الموضوع: بعد خطاب الرئيس مبارك

يا جماعة لازم فعلا نصبر شوية , كسبنا كتير , وخسرنا قليل , لكن لو استمرت الفوضى كل المكاسب هتضيع وهتبقى حرب أهلية

... بما ان الرئيس مبارك ( وانا ضده ) عين له نائبا يبقى كده خلاص هى دى النهاية فعلا ... ومينفعش بأى حال من الأحوال انه يترك الرئاسة ألآن لأن لو ده حصل الفوضى هتعم .. أعدائنا الخارجيين اشد خطرا من الأعداء الداخليين هناك من يصطاد فى الماء العكر وما أكثرهم .. لازم كل واحد فينا من دلوقتى يفكر ويبحث عن مين يستحق انك تصوت له فى الانتخابات الرئاسية القادمة هو ده الاولى ألآن ..

كلمة أخيرة ... كل العالم دلوقتى عرف مين هو شعب مصر والراجل فيهم يورينا نفسه .. مش معنا ان صبرنا 30 سنة ان منقدرش لأ نقدر نقف قدام اى حد لأن ربنا معانا
(( اللهم قيد لهذه الأمة أمر رشد يعز فيه أهل طاععتك وتهدى به أهل معصيتك ))

يا جماعة احذروا الأفاقين وأصحاب المصالح الشخصية
احذروا اللي بيركبوا الموجة وبيسكبوا الزيت على النار

الشعب كسر حاجز الخوف ويقدر ينزل تاني لو ماحصلش تغيير

مبارك اتكسر خلاص وقال مش هيمسك

دستور وهيتغير

مجلس شعب وهيتحل

شرطة واتكسرت خلاص ، وأصبح الشعار دلوقتي "الشرطة في خدمة الشعب"

وزارة واتغيرت وجه ناس محترمة

أحمد عز واتشال

عايزين ايه تاني؟؟؟ أنا نفسي أفهم المتظاهرين دلوقتي عايزين ايه تاني؟؟؟

محدش هناك عارف هو عايز ايه

بقية الطلبات التانية هتيجي واحدة واحدة

مش عايزين نبقى زي تونس مش عارفة راسها من رجلها دلوقتي

ولا عايزين نبقى زي العراق ، تبقى حرب أهلية وما نلاقيش ناكل ولا نشرب

البضائع بتخلص في السوبر ماركتات والبنزين بتشتري 4 لتر أو 5 لتر ده لو لقيت البنزينة فاتحة

مصالحنا متعطلة

قاعدين تحت البيت بال 10 ساعات ماسكين أسلحة عمرنا ما مسكناها في حياتنا

المشاركة الأصلية كتبت بواسطة mohamed_hegazy

للاسف اذا توقف الزخم لن يعود وهذا النظام لن يتغير وسوف يستمر الافاقين فى السيطرة على مقدرات الناس وتصنييفهم على هواهم

و الله لو الناس بتفكر زيك مكانش صوتي راح!!

هما مش فاكرين ان العملية مبارك! المتظاهرين بيقولوا بوضوح: الشعب يريد اسقاط النظام ! لانه نظام فاسد لا يقبل العقلاء ولا الحكماء و لا الشرفاء ولا النزهاء! يقبل ذوي الثقة و يعليهم فوق ذي الخبرة! واحد مطبلاتي و لكنه حرامي و خسيس ممكن يبقى رئيس شخص نزيه و مخلص و لكنه مش مطبلاتي!
هي دي الصورة اللي نشأنا عليها من صغرنا و ناس كتير اضطروا انهم يطبلوا و يزمروا غصب عنهم علشان يكون ليهم عيشه وسط القذارة اللي ملت البلد!!!
النظام اصبح زي السرطان و تمسك مبارك بالحكم ليس لاي هدف اللا لتمهيد الحكم لذي ثقة بعده يتستر على الجرائم التي ارتكبت في عهده! و عمر ما كان مبارك حيوافق على الغاء مجلس الشعب لانهم كلهم ماسكين لبعض ذلل!!! و الفضايح ممكن تنتشر!!
في حد يتخيل ان وزير الاعلام يفضل في منصبه؟
مش هوا ده خلال اول 3 ايام من المظاهرات الشعبية كان بيذيع اخبار المظاهرات ....... في لبنان و اليمن!!!
مش هوا ده صاحب قرار قطع الانترنت و المحمول و الرسائل النصية؟؟؟؟
مش هوا ده اول من اذاع الفوضى مساء الجمعة عن طريق مداخلات نسائية تصوت في التليفون و تقول الحقونا و ضرب نار ! لتفريق المتظاهرين!!
هو ده اللي موداش كاميرا واحده صوب ميدان التحرير خلال 8 ايام!!! و لما شوية شمامين و عربجية عددهم لا يزيد عن 200 واحد لموهم من الشوارع امام ماسبيرو الكاميرا قعدت تصور فيهم 3 ساعات و تعمل زوم ان و اوت و تصورهم من كل الزوايا!!! و تلمح في الخلفية رجال بملابس رسمية يحاولون تنظيمهم و لكن ظلت الفوضى سيمتهم!!!
ده وزير ينفع يظل وزير الاعلام؟ ده اكبر دليل على حرية الصحافة و الديموقراطية التي ستشهدها مصر خلال ال 8 شهور القادمة و ما تليها!
وزير الخارجية!!! حد يصدق انه يظل في منصبه! دا حتى اعضاء الحزب الوطني كانوا بيشتكوا منه انه حاطط وش مصر في الطين خارجيا! مصريين يقتلوا في الخارج, و انا مالي!
مصريين تنتهك حقوقهم, مليش دعوة, مصريين يسجنوا بغير وجه حق, محدش قالهم يسافروا و من خرج من داره قل مقداره!!!
هو دا وزير كان ينفع يبقى موظف في سفارة حتى؟ فين كرامة المصري بالخارج؟!؟! فين شرف مصر و عزتها!
طبعا عارفين وزيرة القوى العاملة و دي بالذات كان لازم تفضل لحصولها على اعلى الشهادات العلمية "الابتدائية"
و ربنا يخليلها سوزان تبوسلها ايديها كمان و كمان! جايز تبقى رئيسة وزرا
يا جماعة الكلام كتير! بس انتوا تعبتوا و عايزين ترتاحوا , بس بلاش تهاجموا اللي لسه فيهم نفس يقولوا لأ للظلم!
عيب
حرام
مش احنا!
لو صعبان عليك مبارك لازم يصعب عليك 300 واحد اتقتلوا في يوم واحد بقناصة مبارك! ليهم اولاد و اطفال و اهل و اسر
احنا مش بنقول نعدمه او نقتله لا سمح الله! احنا بنقوله كفاية, ارحل , حرام, عيب! خليك في مصر بس تنازل لشخص يختاره الشعب الحر و ليس الشعب المسير! ليس موظفي مصانع الدولة و قطاعاتها الذين يساقوا كالانعام ليختاروا من تم اختياره بالفعل!
انت صعبان عليك مبارك و مش صعبان عليك الفشل اللي البلد فيه! احنا ليه محصلناش الهند و دول اسيا! ليه حتى محصلناش قطر و الامارات! لان 30 سنه البلد كانت في تلاجه! في شباك عنكبوت مكتفها و بيمتص دمائها ببطىء
بينما باقي الدول بتحلق و بترفرف بجناحين احدهما الحرية و الاخر الديموقراطية! انا صعبان عليا 30 سنه من عمري قضيتهم في رعب و ظلم و خوف!
اللي بيقول حرام : فكر قبل ما تقول!
اللي بيقول ندي فرصه! هوا كده كده حياخد فرصه غصب عننا لان الجيش وراه! بس ابقى قابلني و انتوا بتعيطوا بدل الدموع دم! و حتى حيمنعوكوا انكم تعيطوا

عندك حق والله .. كفاية خراب لحد كده

المشاركة الأصلية كتبت بواسطة aly_hosny

+1
نصبر ونشوف
وال 80 مليون مستنين هيعمل ايه
لو معملش نروح نجيب حقنا تاني


لا طبعا
دا ال النظام كان عايزه من يوم الجمعة ال فاتت
بس لا طبعا
انا اعدي بمزاجي

للاسف الثورات لاتتكرر كثيرا والفرص لاتتكر فى الوقت اللحنا عايزينه