لغاية وقت قريب كنت متعاطف مع الإخوان لإحساسى بالظلم اللى واقع عليهم طول السنين اللى فاتت ، لكن الأحداث الجارية وضحتلى ووضحت لناس كتير ان الإخوان ليهم أهداف سياسية محددة ومستعدين يعملوا اى حاجة فى سبيل الوصول ليها ، وموقفهم الحالى من التعديلات الدستورية وإستعجالهم لإجراء الإنتخابات فى الوقت دة هو محاولة لخطف الثورة والتحكم فى الأمور.
إستخدام الدين للوصول لأهداف سياسية حاجة بتخلينى أشك فى نواياهم (زى اللى قالى التصويت بنعم واجب شرعى)
محاولة تضليل البسطاء من الشعب لكسب تأييد شعبى بيفقدهم المصداقية ، كنت من يومين قاعد على قهوة وعدى عليا واحد من الإخوان وبيوزع ورق بيقول للناس تصوت بنعم فى الإستفتاء ، الورقة مكتوب فيها السيناريو اللى هايحصل لو قلنا لأ وكله كلام غير صحيح أو على الأقل كله إفتراضات من وجهة نظرهم ولكن لا ترقى إلى الحقيقة ، منها الإستقرار والأمن والعلمانيين وكلام فارغ.