الموضوع: مــا هــو الحـل فى ظهــور بقع بيضاء على السقف و الكبوت والشنطة - نيســان صنى 2008

يا جماعة هو أ. سبعاوي المتحدث الرسمي بأسم نيسان؟ الراجل معاه عربية صني و فرحان بيها و عجباه و بيشكر فيها زي كل الناس اللي معاها صني و أنا أولهم. زي ما قولت قبل كدة دي حالة فردية و مش ظاهرة في الصني عشان نقعد نشتم في المصنع و نقول و نعيد في التقفيل المصري. مفيش اي مصنع في العالم مش وارد انه يخرج منتج فيه عيب, طالما ده مش منتشر يبقى عادي, امال الضمان لزمته ايه؟ .

اللي مش عادي بقى انه يكون فيه تعنت في الاصلاح. بس على فكرة المشكلة الاساسية ان الضمان مش معناه لو فيه عيب السلعة تتغير, الضمان بيضمن اصلاح السلعة مجانا في حالة و جود عيب او عطل و الاستبدال فقط في حالة تعذر الاصلاح. في حالة الاستاذ يوسف المشكل اساسا انهم مقتنعين ان هو اللي معقد الامور و مارضيش بالحل الامثل (من وجهة نظرهم) من الاول الا و هو اعادة دهان السيارة بالكامل, عشان كدة هما مش شايفين انه معاه حق يعترض ان الحلول البديلة ما جابتش نتيجة.

اعتقد ان حضرتك قدامك سكة من اثنين: يا اما ترضى انك تعيد دهان السيارة و تاخد منهم ورق مختوم ان ده تم لعيب تصنيع, انا اعتقد انه اصلا دهان المصنع صعب حد يكتشف انها مرشوشة, يا اما بقى تقدم بلاغ في النيابة و ترفع قضية و تعمل شوشرة و ده ممكن يقلقهم و يوافقوا يغيروا العربية.

المشاركة الأصلية كتبت بواسطة hh

يا جماعة هو أ. سبعاوي المتحدث الرسمي بأسم نيسان؟ الراجل معاه عربية صني و فرحان بيها و عجباه و بيشكر فيها زي كل الناس اللي معاها صني و أنا أولهم. زي ما قولت قبل كدة دي حالة فردية و مش ظاهرة في الصني عشان نقعد نشتم في المصنع و نقول و نعيد في التقفيل المصري. مفيش اي مصنع في العالم مش وارد انه يخرج منتج فيه عيب, طالما ده مش منتشر يبقى عادي, امال الضمان لزمته ايه؟ .

مع احترامى لرأي سيادتك فهناك فارق بين عيوب تصنيع يمكن ان تحدث فى مصانع عالمية كبرى
و هو شئ نادر و استثنائى جدا و غالبا لسبب غير منظور .. و عيوب تصنيع متكررة اما لاستخدام
خامات رديئة معيوبة او للاهمال سواء لعدم الكفاءة او الاهمال فى الانتاج و مراجعة الانتاج ..

ثانيا انت تفسر صمت المهندس سبعاوى على انه راضى و مبسوط و متكيف من عربيته الصنى ؟!
يمكن الراجل ما بيحبش يشتكى او انه حظه كويس وقع فى عربية متقفلة كويس لكن هناك ناس
غيره بتشتكى و حالة استاذ يوسف عن علم ليست استثنائية .. كما ان سوء التقفيل فى مصر
صفة عامة فى منتجات كثيرة سواء سيارات او غيرها .. انا مصرى النيل روانى و الخير جوانى (!)
و كنت اتمنى غير كده !! :)

يا اخي الفاضل أ. سبعاوي بنفسه قال قبل كدة مرارا و تكرارا انه مبسوط من العربية و راجع مشاركاته بنفسك يعني انا مش بفترض. و انا برضه كأحد ملاك الصني الحمد لله مبسوطة منها جدا. مش معنى كدة ان استاذ يوسف يسكت على العيب الموجود في عربيته, لا طبعا. ده انا قولتله يعمل بلاغ في النيابة, يعني مش بدافع عن الشركة, انا يهمني الاستاذ يوسف كأخ في المنتدى ياخد حقه.
و بعدين صحيح ان عيوب التصنيع شئ نادر في المصانع العالمية الكبرى لكنه وارد و هو ده اللي انا بقوله. يبقى قبل ما احكم على المصنع بالفشل اشوف ده شئ منتشر و لا نادر زي ما حضرتك بتقول. و انا شايفة ان حالة استاذ يوسف فردية و ماسمعناش انها منتشرة في الصني عشان نحكم بالاهمال و عدم الكفاءة و الكلام ده كله. و بعدين انا شايفة ان حضرتك بتعمم في كلامك على التقفيل المصري و ده مش صح. حضرتك مصر ان العيوب في الصني متكررة, فأرجو من سيادتك ان تذكر لنا ما سمعته من تجارب سيئة لعيوب ظهرت في الصني المصري سمعتها حضرتك من اصحابها حتى يكون من يفكر في الشراء على هدى

عيوب التصنيع تحدث في كل مصانع العالم .... شوفوا الموقع الأمريكي ده http://www.autorecalls.us اللي بيسجل الـrecalls اللي بتحصل للعربيات ..
هتلاقوا recalls بتحصل في جميع العربيات... انا بصيت كده في recalls للمرسيدس الـ S Class (أيوه...مرة تاني.... الـ S Class) و عيوب تتراوح من مشاكل في نور الصالون لحد مشاكل في نظام التعليق.... (برضه مرة تانية S-Class و نظام التعليق).
الناس بره مش معصومين من الخطأ إطلاقاً... انا سافرت حتت كتير و الناس دول يعني مهماش العبقريات اللي متتكررش و إحنا ناس متخلفين أوي كدة... هو بس شوية ضمير و شوية نظام بس برضه الأخطاء بتحصل عادي جداً و إلا مكانوش عملوا أنظمة جودة لإكتشاف الأخطاء دي.

المشكلة مش في العيب نفسه اللي ظهر عند أخونا يوسف و ربنا إن شاء الله يكرمه و الموضوع يخلص بصورة ترضيه و تخليه يستمتع بعربيته بعد المشاكل و الصداع ده و ينسى اللي حصل و لكن المشكلة الحقيقية في تعامل المصنع بإهمال مع الموضوع.
بس مش معنى كدة نقول إن الصني وحشة و إوعوا حد يشتريها لإنها فعلاً عربية ممتازة و مصنع مصر طلع منها المئات و الآلاف و الناس مبسوطة منها على الآخر...

يا جماعة الف شكر والله انا حاسس إن إخواتي واقفين جمبى
يا أستاذ hh :
1 - انا معاك جدا إنها حالة نادرة , انا اعرف أستاذ أيمن كان عندة نفس المشكلة و تعرفت علية بالصدفة من هذا المنتدى الرائع . و اول حاجة ضايقتنى إنهم قالولى ده اول مرة نشوف المشكلة دية مع العلم إن ايمن راح و عمل المعالجة دية قبلى فى المصنع بأسبوعين و الله اعلم إن كان فى تاني ولا لأ . بس برضة دول عاملين لحد دلوقتى 15000 عربية .
2 - انا معاك إن الضمان بيضمن اصلاح السلعة مجانا و في حالة و جود عيب او عطل و الاستبدال فقط في حالة تعذر الاصلاح . بس المشكلة إنهم شايفين إن الوحيد اللى ممكن يقولوا انة يتعذر الإصلاح هم نفسهم. وده مستحيل طبعا علشان حتى الأن شافين إن الإصلاح سهل جدا بس التالتة تابتة .
3 - موضوع إن الحل الأمثل هو الدهان بس يعطونى ورقة بكده . معاك بس إذا كان هما رافضين يدونى ورقة إن العربية دخلت المصنع للإصلاح . فمعقول يدوني ورقة إنهم رشوها علشان عيب فى التصنيع . والله لو عملوها لتكون نازلة فى أهرام الجمعة . ههههههه . دول ناس فاهمة كويس قوي بتعمل إية .
4 -كل اللى فى المصنع بيسمع و يصدق مسئول الدهان فى كلامة إنة يقدر يعالجها مع إن العقل بيقول إن مستحيل اللى عمل المشكلة أصلا هو اللى يعالج مرة و لما يرجع تانى العيب هوة هوة برضة اللى يعالج تانى و لما يرجع العيب تالت برضة يقول مسئول الدهان المحترم إنة يقدر يعالجها . و الغريب إنهم مازالوا ماشيين ورا كلامة .
5 - هما شايفين إن المشكلة مش محتاجة تغيير بحجة إن مش كل عربية الكلاكس بتاعها يبوظ نغيرها .

و يا محسن باشا شكرا لمشاركتك بس عايز ازود على اكلامك :
اول حاجة انت قولتها الفرق بين عيوب التصنيع النادرة و المتكررة... كلام جميل .. بس هما حتى هذه اللحظة مش حاسسين إن ده عيب تصنيع و ده سببة إما الرطوبة او الورق الأبيض قعد على العربية كتير ( مع العلم إننى مستلم العربية من غيرة اصلا )

إن شاء الله خير و انا متفائل و ربنا يسهل و شكرا على تعاطفكم معانا

المشاركة الأصلية كتبت بواسطة ahmedfd

عيوب التصنيع تحدث في كل مصانع العالم .... شوفوا الموقع الأمريكي ده http://www.autorecalls.us اللي بيسجل الـrecalls اللي بتحصل للعربيات ..
هتلاقوا recalls بتحصل في جميع العربيات... انا بصيت كده في recalls للمرسيدس الـ S Class (أيوه...مرة تاني.... الـ S Class) و عيوب تتراوح من مشاكل في نور الصالون لحد مشاكل في نظام التعليق.... (برضه مرة تانية S-Class و نظام التعليق).
الناس بره مش معصومين من الخطأ إطلاقاً... انا سافرت حتت كتير و الناس دول يعني مهماش العبقريات اللي متتكررش و إحنا ناس متخلفين أوي كدة... هو بس شوية ضمير و شوية نظام بس برضه الأخطاء بتحصل عادي جداً و إلا مكانوش عملوا أنظمة جودة لإكتشاف الأخطاء دي.

المشكلة مش في العيب نفسه اللي ظهر عند أخونا يوسف و ربنا إن شاء الله يكرمه و الموضوع يخلص بصورة ترضيه و تخليه يستمتع بعربيته بعد المشاكل و الصداع ده و ينسى اللي حصل و لكن المشكلة الحقيقية في تعامل المصنع بإهمال مع الموضوع.
بس مش معنى كدة نقول إن الصني وحشة و إوعوا حد يشتريها لإنها فعلاً عربية ممتازة و مصنع مصر طلع منها المئات و الآلاف و الناس مبسوطة منها على الآخر...

معاك مية المية
برة الزبون دايما على حق .. نيسان مصر بتاع الدهان هو اللى على حق و الزبون بيتلكك

المشكلة فى الإدارة المصرية

المشاركة الأصلية كتبت بواسطة youssef_sallam

اول حاجة انت قولتها الفرق بين عيوب التصنيع النادرة و المتكررة... كلام جميل .. بس هما حتى هذه اللحظة مش حاسسين إن ده عيب تصنيع و ده سببة إما الرطوبة او الورق الأبيض قعد على العربية كتير ( مع العلم إننى مستلم العربية من غيرة اصلا

على فكرة هي دي المشكلة الرئيسية, واضح ان مدير الدهان ده عشان مايعترفش بوجود عيب من عنده مفهمهم ان ده سوء استخدام. بس انا مازال رأي انك تحاول تخوفهم ان انت حتعمل شوشرة و قلق و تكتب في الجرايد مشكلتك, يمكن يقلقوا من الدعاية السيئة. و لازم تدور على و احد مسؤل كبير في المصنع و تحاول تتكلم معاه.

ادعو الله عز و جل ان مشكلتك تتحل ان شاء الله بالشكل اللي يرضيك و يا ريت تقولنا اول بأول عملت ايه