الموضوع: حصريا على نايل موتورز صور تويوتا كرولا الجديدة 2011

المشاركة الأصلية كتبت بواسطة som3aa

نقلا عن http://www.nilemotors.net/Nile/67541-a.html مع التعديل زى الbluetooth

مواصفات الاوكتافيا اول فئة أوتوماتيك تمنها فى الوكيل 170 بس بتتباع عند الموزعين ب 167 و يمكن اقل (الكورولا مبينزلوش فيها ) فرق قبل الخصم 8000 جنيه و بعده 5000 جنيه

1- \ تتكون من سنتر لوك مع مفتاح فولد يمكن فتح الشنطة و تنك البنزين من خلاله , الزجاج الكهربائي بالكامل مع التحكم به من الريموت الكنترول , ضبط و تسخين و طي كهربائي لمرايات الابواب مع خاصية التعتيم , مثبت سرعة؟ , تجهيزات تلفون , اربع سماعات اضافية , تكييف كليماتك مع تشغيل الكتروني و توزيع الهواء للمقاعد الخلفية , راديو سي دي , كمبيوتر متعدد الوظائف و باور ستيرنج وردج كونسل مجز لتبريد المشروبات , شاشة بيانات الكتروني بالعدادات , ضبط مستوى عجلة القيادة باربع مستويات , ثلاجة بالتابلوه , ضبط ارتفاع مسند الكراسي الامامية , مؤشر عند فتح الباب بالاضافة الى مساحات امامية و خلفية مرنة , رف خلفي مقسم لسهولة و ضع الحقائب , خاصية طي المقاعد ووضع الاكواب بالكونسل , نظم ال ABS, MBA,MSR,ASR , و مؤشر لضغط الاطارات فوانيس شبورة امامية و خلفية بالاضافة الى فانوس خلفي ثالث , 2 ايرباج , غلق مصدر الوقود عند التصادم , امبولايزر , تصفيح اسفل المحرك و تعتيم اتوماتيك للمرايا للاضاءة القادمة من الخلف , فوانيس امامية غير قابلة للكسر
+ bluetooth


قارن المواصفات دى بمواصفات الكورولا ال1600 هتلاقى الكورولا زيادة فتحة سقف و جنوط و اقل حاجات كتير اوى غير فرق الجودة فى الخامات و التصنيع (كفاية ان العربية المانى (فولكس قاجن) و الشكل طبعا و كل حاجة .

متقارنش الفانتازيا اللى ب 209 علشان دى فيها زيادة شاشة touch بالgps و فيها زينون و فيها فرش جلد طبيعى و فتحة سقف و 6 airbags و حساسات ركن و تدفئة المقاعد دا اللى انا فاكره

[COLOR="Blue"][SIZE="4"]
+111111111111 , الله عليك يا سمعة ,,,,, بصراحة اللي يسيب الفانتازيا بكل ده !!!!!! يبقى فعلا يستحق الشفقة !!!!

بجد بقت وحشة اوي

المشاركة الأصلية كتبت بواسطة m.osman

مع مراعاة "كمان" ان المازدا اللي في الفيديو الشكل القديم :)

youtube - civic v corolla v mazda 3 consumer comparison by edmunds.com

الله ينور , هو اللي في الفيديو ده اللي انا عايز اقوله بالظبط , يا رب الناس تكون فهمت ان الموضوع مش كره للتويوتا لكنه واقع الناس بتعترف بيه في حتت غير مصرنا العظيمة ,,, ان الكرولا مابقتش منافس قوي للاخوات اليابانيات زي المازدا و الهوندا و السوبارو اللي هم ارخص منها :) ......ليه ادفع اكتر في حاجة اقل ! سؤال ح يجاوبني عليه

الاخوة الكرام ...

أسعد الله صباحكم بكل الخير ...

تحية من القلب لأخي الكريم وائل بك و صديقه العزيز و أخي أيضا خالد بك طلعت علي ماقاما به من جهد مشكور و ما قدماه من خدمات أفادت العديد من الاعضاء هنا

أكثر الله من أمثالكما المخلصين

و شكر كبير جدا لأعضاء "تويوتا" المحترمين الذين ساهموا في حراك الماء الراكد

أما بعد ...

كنت قد أليت علي نفسي من فترة ألا أشارك في موضوعات بالمنتدي أو حتي أدخل المنتدي و ذلك لأسباب عديدة أهمها أنشغالي الفترة الاخيرة و لكن ...

نظرا لما لمسته من أستخفاف و تجريح في سيارة تنتمي لماركة شهيرة و عريقة و أحبها الكثيرون في مصر و العالم فقد قررت أن أرد و أن أوضح لمن لايفهمون

أولا .. شاءت الظروف و الاقدار أن أفقد سيارتي المحببة الي نفسي (الياريس) لفترة بسبب أنتهاء رخصتها و عدم مقدرتي علي تجديد الرخصة بسبب أنشغالي الشديد الامر الذي أضطرني لطلب من الشركة المالكة لها أن تتولي هي أجراءات التجديد و قد كان و جاؤا لي بسيارة بديلة و كانت الكورولا الجنوب أفريقي موديل 2008

ثانيا.. هذه السيارة معي منذ حوالي شهر لم أر منها أي شئ يسئ لها سوي بعض العيوب الفنية في نظام نقل الحركة الاوتوماتيكية و التي أدركت مع الوقت كيفية التعامل معها و أصبحت أجيد أستخدامها بشكل كامل

ثالثا.. لن اتحدث هنا عن مواصفات السيارة و أمكانياتها و عيوبها فهذا ليس مجاله و لكن لنا موضوع أخر سوف أتناول فيه كل شئ عن السيارة التي هي محل دراستي حاليا بشكل أكثر تفصيلا

رابعا .. فيما يتعلق بردود بعض الاخوة و تهكمهم علي الكورولا , أحب أن أرد عليهم كالتالي :

(1)..

تعالى للكورولا اللى ب 163 فيها تكييف بكر!!!!!!!!!!!!! شكلها وحش جدا , فيها فتحة السقف زيها زى السيراتو , موتورها و فتيسها اقل من السيراتو!!!!

سيراتو أيه اللي بتتكلموا عليها , أيش جاب لجاب
السيراتو دي لو بقت ببلاش مش هأركبها حتي و هيا فعلا أتعرضت عليا ببلاش و فضلت الياريس ال 1500 عليها


(2)..

لاول مرة فى التاريخ مبيعات هيونداى و كيا (شركة واحدة) تتعدى مبيعات تويوتا و لكسس فى أوروبا

ده علي أعتبار أن مافيش حد فينا راح أوروبا و شاف العربيات هناك أيه
أولا انا كنت هناك و لفيت كذا دولة و ماشوفتش لا الهيونداي و لا الكيا هناك أصلا اللهم غير عربيتين ماتريكس و كيا برايد القديمة و دايو الشكل القديم غير كده ماشوفتش كوري خالص و لا صيني
بل علي العكس تويوتا هناك هي المكتسحة في العربيات الصغيرة زي الياريس و الايكو و البريوس اللي أصبحت منتشرة في الشوارع كتاكسي

بلاش نكرر أي كلام و خلاص و كلام هجص و هبل في الجبل الكوري ده لم ينتشر ألا عندنا نحن و لم يصبح له قيمة ألا بفضل البلاد الضايعة اللي زيينا اللي بيتضحك عليها بأي حاجة شكلها حلو و خلاص لكن مضمونها أيه .... شوف وا بعد 5 أو حتي 10 سنين و أنتوا تعرفوا


(3)..

طبعا ده غير الاداء الضايع و ارخص نوع عفشة و سبحان الله اغلى من المازدا و الهوندا

مين دي اللي أدائها ضايع ؟؟
و هل السيراتو مش ضايعة ؟
و هل الالنترا أو الفيرنا مش ضايعة ؟

أن الاوان أن بالونة السيراتو و الالنترا المنفوخة هوا دي تفرقع و الحمد لله قدرت أثبت هذا الكلام كالتالي :

الحمد لله ... لسه بس أمبارح مش بعيد و أنا في طريق السويس معلم بالكورولا ال mmt اللي ضايعة و مابتسحبش و فيها كل العبر علي سيراتو مش بس كده ...
و أنا راجع باليل علي طريق السخنة القطامية معلم علي ألنترا و تيريوس بالعربية التعبانة اللي معايا

أنا طبعا مش من هواة الشد و لكن أنا كان كل هدفي هو أختبار العربية و معرفة قدراتها و حقيقة مايقال عنها و الحمد لله نتائجها علي مدار الشهر في طرق مختلفة جاء مرضي لي جدا

عايز كمان أكد علي أن العربية دي هيا اللي رجعت بيها من الاسكندرية في الشبورة الحادة اللي كنت تحدثت عنها من قبل

من الاخر و بأختصار ... الكورولا عربية فوق الممتازة و مسألة الشكل دي أذواق لكن المهم عوامل الامان و السلامة اللي أحنا هنا في مصر مانعرفش عنهم أي حاجة و عربية تستاهل كل قرش يندفع فيها و اللي راكبينها بس هما اللي يعرفوا الكلام ده لكن اللي مايعرفش يقول سيراتو و ألنترا و فيرنا و أي كلام

طبعا كلامي مش هايعجب ناس كتير و أكيد هأتعرض لنقد و هجوم منهم لكن مش مهم لأني بأقول رأيي بصراحة و مش ناوي أشارك في الموضوع ده تاني علشان أرد علي أي هجوم أو أستفزاز

مع خالص تحياتي
م/ سمير الشهاوي

انا ساعات بحس ان البعض بيعارض من مبدأ المعارضة
يا جماعه سواء انت معجب او غير معجب بالكورولا
فأنا اظن ان فيه تحامل عليها بزياده

انا لو معايا فلوسها مش هشتريها
ولكن ده لا يمنع ان هيا لها سوقها وسمعتها وادائها
ولكن مش لازم تكون مرادي انا الشخصي
فمش معنى انها مش مرادي انا الشخصي ان اتحامل بزياده عليها
العربيه مش شكل تابلوه ولا اوبشن ولا فوانيس وبتاع
العربيات حاجات كتير منها اللي انا ذكرته وحاجات تانيه اخرى
كالسمعة كالعمر الأفتراضي كسعر اعادة البيع كصيانة كتوكيل واسمه
الكورولا الكاسيت بتاعها شكله مش اد كده ماشي
وشكل الكاسيت في الفلوانس جامد جدا
ولكن انا هشتري العربيه علشان كده
ماهو الكاسيت ابو شكل جامد ده لو العربيه عطلت مني هولع في ام الكاسيت ولا هيفدني بشئ

يعني الأمور لا تأخذ بهذا الشكل كده
لازم يكون في احترام لأذواق واراء الغير
لأن انت شايف ان العربيه بالنسبة لك شكل او اوبشن او اوا او او .....
غيرك بينظر لحاجات تانيه
وانا اثق كثيرا في ان اغلب اللي اتكلم بالسالب في العربيه واختار عربيات اخرى غيرها
انه ساعة الشراء الفعلي الواقعي وياريت نركز في الفعلي الواقعي دي
فيفكر مليون مره في العربيات اللي ذكرها كبديل للكورولا
اللي ايده في الميه مش زي اللي ايده في النار
والله وقت الشراء حاجات كتير هتقف امامك اقلها اعادة البيع واسعار قطع الغيار ولكن مرتبطة بالعمر الأفتراضي ايضا واعتمادية العربيه ومشاكلها
لازم نحترم ان فيه ناس عاوزه عربيه متخسرشي ادائها عالي رفاهيتها كويسه ماتور كويس اسم كويس اعادة بيع كويسه عمر افتراضي كويس

انا عاوز بس الناس لو حبت تقييم الكورولا من كل الجوانب فالنتخيل كل جانب هتاخد فيه ايه من دول (( ممتازة , جيدة جدا , جيده , مقبولة , سيئة ))

وقيم كل البدائل في كل الجوانب مثلها
وشوف انهي واحده هتبقى معتدلة في كل الجوانب
مش هقول ممتازة ولكن مقبولة يعني بتعطيك اغلب الجوانب مرضيه
ممكن عربيات تانيه تعطيك في شئ ممتاز وفي جوانب اخرى سيئة
وفي عربيات معتدلة زي الكورولا يعني مش هتعطيك الممتاز في كل الجوانب ولكن اقلها هتلاقي اغلب الجواني جيده او اكثر
هيا دي المعادلة اللي الكثير مش قادر يفهما او بيحاول يتجاهلها

وبرضه ده لا يقلل من البدائل او ان الكورولا هيا التوب وخلاص
ولكن انا عاوز بس الناس تفهم ان كل واحد بيشتري عربيه جديده بيبقى له اولويات مختلفة عن الآخر
ولكن الكورولا بتلبي اغلب الاولويات الرئيسية لغالب مشتري السيارات فعلا يعني بتلبي مرادك بطريقة جيده في كل الجوانب التي تقيس عليها وتختار فده اللي مخلي الكورولا كورولا وده اللي مخليها اعلى السيارات مبيعا في العالم انها عربيه وسط ولا هيا سوبر رياضية ولا هيا رفاهية عاليه ولا هيا شكل ومظهر مفيش زيه ولا هيا ولا هيا ...... ياريت تكون وجهة نظري وصلت
وتقبلو تحياتي