رابطة مالكى الاكسيل-الجزء الأول

**kindnight** · 18-11-2011 09:43 PM

السلام عليكم ورحمه الله وبركاته
النهارده روحت للمكانيكي للأني كنت بسمع صوت زي تكتكه وأنا ماشي بالعربية علي الغيار الأول و الثاني وهذا الصوت بسمعه من أعلي الموتور من تحت علبة غطاء التكهات وهذا الصوت غير مسموع علي السلنسية او علي الغيار الثالث و الرابع فلما قلت ذلك للميكانيكي قلي أن عمود التكاهات خف ولابد من تغييره وهذا العمود لايتباع لوحده ولكن يأتي مع وش السلندر مع العلم أن حاله الموتور والحمد لله ممتازة وكمان في صوت بيأتي من عند طنبورة الكمبروسير بتاع التكييف وقالي المكانيكي أن رومان البلي بناع الكمبروسر عاوز يتغير أرجو من الأخوه الأفاضل أعطائي النصائح لهذه المشاكل وسيارتي 1300 موديل 96

**m1o2s3t4** · 19-11-2011 12:48 AM

اتشرف بالانضمام للرابطه وعندى اكسل 97 مشكلتها هى ان عداد البنزين مش شغال قولت اشوف العوامه فكيت عوامة البنزين اللي فى التنك وعند تحركها اعلى واسفل العداد اشتغل بيطلع وينزل مع الحركه ولاكن لما تركب فى التنك مش بيشتغل وحاجه تانى كمبروسر التكيف البليه بتاع التنبوره بتاعتو صوتها عالى وعايزا تتغير لازم افك الكمبروسر وهل ممكن تتشحم مكنها والصوت يخف

**EXL** · 19-11-2011 01:22 AM

المشاركة الأصلية كتبت بواسطة lion_heart

فعلا ده اللى عند الموقف الجديد بطلخا

للاسف فقدت الثقة فيه تماما و لا انصح بالذهاب له مطلقا
حاول تتابع مع ميكانيكى بيفهم احسن و يكون شغله امام عينيك

شكرا علي ردك وأهتمامك والأفاده جزاك الله خير

**TAMER13** · 20-11-2011 10:56 AM

بعد ما عملت مشوار لاصبح و رجعت ركنت العربية 5 دقايق و جيت ادور ما دارتش و لا تكتكة و لا اي حاجة افيدونا و انهارده الاحد كل اجازة

**kindnight** · 20-11-2011 09:51 PM

[gdwl]بعد ما عملت مشوار لاصبح و رجعت ركنت العربية 5 دقايق و جيت ادور ما دارتش و لا تكتكة و لا اي حاجة افيدونا و انهارده الاحد كل اجازة
[/gdwl] أخي الفاضل اكشف علي الموبينة والسلك الواصل منها إلي الأسبراتير

**magid1010** · 21-11-2011 08:34 PM

المشاركة الأصلية كتبت بواسطة TAMER13

بعد ما عملت مشوار لاصبح و رجعت ركنت العربية 5 دقايق و جيت ادور ما دارتش و لا تكتكة و لا اي حاجة افيدونا و انهارده الاحد كل اجازة

حصلت معايا و المارش طلع بايز الراجل لفه و غير جلب ب 110 جنيه

قلت ساعتها انا لو جبت مارش جديد كان احسن

**toto_hoho82** · 22-11-2011 11:23 AM

افحص الكبالن وافحص المساعدين

**toto_hoho82** · 22-11-2011 02:09 PM

شرح اجزاء عمل المحرك ودة تعتبر اول مشاركة فعلية لى

**toto_hoho82** · 22-11-2011 02:10 PM

الـســــــــــلام علـــيـــــكـــــــــــم و رحـــمــــــــــــــة الــلــــــــــــــــــه وبــــــركـــــــــــــات ــــــــه
النهاردة جايب لكم موضوع مهم وشيق جدا ...
وهيفيد اكتر الناس المبتدئين فى بحر العربيات ..
مكونات محرك السيارة من الالف للياء ..............

هل فكرت اللى بيحصل لما تحط المفتاح فى الكونتاكت وتدور العربية ؟؟ ...
او ايه هى فكرة عمل الموتور ؟؟؟
وايه انواع المحركات ؟؟؟
و ليه لما تزود بنزين العربية بتتسارع ؟؟؟...
وايه معنى ان الموتور ده 4 سلندر او 6 سلندر ؟؟؟
وايه هى الكامه والكرنك وطقم الشنبر ....

كل ده واكثر هاتلاقوه فى هذا الموضوع الشيق واتمنى ان يحوز على رضاكم ...............

نبدأ فى الجزء الاول بالمحرك :
صورة شاملة للمحرك :

ينقسم محرك السيارة الى جزئين رئيسيين هما كما بالصورة السابقة :
1- رأس المحرك (وش السلندر)
2- جسم المحرك (وتوجد به السلندرات)

وهذه صورة شاملة اخرى لمحرك 6 سلندر :

مكونات الموتور :
أولا : رأس المحرك (وش السلندر) :
صورة وش السلندر منفصل :

وتركب فيه : أ- الصمامات : التى تتحكم بدخول خليط البنزين والهواء وخروج العادم .(ويكون عددها 8 فى السيارات القديمة و 12 او 16 فى معظم السيارات الحديثة)
صورة الصمامات :

صورة مكان الصمامات فى وش السلندر :

ب- عمود الكامة : الذى يتحكم فى توقيت دخول خليط البنزين والهواء وخروج العادم .(ويكون عددهم 2 فى حاله محركات 12 او 16 صباب (صمام) )
صورة عامود الكامة :

صورة لالية عمل عمود الكامه مع الصمامات :

ثانيا جسم المحرك :
صورة جسم المحرك :

ونرى اربع فراغات وهى التى توجد بها الاسطوانات (السلندرات) ..
ويحتوى حسم المحرك على : 1- الاسطوانات (السلندرات) وعددها فى اغلب السيارات 4 وفى بعض السيارات 6 او 8 او 10 او حتى 12 سلندر كما فى بعض السيارات السريعة وشاحنات النقل الثقيل ..
صورة السلندر :

ويوجد فراغات تحيط بالسلندر و يوجد بها ما يسمى الشنابر وهى حلقات دائرية تمنع تسرب الزيت من اسفل المحرك الى غرفة الاحتراق وعندما تتلف الشنابر وتتاكل يتسرب الزيت الى غرفة الاحتراق ويحترق مسببا دخان ابيض يظهر من الشكمان ويدل ذلك على ان الموتور محتاج (عمرة) ...
صورة الشنابر :

تتصل هذه السلندرات بعامود الكرنك الذى يحول حركتها الترددية (صعودا ونزولا) الى حركة دائرية سيتم توضيح ذلك بالتفصيل بالاسفل ...
صورة عامود الكرنك :

يفصل بين وش السلندر و جسم المحرك قطعة من الصاج او الورق المقوى لمنع تسرب الزيت او الماء الى السلندرات وغرفة الاحتراق و تسمى هذة القطعة (جوان وش السلندر) ..
صورة جوان وش السلندر :

وده كان شرح مفصل وحصرى لاجزاء موتور السيارة واشكالها واماكنها .......

والان لنتعرف على اليه حركة الموتور .....
*اشواط المحرك : لمحرك السيارة 4 اشواط فى الدورة الواحدة ولذلك تسمى محركات رباعية الاشواط وهى :
1-شوط السحب 2- شوط الضغط 3- شوط القدرة (الحرق) 4-شوط العادم

صورة شاملة لاشواط الموتور :

1- شوط السحب : وفيه يفتح صمام الوقود ليدخل خليط البنزين والهواء الى غرفة الاحتراق واثناء نزول السلندر الى اسفل وتكون نسبة الوقود صغيرة بالنسبة للهواء ...
2- شوط الضغط : يغلق فية صمام الاخذ ويرتفع السلندر الى اعلى ليضغط الخليط لترتفع درجة حرارتة حتى يساعد على كفائة الاحتراق ....
3- شوط القدرة (الحرق) : يتم فيه حرق الخليط عن طريق اصدار شرارة كهربية من شمعة الاحتراق (البوجية) ويتم اشتعال الخليط دافعا السلندر الى الاسفل بقوة هائلة ....
صورة البوجيهات :

4- شوط العادم : عندما يصل السلندر الى اسفل يفتح صمام العادم ويبدا البستم فى الارتفاع مجددا ويطرد الغازات الناتجة عن الحرق الى الشكمان ومنه الى خارج السيارة ...

وهذه صورة لتوضيح الية هذه الاشواط اكثر :

انواع المحركات :
1-المحرك المستقيم : وهو الموجود فى اغلب السيارات فى مصر و تكون السلندرات بجانب بعضعا البعض بشكل طولى يعنى كل سلندر يتحرك لاعلى واسفل بصورة عامودية ويكون 4 او 6 سلندر ويوجد به راس محرك واحد (وش سلندر واحد) ..
مميزاته: انه اكثر انواع المحركات عمرا وتحملا و اقلها فى التعقيد وسهل فى الصيانة ..
صورة محرك مستقيم 4 سلندر :

2- المحرك على شكل حرف V : ويكون فيه ترتيب الاسطوانات على شكل حرف 7 وينقسم الى طرفان لكل طرف راس محرك (وش سلندر) .. يكون غالبا 8 سلندر وفى بعض الاحيان 6 سلندر ونادرا ما يكون 4 سلندر مثل : جولف 4 ...
مميزاته:1- انه يوفر مساحة كبيرة في حجرة المحرك ممايسهل تقليل حجم السيارة حتى وان كان المحرك ضخما ويقلل من وزنها ......
2- اسرع وانشط من المستقيم لانه عندما تميل السلندرات تقل مقاومة الجاذبية لها ...

صورة المحرك على شكل حرف v ذو 6 سلندر :

3- المحرك على شكل حرف T : نادرا مايوجد هذا المحرك و يكون فية السلندرات متقابلة (كما بالصورة) لتقليل الجاذبية اكثر ويوجد فى بعض سيارات فورد واغلب سيارات بورش و سوبارو ..
مميزاته : تعطى هذه المحركات عزم غير طبيعى بالمقارنة بحجمها الصغير ..
عيوبه : يحتاج الى صيانة اكثر وبالاخص فى وش السلندر لان اغلب الضغط يكون عليها ....
صورة المحرك على شكل حرف T ذو 4 سلندر :

كان هذا شرح مفصل كامل وحصرى لمنتديات مصر موتورز من اعدادى وتجميعى اتمنى ان يعجبكم ...
منتظر ردودكم الجميلة ... واى استفسار انا جاهز ....

و انتظروا الجزى الثانى عن جهاز نقل الحركة (الفتيس) ......

**toto_hoho82** · 22-11-2011 02:17 PM

انا جبت لكم الجزء الثانى واسألكم الدعاء

النهاردة جايب لكم الجزء التانى عن :
جهاز نقل الحركة (الفتيس) بانواعة مع شرح فكرة عمله بالصور ....

هل فكرت يوما ايه هى العصا اللى بيحركها السائق بايده اثناء قيادته السيارة وايه وظيفتها ...
وايه فايده دواسة الدبرياج (الكلاتش) ....
وايه الفرق بين الفتيس المانيوال والفتيس الاتوماتيك وفكره كل منهما ....
وازاى العربية بترجع للخلف ...
كل ده واكتر هتلاقوه فى الموضوع ده باذن الله واتمنى ان يحوز على اعجابكم .....

اولا : جهاز نقل الحركة المانيوال (اليدوى) :

يتكون من جزئين رئيسيين :
1- الفتيس 2-طقم الدبرياج (الكلتش)

صورة لارتباط المحرك بمجموعة نقل الحركة ...

الجزء الاصفر هو طقم الدبرياج والجزء الاحمر هو الفتيس اما الجزء الاخضر هو عامود (الكردان) الذى ينقل الحركة الى العجلات فى حالة سيارات الدفع الخلفى وسيتم توضيح انظمة الجر لاحقا ..

اولا : الفتيس :
صور للفتيس ....

فكرة عمل الفتيس :
يحتوى الفتيس غالبا على 5 سرعات (غيارات) امامية + سرعة خلفية (الريفيرس) ..
ممكن تكون 4 نقلات اماميه فى بعض السيارات القديمة .. وممكن 6 نقلات نادرا فى السيارات الحديثة

صورة توضيحية لفتيس ذو سرعتين (غير حقيقى ولكن للتوضيح)

التروس ذات اللون الاحمر تاتى حركتها من الموتور وهى تروس (قائدة)
التروس ذات اللون الازرق هى تروس النقلات الاول والثانى وهى تروس (مقادة)
الترس البنفسجى (الغويشة) هو اللى مرتبط بالعجلات عن طريق العمود الاصفر ..

عندما ندفع عصا الفتيس الى الغيار الاول .. يعشق ترس (الغويشة) فى الترس رقم 1 حتى تنطلق السيارة من الثبات
وعندما نرجعها الى الخلف نعشق الغيار الثانى وهكذا ..

طيب ليه احنا لازم نطلع على الاول مش مثلا على الرابع او الخامس ؟؟
لأننا فى حاجة الى دفع قوي في بداية حركة العربيه فبنحمل على ترس رقم 1 لانه كبير ومعنى ده انه بياخذ لفات قليلة ..
يعنى كل ما الترس يصغر سرعة العربية تزيد لكن عزمها يقل ...
علشان كدة لازم نختار الغيار المناسب لسرعة العربية ..
الغيار الاول : من 0 الى 25 كم/س
الغيار الثانى : من 25 الى 40 كم/س
الغيار الثالث : من 40الى 60 كم/س
الغيار الرابع : من 60 الى 85 كم/س
الغيار الخامس : اكثر من 85 كم/س
تختلف هذة السرعات حسب نوع او حمولة العربية ..

صورة توضيحية لفتيس ذو 5 سرعات ..

السؤال الاهم ازاى العربية بترجع للخلف ؟؟
العربية بترجع للخلف عن طريق ترس صغير (idler gear) وظيفته عكس حركة ترس الريفيرس علشان نقدر نرجع بالعربية ورا ..
صورة توضح عمل ترس (idler gear) ...

ثانيا : طقم الدبرياج ..

وظيفته : يفصل حركة الموتور عن الفتيس وبالتالى عن العجلات وذلك عند الضغط على دواسة الدبرياج حتى نتمكن من تغيير التروس ...

وبكده نكون شرحنا طريقة عمل ومكونات جهاز نقل الحركة المانيوال .....

ثانيا : جهاز نقل الحركة الاتوماتيك ....

مكوناته معقدة جدا بالمقارنة بالمانيوال ويتم الاستغناء عن النقلات الميكانيكية بنقلات هيدروليكية (ضغط الزيت) ..
وبصراحة معلوماتى عنه ضعيفة شوية ودة لانه معقد جدا ومش مفهوم ...
وفكرتة ان النقلات بتتغير فيه اتوماتيكيا عن طريق حساس (سينسور) بيقيس : سرعة العربية و عدد لفات الموتور (rpm) وعلى اساسة بيعشق الغيار المناسب دون تدخل السائق ....
والعربية اللى فيها فتيس اتوماتيك مش بيكون فيها دواسة دبرياج لان فيه حاجة اسمها محول العزم بيعمل عمل الدبرياج اتوماتيكيا عن طريق ضغط الزيت (الهيدروليك) .. و المنظومة دى معقدة جدا للاسف علشان كدة مش اى ميكانيكى يصلح فتيس اتوماتيك ...

يكون نقل السرعات فيه عن طريق تروس صغيرة تسمى التروس الكوكبية وايضا تروس شمسية وتروس حلقية ..
صورة لتوضيح تروس الفتيس الاتوماتيك ...

شرح عمل السرعات المختلفة للفتيس :
السرعة الاولى ( الغيار الاول ) ..
اولا (كما بالصورة) يدور الترس الشمسي الاصغر باللون الاخضر عن طريق محول العزم , حامل التروس ( اللون الاحمر ) يحاول الدوران بشكل عكسي لكن ذلك لا يتم بسبب الية تمنعه من ذلك وهي الية one-way clutch , بسبب ذلك يتم اجبار الترس الحلقي ( اللون الازرق ) على الدوران ويصبح الترس المقاد الذي يعطي نقل الحركة النهائي ( output ) . الان بخصوص اتجاه الدوران قد يبدو انه عكسي لكن ذلك غير صحيح , حيث ان مجموعة التروس الداخلية تقوم بتدوير التروس الخارجية والتروس الخارجية تقوم بتدوير الترس الحلقي بنفس اتجاه الترس الشمسي وبالتالي نحصل على اعلى عزم ممكن ( نسبة التخفيض 2.4:1 )
صورة للتوضيح :

السرعة الثانية ( الغيار الثاني ) ..
كما السرعة الاولى يكون القائد هو الترس الشمسي الاصغر ولكن في هذه المره يكون الترس الحلقي مثبت عن طريق قطعة ( رباط , band ) تضغط عليه فتوقفه ويتحرك حامل التروس على انه الترس المقاد والذي ينقل الحركة النهائية ونحصل على عزم اقل من الغيار الاول ( نسبة التخفيض 1.47:1 )

السرعة المباشرة ( غالبا الغيار الثالث )
في هذه الحالة تدور التروس كوحدة واحدة وتكون نسبة الخفيض ( 1:1 ) والتروس الكوكبية لا تدور لان الترس الحلقي يدورها مع عقارب الساعة والترس الشمسي عكس عقارب الساعة .
استخدام Overdrive :
overdrive هو مفهوم يقصد به ان سرعة دوران المقاد اكبر من القائد .
في هذه الحالة يتصل عمود من حامل التروس مع محول العزم مباشرة ويأخذ منه السرعة ( في الحقيقة هي سرعة الفلايويل وبالاحرى سرعة المحرك نفسه ) . الترس الشمسي الاصغر يكون حر الحركة ( اي غير متصل مع توربين محول العزم ) والترس الشمسي الاكير يكون مقيد الحركة . في هذه الحالة القائد هو حامل التروس والمقاد هو الترس الحلقي ونسبة التخفيض 0.67:1
مثلا عند دوران المحرك 2000 دورة , يكون سرعة دوران وحدة النقل 3000 دورة
وهذه الخاصية لا تجهد المحرك اطلاقة وتوفر سرعة عالية باستهلاك قليل للوقود .

السرعة الخلفية ( ريفيرس Reverse )
هنا يكون الترس الشمسي الاصغر حر الحركة والترس الشمسي الاكبر متصل مع توربين محول العزم وحامل التروس مثبت والترس الحلقي هو المقاد ونسبة التخفيض 2.0:1
وضع N (المور) :
في هذه الحالة لا يتم تثبيت اي ترس ولا يوجد اي جزء متصل مع محول العزم

ده كان شرح مبسط للفتيس الاتوماتيك لانه معقد جدا وصعب شرحه ....

وبكدة نكون شرحنا طريقة عمل اجهزة نقل الحركة يا رب يكون عجبكم وحاز على رضاكم وتكونوا استفدتم منه ....
اى استفسار انا جاهز ...و مستنى ارائكم وردودكم الجميلة .....
وانتظروا الجزء الثالث عن انظمة الجر المختلفة .....