الموضوع: أجمل وأظرف الأمثال الشعبية ... شارك معنا

"مركب السلايف بارت .. ومركب الضراير مشيت (أو دارت مش فاكر)"
السلايف اللي هن زوجات الأشقاء يعني مراتي ومرات أخويا يبقوا سلايف، وده مثل يبين المحبة والمودة اللي بين السلايف لدرجة إن مركبهم عطلت في حين إن مركب الضراير مشيت :)
بجد أمثال حكيمة، كلمتين بيلخصوا معاني كبيرة وبيرسموا صورة حلوة في نفس الوقت كأنها اسكتش

"الدنيا تلاهي"!! حد يعرف باقي المثل؟
المثل بالكامل: "الدنيا تلاهي .. عبوا المَواهِي .. وسابوها زي ماهِي"
وهي عن قصة ثلاثة لصوص قاموا بسرقة كبيرة وعبئوا غنائمهم في "مواهي" وهي آنية كبيرة أو أجولة، وعند القسمة طمعوا فيها، فاتفق اثنان على قتل الثالث واقتسام حصته، فطلبوا منه تحضير الطعام لهم بينما يقومان بالتقسيم، فغاب عنهما ولما عاد بالطعام عاجلوه بالخيانة وقتلوه، وتناولوا الطعام فرحاً بالغنيمة، ولكن الثالث كان قد سمم لهم الطعام طمعاً في الغنيمة لنفسه، فيموت الثلاثة بجوار غنائمهم المعبأة في المواهي، وعندما مر عليهم الناس انطلقت هذه المقولة "الدنيا تلاهي .. عبوا المواهي .. وسابوها زي ماهي"

أظن أن هذه القصة لها أصول في العهد الجديد

المشاركة الأصلية كتبت بواسطة DODY

المثل ده هو الثرجمة الافرنجى للقرد فى عين أمه غزاااااااااااااااااااااال

هو المثل ده طلع افرنجى ؟؟؟ !! ... طيب اسبله كده يا مرسى .............. :)

المشاركة الأصلية كتبت بواسطة mohamed_88sk

أستاذ Taotao أولا السلام عليكم
ثانيا أسف أنا لسه داخل عالنت حالا ولسه شايف تعليق حضرتك
ثالثا....
طبعا مع حضرتك إن في مكفوفين كتير جدا ربنا مباركلهم ... وكمان بتحدوا الإعاقة دي وبيثبتوا جدارة أكتر من اللي ربنا رازقهم نعمة الإبصار
بس أنا اللي أقصده (الحظ لما يأتي))
هو مين اللي بيوزع الأقدار ؟؟؟
مين اللي وزع الحظوظ ؟؟؟

دي كلها حاجات بتاعة ربنا سبحانة وتعالى تمام ...
والعياذ بالله فكده يبقى معناها أتهام بعدم الحكمة لموزع الأرزاق ...
زي مثل إن جاك الأعمى قال عشاه هو أحن من اللي عماه .....

أنا سألت فيهم مشايخ عشان كده مش بتكلم إفتراء ولا مجرد كلام ...
لا إحنا بجد شعب بنقول كلام بصراحة من غير ما نفهمه

يا ريت بجد نراجع اللي بيتقال ..
وبعدين حضرتك يا سيدي الفاضل محدش جاب سيرة ألوان ولا إلحاد....

سيدي الفاضل ده بيقال أنه من شغل الصوفيه و شغل أعداء الأسلام...
ياريت يا جماعة نعرف بنقول إيه ولا أزكي نفسي على الله ...
إحنا عندنا أمثال بجد مصايب بس للأسف مش فاكر بعضهم ..
يعني مثلا زي يدي الحلق للي بلا ودان ..وده بيقال لما واحد ربنا بيفتح له ويكرمه ..
تخيل حضرتك واحد رايح يدي لست حلق وهو عارف أنها ودانها مقطوعه ماينفعش تلبس حلقان أو واحد جايب لأخر جزمه (أكرمكم الله وأعزكم) وهو عارف أنه والعياذ بالله مقعد .. يبقى ده إيه فما باللك إن المثل يقال أيضا على موزع الأرزاق ..
أعذروني عالأطاله وأسف إني عاوز أوضح وأبين وجهة نظري ..

وعليكم السلام ورحمة الله وبركاته
ومتشكر على حرص حضرتك في الرد السريع على المداخلة، أنا بس اتخضيت من كلمة "تصادم مع العقيدة" على مثل بسيط وحكيم وظريف جداً
يا سيدي المثل بيقول "الحظ لما يواتي، يخلي الأعمى ساعاتي" يعني في الظروف المواتية ممكن أي حاجة -وأغرب حاجة- تحصل، وممكن يكون تفسيره كمان إن في ظروف معينة يوضع الشخص الغير مناسب في مكان (ومكانة) غير مناسبة بس كدة بمنتهى البساطة
انظر لجميع معدومي الكفاءة الذين يتقلدون مناصب قيادية وإدارية، في نظري لا يختلفون كثيراً عن الأعمى في وظيفة ساعاتي، والطرق التي وصلوا بها لهذه المناصب عن طريق "حظ مواتي" أو "قرع يوماتي" ممكن نمشيها "قرع يوماتي يرقي الأعمى ساعاتي" تمشي كدة؟ :)
وبعدين انا مش بالع حكاية لوي رقبة الكلمات ونعصرها وننفضها عشان نطلعها حرام بالعافية، الحظ ده يبقى الرزق وبما إن الأرزاق بإيد الله وبما إن الأرزاق يوزعها الله كيف يشاء والمثل بيقول إن الحظ ممكن يخلي الأعمى ساعاتي، يبقى احنا كدة بنتعدى ع الذات الإلهية -والعياذ بالله سبحانه وتعالى- وعقيدتنا مهزوزة !! كدة؟! لا مش كدة ابدا، ولو الموضوع كدة أنا ممكن اخلي اي كلمة تتقال حرام واعتداء ويصطدم بالعقيدة وكل الكلام اللي يودي في داهية كمان، سهلة جداً يعني.

بالنسبة للأمثال اللي كان عليها جدل "رزق الهبل ع المجانين" والمثل اللي حضرتك ذكرته "يدي الحلق للي بلا ودان" وبرضه انا شايف ان اللي قوم الهوجة دي واحد -ذو غرض- قعد يلوي في المعنى ويلونه على مزاجه لحد ما خلاه تعدي على الذات الإلهية (مَن تعدى هو مَن فكر التفكير الأعوج ده وهو اللي حط في أذهان الناس معاني عمر ما حد فكر فيها، أجدادنا بيقولوا الأمثال دي بقالهم مئات السنين جناب الشيخ بتاع أول امبارح بقى هو اللي اكتشف مالم تستطعه الأوائل؟َ! ولا سيادته أفقه وأعلم من كل المشايخ في 300 سنة اللي فاتوا؟؟!!)
"يدي الحلق للي بلا ودان" زي مانا طول عمري فاهمه (حتى جاء مشايخ آخر زمن ليلووا عنقه ويحولوا معناه لكفر صريح) أنه تسليم مطلق لحكمة الله في خلقه. فلا اعتراض على حكمته ولو أعطى حلقاً لمن لا أذن له فهو تسليم مطلق، وليس استنكاراً ولا اعتراضاً حاشا لله(وبعدين هو لازم يكونلي ودان عشان استفيد من الحلق؟ أنا ممكن ابيعه والجرام النهاردة بـ 130 جنيه :) مش رزق ده؟)
"رزق الهبل ع المجانين" زي مانا طول عمري فاهمه برضه، إن الله يرزق الأهبل عن طريق مجنون، أو أن قليل الكفاءة والصنعة يأتيه رزقه -من الله قطعاً-عن طريق من هو أقل منه موهبةً وكفاءة (ولو حبيت أمثلة هاتلاقي كتير بس المثل ده بييجي في ذهني كل ماشوف محطة الإعلانات إياها بتاعة البطانية العجيبة تدفيك في الشتا وتبردك في الصيف، الوحيدة 4 وش، وش للصيف ووش للشتا ووش لعيد الفطر والمفاجأة وش كمان لعيد الأضحى .... هِبل، واللي بيتصل ينفعهم أكيد مجنون مش كدة ولا ايه؟).
يعني النظرية انت بصيت للمعنى ازاي، والمنطق اللي ورا الكلام كان ايه، لان الكلام العامي بدون إعراب ولا صرف ممكن يحمل الكثير من المعاني، وقراءة المثل دون التعرف على سياقه يفقده الكثير من معناه.
كون بقى واحد يخرج المثل من سياقه، ولوى معناه ويألف له معنى بعيد جداً عن معناه المستقر في وجداننا الجمعي، يبقى العيب في هذا الشيخ وفي تفكيره الغير سوي
كلمة أخيرة تعليق على "شعب بنقول الكلام من غير مانفهمه" هو احنا شعب فيه العِبر صحيح، إنما نقول الحاجة من غير ما نفهمها دي صفة في البغبغانات بس، مشايخ ال Y2K اللي عاملين نفسهم أوصياء علينا دول هم اللي كل همهم يزرعوا فينا إن كل حاجة حرام وإن كل اللي بنقوله يندرج تحت بند الكفر أو الإلحاد وإن مفاتيح العلم في إيديهم وبس (طبعاً عشان سوقهم تفضل رايجة)
هذا والله أعلم
وبعدين خلينا في الأمثال اللطيفة، الموضوع عن أمثال ظريفة مش أمثال مخيفة :D
شكراً لسعة صدرك

المشاركة الأصلية كتبت بواسطة TaoTao

وعليكم السلام ورحمة الله وبركاته
ومتشكر على حرص حضرتك في الرد السريع على المداخلة، أنا بس اتخضيت من كلمة "تصادم مع العقيدة" على مثل بسيط وحكيم وظريف جداً
يا سيدي المثل بيقول "الحظ لما يواتي، يخلي الأعمى ساعاتي" يعني في الظروف المواتية ممكن أي حاجة -وأغرب حاجة- تحصل، وممكن يكون تفسيره كمان إن في ظروف معينة يوضع الشخص الغير مناسب في مكان (ومكانة) غير مناسبة بس كدة بمنتهى البساطة
انظر لجميع معدومي الكفاءة الذين يتقلدون مناصب قيادية وإدارية، في نظري لا يختلفون كثيراً عن الأعمى في وظيفة ساعاتي، والطرق التي وصلوا بها لهذه المناصب عن طريق "حظ مواتي" أو "قرع يوماتي" ممكن نمشيها "قرع يوماتي يرقي الأعمى ساعاتي" تمشي كدة؟ :)
وبعدين انا مش بالع حكاية لوي رقبة الكلمات ونعصرها وننفضها عشان نطلعها حرام بالعافية، الحظ ده يبقى الرزق وبما إن الأرزاق بإيد الله وبما إن الأرزاق يوزعها الله كيف يشاء والمثل بيقول إن الحظ ممكن يخلي الأعمى ساعاتي، يبقى احنا كدة بنتعدى ع الذات الإلهية -والعياذ بالله سبحانه وتعالى- وعقيدتنا مهزوزة !! كدة؟! لا مش كدة ابدا، ولو الموضوع كدة أنا ممكن اخلي اي كلمة تتقال حرام واعتداء ويصطدم بالعقيدة وكل الكلام اللي يودي في داهية كمان، سهلة جداً يعني.

بالنسبة للأمثال اللي كان عليها جدل "رزق الهبل ع المجانين" والمثل اللي حضرتك ذكرته "يدي الحلق للي بلا ودان" وبرضه انا شايف ان اللي قوم الهوجة دي واحد -ذو غرض- قعد يلوي في المعنى ويلونه على مزاجه لحد ما خلاه تعدي على الذات الإلهية (مَن تعدى هو مَن فكر التفكير الأعوج ده وهو اللي حط في أذهان الناس معاني عمر ما حد فكر فيها، أجدادنا بيقولوا الأمثال دي بقالهم مئات السنين جناب الشيخ بتاع أول امبارح بقى هو اللي اكتشف مالم تستطعه الأوائل؟َ! ولا سيادته أفقه وأعلم من كل المشايخ في 300 سنة اللي فاتوا؟؟!!)
"يدي الحلق للي بلا ودان" زي مانا طول عمري فاهمه (حتى جاء مشايخ آخر زمن ليلووا عنقه ويحولوا معناه لكفر صريح) أنه تسليم مطلق لحكمة الله في خلقه. فلا اعتراض على حكمته ولو أعطى حلقاً لمن لا أذن له فهو تسليم مطلق، وليس استنكاراً ولا اعتراضاً حاشا لله(وبعدين هو لازم يكونلي ودان عشان استفيد من الحلق؟ أنا ممكن ابيعه والجرام النهاردة بـ 130 جنيه :) مش رزق ده؟)
"رزق الهبل ع المجانين" زي مانا طول عمري فاهمه برضه، إن الله يرزق الأهبل عن طريق مجنون، أو أن قليل الكفاءة والصنعة يأتيه رزقه -من الله قطعاً-عن طريق من هو أقل منه موهبةً وكفاءة (ولو حبيت أمثلة هاتلاقي كتير بس المثل ده بييجي في ذهني كل ماشوف محطة الإعلانات إياها بتاعة البطانية العجيبة تدفيك في الشتا وتبردك في الصيف، الوحيدة 4 وش، وش للصيف ووش للشتا ووش لعيد الفطر والمفاجأة وش كمان لعيد الأضحى .... هِبل، واللي بيتصل ينفعهم أكيد مجنون مش كدة ولا ايه؟).
يعني النظرية انت بصيت للمعنى ازاي، والمنطق اللي ورا الكلام كان ايه، لان الكلام العامي بدون إعراب ولا صرف ممكن يحمل الكثير من المعاني، وقراءة المثل دون التعرف على سياقه يفقده الكثير من معناه.
كون بقى واحد يخرج المثل من سياقه، ولوى معناه ويألف له معنى بعيد جداً عن معناه المستقر في وجداننا الجمعي، يبقى العيب في هذا الشيخ وفي تفكيره الغير سوي
كلمة أخيرة تعليق على "شعب بنقول الكلام من غير مانفهمه" هو احنا شعب فيه العِبر صحيح، إنما نقول الحاجة من غير ما نفهمها دي صفة في البغبغانات بس، مشايخ ال Y2K اللي عاملين نفسهم أوصياء علينا دول هم اللي كل همهم يزرعوا فينا إن كل حاجة حرام وإن كل اللي بنقوله يندرج تحت بند الكفر أو الإلحاد وإن مفاتيح العلم في إيديهم وبس (طبعاً عشان سوقهم تفضل رايجة)
هذا والله أعلم
وبعدين خلينا في الأمثال اللطيفة، الموضوع عن أمثال ظريفة مش أمثال مخيفة :D
شكراً لسعة صدرك

احسنتم يا مولانا !! ;)