الموضوع: عربيات زمان احسن جوده من دلوقتي؟؟

المشاركة الأصلية كتبت بواسطة sab3aawy

يكفى ان تقود سيارة تعود الى السبعينات مثلا وتنتقل لقيادة سيارة حديثة من نفس الفئة بنفس الحالة الفنية ومن منتج مساوى فى السمعة اليوم لمنتج سيارة السبعينات يوم انتاجها لكى يتقلص كثيرا حجم الكلام فى هذا الموضوع

يعنى انا لو هقارن فيات السبعينات بفيات النهاردة او فولكس السبعينات بفولكس النهاردة واودى السبعنيات باودى النهاردة ومرسيدس السبعينات بمرسيدس النهاردة هلاقى ان لا وجه للمقارنة اصلا ، لكن انا هقارن فيات واودى وفولكس السبعينات بهيونداى وكيا وبروتون النهاردة

القياس هو على الموديلات المعقولة وليس الموديلات الإستثانية(يعنى محدش مثلا يقول لى الأكسنت تروح فين جنب البيجو 504 لأن ال504 موديل استثانئى لن يتكرر)، يعنى دعنا ناخد مثال لسيارة اوروبية سبعينية من الفئة المتوسطة ولتكن الفيات 131 وسيارة كورية او ماليزية من الفئة الحالية ولتكن الهيواندى إلانترا(إيه رأيكم نكمل وللا منكملش؟)، مع ان الفيات 131 فى السبعينات هى نفسها فئة الهيوانداى الانترا حاليا لأن فئات العربيات كلها كبرت لكن انا شايف ان ال131 حرام تتقارن بالهيونداى الانترا لذلك هقارنها بعربيه من فئة اصغر وهى الكيا ريو، والتى تقابل فئة 128 فى السبعينات

نمسك الخامات: صاج ال 131 الخارجى ميفرقش كتير عن صاج الكيا ريو فى السمك، لكن الشكل المربع هوى اللى كان بيديله متانة الى حد ما، لكن الخبطة اللى بتعجن دى بتعجن دى،بس صاج الريو مش بتسرح فيه البارومة بالسرعة الوهمية اللى كانت بتسرح بيها فى صاج ليس فقط ال131 ولكن حتى مرسيدس السبعينات، فوانيس ال131 كانت زجاج وفوانيس الريو بلاستيك، التجربة اثبتت ان البلاستيك اكثر قابلية لتحمل الزلط والطوب من الزجاج، لكن عيبه انه لونه بيطفى، اكصدام ال 131 حديد، واكصدام الريو بلاستيك،ووراه فوم وراه اكصدام تانى حديد، صحيح ان البلاستيك بيتكسر مع الخبطة لكن فى النهاية انا حمييت شاسيه العربية من الصدمات البسيطة اللى كان الإكصدام الحديد بينقلها بكل امانة للشاسيه فى حين ان البلاستيك والفوم بيمتصوها قبل ما توصل للإكصدام الحديد ومن ثم الشاسيه، كما ان الإكصدام البلاستك أأمن فى حالة صدمة بسيطة بأحد المشاه
موتور ال131 كان كبيره بيقعد 150 الف الى 200 ألف كيلو قبل ما يطلب عرمة، النهاردة موتور الريو وامثالها بيعد 200 ألف و 300 ألف
نبص بصة كدة على الصالون ، ببان ال131 كانت مكسوة من الداخل بكرتون سوليتكس مغلف بنوعية من الجلد الصناعى تعتبر بدائية جدا بالمقارنة بما هو موجود اليوم، والتابلوه عبارة عن هيكل حديد مكسو باسفنج مكسو بجلد صناعى بيشقق من الشمس

الكيا ريو بابها مكسو من الداخل بالبلاستيك اللى هو فى رأيي افضل 100 مرة من السوليتكس اللى بينفخ ويضرب لو جت عليه شوية مية لو المية طالت الباب فى مطرة الشتاء ، ومع البلاستيك باب الريو معمول بنوع من انواع القماش الجيد، والتابلوه بلاستيك مش بيشقق فى الشمس

الزجاج الأمامى والخلفى وزجاج الأبواب كانوا فى ال131 من النوع سابق الإجهاد، اللى بيتفتفت لو اتشرخ شرخ صغير علشان خاطر ميعورش حد من الركاب، زجاج الريو من نوع التريبلكس اللى لا بيتفتفت ولا بيقع من مكانه لو اتكسر بفضل شريحة البلاستيك اللى بين طبقتى الزجاج وبالتالى زجاج الريو احسن

الكراسى بدل ما كانت محشوة سفنج بقت محشوة فوم والاتنين بيهبطوا بعد شوية، مش فارقة كتير

بالمقابل هنلاقى شوية حاجات ظريفة جدا فى العربية الريو، صالون العربية الريو اللى هى من فئة اصغر من ال131 مساوى فى الإتساع ان لم يكن اوسع من صالون ال131،

موتور الريو انعم 100 مرة من موتور ال131، محرك الريو لو كان من نفس السعة اللترية بتاعة محرك ال131 هنلاقيه فيه فرق حوالى 25 حصان زيادة نيجة للتطورالتكنولوجى فى تصميم المحركات، فتصميم محركات بنسب انضغاط اعلى وتعميم الحقن الإلكترونى وتعميم فكرة الكامات العلوية، وتعديل تصاميم المكابس واذرع البيل بما يتناسب مع سرعات Rpm عالية وتصميم محركات ذات خلوصات ضيقة متواكبة مع التطور فى تصنيع الزيوت وبالتالى الحصول على كفاءة اعلى وقدارت اعلى للمحرك كلها تطويرات فى صناعة المحركات لا ينكرها إلا مكابر، ادت الى ان محرك النهاردة العادى وليس الرياضى الذى قد لا تختلف تفاصيله الأساسية عن محرك السبعينات بالنسبة لغير المتخصص يستطيع انتاج قدرة حصانية تزيد بأكثر من 25% عن محرك السبعينات من نفس السعة اللترية وبدون الحديث عن التيربو تشارجر

هنلاقى ان الزجاج الكهربائى والتكييف والغلق المركزى وجهاز الإنذار لم تعد كماليات فى الريو

كمان هنلاقى حاجة مهمة جدا فى الريو، هيكل مقصورة السيارة الريو اكثر متانة وترابطا ومقاومة للإنبعاج بكثير من هيكل ال131 اللى بطبيعته معتمد فى متانته فقط على الشاسيه السفلى لكن القوائم والسقف ليست جزءا من تدعيم السيارة، ولذلك فالسيارة الريو اكثر امانا بكثير من 131 على ركابها فى الحوادث المتوسطة، اصبحنا حاليا بنشوف سيارات بتنقلب على 140 ويخرج ركابها سلام ، ده طبعا ماكنش وارد نهائيا فى عصر ال131، وانا شفت بعينى واحد بعربية هيونداى اكسيل دخل تحت عربية نقل على سرعة 160 بفرق سرعة لا يقل عن 80 كيلومتر فى الساعة بين السيارتين، العربية مانفعتش تانى نهائيا لكن هو خرج بدون خدش واحد

وتانى افكركم انا بقارن سيارة سبعينات من مصنع اوروبى عريق بسيارة كورية من فئة حجم اقل، فما بالكم لو قارننا ال131 بالفيات نيو كروما مثلا،

كل وقت وله ادان، وعربيات زمان كانت حلوة زمان ، لكن الدنيا تتحرك للأمام

يا أستاذ سبعاوى حرام عليك العملاقة 131 نقارنها بسيارة مجهولة الهوية زى الريو!!
بالنسبة لموضوع المحرك, لاحظ انو جزء كبير من الزيادة فى القوة الحصانية متأتية أصلا نتيجة لأن محرك الريو مثل معظم محركات السيارات الكورية و اليابانية من النوع الذى يأخذ عزمه على سرعة مرتفعة, و هو ما يرفع القوة الحصانية و لكن يأتى على حساب عمر المحرك دائما.
طبعا موضوع الخلوص و نسبة الانضغاط و الحقن ليه عامل, لكن لا تنسى انو الحقن ابتكرته شركة بوش على ما أعتقد فى أوائل السبعينات!! يعنى موضوع الحقن مش جديد و كان حقن ميكانيكى بالضغط, و لا فرق كبير بينه و بين الحقن الاليكترونى, كل ما حدث هو أنه انتقل من السيارات الفارهة الى سيارات أقل ثمنا.
بالنسبة للعمر فأنا أسمع عن 131 بتعيش 300 ألف, و من فترة قريبة كانت عربية اكسل عاملة 150 الف فقط و بيتعملها عمرة كاملة, 150 ألف فقط و الى بيسوقها راجل كبير مش شاب و لا حاجة, و العربية دى غيرت اسطوانة عند 80 ألف!!
بالنسبة للريو معتقدش انها هتختلف كثيرا عن الاكسل.
بالنسبة للتكييف و الباور و حتى الأوتوماتيك و خلافه متنساش انو الكلام ده موجود من زمان فى السيارات الأمريكية. مش حاجة حديثة لكن تم تعميمهم على بقية السيارات.
بالنسبة للثبات, فطبعا ال131 و بما أنها دفع خلفى, نقدر نتوقع انها أكثر ثباتا فى المنحنيات, كما انها أكثر تحملا فى الطرق الوعرة.
محرك ال131 على ما أعتقد أكثر مرونة من الريو, لأنه يأخذ عزمه على سرعة منخفضة, و بالتالى هو أفضل فى الطرق الوعرة, كما أن نسبة التخفيض و علبة التروس تجعل السيارة مرنة على كل النسب, و لا ننسى طبعا الدفع الخلفى الذى يساعدها على صعود المرتفعات بسهولة أكبر من الريو التى تعانى هى و صديقاتها الكوريات فى مطالع الكبارى دائما.
وزن ال131 على ما أعتقد لا يتعدى ال950 كغ, أما وزن الريو فأكيد أكبر من 1000 كغ.
يعنى باختصار كل ما حدث من زمان للنهاردة فى معظمه هو :
- تعميم تجهيزات كانت مقصورة على السيارات المترفة فقط, الى السيارات الأقل ثمنا.
- دخول الالكترونيات, و هى ليست ذات فائدة كبيرة, فمثلا نظم منع الانغلاق لا تفعل فى الواقع أكثر من محاكاة ما يفعله سائق محترف عندما تنزلق سيارته (مثلا تخفيف سرعة العجلات الأمامية عندما تبدأ فى الدوران حول نفسها و هو ما يمكن أن تفعله بنفسك بواسطة ترك دواسة الوقود أو الضغط بخفة على الفرامل).

يا جماعة الموضوع بسيط
-اى عربية قديمة مكملة ولسة عايشة بعد 20 سنة على الاقل حتى لو اتغير فيها كل حاجة

-اى عربية من بتوع الايام دى مهما كانت بيتغير فيها كل حاجة بعد 5 سنين تفتكروا هاتعيش كمان 15 سنة بعد كدة ..من ملامح الحالات الموجودة الان ..ما فتكرش ابداً

باختصار عربيات اليومين دول (عربيات كلينكس ) يعنى استخدام مرة واحدة ,,ودة اصلاً بقى الفكر السايد فى شركات التصنيع ..إن العربية حالياً هى سلعة غير معمرة
ودة واضح جداً من خلال
1-العمر الافتراضى لقطع الغيار بقى قليل جداً
2-عدم توافر قطع الغيار بعد ذهاب ذهوة الموديل و نزول موديل احدث
3-بداية ظهور مشاكل من بعد اول 3 سنين إذا ماكنش قبل كدة كمان
4-سعر اعادة بيع مش ماسك نفسة ابداً
5-حالة عربيات مذرية لم يمر عليها 5 سنين استعمال
6-عدم ثبات اى مالك على عربية جابها زيرو اكتر من 5 سنين ..بالطبع لآنة (خد خيرها) والعربية بداءت تفتح بقها

وليت القديم يعود يوماً !

يا عمرو باشا .. احنا اضحك و بيضحك علينا
خدنا شوية كماليات و رفاهية و شوية اسامى ل options بتستخدمها مرة واحدة فى حياتك ..و دفعنا و بندفع فيها دم قلبنا كل يوم ...فى عربيات كل يوم بتتسرب من بين ايديك و ابنك عمرة ما هيشوف عربية ابوة الى فى الصور الابيض و الاسود و ممكن تبقى تورهالوة على الفوتوشوب . :D