
- بوجيهات = 48 ج
- فلتر هواء = 42 ج
- فلتر بنزين - 150 ج
- زيت فيتيس = 30 ج
- مصناعيات = 280 ج
- ضربية = 76.50 ج
------------------------------
اجمالى : 875 ج و التيل المرة الجاية ان شاء الله

ربنا يباركلك فيها وان شاء الله تبقى صيانة ناجحة وياريت تقولنا موضوع الرجة بتاعة الموتور دي راحت ولا لسة ؟