الموضوع: دليل لمشاكل الهوندا ... وأحسن الصنايعية ليها .

السلام عليكم يا شباب الهوندا

بعد ما أكثر من واحد من الهونداوية سألوا عن صنايعية كويسين فى كافة التخصصات ... أو اشتكوا من صنايعية بسبب شغلهم السئ فى الهوندا .
فكرت انى أعمل موضوع خاص بأفضل الصنايعية المتخصصة فى الهوندا فى كافة التخصصات من ميكانيكا - كهرباء - عفشة ... الخ .
وكل واحد من الهونداوية يكتب مشكلته كانت ايه ... وطريقة فهم الصنايعى ليها لمحاولة حلها كانت ازاى .
علشان يبقى ده دليل لينا كلنا فى معرفة المشكله ... وكمان لمعرفة قدرة الصنايعة على الفهم ومدى خبرته وشطارته فى التعامل مع المشكلة .
فياريت كل واحد ميبخلشى بانه يمدنا بمعلومات تفيد الكل ... وتجنبنا مشاكل التعامل مع الصنايعية اللى مش متمكنين من شغلهم .

طيب يا طارق انا هبدأ من اول السطر ... أول ما اشتريت العربية .
كنت واخد العربية وفيها مشكلة فى علبة الدركسيون واتفقت مع مالك العربية القديم انى هخصم ثمنها من ثمن العربية ورحت لمنير فى الحرفيين وقلتله مشكلتها فأستسهل وغيرها مع انها كانت محتاجة طقم اصلاح وانا برضوا قلت التغيير أفضل ، ده غير انه اثناء تغيير علبة الدركسيون وفك العلبة من داخل العربية باظت قطمة الدركسيون بسبب طريقة الفك .
وفى نفس الوقت غيرت عنده طقم سرفيس كامل من سيور وبلية كاتينة وكمان طنابير امامية يابانى وبسبب تغيير الطنابير كانت ممكن تعمل كارثة لان اللى ركبها عنده صانيعى مظبطشى شغله مظبوط وفكت حاجة من عند لقمة الفرامل وبوظت جزء من الطنابير الجديدة اللى مكملتش ساعتها 4 ايام .
المهم لولا ستر الله انى كنت قبل ما تسيب لقمة الفرامل كنت ماشى على 140 فى طريق مفتوح وأول ما عملت يوتيرن فكت حاجة من اللقمة وأكلت جزء من الطنابير وكنا فى الوقت ده فى عيد والصنايعية كلها مأجزة وكلمت منير ونزلى مخصوص الورشة وغيرلى اللقمة من غير ما يتكلم بسبب خطاً الصنايعى بتاعه .
الدروس المستفادة من اللى فات
لوعلبة الدركسيون فيها ثقل فى اللف بمعنى لو تقيلة فى لف الدركسيون لاكن مع المطبات والنقر مفيش حاجة محسوسة بخشونة أو تخبيك ... يبقى المشكلة ممكن تكون فى طقم اصلاح أو سرفيس عبارة عن اويل سيلات للعلبة لمنع تسريب زيت الباور واحكامه فى دورته أو ممكن تكون المشكلة فى طرمبة الباور أصلاً ونفس القصة يا تتصلح يا تتغير .
أما الطنابير اتغيروا كنوع من الدلع مع انهم ما اتخرطوش قبل كدة ... وكان ممكن يتعملهم خراطة لان حالتهم كانت مش وحشة اوى .
وان شاء الله هبقى اكتب المشاكل اللى اجهتنى مع العربية والصنايعية تباعاً .