الموضوع: دليل شامل عن الهيونداي ماتريكس بواسطه اسئله الاعضاء , قصة حب مع المصريين ..متجدد

المشاركة الأصلية كتبت بواسطة bassam nagy

طب الحمد الله انهم ظبطوا عداد البنزين
مشكلة التوكيل ان الصيانة بتتم فى وقت طويل جدا

فعلا يا أخى يا بسام الحمد لله إن المشكله دى إتظبطت عشان ما كانش ينفع أمشى كده
وبأعتقد إن الموضوع ده مأخدش وقت كتير قوى عشان أنا طلبت منهم مجرد الطلبين دول
و كذلك عشان الشبورة دى فما كانش فى زحمة كتير الصبح
الزحمة جت بعد الظهر بشويه

المشاركة الأصلية كتبت بواسطة dodocai

الحمدلله أنهم وفوا بشىء ، وألف مبروك والحمدلله ان ربنا سترها معاك فى الشبورة

رجاء لو تسمح اجابة بعض الاستفسارات
1- هل أسفل تابلوه السيارة مفتوح لدرجة انك ممكن تشوف الأسلاك تحت التابلوه
2- هل يوجد مشاكل من ناحية الفتيس أو الدبرياج
3- هل تم حل الحدفة اليمين بالكامل وماذا تم لتصليح هذا العيب
4- هل السيارة فعلا تركى
5- نوع البطارية جافة ولا عادية
6- نوع الاطارات هل هو البيريللى ولا تم تغييره
7- هل هناك سخونة تحدث أسفل التابلوه
أعتذر عن الاطالة

و الله يا أخى يا dodocai ربنا ستر فعلا , و أنا بأنصح كل الناس بلاش يسافروا فى الشبورة دى عشان خطر جدا, و شفت بعينى حوالى أربع حوادث و لولا ستر ربنا كنت حشوف الخامسه بعينى فى عربيتى ( نسأل الله العفو و العافية )

و بالنسبه لأسئلتك : حجاوب بالترتيب

1- بصراحه مأخدتش بالى من حاجة زى كده , بس حشوف بكره إن شاء الله و أقولك
2- الفتيس إلى حد ما معقول بس حاسس إنه ناشف شويه ( يمكن عشان الجو برد) و المارشدير أنشف من السرعات بس أنا قرأت فى الموضوع هنا إن ده عادى فى المتركس , الدبرياج عادى
3- الحدفة بفضل الله إتظبطت, بس و أنا رايح لهم طاره الدريكسيون كانت مظبوطه , بعد ما إستلمتها منهم لاقيت عشان أمشى بالعربيه عدل فلازم أخلى الطاره ناحية الشمال سنه بسيطه ، طبعا ده مش مهم طالما العربيه ماشيه عدل و مش كل شويه أضطر أعدل وضع الدريكسيون عشان العربيه ما تنحرفش
4- السياره فعلا تركى عشان كان فى نسخه من ورقه الإفراج الجمركى ملحقه مع ورق العربيه و فيه قائمة بكل العربيات اللى جت على نفس الباخرة وفى الجدول لقيت رقم موتور و الشاسيه بتاع العربيه بتاعتى و مكتوب بلد المنشأ تركيا
5- نوع البطاريه سائلة
6- نوع الاطارات بيريللى
7- ما فيش سخونة أسفل التبلوه بحمد الله

نسيت أقولكم إنى لاحظت إن الكبوت عندى بيسخن قوى من الجنبين !!!! فسألت المهندس حسن و أكتر من واحد عنده هيونداى فقالوا لى إن ده عادى و ما فيش مشكله . المهم مؤشر الحراره فى التابلوه ما يعديش النص.
و لو فى أى أسئلة تانيه : فأنا فى الخدمة
أخوكم هشام

المشاركة الأصلية كتبت بواسطة dodocai

أستاذ/ هشام الموقر

أشكر لك ردك واهتمامك البالغ وهذا إن دل على شىء انما يدل على ذوقك البالغ:
والحمدلله انه ربنا سترها معاك ، ورب ضرة نافعة ، أعتقد انك لو ذهبت فى يوم أخر كنت سترى الزحام على أصوله وأعتقد أن أحد الأسباب الرئيسية لسوء خدمة غبور هو الزحام ، موضوع الدريكسيون حصل معى فالآن الدريكسيون غير مظبوط تماما بحيث أن السيارة لكى تكون فى وضع استقامة العجل قد يحدث أن علامة هيونداى تنحرف بشدة جهة اليمين أو اليسار ، مع العلم أن هذه الحدفة لم تختفى بل أصبح هناك حدفة أخرى جهة اليسار ولكن هذا الحدف لا يتم الا بترك المقود ، وبما أنى فى الخارج لن أستطيع الذهاب لحل هذه المشكلة ، ما وددت أن أطمئن عليه هو أنهم لديهم الامكانية لحل هذه المشكلة ، وبالسؤال عن العيب أفاد أحد الأخوة أنه عيب فى الكاوتش.
أما بالنسبة للسخونة أسفل التابلوه أرجو منك ملاحظة الأمر أثناء سيرك بالسيارة.

وتقبل تحياتى

أخى العزيز dodocai
اشكرك على كلامك الجميل لى و انا و الله العظيم سعيد جدا بمشاركاتى معكم فى هذا الموضوع المفيد
فواجب علينا جميعا أن نفيد و نستفيد و ان نتبادل خبراتنا لتعم المنفعه بإذن الله

بالنسبه للسؤال اللى انا مجاوبتش عليه المرة اللى فاتت :
1- هل أسفل تابلوه السيارة مفتوح لدرجة انك ممكن تشوف الأسلاك تحت التابلوه ؟
انا بصيت تحت التابلوه فلقيت قدامى سلكتين مدلدلين كده !!
و قدام كرسى المدام لقيت ضفيرتين حلوين كده برده لكن و الحمد لله ماحستش ان فى فتحات ممكن يدخل منها هوا سخن

اما بالنسبه لغبور ابو رواش ففعلا زى ما حضرتك قلت : رب ضرة نافعة
لاننى فعلا لما رحت يوم الشبورة الجامده دى ماكنش فى زحمة لغايه الساعه 1200 بعد كده الدنيا إتزحمت جامد قوى لدرجه إن كل الكراسى اتملت و بعينى دول شفت زى ما يكون عيله بالكامل { اب و ام و اولاد } جايين يتفرجوا على عربيتهم و هى بتتظبط كأنهم فى رحله !!
يمكن يكون ده عشان عنوانه ما يتوهش و كل الناس بتستسهل انها تروحه

و يمكن عشان كده انا سمعت من واحد جارى كان عنده ماتركس موديل 2006 إن فرع غبور قليوب احسن من ابورواش , ربنا يسهل و اروح اشوف بنفسى
ده طبعا بعد ماعمل صيانه أول 1000 كيلو بإذن الله تعالى

المشاركة الأصلية كتبت بواسطة kareemman

يا جماعة انا عايز اعرف ايه مشاكل الماتريكس 2010 التركى المانيوال
احنا كنا خلاص شبة استقرينا عليها بس لما عرفنا انها تركى بدانا نقلق تانى
مش عارفين نعمل ايه
هل نصرف نظر عنها و نبدا ندور تانى ولا ايه النظام
و هل فى فرق كبير بين التركى و الكورى
انا تقريبا زيرو خبرة فى العربيات فمش هعرف احكم عليها كويس لو اشتريتها فعشان كده انا عايز اطمن من اهل الخبرة
و شكرا مقدما

اهلا و سهلا يا أخ kareemman
ماقدرش افيدك فى جزئيه هل فى فرق ما بين الكورى و التركى
ده لإنى ماجربتش اسوق ماتركس كورى و لسه شارى الماتركس التركى من عشر ايام بس

لاكنى سمعت من نفس جارى اللى كان عنده ماتركس كورى { وهو على فكرة بيتاجر فى العربيات } ان هيونداى لو كانت تقفيل كورى , تركى , جنوب افريقى بتبقى 100 100 , ده على حد تعبيره

و أكد لى كمان ان تركيا من فترة مش قليلة و هما بيجمعوا العربيات بمستوى عالى و ما فيش حد اشتكى منهم

اما بالنسبه لخبرتى فانا عن نفسى من ساعة ما إستلمتها لليوم إكتشفت ثلاثه مشاكل صغيرة بفضل الله و تم تظبيتهم :

1- نور الكابينة زائد لمبتين القراءه ما كانوش شغالين بسبب فيوز مهزوز
2- بعد ما إستلمت العربية و فولتها وجدت مؤشر البنزين ما بيتحركش من مكانه واللمبه البرتقالى منورة على طول كما لو إنى ماحطيتش بنزين , طلع فى مشكله فى العوامة و غبور ابو رواش غيروها لى ببلاش و الحمد لله
3- كنت حاسس و أنا رايح بحدفة يمين كده و برده ظبتوها لى بفضل الله ببلاش

ومن ساعتها أقدر اقول إن العربيه بسم الله ما شاء الله لا قوة الا بالله كويسة و مفيش اى مشاكل تانيه ظهرت فيها الى الأن
و خلى بالك من نقطة مهمة : انا كان عندى 128 موديل 2008 قبل دى فطبيعى ابقى موهوم حبتين بالفل اوبشن

و على فكرة عمى لسه شاري ماتركس 2010 من اسبوعين برده و زى الفل معاه
لولا انه بيشتكى ان العربيه عنده جهاز الانذار فيها حساس زياده عن اللزوم : يعنى اي عربيه تعدى من قدام عربيته تفضل تصوصوا و ماتوقفش الا لما هوا يوقفها بالريموت !!!!
فقولتله واضح ان عندك مشكله فى احد السينسورز فى الابواب كما لو ان حد فتح العربيه , و نصحته يروح ابو رواش عشان يصلحوا له العيب ده لاحسن البطاريه تفضى منه

و اتمنى من الله سبحانه و تعالى إن المشاكل تبقى صغيره و بسيطة كده و زيها زى اى نوع عربيات تانيه نتيجة للتخزين والشحن و كده

و اسال الله لك التوفيق و الهداية لما فيه الخير

اخوكم هشام

اطمن تماما انا معايا تركي و كوري والاتنين زي بعض مفيش فرق بينهم في الاداء والاتنين زي الفل و الحمد لله

المشاركة الأصلية كتبت بواسطة COLDMAN

اطمن تماما انا معايا تركي و كوري والاتنين زي بعض مفيش فرق بينهم في الاداء والاتنين زي الفل و الحمد لله

[glow1=#00ff51]
طيب يا أخى الله يطمنك و جزاك الله خيرا
[/glow1]