الموضوع: مــا هــو الحـل فى ظهــور بقع بيضاء على السقف و الكبوت والشنطة - نيســان صنى 2008

المشاركة الأصلية كتبت بواسطة youssef_sallam

صحيح انا كنت حاسس قبلها بيومين إن البقع بدأت تقل بس فعلا مكانش فى بقع تماما موجوده
مش عارف راحت لية بس على قد ما كنت مبسوط على قد ما كنت متضايق جدا إنهم فلتوا من تحت إيدي ....

يعنى البقع اختف تانى و لا اية , خد بالك ممكن الموضوع يكون مرتبط بالجو , كان فى كام يوم حر شوية ممكن البقع تكون اختفت بسببهم , و بعدين الصيف داخل يعنى البقى حتختفى فى الصيف تماما و ترجع تانى تظهر لما الشتا يدخل , لو الموضوع كدة حيبقى صعب انك تشوف البقع تانى دلوقتى , انا مش بخوفك ولا حاجة بس برضو الاحطيات واجب .

مش عارف إخفت إزاي ,, ده حتى أنا قولت يمكن حد جة تحت البيت و عالجها ... مش عارف الله أعلم
يمكن الحر لما بدأ يشد كان لية علاقة ...
بس حاليا ما فيش بقع و الحمد للة

معلش- الكلام كده شكله مش راكب على بعضه - وكده انت بتدى للتوكيل فرصه يقول العميل هو اللى مش فاهم

لو هو عيب صناعه ممكن اصلاحه يبقى هم عملوا اللى عليهم وقاموا بالاصلاح - موضوع تغير السياره بغيرها ده كلام نسمعه عن الخارج وانا عشت فى الخارج وعارف انه مش بالبساطه دى خصوصا مع سلعه زى السياره - يعنى لو العيب ده كان ظهر مع اكتر من عميل ممكن فعلا الشركه على طول تسحب المنتج وتبدله حفاظا على سمعتها- لكن عربيه واحده او اتنين يظهر فيهم مشاكل هنا الشك بيروح فى اتجاه انه ممكن يكون خطاء من العميل نفسه

كان من الاولى - وخصوصا انك اثبت عليهم انه كان فى مشكله - حتى لو المشكله اختفت - انك تطالبهم بتوضيح عن السبب وكمان تعويض عن وقتك واعصابك اللى اتحرقت

انت كان بالك طويل ومجهودك مشكور بس برضه هم كده طلعوا منها -

ما عنديش حاجه ضد التوكيل ده بالذات - المشكله انه الموضوع هنا اتعرض من جانب واحد اللى هو حضرتك- كان نفسى حد من التوكيل يدخل ويرد على كل اللى اتقال -
ما عرفش ادارة المنتدى ممكن تقوم بالخطوه دى نيابه عنك ولا الموضوع كده اتقفل ؟؟؟

المشكلة يا أستاذ يوسف ويا أستاذ أيمن في كذا حاجة:
1- أن حضرتك لما روحت للتوكيل بالعربية اول مرة قبلت انهم يصلحوها من غير مايكتبوا حالتها بالظبط ويمضو عليها.
2- أنك ماعرضتهاش على شركة تانية تكتب تقرير.
3- أنك ماعملتش محضر في القسم ، لو كل واحد عمل محضر بأي حاجة صغيرة هانقدر نثبت كام حالة بالظبط حصلها كدة ، والكلام هايبقي على أثاث وهايخوفهم اكتر ويسهل الاجراءات القانونية.
4- أنك مش عارف ان في واحد خد تعويض من أبو الفتوح بقيمة 100 الف جنيه بحكم محكمة ، حتى لو حالته كانت مختلفة الاختلاف بيبقى في قيمة التعويض.
5- موضوع التعويض دة حتى لو ب 7000 جنيه هايعوضك الخسارة اللي هاتخسرها في اعادة البيع ، ودليل إثبات على ان العربية فيها حاجة.
6- أن الناس من عينة الاستاذ اللي قاللك عليه العوض واحسن ماكانت تيجي في حاجة تانية للأسف بتتساهل في حقها على الآخر لدرجة أن كل الشركات في جميع المجالات مش هاتاخد معاها لا حق ولا باطل لأنهم متطمنين على الآخر.
7- مافيش رأي عام ، يعني حضرتك وغيرك هاتشتكو للجرايد والمنتديات للصبح والناس هاتفضل برضو تشتري نيسان وتشكر فيها وتدافع عنها زي مابتدافع عن امها ، ولو احنا في بلد بتحترم نفسها ، الناس بتستنى قبل ماتشتري وتدرس الموضوع كويس قبل ماتفترض ان الشاكي مفتري أو انه حالة فردية أو منافس من شركة تانية ومزقوق.
8- الناس للاسف بتشتري الحاجة المنتشرة وخلاص وماعندهاش ثقافة الشراء:
يعني مثلا - عربية من غير الكماليات اللي بتنزل بيها ماحدش يسأل الكماليات دي فين.
- العربية بيبقى سعرها ولا يسوى قيمتها والناس بتشتري برضو زي مايكونو لاقيين فلوسهم في الارض ، فالتجار يعلو الاسعار براحتهم بقى وياخدو اللي يقدرو ياخدوه من العربية ويبيعوه للناس تاني بسعر وهمي وتلاقي نفسك بتجيب عربية زيرو وتصرفلك عليها اكتر من 2000 جنيه عشان تعرف تركبها من فرش وكاسيت وسنتر وخلافه ، واية يعني مالناس كدة كدة هاتشتري.
9- لازم يبقى كلام اي شركة مخالفة موثق عشان تضمن حقك وعشان لما تيجي تقول العيب مابقاش موجود مرة واحدة الناس ماتقولش دة راجل كداب او عنده وهم ، انا عن نفسي والله مصدقاك بس انت هاتديهم هم الفرصة لكدة ، يأما تاخد الطريق الشرعي للهجوم (البوليس والجهات المعنية).
10- لازم الناس يبقى عندها ثقافة المقاطعة ، مش بس للرسومات المسيئة للرسول والشركات اللي هي اصلا مش دنماركية ولا حاجة ، لا عشان تاخد حقها هنا من الشركات واي مؤسسة خدمية.

وعموما ياجماعة اتمنى ليكو التوفيق من كل قلبي ، وانا هاساعد اي حد عايز ياخد حقه على قد ماقدر ، من باب الايجابية الاجتماعية.

شكرا

شيرين