الموضوع: شفيق يحيي شباب الثورة ويطالب العمال العودة لمصانعهم

المشاركة الأصلية كتبت بواسطة maserati

السلام عليكم و رحمة الله و بركاته

أنا من رأيى أن الموضوع لا يستحق كووووووووووووووول الهجوم و الدفاع و الخوف و الترقب ده.

احنا مالناش عند رئيس الوزرا -أيا كان مين هو- الا شغله, شغله و بس, اذا شغله عجبنا و لقيناه بيعمل خطوات ايجابية على أساسها أننا هنحس أن الراجل ده فى خلال الفترة اللى جايه, ييجى منه, خلاص هيفضل و نشيله على راسنا من فوق, غير كده, يبقى يتغير لحد ماييجى رئيس الوزرا اللى يكون فاهم و مستوعب الشعب عاوز ايه.

أحمد شفيق كان راجل كويس, بس كان بيتعامل من طرف مناخيره و أنه هو رئيس الوزرا اللى فاهم و أن عامة الشعب هم شويه ناس جهال و مش فاهمين حاجة و كان واضح جدا أنه لايقبل النقاش أو المراجعة فى كلامة و كانت عنده حكاية (الأنا) دى عالية شويتين و قعد يقول أنه هو اللى عمل مصر للطيران و المطار و حط مصر على الخريطة العالمية للطيران و الكلام ده, ok , بس ده شغله اللى هو بيقبض عليه مرتب كبيييييييييييييييييير أوى و اللى لو ماعاملهوش يبقى مقصر, الكلام ده مش فضل منه و لا منه .

نفس الكلام مع عصام شرف, أى حاجة أو أى قرار هو بياخده و لا هياخده, ده من صميم مهامه الوظيفية اللى هو لو شايف أنها كتير عليه, ممكن من دلوقتى يقول أنه مش أدها و يمشى معزز مكرم و يرجع يشوف هو كان بيعمل ايه.

المطلوب مننا, أننا ننزل الناس منازلهم, يعنى, نحترم منهم العلماء و الأمناء و الناشطين و المثابرين على العمل من أجل راحة الشعب, بس كده و خلاص, لكن مش لازم, أننا نتملقه بالليل و النهار و نصليله من دون الله -و العياذ بالله- عشان نبقى بنحترم المسؤولين بتوعنا, ده غلط طبعا.

أما نشوف عصام شرف هيعمل ايه فى اليومين الجايين, أحمد شفيق قعد شهر كااااااااااااااامل, ماقدرش يجبر وزير الداخلية المصرى أنه ينزل الشرطة فى مواقعها تانى و يخليها تشوف شغلها بكفاءة, أما نشوف عصام شرف ده هيعمل ايه, ازاى , يبقى رئيس وزرا و مايعرفش يمشى كلمة على وزير الداخلية اللى تحت ايده, ايه الفوضى دى .

أنا من رأيى أن رئيس الوزرا الجديد, يحط جدول زمنى للواء محمود وجدى, و فى خلاله يكون اللواء محمود وجدى نزل الشرطة تشتغل كويس و بكفاءة 100% و كأن شيئا لم يكن, عمل كده, أهلا و سهلا, ماعملش كده, يمشى وزير الداخلية و ييجى غيره و لو عصام شرف كان خايف من وزير الداخلية المصرى و مايقدرش يعمل معاه كده, احنا كمصريين اللى هنعمل كده و احنا اللى هنعمل حملة اسمها (حملة ال30 يوم لوزير الداخلية المصرى) اللى فى خلالها لازم يكون منزل الشرطة تشتغل فى كووووووووووووووول مواقعها زى البنى آدمين, ماذا و الا , معادنا بعد شهر ننزل ميدان التحرير و نطالب باقالة وزير الداخلية المصرى و ساعتها العالم كله هيقف معانا و ماحدش هيقدر يغلطنا, لأننا ادينا فرصة و هو اللى ماشتغلش.

صح كده و لا أنا غلطان ؟؟؟؟!!!!

متفقة مع حضرتك جدا

وجه الاعتراض لى الفريق احمد شفيق كان كرئيس وزراء و ليس كوزير طيران مدني لانه كوزير كان له انجازات واضحة في مجال الطيران

و لكن كرئيس وزراء مكنش يصلح لهذا المنصب اطلاقا و هوا مؤيد لسياسات مبارك و بيدعمه طوال ايام الثورة و رافض لتنحيه و دا معناه انه بيرفض ارادة الشعب و دي اول سقطة سياسية ليه لأن عدم احترام ارادة و مطالب الشعب يتنافى تماما مع السياسة و القيادة السياسية و الشعبية

ثانيا اختياراته للتشكيل الوزاري و اولها ابقائه لوزير الخارجية ابو الغيط و وزير العدل المتامر في تزوير الانتخابات كلها في ظل النظام السابق دا غير وزير البترول سامح فهمي و وزيرة القوى العاطلة عائشة عبد الهادي و دول كلهم كوم و محمود وجدي وزير الداخلية كوم تاني لسة بيتعامل بنفس اسلوب النظام الساقط الفاسد من كذب و تشويه حقائق و اضاعة حقوق - دا حتى مفتحش تحقيق داخلي جوة الوزارة عشان يشوف مين المقصر و مين اللي تخلى عن موقعه و مين ... و مين .... - دا غير تامره مع النظام و عدم رجوع الشرطة بكامل قوتها للشوارع

ثالثا عدم احترامه لكلمته عندما قال امان المتظاهرين على لاقبتي و تاني يوم يستمر الضرب فيهم لمدة 16 ساعة متواصلة و هوا يقول اسف مكنتش اعرف و ماعرفتش الا الساعة 5 المغرب و حتى لما عرف ماعملش حاجة

رابعا تمسكه بالمنصب رغم مطالبة الالاف برحيله و لتاني مرة ماحترمش ارادة الناس دي و مطالبهم ولا فكر يتوجه ليهم بكلمة او ينزلهم التحرير لكنه ظل يتعامل من نفس البرج العالي متعاليا على الناس

مش معنى كدا انه رجل فاسد - والله اعلم فساده من عدمه - او ان احنا بننكر اجازاته كوزير طيران مدني بل على العكس بنشكره على هذا الانجاز و هوا دا الشىء الطبيعي المطلوب من اي وزير