محتاج رأي وخبرة أصحاب السيراتو

**ahmedezar** · 18-12-2010 02:02 AM

السلام عليكم يا إخواني

أولا حمدلله علي سلامة المنتدي

المفروض اني كنت اعمل الموضوع ده الاول في قسم المقارانات بس فضلت أخد خبرتكم هنا عشان يساعدني في القرار.
من فترة انا متابع أخبار النيوسراتو وعجباني العربية الحقيقية وقريت معظم مواضيع القسم وتجربة القيادة الخاصة بنايل موتورز .
النهاردة نزلت رحت سمير ريان وشفت ال sx الجديدة وكيل بالفتيس ال 6 سرعات و الاوبشن الزيادة (الستيب ترونك في الدركسوين - مرايات ضم - ليدات المريات بقت رفيعة - الجنوط بقت 16 هانكوك - abs -التكييف بكر - مقياس لدرجه الحراره مع الساعه) وبتاع المبيعات أكدلي ان مفيهاش ebd وحاولت اروح التوكيل عشان اجيب البرشور بس ملحقتش الوقت كان أتأخر بس في حاجات هي دى اللي قلقان منها جدا ومحتاج رأيكم فيها :-

1- العفشة ناشفة
انا نازل من لادا 1200 فأكيد ححس انها ناعمة جدا دي مش مشكلة

2- التعليق الخلفي torsion beam الي أكتر حاجة قلقاني والناس بتقول بيخلي العربة بتنطط وناشفة بزيادة

3- الحدفة الشمال اللي شفت الناس بتشتكي منها وموضوع حادثة المهندس غازي حمدلله علي سلامته وتزيق المساعدين والاكس اللي اتكسر وكان ماشي علي 100 (يا جماعة انا بالادا ساعات بجيب ال 110 و ال 120 ) .

4 - البلالين الفظيعة اللي بقت زي الرز في الجنوط ال 16 وال 17

5- كنت قريت مشكلة عن الفتيس انه مبيحرقش النقلة الرابعة علي ار بي م عالي بس مش عارف الفتيس ال 6 سرعات عامل ايه

الخلاصة يا جماعة ان انا شخص عصبي في السواقة وبحب اجري في الفاضي يعني موضوع ال 100 ده اقل واجب و ااخد غرز عادية مش ضيقة ومليش في الشد بس يعني شوارعنا الجميلة غنية بالخيرات وحتة زي حدائق الاهرام اللي انا ساكن فيها تدغدغ احسن عربية فقلقان ومش عايز اعرض حياتي ولامراتي وبنتي برضه للخطر.

في نفس الوقت الاختيارات في الفئة السعرية ال 120 الف محدودة يعني تعتبر السيراتو افضل الموجود بالكماليات اللي نازلة بيها ودول اللي بفاضل بنهم لسه :-

1-الانسر 1600 كاملة ومفيهاش كاست وشكلها تقليدي
2- الالنترا 2010 والشكل الجديد 2011 حتنزل معدية ال 130 الف
3- الياريس 1500
4- هوندا سيتي 1500 اوتوماتك مش كاملة

انا ناوي اشتري اخر يناير اول فبراير ومحتار مش عارف اعمل ايه لان القرار صعب جدا؟؟

وشكرا لمساعدتكم

**NoRmAl** · 18-12-2010 05:55 PM

أهلا بيك يا باشا وأنا هساعدك علشان أنت جاري :))
ولاونى مبحبش حدائق الاهرام دى بس مش مشكله :)
بص يا سيدي...

أولا كويس أنك هتشترى الجديد بالفتيس الحديث ال6 سرعات وخلاص بقى محدش يجيب ال 4 دا مهما كانت الاغرائات
نقاطك بقى...

1. العفشه بالفعل ناشفه ومنقدرش نقول عليها عربيه ناعمه لكن أنا مثلا أعتدت عليها خلاص ومبقتش أحس بيها لا أنا ولا أسرتى
رغم أنهم علقوا عليها أول مجبتها لكن دلوقتى مفيش أى تعليق.

2. بص بقى موضوع التعليق المتصل دا قتل بحثا
خلينى أقولك بس قبل مقولك رأيي أنى أيقنت ان الكلام فى الموضوع دا دلع بالغ..اه والله
المهم..
التعليق المتصل دا مش بدعه فى العربيات وفى الحقيقه مسمعتش عن مشاكل منه غير منها هنا وكلامنا عليه
التعليق المتصل و الملتى لينك كل منهم ليه عيوبه ومميزاته وكفايه أنك تبقى عارف أن معظم العربيات الحديثه دلوقتى بتنزل تورشن بيم مش ملتى لينك بعيدا عن الesp
الملتى لينك تعليق حديث نسبيا معقد فى صيانته ولكن أعتقد أنه أثبت على الطريق
التورشن بيم تعليق قديم نسبيا مشاكله بسيطه إن لم تكن معدومه وصيانته بسيطه ولكن أقل ثباتا من الملتى لينك
فى السيراتو التورشن بيم موجود
يعنى ثبات أقل على كلامى لكن السيراو عندها الى يديها الثبات المفقود دا
وهو الجنط ال17 أو ال16 "ال17 أكتر طبعا" وكمان مساعدين بمشوار قصير وغاز
يبقى أنت كدا جمعت الافضل لكن جنيت نشوفيه العفشه
الخلاصه علشان متوجعش دماغك :)
لو أنت فاهم كويس يعنى أيع تعليق ويعنى أيه تورشن بيم وملتى لينك وفاهم كويس كل حاجه يبقى أنت غنى عن السؤال وأنت أدرى بالاصلح ليك
لكن لو بتسأل السؤال دا بس لأنه أثير ولأنك سمعت ناس بتتكلم فيه لكنك فى الحقيقه مش فاهمه أوى أحب أقلك "نفض" :)))
ومتشغلش بالك :)

3. الموضوع دا طلع أول ما العربيه كانت نازله وظهرت معاه الاشاعات والمقصات والخرافات والاساطير وبعدين أكتشفنا أن الضغوط فى العجل غير متساوى ودا سبب الحدفه ولو ظبطت الضغوط تبقى تمام

4. فعلا البلالين كتير مع الجنط ال17 بالزات ودا ناتج من أنه لو بروفايل وكاوتش مش كويس نسبيا
أنصحك بال16 منه تتفادى البلالين ومنه شيك بردو ويمنحك الثبات الى أنت عايزه "أنا جنطى 16"

5. مش فاهم أقريت الكلام دا فين؟

العربيات الى طرحتها

1. متجبش السيره دى قدامى :)
2.مش من الحكمه أنك تشترى الشيب القديم فى الوقت دا
3.شكراً
4.ممكن بس سعر إعاده بيع ضايع وقطع غيار غاليه جدا بس عربيه محترمه جدا جدا

ربنا يعينك

**sara2001** · 18-12-2010 09:04 PM

اهلاً .... اهلاً
احمد عندنا .....
يامرحبا .... يا مرحبا
نورك غطا على الكهرباء
عارفه انك هتخنقني على الكلمتين دول

يا جماعه أحمد ده أخويا
ودخل بيت النمور برجليه
مش عايزين نسيبه يخرج
غير لما ينضم لقسم النمور

علشان اعرف أستغله كويس في مشاوير التوكيل

**yasso0101** · 19-12-2010 10:40 AM

وتحيه خاصه ليك بسبب انك اخو عضو في اسرة كيا

**ahmedezar** · 19-12-2010 04:58 PM

المشاركة الأصلية كتبت بواسطة normal

أهلا بيك يا باشا وأنا هساعدك علشان أنت جاري :))

متشكر جدا أ/ نورمال لردك وشرف ليا أنك تكون جاري

ولاونى مبحبش حدائق الاهرام دى بس مش مشكله :)

حقيقة معاك حق بقت حي مش مدينة

بص يا سيدي...

أولا كويس أنك هتشترى الجديد بالفتيس الحديث ال6 سرعات وخلاص بقى محدش يجيب ال 4 دا مهما كانت الاغرائات
نقاطك بقى...

1. العفشه بالفعل ناشفه ومنقدرش نقول عليها عربيه ناعمه لكن أنا مثلا أعتدت عليها خلاص ومبقتش أحس بيها لا أنا ولا أسرتى
رغم أنهم علقوا عليها أول مجبتها لكن دلوقتى مفيش أى تعليق.

الحقيقة النقطة دي مش قلقان منها أوي عشان زي ماقولت نازل من لادا فأكيد أي عربية تانية حتى لو 128 هتبقي أنعم 100 مرة من الادا

2. بص بقى موضوع التعليق المتصل دا قتل بحثا
خلينى أقولك بس قبل مقولك رأيي أنى أيقنت ان الكلام فى الموضوع دا دلع بالغ..اه والله
المهم..
التعليق المتصل دا مش بدعه فى العربيات وفى الحقيقه مسمعتش عن مشاكل منه غير منها هنا وكلامنا عليه
التعليق المتصل و الملتى لينك كل منهم ليه عيوبه ومميزاته وكفايه أنك تبقى عارف أن معظم العربيات الحديثه دلوقتى بتنزل تورشن بيم مش ملتى لينك بعيدا عن الesp
الملتى لينك تعليق حديث نسبيا معقد فى صيانته ولكن أعتقد أنه أثبت على الطريق
التورشن بيم تعليق قديم نسبيا مشاكله بسيطه إن لم تكن معدومه وصيانته بسيطه ولكن أقل ثباتا من الملتى لينك
فى السيراتو التورشن بيم موجود
يعنى ثبات أقل على كلامى لكن السيراو عندها الى يديها الثبات المفقود دا
وهو الجنط ال17 أو ال16 "ال17 أكتر طبعا" وكمان مساعدين بمشوار قصير وغاز
يبقى أنت كدا جمعت الافضل لكن جنيت نشوفيه العفشه
الخلاصه علشان متوجعش دماغك :)
لو أنت فاهم كويس يعنى أيع تعليق ويعنى أيه تورشن بيم وملتى لينك وفاهم كويس كل حاجه يبقى أنت غنى عن السؤال وأنت أدرى بالاصلح ليك
لكن لو بتسأل السؤال دا بس لأنه أثير ولأنك سمعت ناس بتتكلم فيه لكنك فى الحقيقه مش فاهمه أوى أحب أقلك "نفض" :)))
ومتشغلش بالك :)

للأسف كتر العلم ما قتل من كتر اللي واحد قراه في المنتدي من حوادث السيراتوا وحادثة المهندس غازي وكذا واحد ده يجيب القلق وخصوصا زي ما انا قولت في الأول أنا مش حنين علي العربية يعني بمشي أهبد بيها خايف المقص اللي بيتكلموا عنه المفرغ ده يتكسر أو المساعد يحصلوا حاجة والعمر مش بعزقة وحتي بنتي ومراتي وكمان الفلوس مش بتيجي بالساهل ده اللي كنت بتكلم فيه
إنما الموديل اللي عاجبني إس إكس جنوط 16 و6 سرعات زي ماكتبت

3. الموضوع دا طلع أول ما العربيه كانت نازله وظهرت معاه الاشاعات والمقصات والخرافات والاساطير وبعدين أكتشفنا أن الضغوط فى العجل غير متساوى ودا سبب الحدفه ولو ظبطت الضغوط تبقى تمام

برضه قريت المواضيع كتير عن الحدفة واديني مستني اشوف الناس تأكد برضه معايا

4. فعلا البلالين كتير مع الجنط ال17 بالزات ودا ناتج من أنه لو بروفايل وكاوتش مش كويس نسبيا
أنصحك بال16 منه تتفادى البلالين ومنه شيك بردو ويمنحك الثبات الى أنت عايزه "أنا جنطى 16"

الجنط اللي نازل 16 هانكوك بس مش عارف ظروفه إيه

5. مش فاهم أقريت الكلام دا فين؟

معلش ممكن اكون غلطت وقريت ده في قسم الإلنترا وفي مشاكل في الجير بوكس الأوتوماتيك

العربيات الى طرحتها

1. متجبش السيره دى قدامى :)

طب ليه مالها بس البومة ماهي أثبتت كفاءة في السوق المصري سنين ولسه شغالة طب بلاش دي رأيك أيه في الانسر الشارك ال 1500

2.مش من الحكمه أنك تشترى الشيب القديم فى الوقت دا

متفق معاك بس ده برضه حيحرق سعر كويس

3.شكراً

شكرا ليه برضه ؟؟؟؟؟ مالها اليارس

4.ممكن بس سعر إعاده بيع ضايع وقطع غيار غاليه جدا بس عربيه محترمه جدا جدا

بفكر فيها وبقول أدوس علي نفسي واجيب الكاملة اللي ب 128 ألف

ربنا يعينك

متشكر مرة تانية علي مرورك وردك ويسعدني أشوفك في الحدائق

**ahmedezar** · 19-12-2010 05:02 PM

المشاركة الأصلية كتبت بواسطة sara2001

اهلاً .... اهلاً
احمد عندنا .....
يامرحبا .... يا مرحبا
نورك غطا على الكهرباء

عارفه انك هتخنقني على الكلمتين دول

أختي العزيزة أهلا بيكي منورة موضوعي

يا جماعه أحمد ده أخويا
ودخل بيت النمور برجليه
مش عايزين نسيبه يخرج
غير لما ينضم لقسم النمور

هو حد يكره بس يعني يكون عن إقتناع أن العربية تمام ومش مقلب

علشان اعرف أستغله كويس في مشاوير التوكيل

أنا تحت أمرك من غير أي تدبيس أو إستغلال

**ahmedezar** · 19-12-2010 05:07 PM

المشاركة الأصلية كتبت بواسطة yasso0101

طبعا بعد كلام نورمال مقدرش اقول حاجه بس ليه اضافة بالنسبة للجنط 17

متشكر لمرورك أ / ياسو

موضوع البلالين مش زي الرز زي مبتقول هيه العمليه نصيب بس هو كتير مش هنكر بس مقابل كده - بيديك ثبات التنين على الارض الحق يتقال في الملفات و على السرعات العاليه مع الجنط 17 ثبات عالي جدا

فكل حاجه ليها ميزتها وليها عيبها

حظي بقي في قراية المواضيع كده عموما أنا بعيد عن الجنط ال 17 العربية اللي أنا شوفتها 16 هانكوك

المشاركة الأصلية كتبت بواسطة yasso0101

وتحيه خاصه ليك بسبب انك اخو عضو في اسرة كيا

متشكر لذوقك وتحية للمنتدى الجميل بناسه المحترمه

**ahmed_911_98** · 19-12-2010 07:28 PM

يعني إيه بلالين
أنا معايا ميجان 2007 و عايز أجيب حاجة نفس المستوى علشان اركبها ماتور الكيا عجبني بس أغلب الإمكانيات مش موجودة زي مثبت السرعة و نور التبلوه إلي بيعلى و يوطة (مفيد جداً ف السفر) و نور العدسة ف الفانوس إلي قدام
أنا مش عجباني الميجان علشان العفشة ما أستحملتنش و تكيفها ضعيف و متورها ضعيف115 حصان 1600 سي سي و الجديدة 105 و الأبتينس إلي محتاجها ف حدود ال-160 و لم أجي أبعها أخسر أكتر من 60% من تمنها

أنا عايز حاجة ف حدود 150 و تكون بتاعت شغل و ف نفس الوقت مريحة

يا ترى تنصحوني بإيه؟مع العلم إن مش عايز أوروبي علشان كل قطع غيار يقسم الوسط
و الياباني أنيل
أنا عجباني كمان مازدا 3 بس ال-highline بتاعها حيعدي ال-160 و فيه الكروز بس شكل ال-cerato koup أحسن

**NoRmAl** · 19-12-2010 07:41 PM

بص يا أحمد من جديد مش عايزك تقلق من موضوع التعليق والمقص والكلام دا
الموضوع كل ما فيه أن العربيه أول منزلت دار حولها جدل واسع
ودا مع عدم الانتشار ساعتها أطلق للمخيله العنان فى أسباب حادثه مهندس غازى مثلا أو بعض الحوادث الاخره الى مشفناش منها غير صور
لكن الان نقدر بدون شك نبرأ المقص من أى عيوب ولا موضوع مفرغ ولا مصمت ولا الكلام دا خالص
طبعا أنا مقدر جدا أنك خايف من الى قريته لكن دى مواضيع قديمه حتى ساعتها العربيه مكنتش أتجربت بصوره تخلينا نحكم عليها
فموضوع التعليق تانى
أنت لو فاهم نظم التعليق يبقى هيبقى ليك رأى ومتمسك بيه ومقدرش أقولك التورشن بيم مفهوش مشكله لأنك ساعتها أنت مقتنع بشىء لأنك فاهم إذن حتى ساعتها مش هتسأل أنت فاهم كويس انت راكب أيه
لكن لو أنت ملكش فى الموضوع أوى بجد مدخلش نفسك فى توهان صدقنى مالوش أى داعى
هل كل مالك للسيراتو ماشى فى الشارع فاهم نظام تعليقه الخلفى أيه!!!!
10% من الناس الى ماشيه فى الشارع دى بس هى الى هتبقى عارفه
والباقين راكبين ومش شاغلين بالهم "بنظام التعليق"
فبلاش تفكر فى الموضوع دا تانى
أخيرا..حادثه غازى تعتبر حاله فرديه بحته...قولى عربيه تانيه سيراتو أتقلبت وعومت وأتكسرت مقصتها على 100 كيلو متر فى الساعه..مش مقياس

متستناش حد تانى يكلمك عن الحدفه :)
انت لو ربنا كاتبلك وأشتريت العربيه
هتلاقى فيها حدفه شمال أو يمين :)
وهتطلع على أول بتاع كاوتش وشوف معاه ضغط الكاوتش بعينك وأبقى هتلاقى قدام 50 و 45 وورا 55 وأرقام غريبه تانيه :)

هانكوك كويس ولو نيكسن يبقى أفضل

البومه...
أنت عارف الشيب دا بينزل من سنه كام؟؟
عربيه شكلها بيقدم من سنين وسعرها بيغلى
توكيلها نازلها بجانب الشيب الجديد ضربت الشيب الجديد راح مغليها علشان الناس تبطل تجبها بردو أشتروها غاليه أعتقادا أنها بتغلها أن تمنها فيها :)
رأيي الشخصى..الى بيشترى بومه فى الوقت الحالى...مضحوك عليه
اليارس عربيه ذات سمعه سيئه الى جانب أنها مبعجره الشكل والابعاد وأضف الى ذلك سعرها المبالغ فيه جدا جدا جدا
السيتى زى مقلتلك عربيه محترمه وكويسه
لو مش هتبيع قريب
ومش هامك سعر قطع الغيار
أركبها لو عجبتك توكل على الله

الموضوع: محتاج رأي وخبرة أصحاب السيراتو

LinkBack

أدوات الموضوع

عرض

-

-

-

-

المواضيع المتشابهه

محتاج ميكانيكى عندة ضمير وخبرة فى عملة

أصحاب ال n 97 محتاج خبراتكم بعد إذنكم

استفسار صغير من أصحاب السيراتو

أصحاب السيراتو .. أرجو الإفادة

الى الإخوة الأفاضل أصحاب السيراتو

الكلمات الدلالية لهذا الموضوع

المفضلات

المفضلات

ضوابط المشاركة