الموضوع: رابطة ملاك الكيا برايد - كلاكيت تانى مرة!

المشاركة الأصلية كتبت بواسطة h a r d

السلام عليكم
يارب الجميع يكون بخير
انا بس لفت انتباهى موضوع الجركن ده
فعاوز انصح نصيحه انا شايف ان فى الجركن شويه صغيره فخمنت انك حطيتوا كلوا

بس غلط انك تحط ال 4 لتر كلهم او 3 لتر حسب الريداتير ميه خضرا بس
الميه الخضرا يجب الا تتعدى واحد لتر والباقى ميه عاديه او ميه مقطره
ولو عاوز تبعد اكتر عن مشاكل الميه الخضرا يبقى هتجيب ميه مقطره
والميه المقطره مش بتاعت البطاريات ولكن بتاعت التكييف

الميه الخضرا بس مش بتعمل بس على عدم تكون الصدا بس بتعمل على ازاله الصدى وبتكون حاميه على لردياتير
فازاله صدى هيسدلك الردياتير غير انها حاميه عليه
عشان كدا بنقول واحد لتر بس معاه ميه مقطره او مياه عاديه

بالتوفيقـ

المشاركة الأصلية كتبت بواسطة h a r d

بص يا باشا انت مترجعش الجركن خليه معاك وحط واحد لتر منوا بس وبعد كدا حط ميه عاديه او ميه مقطره
او رجعوا وهات ميه مقطره
بالنسبه لتنظيف الريداتير خليه واحد موثوق منوا عشان ميعملش مشاكل بعد كدا

بالنسبه بعد التنظيف اكيد هتحس ان العربيه فاقت عن الاول
بالنسبه للميه الخضرا مش هتحس بفرق بس على المدى الطويل هتاثر وهتسبب مشاكل كدا انت بتبعد عن اى مشاكل باذن الله

وشكرا يا جماعه على سعه الصدر وانكوا سمحتولى اتكلم معاكم

وشكرا خاص لحبيبى الى قال لما يرجع من الشغل وبقالو يومين لسه مرجعش:ka_che1[1]:

اهلا بيك معانا ويا رب تبقى منورنا دايما كده .. بس معلش خلينى اختلف معاك :) الكلام اللى انت قلته صح ومفيهوش اى مشكلة بس فى حالات وحالات ..
انا هقول على اللى انا اعرفه ورزقى على الله :) ... يمكن اكون من اجدد الناس اللى عندها خبرة بالعربيات بس الحمد لله انا دايما بحب اقرا فى اى حاجة حتى قبل ما اجيب العربية ...
الفرق بين المياة المقطرة والمياة الخضرا ان المياة الخضرا متضاف عليها ايثيلين جليكول علشان يرفع درجة غليان المياة.
اللى انا اقصده بقى ان كلام حضرتك صح فى حالات وحالات ده هوضحه دلوقتى ... اللى اعرفه ان المفروض تركيز الايثيلين جليكول ميزيدش عن 50-60% فى المياة الخضرا والا هيبدأ يضر أكتر ما يفيد وده بيأكد ان كلامك صح بس فى حاجة تانية.
فى تقسيمتين ممكن نقسم بيهم أنواع المياة الخضرا .. نوعها زى شيل ... موبيل كولانت .. أيدا
وممكن كمان نقسمهم على حسب التركيز ... بيتباع عبوات تركيزها بيكون عالى ودى فى الغالب بتكون لتر بالكتير انت بتجيبها وتخففها بمياة مقطرة زى ما قلت... وفى الجراكن ال4 وال 5 لتر ودى تركيزها مبيزيدش عن 35% ودى انت ممكن تملى بيها الريدياتير على طول من غير ما تخففها ولو نقصت بعد كده ممكن تزودها بمياة من نفس النوع لو فايض معاك ولو مش فايض معاك بدل ما تشترى جركن 4 لتر كمان علشان تزود بس اشترى مياة مقطرة وزود بيها وعلى فكرة الايدا اللى فى الصورة دى تركيزها اصلا 5% يعنى قليل.

المشاركة الأصلية كتبت بواسطة المناور

تصدق وتؤمن بالله أنا لسه شغال لغاية دلوقتى وحكمل شغل لغاية بكرة ، الله يقطع الشغل وسنينه

ربنا يكووون فى عوونك وتخلص من الشغل ده على خير

المشاركة الأصلية كتبت بواسطة may_moon911

اها زي مسند الحاجة الساقعه كدا
تمام بس حضرتك لقيت مقاس علي اد الحته اللي بين الكرسيين بالظبط !!!!!
هادور لحضرتك كدا علي فيديو لطريقه التركيب و ان شاء الله يركب و عادي لو ما نفعش الواحد ما بيتعلمش ببلاش بردوا

اه لقيت عادى .. هم تقريبا بيبقى ليهم مقاسات معينة بس مش متأكد من الحتة دى .. انا لسه مجبتش مسامير تانية .. عاوز اجيب بس مكسل ... بس يعنى قبل المغرب بشوية كده هنزل أركبه إن شاء الله علشان انا حاطه كده بين الكرسيين وامبارح نزل جنب الفتيس قرفنى فى عيشتى وانا بنقل :)

المشاركة الأصلية كتبت بواسطة may_moon911

العربيه كانت بتسخن علي الاخر لدرجه ان عداد الحراره بيوصل للتلات تربع و بطر اقفل العربيه و اسيبها شويتين تلاته .رحت لواحد قالي دا الردياتير مخروم و بص الصدي اللي عاملو قلتولو اشطه الحموا ف الاول قالي مش نافع و هاركبلك واحد جديد قولتلو لا اللحمو ف الاول قالي لا و بعدين راح لحمو يومين بالظبط و رجعت العربيه تسخن تاني رحتلو تاني قالي دا في خرمين كمان هالحمهوملك و كلو هايبقي تمام و بردوا مافيش يومين رجعت ريما لعادتها الاديمه ف رحت للميكانيكي بتاعنا قالي دول حراميه الردياتير اصلا دايب مش مخروم ولا حاجة و لازم يتغير و هوا كان بيقولي مخروم عشان يقبض فلوس و خلاص و غرمني ابن الازينه 25 جنيه علي الخرم الواحد ههههه يالله المهم غيرت الردياتير و مالقتوش الا عند الجندي اللي ف جسر السويسدا بعد مالفيت مصر كلها لدرجه اني كنت بقول لو ماقيتوش هاجيب اي واحد بتاع اي نوع تاني و خلاص و خدتوا مش فاكر بكام بس هابص علي الفاتورة و ابقي اقلوكوا و ركبتو بس كانت المياه بتخلص منو بطريقه غريبه جدا بس طلع من غطا الردياتير مش حلو بيسرب البخار ف الضغط جوا الردياتير مش متعادل ف مش بياخد ميا من القريه
المهم دي حكايتي مع الردياتير و يا ريت اللي بعد الشر عندو حاجة فيه يروح لواحد ابن حلال علي طول بدل ما يدوخ السبع دوخات عند ناس مالهاش ضمير
و ربنا مع الكل ان شاء الله

امين يا رب وربنا يبعد عننا الصنايعية اللى معندهمش ضمير

المشاركة الأصلية كتبت بواسطة may_moon911

دا انا جبت جركن سعودي امبارح بالليل 4 لتر اروح ارجعوا بقي و اجيب واحد 1لتر و اقولو عايز مياه مقطره للتكيف و هابقي اروح بيهم المحطه عشان ينضفولي الردياتير و يحطولي دول و هابقي اقولكم ان شاء الله عالنتيجه

لا هى مش مياة مقطرة للتكييف هو يقصد المياة اللى بتطلع من التكييف .. هى بتبقى مقطرة .. :) وممكن تشترى بدالها مياة مقطرة اللى بتتحط للبطارية

بقولكو ايه ... ما كل واحد يعرف نفسه علشان نبقى عارفين بعض وعارفين بنكلم مين :)

انا هبدأ بنفسى ..
أحمد الصواف .. 23 سنة مهندس كهربا لسه متخرج السنة اللى فاتت دى بس بشتغل Web Developer علشان مبحبش شغلنا اوى :)