الموضوع: .... مليونية إنقاذ الثورة - مطالب مشروعة ....

المشاركة الأصلية كتبت بواسطة hh

يا ريت اللي معترض على المظاهرة يجاوب على الاسئلة دي:

1- مين من المسئولين السابقين اتقدم للمحاكمة غير الرباعي اللي مبارك ضحى بيهم من الأول؟؟؟ ليه الناس اللي مكتوب أسمائهم في المطالب مبيتمش التحفظ عليهم و التحقيق معاهم؟؟ يا ريت الرد ميكونش من عينة عدم و جود أدلة أولا لأنه فعلا متقدم فيهم بلاغات كتير, ثانيا لأن مجرد التحقيق في مصادر ثرواتهم كفيل انه يدينهم.
وهل حضرتك عندك كشف بكل من تم احالتهم للتحقيق ؟؟؟
وهل المطلوب جر اي واحد من قفاه لمجرد ان مجموعة من المجموعات الكتيرة اللى بتتكلم باسم الثورة قال انه مجرم للمحاكمة ؟
وهل المطلوب محاكمات سريعة تنتهي بالبراءة ام محاكمات تنتهي بالادانة وهو ما يحتاج ادلة قوية لا جدال فيها ؟؟؟
وهل هم بالسذاجة التي تتخيليها حتي يتركوا خلفهم ادلة ؟؟؟؟؟؟
من الان انا واثق مبدئيا ان فيه 2 لن يتم ادنتهم مطلقا ليس لانهم شرفاء والله اعلم لكن لانهم اذكي بكثير جدا من ان يتركوا دليل على اي فساد عليهم
د
2 - تفتكروا جمال و سوزان مبارك و فتحي سرور و صفوت الشريف و زكريا عزمي و غيرهم بيعملوا ايه دلوقتي؟؟؟ قاعدين مستنيين قضاهم؟؟ تفتكروا مش بيحاولوا يدبروا مؤامرات سواء لأشاعة الفوضى و تحويل الأنتباه عنهم أو لأعادة السيطرة على البلد حتى لو مش بشخصهم يبقى بناس تانية تدين ليهم بالولاء؟؟؟ تفتكروا معندهمش القدرة من ناحية الفلوس و الناس اللي تخليهم يقدروا انهم يعملوا كدة؟ فيه حد من المصريين ميتمناش محاسبة الناس دي؟؟
لو حضرتك عندك معلومات عن اي مؤمرات بيديرها اي واحد منهم اعلنيه وقدميه للنائب العام والصحافة والمجلس العسكري بشرط يكون معلومات ادلة مش كلام وخلاص

3- مين اللي قالكم ان مفيش معتقلين سياسيين تم القبض عليهم؟؟
ومين قالك ان فيه ؟؟؟
طييب النشطاء السياسيين بيتكلموا عن أسماء معينة هما عارفينهم بالأسم و عارفين انهم كانو من المعتصمين مش بلطجية و أتقبض عليهم. ايه المشكلة انهم يطلبوا الافراج عنهم؟؟
مين هما النشطاء دول الاول ؟ مش كل النشطاء اعلنوا في جمعة تول عصام شرف تعليق الاعتصامات وبرغم ذلك استمر المئات في التحرير ؟؟؟؟؟؟؟ هل من بققوا نشطاء سياسيين ايضا ؟ واذا كانوا كذلك والاغلبية اخذت قرارها بانهاء الاعتصام هلب من حق المئات مخالفة راي الملايين من الثوار في التحرير؟ اذا كانت الاجابة بلا فهم يستحقوا القبض عليهم لانهم يخافون القانون وان كانت الاجابة بنعم فهي الفوضي ان كل عشرات او مئات لا يرضيهم قرار يعتصموا ولا يوجد اي قرار سيرضي ال85 مليون وبالتالي نجهز انفسنا لاعتصامات مدي الحياة

و بعدين أي حد فيكم نزل في مظاهرة و لا أعتصام في خلال الشهرين اللي فاتوا كان يحب لو اتقبض عليه محدش يسأل فيه و لا يدور على حقه؟؟
اي حد نزل المظاهرات كان متوقع انه يتقبض عليه ومحدش يسئل عنه او يتقتل
واللى خايف وبينزل عامل حسابه ان حد بيحميه مينزلش وميبقاش ثوري ويبقي جبان بيشتم واول ما يتمسك يعيط

4 - ايه من المطالب السابقة من البداية الجيش حققه من غير ضغوط؟؟؟ هل فيه أي خطوة أصلاحية الجيش خدها من غير مظاهرات و مطالبات ملحة من الناس؟؟ واضح ان الجيش مش بيتحرك من غير ضغط, ده مش اتهام ده واقع.
اتفرجي على الجيش الليبي واليمني والسوري وانتى تعرفي ان الجيش بيتحرك بمزاجه مش ضغط وخوف
اتفرجي عليهم وانتى تعرفي ان الجيش المصري محترم والافضل نتكلم عنه بطريقة افضل شوية

يمكن بتتمارس عليه ضغوط من جهات تانية, و يمكن مش عايز ياخد اي خطوات جزرية الا لو متأكد ان الناس عايزاها. مين اللي قال أصلا ان الجيش نفسه مبيبقاش عايز الضغط الشعبي ده عشان يدي لقراراته شرعية و محدش يرجع يشكك فيها؟؟
ومين قال ان الجيش عايز ضغوط عليه ؟؟؟؟؟ النشطاء بردو ؟
والشرعية اخذها الجيش بموافقة الاغلبية على التعديلات اللي اعدها وما زالت الاقلية محتكرة لنفسها حق الكلمة وعايزة تفرض رايها على الاغلبية

5- ايه وجه تعطيل الانتاج في البلد و عدم امكانية البناء لما يبقى فيه مظاهرات يوم الجمعة؟؟؟ طيب ما هو بقالنا كذا جمعة مفيش مظاهرات, ايه اللي معطل الانتاج؟؟
فكرة الجمعة بعد ما فشلت مظاهرات الثلاثاء وبعدين مين قال لحضرتك ان مصر كلها اجازة يوم الجمعة وايه الهدف اصلا من التظاهر كل يوم جمعة ؟
واللى معطل الانتاج حاجات كتير جدا منها ان اي حد عايز يعمل فوضي بيعملها والحجة جاهزة ان مطالبه هي مطالب الثورة سواء بقة اتظاهر يوم جمعة او طول الاسبوع

6- ازاي عايز الناس متعملش أعتصامات و لا تطلب مطالب فئوية و هما شايفة ان فيه ناس مطالبهم بتتحقق فورا, و ناس تانية محدش بيسأل فيها. اللي أعرفه ان يا أما من الأول تعلن انه حيكون صعب تحقيق أي مطالب دلوقتي يا أما تدرس المطالب كلها انما مش المفروض يكون فيه خيار و فاقوس. ده بالرغم من ان انا شايفة المظاهرات الفئوية دي انتهازية و انا ضدها تماما, انما مينفعش أمنع ناس من ممارسة حق ليهم حتى لو أختلفت معاهم.
دي فعلا الغلطة ان المجلس العسكري وحكومة شفيق ثم حكومة شرف استجابوا للماطلب الفئوية وكان المفروض رفضها والضرب بيد من حديد على كل من يتظاهر
لكن بعذرهم اذا كان شرف اصدر قانون منع التظاهر للحد من التظاهرات الفئوية والانتهازية اتقلبت الدنيا عليه واصبح خائن للثورة ويجب عزله

7- ايه علاقة الاستفتاء و نعم و لا بالموضوع؟؟ ايه علاقته بالديموقراطية؟؟؟ هو الناس نازلة تطلب الغاء نتيجة الاستفتاء و رفض التعديلات و لا ايه؟؟ مين أصلا اللي قال ان كل النشطاء رفضوا التعديلات؟؟ أنا أعرف أكتر من أسم معروف منهم قال نعم زي عبد الرحمن يوسف و نوارة نجم, و عصام شرف نفسه قال لأ. بجد مش فاهمة ايه النغمة الجديدة دي ان كل واحد عايز يثبت وجهة نظره يقولك ده رأي ال77% الي قالوا نعم.

العلاقة ان الاغلبية اللي قالت رايها بيتم التسفيه منها
العلاقة ان الاغلبية قالت انها موافقة على تصرف المجلس العسكري والاقلية رافضة
العلاقة ان كتير جدا من الى قالوا لا شايفين انهم بس اللى بيفهموا ولازم الشعب المصري كله يطيعهم ومنهم اللى بيدعوا للمظاهرات الان
ومش فاهم ايه نغمة ان الكتلة الفاعلة ال23% هم اللى بيفهموا وان لابد الشعب المصري كله يطيعهم وان الاغلبية جاهلة وتحتاج تعلم وتثقيف سياسي حتي تليق براي الاقلية وتصبح جاهزة ان يحكموها
ومش فاهم يعني ايه اي حد يخالف من يدعو انهم ثوار الان يصبح لجنة الكترونية وحزب وطني والكلام اياه

المشاركة الأصلية كتبت بواسطة wawoo

يا استاذ hh لا تنتظر اجابات على كل تسئالاتك ..كل الموضوع ان هناك من لا يهتم كثيرا بالثورة و خلافة يهمها فقط اكل عيشها يشتغل و خلاص و افكار الحرية و الدمقراطية دى لن تفيدهم فى شىء ..
نفهم من كدة ان عصام شرف هو كمان لا يهمه الثورة لان الرجل اصدر قانون بمنع التظاهر وبيطالب الشعب بالانتاج وبيقول ان التظاهر الان يضر البلد ؟؟؟؟؟
وهل الحرية والديمقراطية لا تاتي الا بالتظاهر اليومي ودون عمل ؟
هل الثورة ستستمر ثورة حتي النهاية ام لابد من بناء البلد ؟
رحم الله الشيخ الشعراوي

انا شوفت يوم الاستفتاء اللى نزل فية 18 مليون فرد من جميع الاعمار و المستويات ..شوفت ناس والله مش عارف ان فى استفتاء اصلا ولا يهمها اية اللى يحصل و دول اكيد نسبة كبيرة من لم يذهبو من 27 مليون الاخاريين اللى ليهم حق التصويت ...
وشفت كل دول العالم لما بيحصل استفتاء او انتخابات ايا كانت النتيجة الكل بيحترم راي الاغلبية الا في مصر حيث يتم اتهام الاغلبية بالجهل وانها تخضع للتوجيه وانها لا تستحق الفكر العبقري للاقلية

شوفو الفيديو دة من الدقيقية العاشرة 10..و ازى د علاء الاسوانى بيتكلم عن عمل الللجنة الالكتورونية للحزب الوطنى بتشتغل ازى و بتسف اراء الكتاب و المفكرين حتى لا يتاثر بيهم الكثيرين و شارح الهدف المباشر من هذة الخطط الخبيثة و هو التاثير على الكتلة الغير فعالة اللى لم تشارك فى الثورة للضغط عليها عشان تكرة الثورة و اظن دة يفسر الكثير مما تقراء الان ..

ومين علاء الاسواني اصلا ؟ كاتب روايات انت تعرف ما بها وانا وغيرنا الكثيرين
وهل اي معارض لراي الاسواني يصبح لجنة الكترونية ؟
ومن قال ان الاسواني مفكر ؟؟؟؟
هو مجرد مؤلف روائي فقط لا غير
وجديدة حكاية الكتلة غير الفاعلة دي اللى ظهرت بعد االلجنة الالكترونية وبعد جهل الشعب المصري وبعد تدين الاستفتاء منتظرين اخر عبقريات الاسواني في وصف معارضيه واعتبار نفسه وحده الصواب
متهيالي المفروض الاسواني وغيره يعرفوا حجمهم عند الشعب المصري بعيدا عن التليفزيون والجرائد من خلال نتيجة الاستفتاء حين دعوا جميعا لقول لا وملئوا كل البرامج والمحطات ونزلوا اعلانات فيها وفي الصحف اليومية صفحة كاملة وفي النهاية الشعب لفظم

المشاركة الأصلية كتبت بواسطة skybird

مطالب مشروعة
اويد الدعوة بشده
وده اقوى اعلان ان
المرحلة الثانية من الثورة هتبدأ الجمعة القادم 1 ابريل
(الثورة 3 مراحل)

سكاي بيرد
سئلتك عن الجملة دي ومردتش عليا
ووالله وبحس نية بسئلك تاني
هي الثورة 3 مراحل ؟
والكلام ده من امتي ؟
ومحدش عارف الموضوع ده ليه ؟
ولو فيه حد عارف مين الى عمل المراحل وليه البعض فقط يعرفون عنها
عارف بسئلك ليه ؟
علشان خايف بعد كدة يقال ان المراحل دي مطالب الثورة من البداية