الموضوع: صعبنيات

ياعمرو الحل عندهم هما مش عندنا احنا
الحل مش انهم يطلعوا مظاهرات يعيطولنا فيها والامناء بالذات

مفيش حاجه اسمها انا عبد المأمور
فيه حاجه اسمها انتا بتضرب مواطن مصري زيه زيك
فيه حاجه اسمها امر انك تفض مظاهره
وفيه حاجه اسمها امر انك تفتري

هوا مش فيه اب بيضرب عشان يربي
واب ملوش قلب بيضرب زي الحيوان المتوحش؟؟

بنقول ايه عليه
انتا لا يمكن تكون اب

كلامي منطبق عليهم
دول لا يمكن يكونوا مصريين ولا حسوا بالمصريين
دي ناس عندها عقد نفسيه
ومعقدين
ومرضي نفسيين

ولعلمك اللي بيخليهم كده دراستهم في الكليه
لان مش ممكن يكونوا كلهم شكل واحد

علي فكره انا والدي ظابط جيش سابق
وياما حكالي علي فساد رهيب
وفلوس بردو بتتاخد

بس بص الفرق
فرق السما من العما

الفساد موجود في كل مكان
وفي كل حته
بس دايما الوحش بيكون اقل من الحلو
لو الوحش بقي اكتر من الحلو
مش حنعرف نعيش

لما وحشهم بقي غالب علي حلوهم
شعب مصر كره الشرطه واللي في الشرطه وصعب اوي تلاقي منهم ناس محترمه

انا اللي مستغربه
انك تلاقي اللي بيتنطط منهم
رائد
امين
عيل لسه متخرج
ده اللي منفوخ اوي وحيفرقع

انما لواءات
عميد
والله انا بيجيلي ناس في الشغل
مش عاوز اقولك مبصدقش انهم شرطه من كتر ما هما محترمين
ناس متواضعه كده
ويدخل عليا يخلص كل الي هوا عاوزه وفي الاخر وهوا ماشي
يقولي لو عاوز اي حاجه انا فلان الفلاني

وناس تدخل عليا
يقولي رائد فلان الفلاني مباحث امن المش عارف ايه

ياعم انا مال اهلي وانتا شايفني رد سجون
متولع انتا ورتبتك
انتا جي تخطب

نرجع ونقول والله الغلط مش غلطنا علي رأي وائل غنيم
الغلط غلط كل واحد ماسك في السلطه ومتبت فيها ومش عاوز يسيبها

لسه الطريق طويل قدامهم
ده حصاد سنين الكراهيه دي
وانا علي توقعاتي انا

الشرطه دي ليها مظاهره خاصه في التحرير
مجرد بس ما يتشال القناع المزيف ده وينزلوا الشغل تاني ويبتدوا يحاولوا بقي ياخدوا وضعهم تاني

وفي اول قفا لاي مواطن في مصر كلها
مصر كلها حتعرف
وحتبقي مجزره بجد


وبكره تشوف

المطلوب وبكل بساطه

1- تغيير اسلوب التدريس بكليات الشرطه وخاصه الجهات التي تتعامل مع المواطنين العاديين
بمعني ان مينفعش ظابط بيتعامل مع الحرامي والمسجل خط وقتال القتله يكون هوا هوا اللي بيتعامل مع الجمهور العادي يكون فيه زي علاقات عامه كده
واحد بيطلع رخصه واحد داخل يعمل محضر اتقابل مع واحد عمال يسب الدين ويشتم ليه ان شاء الله


2- تعيين موظف من حقوق الانسان في كل قسم شرطه لمراقبه اوضاع المساجين لظبط اي مخالفه علي الطرفين سواء من المسجون او الظابط ويكون له السلطه الكامله لتقديم تقرير يرفع رأسا الي وزير الداخليه

3- عند تقديم شكوي ضد اي ظابط شرطه او عسكري او امين شرطه او ايا ما كان يتم احالته الي المحاكمه الفوريه مع رفع رتبته او وقفه عن العمل لحين صدور قرار بالشكوي
ان كانت بحق يسجن الظابط ويتم معاملته كمواطن عادي وليس كظابط شرطه
ان كانت بالباطل وثبت بطلانها يتم محاسبه المتقدم بها كبلاغ كاذب ويؤخذ ضده اشد العقوبات لضمان عدم فعلها مره اخري

الحاجات دي لو اتنفذت كده
كن واثق ان اول ناس حترفع ظباط الشرطه هم المواطنين
لما احس ان الرتبه اللي معلقها علي كتفه دي لخدمتي انا
مش للتنطيط عليا
ساعتها ححترمه

مش تروح تشتكي الامين تلاقي الظابط معاه تشتكي للمأمور تلاقيه معاه
وتتهزق وتتعامل معامله المجرمين واصحاب السوابق