واضح انهم غيروا ليك الزيت اللى اخذته معاك ولم يستخدموا زيت من عندهم تمام؟
انا شايف يا استاذ مصطفى انك سريع الغضب ولما بتلاقى الامور موش زى مانت عايز بتزهق بسرعة معلش سامحنى فى التعليق ده ومتزعلش منى
انا لو مكانك وخاصة انى جاى من مسافة كبيرة وواخد يوم اجازة من الشغل يبقى لازم ما ارجعش الا بالشئ اللى انا عايزه حتى ولو جلست 10 ساعات
كان لازم تطلب مقابلة مدير المركز الامهندس حسن صفوت وتشتكى له واظن انه كان هيساعدك ان شاء الله
عندك ارقام تليفونات الانسة داليا متعلقة على اول باب وان داخل على اليمين كنت اتصلت بيها فورا وحكيت لها اللى حصل وهى ممكن تبلغ صاحب الشركة فورا ولو موجود وقت ما كنت هناك اكيد كانت هترتبك لك مقابلته
السلوك العام للناس فى المركز انا عارف انه موش مريح وانا علقت على الكلام ده فى مشاركتى بخصوص صيانة الالف واظن انه ده ثقافة طاغية على الناس فى القاهرة بشكل عام فى كل مكان تروحه موش فى التوكيل بس والموضوع ده انا انتبهت له الحقيقة لما نزلت اسكندرية يوم فى اجازتى قبل عودتى للسعودية لزيارتى ناس اقاربى هناك بصراحة لقيت اهل اسكندرية ناس محترمين جدا فى التعامل واسلوب الكلام ومساعدتهم للغريب لانى كان العنوان صعب على شوية وانا مااعرفش حاجة فى اسكندرية خالص وده فكرنى بالقاهرة من 15 سنة فاتوا
انا عندى اقتراح انك احسن خد موعد فى مركز اسكندرية للصيانة ومعلش اعتبره يوم فسحة وتوكل على الله وظبط سيارتك هناك وموش هترجع الا مرضى ان شاء الله
لك منى ارق تحياتى