الموضوع: الكورى ... هل فعلا مظلوم ... مناقشة موضوعية من واقع تجربة

المشاركة الأصلية كتبت بواسطة se_coralsea

متفق معاك و فعلا عربيتي العزيزة السابقة (اللانوس) كنت بأغير لها تيل فرامل كل 20000 كم و بالاضافة لطقم فلاتر كامل (بنزين - هوا - زيت) و لو اتأخرت عن كده ممكن السحب يقل و أبدا بقي في دوامات مالهاش اخر

لكن تعالي بقي للياباني :
- الياريس : داخلة علي 60000 كم و الحمد لله تيل الفرامل زي ماهو و فلتر البنزين برضه زي ماهو
- الكورولا : برضه 59000 كم و التيل لم يتم تغييره و شكل الفلاتر كلها أصلي ماحدش جه جنبها و مع ذلك العربية جابت ال 180 كم/ساعة علي طريق الاسكندرية ببساطة و بأقول عليها مكتومة

أكيد طبعا فرق السعر مش من فراغ و لكن .... مش شايف برضه أن هما مزودينها شويتين في حكاية السعر دي سواء للكوروي أو الياباني أو الاوروبي ؟؟

اكيد طبعا اليابانى مستهبل فى السعر والكورى بيستهبل اكتر يعنى

العربية بتبقى خارجة من المصنع فول اوبشن بسعر كذا , العربية دية هتنزل مصر يروح الوكيل شايل منها كل حاجة وعاملها فئات ( فاضية - هاف اوبشن - فول اوبشن - هاى لاين ) وكل واحدة يزود عليها عشرة الاف جنية لحد مايوصلها للسعر اللى هو عايزة وتبقى العربية اصلا واقفة بأقل من السعر اللى بيبيعها بكتير ومش بيكفية كدة وبس لأ دة الحاجة اللى ب100 يبيعها ب500 وعارف انك هتشترى والحاجة السليمة ييغيرهالك بردة مانت مش شايف حاجة

لكن بقى فية حاجة لو هنتكلم عن الكورى بينزلك عربية فاضية مافيهاش غير ( تكييف- كاسيت - زجاج كهرباء -باور) وب95 الف جنية هل يعقل انى ادفع المبلغ دة فى عربية فاضية تفتقر الى عوامل( الامان والثبات والخامات كلها بلاستيك )

صح مش دة اللى بيحصل

لكن اليابانى بيغلى عليك لكن بيديك عرييات فيها abs-ebd-2 airbag-كمبيوتر معلومات +ثبات عالى +خامات

عيوبة بقى بتبقى العربية منخفضة عن الارض + قطع غيار غالية + مواتيرة ممكن ماتبقاش فى قوة الكورى ( مش عيب ماتور لأ عشان( وزن العربية مناسب لوزن السيارة )

وبردة بالنسبة للرد على ان الكورى بيطور ومبيعاتة بتتزيد ( من وجهة نظرى ان دلوقتى العالم داخل على مشاكل اقتصادية كتير وفى نفس الوقت عايز يركب عربيات تريحة من الزحمة والقرف البديل اللى قدامة عن اسعار اليابانى المبالغ فيها مافيش قدامة غير الكورى +قطع غيارة الرخيصة وتناسب اى واحد تخلية يعرف انة مهما حصل فى العربية فى الاخر مبلغ بسيط جدا هيرجعها تانى ( دة محليا )

عالميا بقى : محش يقارن العربيات هنا بهناك الكورى هناك فول اوبشن وخامات وحتى الفرق وصل للتقفيل فى الصاج نفسة واللحمات بتاعة الشاسية وهية دية الحاجات اللى بيتم اختبارها وبياخدوا نتائج منها

لكن والله لو عربية من عندنا تم اختبارها لتاخد نص التقييم اللى حصلت برة يعنى لو خدت 8 من 10 هتاخد هنا 4 من 10

للاسف الشرق الاوسط كلة لية خط انتاج غير خط انتاج السوق الامريكى والاوروبى

محدش سأل نفسة لية ملحق اخبار السيارات بيقعد يختبر سيارات محدش اصلا يعرف ماركاتها ويجيبهالك بالتفصيل كأنك نازل تشتريها بكرة ومعاك 3 , 4 مليون جنية ومش عارف توديهم فين

والخ...... ويطلعلك النتائج ومين كسب والعيوب بالتفصيل كأننا هنشترى تانى يوم

لكن عمرك شوفت مقارنة بين هيونداى النترا - شيفرولية اوبترا او كروز او سيراتو ويقولك مين احسن ومين اثبت واية عيوبهم

لكن الكلام كلة سيارة كاملة المواصفات وحش على الطريق - ابعادها مثالية جدا وتحس بالراحة التامة - جودة خامات وتقفيل من اجود الانواع , وتيجى تركب تلاقى كل دة فى الارض وطبعا كلنا عارفين الكلام دة بيتقال لية

معلش انا يمكن خرجت عن الموضوع شوية بس متعلق بية من طريق غير مباشر وهو الاعلان لمصلحة الوكيل اولا مش للزبون انة يختار صح وفى الاخر تلاقى حوادث كتير ( كاوتش ضرب - عربية عامت - فرامل سابت - الدركسيون علق - العربية بطلت وهية ماشية مرة واحدة - العربية فراملها ضعيفة الخ..........