الموضوع: دليل لمشاكل الهوندا ... وأحسن الصنايعية ليها .

انا هاقول مميزات وعيوب كل واحد فيهم :

1- مسعد وعدلى : كانوا كويسين جدا وبيشتغلوا بايديهم لحد بالظبط من اربع سنين كدة مشغلين كام واحد وهما قاعدين بيتكلموا وبيشرفوا فقط ومصنعيتهم غالية جداااااااااا , بس فاهمين ولو هيشتغلوا بايديهم ويقللوا المصنعية شوية يبقى تمام اوى

2- منير : منير بقى دة حوار لوحدة صنايعى حافظ العربية بس فية تريكات كدة مايعرفش يتعامل معاها , ممكن تيجى تقضى ال week end عندة لانة عشرى جدا ممكن تجيلة الساعة 12 الظهر تمشى من عندة الساعة 10 بليل وانت معملتش اى حاجة , يفتحلك 100 عربية فى وقت واحد مابيحبش يزعل حد , ويعز اوى الزوغان ممكن تتلفت كدة ماتلاقيهوش ويغيب بالنص ساعة والساعة نفسى اعرف بيروح فين؟؟؟ , واحلى حاجة فية يحب يعلم العيال بتوعة فى عربيات الناس يخلى العيال هما اللى يفكوا ويركبوا كل حاجة وخصوصا العفشة دية بردة نقطة بتخلى الناس تبعد عنة , مميزاتة بقى طيب جدا , مصنعيتة رخيصة , يحب يخدم بس لو الحاجة عندة يعنى ممكن يركبلك حاجة ومايحاسبكش عليها ولو قالك هجيلك 11 الصبح تلاقى جاى الساعة 1 الظهر وكمان مش واكل وياخدلة ساعة اكل وعلى بال مايظبط دماغة تكون الساعة 2:30 ويجى بقى يشتغل تلاقى واحد صاحبة عدى علية يتكلم بالساعات , يخلص تلاقى زبون اول مرة يجيلة هب يروح قافش فية ويطلع يجرب معاة تكون الساعة 4 العصر , يجى يقول للعيال فكلى مثلا الجنب دة يروح الواد قاعد ساعتين تحت بتهبب اية ياض ماعرفش يجى منير الله يخربيتك انا قولتلك اعملها كدة دية بتتعمل كدة هتفضلوا طول عمركوا كدة المهم فك الجنب يريح بقى ساعتين يكون فكلة كام عربية تانية كدة تلاقى الساعة 8 بليل وانت لسة ماعملتش حاجة يفضالك بقى يخلصك لحد الساعة 10 كدة ولو فيها حاجة تعالى بكرة كمل ماهو فاضى بقى
يعنى بجد قمة الكوميديا هناك تبقى واقف ولا فاكر ال ولا اى حاجة انت واقف بتتفرج وبتتعرف على مشاكل الناس

3- محمود المعادى : واحد صاحبى جربة تقدر تقول كويس بس عيبة انك لو بتموت قدامة مالوش دعوة غير لما يخلص العربية اللى فى ايدة حتى لو كنت هتربط صامولة بس ممكن يقعدك لاخر النهار ومصنعيتة غالية

4 - عصام : عصام دة كان شغال عند منير اصلا وسابة لخلافات او بقى خلاص الواد شرب الصنعة ,تشوف عصام دة تلاقية عندة 21 سنة طبعا مافيش الخبرة الكافية اللى تخلية يشتغل فى حاجات دقيقة فى محرك زى محرك الهوندا , روحتلة مرة انا ومحمود صاحبنا عشان يشوفلة الكربرايتر الحمد لله كان هيفوتلة الماتور بس انا قوتلة بس احنا جاين عشان كربراتير مش طقم شنبر كان معتوق معانا ساعتها , فاعتقد ان خبرتة لسة قليلة ومقدرش انى اغامر بية ابدا

5 - سمير : سمير نفس الحكاية كان شغال مع منير بردة ونفس قصة عصام بالظبط , بس سمير فية ميزة سريع وايدة كويسة فى العربية بس فى تشخيص الاعطال انسى روحنا بردة جربناة انا ومحمود فى عيب كدة المهم قعد يتحدانى فى عيب وقوتلة هيطلع من المارش وهو يقولى القطمة , ياعم من المارش وهو يقولى القطمة المهم قولتلة فك انت حر وفعلا غير القطمة ونفس العيب راح ركب وغير المارش العيب راح , طبعا شيلتة من دماغى ساعتها لان الناس دية تجيلها بعد عشرين سنة عشان تبقى شربت الهوندا

6 - محمد سعيد : دة برة من الشخصيات اللذيدة جدا يعنى قبل ماتخش علية تصلح العربية لازم تكون غاسلها كويس , ومعقمها لانك هتلاقى واحد لابس بالطوا ابيض كدة وممكن كمان تكشف عندة اسنان ولا حاجة لحد ماعربيتك تخلص , وغالى جدااااااااااااااااااا , هو كويس بس مش بيشتغل بايدة بردة

كدة انا قولتلكوا قصة كل واحد فيهم وللاسف كلهم فيهم عيوب قاتلة

انا نفسى الاقى واحد بجد فاهم : من حيث :

1- فى الماتور يعرف يشخص كويس ويركب الحاجة صح ومظبوط ومايقعدش يألف

2 - فى العفشة يبقى عارف مقاسات كل حاجة والوحش والكويس ويركب

3 - يكون بيشتغل بايدة بدل ماهو مخلى العيال عمالين يبوظوا فى حاجات غالية واهو بيجرب فى الزبون

تفتكروا هنلاقى ميكانيى فية المواصفات دية ربنا يسهل