و حدثت الصاعقه ( كارثه الدينامو )

**MEDO84EG** · 07-04-2011 10:55 AM

السلام عليكم و رحمه الله و بركاته
اخواني الاعزاء
مساعده عاجله
عملت عمره و الكهربه متلخبطه و لما اطلع من نقره ادخل في نقرايه تانيه
المهم
اخر شيء
لقيت لمبه البطاريه دايما منورة
شحنت البطاريه علي التونجر و ركبتها
بردو منوره
فقلت اعمل شيء صوغنون
جبت الافو ميتر
و قست البطاريه لقيتها 12.4 يعني مقبول في ظل شروف نوم البطاريه ده
و جيت اقيس الدينامو
صعقت
لقيته 12.3
!!!!!!!!!!!!!!!!!!!!!!!!!!
و العربيه دايره رحت شادد كابل الارضي بتاع البطاريه و كانت الصاعقه
العربيه بطلت
يعني العربيه شغاله علي البطاريه مش الدينامو
خايف ليكون الدينامو طار
ربنا يستر
و شاكك انه من التوصيل و كده يكون الدينامو فيه سلكه فاصله
تنصحوني اعمل ايه او اراجع ازاي علي وصلات الدينامو ؟
و سؤال كمان
هو كل عربيه ليها دينامو خاص بيها و لا عادي زي البطاريه
و ايه افضل الانواع اللي تنصحوني اشتريها و الف شكر ليكم

**the-hero** · 07-04-2011 11:11 AM

اولا روح لكهربائي يقيس شحن الدينو
ويشوف على فيه عطل يتصلح ولا يتغير

**ahmed_mido1889** · 07-04-2011 11:20 AM

ممكن يكو ن سيرالدينامو عايز يتشد

ممكن يكو ن عايز يتغيرله شرابين او كتاوت

ممكن تكون قاعده السليكونات بايظه

**MEDO84EG** · 07-04-2011 03:06 PM

نديها واحد كهربائي و نقولكم
بس بردو مرديتوش عليا
الدينامر زي البطاريه اي حته في اي موديل عادي
و لا كل عربيه ليها ديناموها الخاص
و من باب العلم بالشيء
هل ترشحولي نوع معغين او ماركه معين او دينامو بتاع عربيه تاني اركبه عندي
و تشكروا يارجاله

**the-hero** · 08-04-2011 01:37 PM

المشاركة الأصلية كتبت بواسطة medo84eg

نديها واحد كهربائي و نقولكم
بس بردو مرديتوش عليا
الدينامر زي البطاريه اي حته في اي موديل عادي
و لا كل عربيه ليها ديناموها الخاص
و من باب العلم بالشيء
هل ترشحولي نوع معغين او ماركه معين او دينامو بتاع عربيه تاني اركبه عندي
و تشكروا يارجاله

لا طبعا كل عربية ليها دينو معين بتاعها
بس فى انواع بتتوفق مع كذا عربية
الدينامو بيبقي على حسب قوتة فيه كبير ومتوسط وصغير بيتقاس بالامبير
وطبعا بيختلف من العربية العادة عن المكيفة
عمتا اسال عليه كهربائي العربية وهو اكتر واحد هيفيدك فى الموضوع ده او تجار الاستيراد لنى معنديش خبرة كبيرة فى ال 305

**gsober** · 09-04-2011 05:27 AM

العربيه ال305 وال304 ليهم دينامو معين المانى بكتاوت داخلى وده الافضل
او فرنساوى بكتاوت خارجى
وخليه يشوف الموبينه ممكن يكون العيب منها
او يغير شربونه (قوله يركب شربون امريكى اللى متغلف نحاس مش الصينى)
وممكن سليكونات
وبالمره خليه يكشف على الرلمان البلى الخاص بالدينامو يكون ناعم ولا فيه شخلله لو لقيت فيه شخلله غيره
لان الصنايعى ممكن يقولك شغال وتمام وتلاقى بعد كده البلى فرط وتضطر انك تروحه تانى بمصنعيه تانيه فاهمنى طبعا
على العموم البلى مش غالى ولما تجيب البلى قولل للراجل عاوز بلى متغطى عشان ده مش بيحتاج تشحيم وعمره اطول
من البلى المكشوف
واطمن بالمره على سير الدينامو
وربنا يوفقك يارب

**MEDO84EG** · 09-04-2011 11:28 AM

الاخوة الاعزاء
جبنا كهربائي و اكتشفنا للاسف الشديد ان البيه الميكانيكي و هو بيركب كتاوت الدينامو ركبه معكوس فاتحرق و حرق كل من : كتاوت النور و الكلاكس
بالاضافه الي عدم عمل الدينامو مما ادي الي لحس البطاريه
بس ربنا ستر و غيرنا الكتاوتات و شغلنا و الحمد لله احسن كتير من فضل الله
بس عدادات الحراره و البنزين و بالاضافه الي ان الاشارات و الكلاكس
المجموعه دي كلها بتشتغل و تطفي مع نفسها

**aboomar22** · 09-04-2011 12:55 PM

قدر الله وماشاء فعل عارف يامدو انا برضه كنت بدهن العربية وبتاع الدوكو ركب البطارية معكوسة ضربت الدينامو وغيرت الديناموا كله بس الغريبة انت لما كنت ماشى كان الكلاكس شغال ولمبه الدينمو كانت مطفية يمكن حاجة لمست اهمال الصنايعية يعمل اكتر من كده الحمد لله انها جت على قد كدة انا مرة عملت صيانة لاوبل فيكترا فى مركز كبير وهو شغال كسر ماسورة زيت الفرامل وانا راجع وللحظ كنت ماشى بطىء وبدوس طبعا مين ........ الحمد لله سبتها ورجعت الورشة قعدوا بيوزعوا الاتهامات على بعض وربنا ستر

**MEDO84EG** · 10-04-2011 01:40 PM

الف شكر يا استاذ محمد علي رد حضرتك
بس و انا ماشي لاحظت ان لمبه البطاريه بتنور و قلتلهم راحوا لاعبين في الكتاوت
و فعلا الكلاكس كان شغال
بس اول ما مشينا لناصيه الشارع بعد مخلصوا اللي كانوا بيعملوه في الكتاوت حصل اللي حصل من بعد ما سبناهم علي طول
يالا الحمد لله علي كل حال
و عادي يعني انا مش زعلان بس بحاول اتكلم مع الاعضاء ربما حد يكون عنده خبره يفيدني
و ربما واحد هيقع في نفس ظروفي احذره
بس و الله يا استاذ محمد انا سعيد جدا و الله بمعرفه حضرتك

**the-hero** · 10-04-2011 06:25 PM

ااااااااااااااااااااااااا اه
فكرتونى بيوم النحس العالمى اللى تعرضت ليه بسبب صنيعي مهمل جدا
كنت بغير وير الدبرياج المعلم ضيع البلبة اللى بتوصل الوير بالدواسة
وفين لحد مجبت واحدة زيها استيراد
رجعت لقيتة كاسر وش الاسبراتير
رحت جبت غيره استيراد وهو بيركبه سند على اربه زيت البور كسر البزبوز اللى بيركب فية الخرطوم
وقال ايه بعد مخلص بيقولى حسبنا كدا !!!!!!!!!!!!!!!!!!!!!!
قولت له حساب ايه
انت كدا اللى عليك فلوس
هو انت ليك عين تقولى حساب وسبته ومشيت
بعديها بفتره قبلنى بيقولى مش ناوى تحسبنى
قولت له بكل برود بالله متفكرنيش باليوم ده
حسبنا الله ونعم الوكيل
بس الواحد مبيتعلمش ببلاش

الموضوع: و حدثت الصاعقه ( كارثه الدينامو )

LinkBack

أدوات الموضوع

عرض

-

-

-

-

المواضيع المتشابهه

ماذا تعرف عن شهيد الصاعقه ابراهيم الرفاعى و المجموعه 39 ؟؟

الشهيد البطل ... ابراهيم الرفاعى صاحب فريق 39 قتال فرقة النمور الصاعقه

يالهووول الصاعقه ........ للمتزوجين واصحاب الكروش فقط

أسد الصاعقه - الأسطوره المصريه - أبراهيم الرفاعى

كارثه في كارثه فورد فوكاس 2007 2008 انتم فين

الكلمات الدلالية لهذا الموضوع

المفضلات

المفضلات

ضوابط المشاركة