هو ليه الناس مصرة تخلط الأوراق ببعض؟؟؟
ايه علاقة الدعوة للمظاهرة بالبرادعي بالديموقراطية؟؟؟
أولا المظاهرة طلباتها كالتالي:
1- الأسراع في محاكمة كبار الفاسدين و علي رأسهم مبارك و ثلاثي الشر : زكريا عزمي و صفوت الشريف و فتحي سرور .
2- حل الحزب الوطني اساس الخراب و الفساد في بلادنا .
3- الأفراج عن معتقلين الرأي الذين اعتقلهم الأمن المركزي مسبقا و الشرطة العسكرية حديثا .
4- الأسراع من مصادرة اموال الطغاة و رجال الأعمال الفاسدين و تجميد كل ارصدتهم في كافة بنوك العالم و اولهم ال مبارك , و تطهير الأعلام الفاسد الذي يدافع عنهم و يؤيد ثورتهم المضادة .
5- التأكيد علي حرية الرأي و التظاهر السلمي و عدم العمل بأي قانون يصدر لتقييد رأي الشعب الذي يستمد الجيش منه شرعيته .
ايه اللي شايفينه مش مطلب عادل و مشروع؟؟؟؟ و ايه علاقة المطالب دي بالاستفتاء أصلا؟؟؟؟ على فكرة النشطاء بتوع الثورة مش كلهم قالوا لأ, فيه نسبة كبيرة منهم قالت نعم. انما كدة كدة نعم و لا دول كانوا على التعديلات الدستورية ملهومش ادنى علاقة بالمطالب دي اللي هي مش جديدة أصلا.
هي الحجة الجديدة بعد أحترام مبارك و الخوف من الفوضى و الفراغ الدستوري, بقت ال77% نعم؟ أي حاجة الحكومة و الجيش عايزينها حتبقى عشان ال77% نعم؟؟؟ كالعادة مغالطات و كلام ملهوش علاقة ببعضه.
ثانيا هو البرادعي ماله برضه بالموضوع ؟؟؟ البرادعي هو اللي دعا للمظاهرة؟؟؟؟ بجد مش قادرة أفهم ايه التربص و الكره ده للراجل.عمل ايه البرادعي بشع كدة عشان الناس تبقى بتتلكك كدة عشان تهاجمه؟؟؟؟ بجد غسيل المخ اللي الحكومة عملتوا للناس على مدى أكتر من سنة تأثيره فظيع. مش بأقول ان كل الناس المفروض تأيد البرادعي, عادي جدا ان حد يكون مش عاجبه أو مختلف مع أفكاره او تصرفاته انما بجد الغل اللي جوة بعض الناس ناحيته ده غريب قوي.
و بعدين ليه الناس أعتبرت نسبة نعم في الاستفتاء هزيمة للبرادعي؟؟؟ أفهم من كدة انكوا بتعتبروا ان ال 22% اللي قالوا لأ مؤيدينه؟؟ ده على كدة بقى شعبيته كاسحة. ما هو كل مرشحي الرئاسة اساسا قالوا لأ فلما يبقى البرادعي بس اللي أنصاره سمعوا كلامه و قالوا لأ و شكلوا النسبة دي, يبقى بعد ما يعمل حملة انتخابية بقى و يوصل للناس البسيطة حيكتسح بدون منازع!!!!!!!!!!!
المفضلات