الموضوع: الى اصحاب الجنسيات التانيه...........

المشاركة الأصلية كتبت بواسطة amribrahim

معلش بقى يا مان أنا مش معاك في اللي إنت بتقولو ده .. مش عشان أنا أو ب أو ت خدنا جنسية نحاول أو ننسه حاجة اسمها مصر يا مان لما تسافر كدة و تبقى قاعد في الغربة حتهس يعني إيه مصر على فكرة إنت لو معاك الباسبور الأمريكي الامريكان بردو شايفينك على انك مصري مش أمريكي و عمرك محتهس إن أمريكا ديه بلدك والله لو قعدت فيها طول عمرك بردو الناس هناك هيبسولك على انك مصري اوعى تبيع بلدك علشان باسبور أجنبي اوعى .. اه فيه مميزات لكن مش علشان المميزات ديه أبيع بلدي .. هو أنا ليه قلبت وطني كدة هههههههة

المشاركة الأصلية كتبت بواسطة Mohamed_Ayman

الله ينور عليك ،
كنت عايز أقول كدا بالظبط ، هو ليه كل واحد بيدور على حاجة يتنطط بيها على خلق الله ، والناسش دى بتنسى ان الكبرياء لله واحده والتواضع صفه جميلة يا ريت نتحلى بيها ، مش ننتقد الناس اللى بتتكبر بس فى نفس الوقت يبقى نفسنا نعمل زيهم!!!

يمكن يجى فرج ربنا ويكون المصرى ((محترم)) فى بلده عن أى حد تانى وهو ده الطبيعى ولحد ما يجى اليوم ده ، كل واحد عليه انه يحسن أخلاقه ويحسن تربية أولاده والله هتفرق كتير...

قبل اى حاجة اعتذر عن ردى المتأخر
احب أوضح حاجة مهمه انى مش بكره مصر لأنها مصر - لكن بكره مصر لأن فيها مصريين كتيييييييييييييير
والله انا عارف ان الكلام ده غريب وأول رد هايتقال لى - > انك مصرى يا بية ومتعشى فى الدور
الناس بتدور على الهجرة علشان حاجات كتيييييييييييييير - لكن انا بدور على أو لادى فقط ومستقبلهم وان كان المستقبل بيد الله سبحانه وتعالى وحده
انا نفسى ان أولادى يتربوا صح - يتعلموا صح - ميشربوش من نيلها - ميتعاملوش مع موظفينها - مايشفوش ظباطها ولا مرتشينها ولا تلوثها ولا أكلها ولا شوارعها ولا طرقها ولا سواقينها ولا زبالينها ولا جيرانها
تعرفوا انى عندى خوف هيستيرى من حاجة - لو ابنى واحد ظابط ضربه بالقلم قدامى فى يوم من الايام هاعمل ايه - لو ابنى تعب ودخل المستشفى واخد دواء غلط وكان السبب فى موته أو عجزه هاعمل ايه - لو راح المدرسة وسور المدرسه وقع عليه أو اتوبيس المدرسة داس عليه هاعمل ايه

للأسف انا مريت ببعض التجارب السيئة جدا واللى فعلا خلتنى أقول كفايه كده يا مصر - لكن المشكلة ان مصر عماله تقول لى لأ - لسه مش كفاية لما أطفحك اللى شريبتوه من نيلها انت واللى جابوك يبقى كفايه

انا كان عندى شغل لمدة 7 أيام فى دبى وهيه ديه المره الوحيدة اللى سافرت فيها بره مصر
صدقوا أو لا تصدقوا أول لما وصلت هناك تانى يوم كنت زهقاااااااااااااااان جدا وعايز ارجع مصر
وأنا راجع مصر كنت فرحان جدا يمكن علشان ولادى وحشونى وزوجتى وأمى - مش عارف
والله العظيم أول لما نزلت من الطايرة كانت أول كلمه سمعتها من واحد ماش قدامى فى المطار بيتكلم فى الموبيل - ايوه يا باشا انا هاخلص للباشا كل الورق بتاعه وهايخرج قبل اى حد ولاتفتيش ولا ديوله -> تيييييييييييت أم الوسطه
بعد ما خلصت ورقى لقيت واحده (سامحنى يا رب) متخلفة عقليا وبتهته وبتقول املئ الاستمارة الخاصة بأنفلوانزا الطيور والخنازير - طيب هاتى قلم -> مفيش

وانا خارج كان ماشى جنبى واحد من الواضح انى اجنبى وأن كنت اظن انه انجليزى بالظبط اللى حصل كالتالى موظف المطار قال له welcome وابتسم له - وراح لاغى الابتسامه اللى هيه فى عرف المصريين نوع من قلة الادب والذوق لو أبتسمت فى وش حد وباللفظ قالى باسبورك - وبص فيه - حمدالله على السلامه بدون ما يبص لى - انت جى منين - انا من دبى - هو ااااه ومازال بيبص على الباسبور - وراح مخبط على شنطتى وقالى الشنطة ديه فيها حاجة - قلت له لأ - بمنتهى الجليطة ادانى الباسبور بتاعى وقالى اتفضل اخرج من هنا
حاجه تييييييييييييييييييييييت
أول لما خرجت كانت مأساتى واحد قريبى كان مستنينى - وللأسف عربيته كان فيها مشكلة فجالى بعربيتى وهو سواقته فى المانيوال تعبانه شوية فخلانى انا اللى اسوق بحكم انى متعود على العربية
........أحب أأكد انى قاعدت فى دبى 7 أيام فقط وليس 7 سنين
أقسم بالله انى كنت هاعمل حوادث الدنيا والاخره وانا ماشى - كل واحد عايش فى مية البطيخ وبيعمل اللى هو عايزة - اشارات المرور مش شغاله واللى شغال منها الناس مش بتحترمه - الغريبة انى كانت اشارتى خضراء وانا فى وسط البلد وبعدى وواحد بيعدى من يمينى بيقطع الشارع واشارته حمرا والبية بيزعق لى ويقولى مش تفتح يا حمار - ففعلا انا حمار يا مصر بس انا اتولدت بنى أدم وانتى والمصريين اللى حولتينى الى ......... مصرى

المشاركة الأصلية كتبت بواسطة Piowood

على فكره انت كلامك صح استراليا فعلا بيقولوا ممتازه . انا اخويا عايش في الامارات وقالي من هناك الهجره سهله لأستراليا

الامارات على الاخص حاجة قمة الاحترام وأخوك لو ينفع يخدك هناك الدنيا هاتختلف تماما
أم استراليا فهى ديه ان شاء الله نهاية المطاف بالنسبة ليه بإذن الله
اللى عايز يهاجر يا جماعة لازم يقرأ بشكل هيستيرى ويجمع معلومات ويشوف هو عايز ايه - بلاش كلمة عايز اهاجر وخلاااااااااااص
لازم تعرف كذا حاجة -> تعرف انت هاتشتغل ايه وهاتعيش فين وايه الخطوات المستقبلية اللى هاتعملها
لازم يكون معاك سيوله محترمه وتكون واخد بعين الاعتبار ان فلوسك ديه كلها ممكن تضيع هباءا
اعتذر عن الكلمة اللى هاقولها وان كان اغلبنا عارفنها - المصرى بره ملوش قيمه نهائياااااااااااااااااااا وبالعكس اصبح شخص غير مرغوب فيه فى أى مكانه مرموقة - وأنا فى دبى جت لى وظيفة ممتازة ومناسبة ليه جدا - لكن كان بيشترطوا انى أكون من دول الخليج مش هما دول اللى كنتم بتقولوا عليهم بهايم
انا معنديش خبره فى موضوع الهجرة لكن حاولت وفشلت محاولات بسيطه كلها كانت لأمريكا - لكن استراليا هيه حلمى فى أخر 8 سنوات وربنا يكرمنى وأوصل فى يوم من الايام لحلمى