الموضوع: شركتك وضعها ايه دلوقتي

على الجانب الشخصى كل المجلات المتخصصة فى اى حاجة مش بس عربيات كدا شكراً الى اجل غير مسمى علشان محدش فاضى يتسلى بجانب ان محدش هينزل بإعلانات نهائى على الاقل 6 شهور قدام وعلشان اسعار الطباعة هتولع وده كله غير مصيبة الفلوس اللى على الناس من الطبعات الكبيرة بتاعت اعداد فورميلا الاهرام وحتى لو كل المشاكل دى اتحلت مازالت مشاكل التوزيع قائمة بعنف , وفى كلام الفترة دى ان معظم المجلات مش بس هتقف ده فى ناس كتير هتصفى

على الجانب العائلى شغل المقاولات فى البلد متوقف تماما لا فى خامات بتنزل واللى متخزن مولع نار ولا فى سيولة فى وضع البنوك الحالى حد يتحرك بيها برغم ان عمال البناء ربنا يعينهم فى عرض يوم شغل ، ربنا يكون فى عون الناس اللى باعت عمارات بتتبنى هيشيلوا خسائر فادحة الفترة الجاية

زوج اختى عنده عدة مركز طبية بتتولى الرعاية الطبية لأفواج من شركات سياحية فى مصر ، صفى العمالة كلها وفى اجازة مفتوحة وكل الشركات اللى معاه قفلت خلاص والعاملين الاجانب اللى فيها سافروا ويادوب بيحاول يلم فلوسه من شركات التأمين الاوروبية

ربنا معانا

انا شغال فى جامعة خاصة (ذات طبيعة خاصة )
لغاية دلوقتى ولغاية يوم الخميس اللى جاى احنا اجازة مدفوعة الأجر ولسه مش عارفين ايه اللى حيحصل
المشكلة ان حوالى 40 % من الطلبة عندنا من دول عربية وافريقية ومش عارفين دول حيعملوا ايه بعد الأحداث دية !!

بالنسبة لشغلى الخاص عندى شركة ويب و برنتنج ديزاين بالاضافة ل اشتشارات موارد بشرية وكل العملاء اللى معانا معتمدين على دعم هيئة تحيث الصناعة اللى بتمنحة وزارة التجارة والصناعة والدعم ده كان بيوصل فى بعض القطاعات ل 70 و 80 % من قيمة البروجيكت

ومش فاهمين ايه اللى بيحصل دلوقتى

المشاركة الأصلية كتبت بواسطة ghazy12

للاسف وقفت نشاطي مؤقتا في الاستيراد نظراً لارتفاع سعر الدولار
و الشغل تقريباً لحد دلوقتي متوقف لحين اشعار آخر...

اللطيف اني كنت متفق على بعض الخامات اللي هتجيلي من فرنسا من شركة لافارج
و حولت الفلوس للشركه يوم الخميس اللي قبل جمعة الغضب, و شكرااا :))

لقيتهم بيكلموني من فرنسا من يومين بس و البنت المسؤله عن الاوردر
بتاعي مغربيه, و بتكلمني و هي مكسوفه جداا و بتقوللي قلبي معاكم
و ربنا يوفقكم و قمة الروح الطيبه, و قالتلي ان الاوردر جاهز و منتظرين
تدينا كونفيرم علشان نبعته... طبعاً لسه الامور متوتره, لكن ربنا يسهل
و نجيب الاوردر ده و نركنه في المخزن زي الباشا لان المشروع اللي
هيتوردله الاوردر ده توقف اصلاً مع توقف المقاولون العرب عن العمل...

لكن مع كل ده و انا بردو مش زعلان, لاني شايف من وجهة نظري
المتواضعه اني اعيش بكرامتي و احس اني بني آدم ليه قيمته في بلده
و حاسس اني عايش على ارضي و في بلدي مش عزبة الريس و لا الحزب الوطني

احس اني مش عايز اسيب البلد دي او اهاجر زي ما كنت عايز اعمل
عندي اهم من اني اتعطل اسبوع او اسبوعين في شغلي...

احس ان البلد دي فعلاً بقت بلد محترمه و اقدر و انا مطمن اني اربي فيها
ولادي و اعلمهم و اكبرهم و احسسهم قد ايه البلد دي بلد عظيمه زي تاريخها

عندي الاستعداد بالتضحيه بشوية ايام من الحاضر في سبيل مستقبل محترم
و مشرف ليا و لاولادي و لاولادهم كمان...

احنا طول عمرنا بنتسرق, اعتبر نفسك اتسرقت اليومين دول بس
اللي جاي هيعوضك عن اليومين دول نفسياً و مادياً و اجتماعياً.....

تحياتي...

ربنا يزيد من امثالك