كنت عايزة ازرع بقدونس وريحان والحاجات دى فى البيت يعنى اطبخ منها حد يعرف ازاى
عرض للطباعة
كنت عايزة ازرع بقدونس وريحان والحاجات دى فى البيت يعنى اطبخ منها حد يعرف ازاى
الموضوع مش صعب ... بس اهم حاجة توافر الضوء .. ممكن الزراعة فى أحواض ..
اذا كان على الضوء مفيش اكتر منه بس ايه نوع التربة اجيبها منين اعمل ايه كده يعنى
متابع باهتمام
ها تزرع في احواض والا عندك كام قيراط علي حسب
الموضع بسيط ان شاء الله
اهم شيء ياريت اللي عايز يزرع يحدد المكان اللي هيزرع فيه ونوعية التربة ايه
يعني لو هتزرع في حديقة قدام البيت قلنا نوع تربتها ايه ولو مش متوفره ممكن في احواض بلاستيك او اي نوع
والمطلوب فقط للنباتات البسيطة اللي زي دي هو تجهيز تربة من ارتفاع حوالي 10 الي 20 سنتيمتر من التربة الخصبة الصالحة للزراعة (طمي النيل - او تربة طينية - خليط من الرمل والتربة الطينية ) ودي أسهل مكان للحصول عليها هو أخذ جزء من الطين اللي بترفعه الكراكات اللي بتطهر الترع والمصارف بعد ما تنشف طبعا
وتضع هذه الكمية في الحديقة او في الحوض البلاستيك وبعدين تحاول تنعمها جيدا (تخليها حبيبات ناعمه لو خشنة ) مع تسوية سطحها جيدا قدر المستطاع وبعدين تشتري بذور النبات اللي محتاج تزرعه وبعدين تقوم ببذر هذه الحبوب في التربة مع محاولة تغطيتها بغطاء خفيف جدا من التربة وبعدين تروي هذه التربة بالماء جيدا وبعدين تتركها في الهواء والشمس
بس وربك هو اللي هينبت منها الزرع ان شاء الله
لو فيه اي توضيح اسأل وتحت أمرك
طبعا الزراعة بتختلف من نبات لأخر ومن تربة لأخري ولكن ده ببساطة وعلي حسب النبات اللي حضرتك ذكرته
والله الموفق والمستعان
طبعا الطمى افضل نوع للزراعة ... بس عيبه بيوسخ المكان خصوصا لو فيه أطفال .. الطمى بيكون تراب زراعى مضاف اليه قليل من الرمل علشان ميحتفظش بالميه ... وفى تربة جاهزة اسمها بيتموس بتتباع فى اماكن بيع التقاوى ... اماكن البيع فى القاهرة بجوار مديرية الأمن - باب الخلق ... معرفش اماكن فى المنصورة بس ممكن لو فيه جمعية تعاونية تلاقى فيها ....
موقع زراعة نت - زراعة النباتات المنزلية والداخلية
دا لينك لموقع زراعة نت هيفديك كتير
شكرا يا جماعة حقيقى افدتونى
طبعا فى البلكونة معنديش جنينة ولا حاجة هتبقى فى الحاجات البلاستيك دى اللى من عند الشريف للبلاستيك
استاذ ايهاب من المنصورة ممكن يكون عارف البذور منين والتربة منين ولو بيتموس منين برضه
يا استاذ محمد في المنصورة التربة ببلاش وكمان في القاهرة بس اللي ينزل علي شط النيل او اي ترعة او مكان قريب من المناطق اللي بتزرع وخد معاك اي حاجه ولوحتي شيكارة او شوال من اللي بيتباع فيهم الأرز مثلا وخد اللي انت عايزه انا أساسا من المنصورة والفلاحين قبل انتقالي للعمل بالقاهرة فالموضع سهل لناس المنصورة اكتر من القاهرة
ايوة انا عارف ان التراب الزراعى مفيش مشكلة .. انا بتكلم على اماكن بيع التقاوى
بخصوص موضوع التربة ممكن من غير ما تشتري تربة تأخذي الحوض اللي هتزرعي في وبالعربية تخرجي علي اي طريق قريب منك من المنصورة ولو حتي شط البحر اللي بره ناحية طريق دمياط وتطلبي من اي واحد بيزرع علي الشط وبيكونو موجودين في اي وقت تطلبي منه يحطلك شوية تربة في كل حوض وعرفيه انك هتزرعي فيه ريحان وبقدونس وبس
موضوع البذور بصراحة مش فاكر محل بعينه في المنصورة بيبيع بذور لكن ممكن تسألي عند اي حد بيبيع الحاجات دي جافة (الريحان والبقدونس ) زي العطارين مثلا وأعتقد هتلاقيهم كتير وتسأليه انك عايزه تزرعي بقدونس وريحان وهو هيعطيكي بذور علي قد الشيء اللي هتزرعي فيه ورخيصة جدا يعني مثلا 5 جنيه يزرعو كتير جدا لأنها حبوب رفيعه جدا
ولو مش عنده اسأليه تجيبي منين و أعتقد شارع العباسي وأجواره في المنصورة فيهم ناس بتبيع الحاجات دي
ولو في اي خطوة فيه حاجه للمساعده قولي واحنا نرد قدر المستطاع ان شاء الله
طيب انا ممكن اجيب من شط ترعة المنصورية عند مجمع المحاكم كده اسهل ماشى؟
واى نبات بقى روزمارى او كسبرة او نعناع اسأل العطار وربنا يسهل
معتقدش فى خالص فى العباسى وايه المنصة دى؟
خلاص الموضوع كبر فى دماغى من فترة ونفسى ينجح ان شاء الله
انا قلت فى مكان فى المنصورة اسمه المنصة وانا معرفوش: )
http://files2.fatakat.com/2011/2/12981284991549.gif
اهم حاجة تنجح الزراعة الرى الصحيح لأن كثرة الرى تسبب تعفن الجذور وبالتالى موت النبات وقلة الرى تسبب الجفاف
موضوع جميل جدا
عندنا جنينه فى البيت مزروع فيها اشجار فواكه (شجره من كل نوع)خوخ وبرتقال وجوافه وتوت ونخله بس لسه من قريب مطرحش الا الخوخ والعنب وشجرتين رمان بس اللى ربنا طارح فيهم البركه
وباقى الجنينه بابا بيسلى نفسه فيها مزروعه ريحان وورد واشجار زينه وفيه حوضين بنزرعهم اى حاجه
شويه خس وشويه جرجير ومره فول اخضر بس فشل
الميزه الجميله فيه انى بحب اكل الخس وهو طازه يعنى بالسكينه وانزل اجيب وانا مطمن ان مفيش اى مبيدات او اسمده لدرجه اننا بنفكر نشترى قطعه ارض ونزرع فيها كل اللى نحتاجه
لو على الزراعة فهى شىء جميل جدا و البشمهندس ايهاب قال اللى فيه المفيد
انا عن نفسى غاوى زراعة من صغرى و عندى أرض زراعية فى البلد بباشرها و طبعا زراعتها ( ارز قمح بطيخ لب قطن ..)
لكن عندى فى ا لبيت على السطح كميه كبيرة من الاحواض و الجرادل و البراميل .....
الاحواض بزرع فيها ( جرجير - كزبرة - نعناع .... و جربت البقدونس مرة بس مطلعش كمية كبيرة )
الجرادل ( ياسمين- ورد بلدى - شبر فايد - و فى مرة زرعت كوسه و طلعت بس عايزة تربه عميقة - جزر و العيال عندى بيحبوا كل ما يطلعوا السطح أخلعلهم شوية و يأكلوه )
البراميل ( عنب - رمان جوافة بس لسه بقالهم سنه )
المهم فى الموضوع
*تربة جيدة الصرف !!
*الشمس بتطول الزرع وقت كافى
و فيه حاجات زى الياسمين و الفل مش بتعوز شمس كتير
و فيه حاجات زى النعناع و الجرجير و البقدونس بيحبوا الشمس وقت طويل بس المشكلة فى الحر الشديد لو التربه مش كتير هتنشف و النبات بيدبل
فى الغالب الجرجير و النباتات اللى فيها محتوى مائى كبير ( الخس و البقدونس ) مش بتنجح فى الصيف من شدة الحرارة
و عموما فيه محلات مخصوصة ببيع المبيدات الزراعية و التقاوى بس مش عارف فى المنصورة فين بصراحة !!!
و بتشترى بيييجى 3 جنيه تزرعى بيه 10 مرات مثلا
و هى هواية محببة جدا بس للى غاوى
انا شايف ان موضوع الزراعة اللي بتسألي عليه ده لازم يتم فيه التجربة والتعلم بالمحاولة والخطأ لأن الظروف بتختلف من مكان لأخر والتعامل أيضا يختلف باختلاف هذه الظروف
لذلك المفروض ان احنا قلنا خطوط عريضة للموضوع ويتبقي التجربة لمعرفة ظروف المكان وبعدها محاولة التغلب علي المشاكل اللي هتواجهك ومنها كمان هتكوني اتعلمتي ازاي تتعاملي مع النباتات
ماشى انا هجيب التربة ان شاء الله الأسبوع ده
وهدوشكوا بقى : )
قبل اى حاجه لازم قبل الزراعه اعداد التربه كويس وتسويتها وبعدين ريها بالماء (ري يعني غمر) مش مجرد رش وبعدين تتساب يوم او يومين قبل الزراعه او وضع البذور
بخصوص الشبت والبقدونس والكسبراه فدول الاسهل انك نجيبهم بذور من عند بتاع البذور ويفضل انه يكون شغال عشان تضمني ان البذور مش مخزونه عنده بقالها فتره طويله
وهتشتري منه مثلا بجنيه او اتنين بذور من النوع الى انتى عايزاه هيبقى فى كيس صغير بس البذور الى فيها تكفى زراعة 2-4 متر مربع تقريبا
ودول هتشتريهم مره واحده فقط لانه بعد الزراعه النبات "بيتقي" يعنى بيعمل التقاوي بتعته تلقائى عشان تستمر دورته الطبيعيه
بخصوص الريحان معتقدش انه ممكن يتزرع فى احواض بسهوله لأنه عباره عن شجيره
وبيتجاب من اى مشتل عباره عن فرع صغير ويتزع فى الارض عشان يكبر ويبقى شجيره
وفمره جربناها عندنا فى الجنينه وقطعنا فرع جديد اخضر وزرعناه وطلع
بس خدي بالك فى نوعين من الريحان نوع عادي وده شكل بس لان رائحته ضعيفه ونوع بلدي وده بتكون رائحته عطريه نفاذه
بخصوص النعناع فزراعته سهله اشتري اى نوع نعناع عاجبك من السوق (بس يكون صابح مش دبلان) وتيجى على المكان الى هتزرعيه فيه - الى احنا ظبتناه وسقناه قبلها - وتغمسي العدان فى الارض افقيا (يعنى تجيبي العود وتنيمه على الارض بشكل عرضي وتضغطي عليه شويه لحد ما ينزل بمسافة 0.5 سم او أقل بحيث يكون العود فى التربه وطرفه بمساواة التربه) وبعدين تسقيه (رش) كل يوم فى اول اسبوع هيدبل وفى تانى اسبوع هتفتكري انه مات وفى تالت او رابع اسبوع هبدأ بنبت ويطلع ان شاء الله
ما شاء الله حلو قوى الشرح ده
انا لقيت البيتموس ده فى السوبر ماركت وكل ما احط له ماء يشربه وبعدين بدأ يشقق كده والطبقة اللى فوق فرولت ده طبيعى ؟
واغرقه ماء بقى ؟انت قلت نغمره
لو تقدري تيجي يوم القاهره تزوري معرض الربيع في حديقة الأورمان
وتشتري من هناك النباتات اللي انت عاوزاها بالتربه بتاعتها
ده غير الناس هناك هتشرح لك كل حاجه زي طريقة الإعتناء بكل نبات ومتابعته
بالنسبة للبيتموس معروف انه بيشرب المية لكنه فقير غذائيا فلابد من التسميد
ده عمال يكبر قوى وخرج بره الأصيص : )
والتسميد ده اعمل له ايه ؟
بس any way البواب جاب لى تربة من ضفة الترعة برضه واشتريت بذور كسبرة وشبت
فيه مشاتل كتيييييييييير في المنصورة وبتبيع كل النباتات أيضا ولكن معظم اللي موجود فيها هي نباتات زينة وزهور وعطرية
فيه عند حضرتك مشتل عند مدارس الهدي والنور بعد بنزبنة وطنية اللي عند سندوب قدام علي نفس شط الترعة
وفيه مشتل الجامعه وده داخل الجامعه أيضا
وفيه مشتل كلية الزراعة داخل الجامعه
عارفة مشتل الجامعة بس معرفش انه بيبيع للجمهور
طب خلينا فى الحاجات اللى اشتريتها الأول دى
هحاول فيهم كده وربنا ييسر لو فتحوا نفسى اجيب حاجات تانية
انا اشتريت كتير جدا من مشتل الجامعه ولكن ده من حوالي 7 او 8 سنوات أيام ما كنت في الجامعه وبيبيع عادي جدا لأي حد
انا كنت بتكلم عن التربه الطينيه العاديه ومجبتش سيرة البيتموس خالص
واقصد بالري اننا نسقى التربه كويس اوي مره واحده لان التربه الطيبنه بطبيعتها بتقدر تحتفظ بالماء لفتره طويله
بخصوص البتموس الى اعرفه عنه انه انه كويس للشتلات الصغيرة ونباتات الظل فقط
رأيي الشخصي انك تجيبي تربه طينيه افضل ولو تحبي ممكن تخلطيها بنسبه من البتموس
وسهل انك تجيبي تربه طينيه من اى مكان لان المنصوره كلها تربه طينبه مش رمليه زي مناطق كتير بالقاهره
يعنى اى حد بيحفر عشان يرمي اساسات لبيت الى بيطلعه بتكون تربه طينيه صالحه للزراعه مش هتقول لأ
او اى مشتل (اكيد المنصوره حواليها أكتر من 500 مشتل) ممكن تشتري منه تربه طيبنيه وقوليله انك هتزرعى فيها نعناع ونباتات للاكل مش زينه
والتربه الطينيه بتكون رخيصه جدا لانه بيجيب المقطوره ب 50 جنيه تقريبا (المقطوره اللى بتبقى راكبه ورا الجرار الى بيستخدموها فى نقل التراب )
ولو فى اى استفسار انا تحت امرك
شكرا يا سارة
+++++++++++++++=
sha2e
انا جبت التربة الطينية دى ببلاش : )
دلوقتى كل الأصيصات جاهزة البيتموس لوحده والطين لوحد ه ورويتها مش فاضل غير احط البذور بقى
ارويها كل يوم ؟ وقدامها قد ايه لما النتيجة تبان ؟
بس المشكلة ان ملقتش فى السوق اصيص مخرم فده يبقى مفيش تصريف بفكر بقى اسخن حاجة على النار واخرمه
بالنسبه للبيتموس معتقدش ان ضروري اوى يتخرمله لكن الطين يفضل طبعا يكون الاصيص مخروم خصوصا وانك لسه فى الاول ومعندكيش السنس المطلوب علشان تعرفى مقدار الميه المظبوط الى لازم تتحط للزرع
احنا قولنا اننا هنروى التربه - انا بتكلم على التربه الطينيه - ريه كويسه ونسبها يوم او يومين عشان نضمن ان الارض امتصت المياه كويس ولو كان فيه ميه ذياده تكون نزلت تحت
بعد كده نحط البذور ونسيبها يومين تلاته وبعدين نبدأ نسقى التربه كل يوم أو يوم ويوم -حسب كمية المياة ودرجة الحراره-
المهم اننا منخليش التربه تنشف من قلة المياه او تبوظ من كترها
وان شاء الله البذور هتبدأ هتنبت وتبدأ تظهر نتيجه بعد اسيوعين او تلاته بأذن الله
وبخصوص النعناع هبقى ادور على صور لنوعين كنت زارعهم عندي وهبقى ارفعهم ان شاء الله
خلاص ان شاء الله هاحاول اخرمهم
كمان لقيت عندى 2 اصيص فخار اظن دول يبقوا حلوين فى الزراعة
وشكرا على اهتمامك