امنيتك ايه بعد الثورة

**نور القمر** · 12-02-2011 02:57 AM

امنيتك ايه بعد الثورة
او بمعنى ادق ايه التغييرات اللي نفسك تتحقق في مصر
انا هابدأ بنفسي
نفسي نعتمد على نفسنا كدولة في موضوع الغذاء ويكون عندنا الاكتفاء الذاتي من القمح والذرة والفول والقطن كمحصول هام للصناعة
انا فاكرة وانا صغيرة كان الفلاحين في بلدنا بيشتكوا ان الحكومة منعاهم من زراعة القمح اللي كان بالنسبة لهم اهم المحاصيل للاستخدام الشخصي
الفلاح من دول يزرع على حسب توجيهات الحكومة المتمثلة في الجمعية الزراعية ويرجع يشتري القمح المستورد لاستخدامه الشخصي
حتى اللي كانوا بيزرعوا قمح كانوا بيفرضوا عليهم تقاوي مستوردة مهجنة بحجة وفرة انتاجها ولغوا القمح البلدي الافضل مذاقا
واصبحنا نعتمد على الاستيراد بشكل كامل وبقينا مذلولين للعالم بقطع المعونات عننا
بالاضافة الى تقليص زراعة القطن المصري طويل التيلة والاميز على مستوى العالم
نفسي يكون في اكتفاء ذاتي زي زمان من المحاصيل الزراعية المهمة ونسبش نفسنا تحت رحمة الغير

**AboELsoud** · 12-02-2011 03:04 AM

بصراحه مفيش حاجه بعد اللي انت قولتيه
بس ممكن اضيف
انه يكون في تعليم جيد (لاني لسه في الكليه طبعا)

**ABDULLAH AHMED** · 12-02-2011 03:17 AM

الكلام اللي حضرتك قولتيه
+
مصر تبقى زي اليابان والمانيا كده . من احسن بلاد العالم ابتدوا من تحت الصفر
الحمدلله مصر في مرحلة كويسة اوي ممكن تساعد على عمل نهضة في كل حاااجة
يا رب

**zyadahmed** · 12-02-2011 03:21 AM

نفسى اشوف احزاب حقيقية فى مصر وتتنافس فى البرلمان والمنافسة تجيب الجودة فى الاداء لارضاء الناخب والحرص على صوته
ساعتها هاتتقدم مصر فعلا فى كل المجالات

**Eslam.Elrefaey** · 12-02-2011 03:21 AM

بما اننا منتدى بتاع عربيات اساسا يبقا المفروض نطلف الغاء الجمارك على العربيات

**tarekzein** · 12-02-2011 03:23 AM

نفسى فى وجبه كنتاكى

أتحرمت منها يا جدعان

منهم لله اللى كانوا السبب

**Amr_tika88** · 12-02-2011 03:30 AM

اولا انا بشكر حضرتك على الموضوع الجميل ده واتمنى تثبيته في القسم علشان نقدر بعد كده نخليه مرجع ونعمل بيه بيان احصائي ونبعته للمختصين عن اهداف مصر على مستوى الرأي العام
تاني حاجه انا نفسي نتحول لدولة صناعية زراعية وبتعتمد علي اكتر من مورد انتاجي علشان التعدد ده هيخلي مصر اقوى ده غير ان يوضع خطة شاملة علشان نشوف كل واحد بيشتغل في مجاله منلاقيش دكتور بيتخرج وبيشتغل مثلا في حاجه تانيه بعيدة عن مجاله بالاضافة لاعادة تاهيل المتعلمين الحاليين بكورسات تدريبية ودورات علشان يمسكو مواقع في البلد كل واحد حسب مستواه

غير ان ليا امنية ان اسعار السيارات تنزل وانشا الله نلاقي العادي للمنتدى انه راكب بي ام ولاندكروزر

**نور القمر** · 12-02-2011 03:31 AM

نفسي التعليم يتغير
يعني اسلوب الحفظ ده يلغوه بقى
نفسي كل طالب يختار المواد اللي بيحبها واللي تؤهله للكلية اللي ماشية مع ميولة واهتماماته
ويلغوا الجامعات الخاصة
ياناس ده اولاد خالتي في كليات خاصة واحد نظم ومعلومات وواحد هندسة
تصدقوا بينجح وهو في الرياضيات مثلا مش بيعرف يحل المعادلات الانية ولا يفك قوس تربيع
المدرسين اللي معندهمش ضمير اولا لازم يتم رفع مرتبات المدرسين عشان ميكونش هدفهم الدروس الخصوصية والعيال تبقى طالعة من الحصة مش عارفة حاجة في حياتها
وموضوع ان ابناء مدرسين الكليات لازم يكون معيد بالرغم ان في ناس تقديرها اكبر
سلبيات كتير اوي في التعليم مش عارفة اقول ايه ولا ايه

**misoalex** · 12-02-2011 03:33 AM

حاجات كتييييييييييييييييييييييي يييير

منهم لله حرمونا منها ولاد التييييييييييييت
حرمونا نعيش كبنأدمين
بس اول حاجه نفسى الشرطه تتغير والاكل يرجع زى زمان ومياه النيل تبقى مش ميه مجارى

**yoko** · 12-02-2011 03:41 AM

يتحاكم كل واحد سرق مصر في ال30 سنة الي فاتوا ونسترد الفلوس دي ندفع بيها ديون مصر
نبتدي نهضة في كل حاجة ونبقى زي ماليزيا وتركيا (دول لسه بدأة قريب زينا) ونعدي المانيا (دول قويه من زمان)
ونحقق الإكتفاء الذاتي في كل الي نقدر عليه

لإن لو حصل الكلام ده يبقى مش هناخد معونات ولا أي حاجة من أي حد وساعتها مفيش أي دوله هيبقى ليها كلمة علينا
ولما البلد تشتري حاجة من بره تشتريها وفلوسها كاش وعلى ال.... زي ما بيقولوا