الموضوع: السفر للخارج او البقاء في مصر..... دعوه للنقاش الموضوعي الجاد

المشاركة الأصلية كتبت بواسطة amir

السلام عليكم و رحمه الله

اعضاء نايل موتورز الكرام

حبيت افتح موضوع للنقاش الجاد و الموضوعي عن موضوع السفر للعمل او الهجره سواء لبلاد عربيه او اجنبيه

و اتمني ان النقاش يكون هاديء و موضوعي و علي مستوي راق

و الغرض ان تعدد الاراء و النقاش هيرسم صوره حقيقه امام كل من يفكر في الموضوع

و احب في البدايه اطرح بعض النقاط للنقاش و طبعا النقاش مفتوح و اهلا و سهلا بكل رأي

1- الانفصال الاجتماعي عن الاهل و الاصدقاء و ما يتبعه من عزله

2- صعوبه ايجاد شريكه حياه نظرا لظروف الغربه

3- ضيق المساحه الاجتماعيه بالنسبه للعزاب و المتزوجين سواء, اللهم سوي من دائره محدده من الاصدقاء و المقربين

4- الاولاد و تعليمهم و اكتسابهم خبرات مختلفه (بالذات في الدول الاجنبيه), و بعدهم عن الاب (غالبا) و ما يستتبع ذلك من مشاكل

5- مشكله التعود علي نمط معين من الحياه (غالبا ارقي سواء ماديا او اجتماعيا او ثقافيا)

6- صعوبه و تدهور الاحوال في مصر

7- الغلاء الفاحش و عدم القدره علي توفير حياه كريمه


اتمني ان النقط دي تكون مرجع بسيط لتسلسل الافكار و الخبرات

ياباشا رب هنا هو رب هناك ورزق هتخدوه هنا او هناك مش ناقصه مرمطة وغربة هوا طبعا ربك بيقول اسعى ياعبد وانا اسعى معاك وبس بردوا يعنى هوا الشغل مقطع بعضه بره اوى

المشاركة الأصلية كتبت بواسطة viper911s

طبعا مشاركة دكتور فادى مفيدة جدا خصوصا وانى اتكلمت معاة كتير اوى فى الموضوع دة
ودكتور مازيراتى اكيد وكل الناس الى شاركت فى الموضوع بأجابية
بس سؤال بارد هل دول الخليج بتوفرلك نفس الامان والحياة المثالية دة وجمالة والطبيعة
ولا اية

السلام عليكم و رحمة الله و بركاته

الدول العربية فى الخليج , مش هتلاقى فيها الا الفلوس, الفلوس و بس لكن مفيش هناك الPeace of mind بتاع الدول الأجنبية المتقدمة و خصوصا لو كنت انسان مجتهد و مكافح .

و طبعا أنتوا عارفين نظام الكفيل هناك فى الخليج اللى أول مابيسلم عليك , بياخد جواز سفرك و يديك اقامة تمشى بيها و ماتقدرش تغادر البلد الا بموافقة الكفيل ده , يعنى , أنا ممكن أكون شغال فى السعودية و يحصلى ظرف طارئ يضطرنى أنى أنزل مصر فجأة و لو الكفيل ماوافقش , معرفش أنزل , طبعا غير فرق المعاملة بين الأجنبى المصرى و الأجنبى الأميركى أو الانجليزى أو الكندى أو من أى جنسية محترمة .

بص , من الآخر , العنصرية اللى أنا لمستها فى السعودية , رغم أنى كنت شغال حكومة مش قطاع خاص, هى اللى كانت الدافع الرئيسى لى أنى أقدم على هجرة كندا , لكن أنا لما سافرت السعودية فى 2-2007 , عمرى ماكنت مخطط أنى أهاجر كندا أو أهاجر أصلا , كانت كل أحلامى أنى أشتغل و أرقى بنفسى علميا عشان أقدر أتنقل الى مكان أفضل فى السعودية أو الخليج و خلاص .

العنصرية اللى أنا شوفتها فى السعودية و مدى هوان المواطن المصرى هناك و يمكن يكون بالفعل أكتر مقيم أجنبى متهان هناك , مش عارف ليه, هى اللى خلتنى أقدم على حاجة زى الهجرة رغم أنها هتخلينى أبدأ من الصفر.