الموضوع: مرض الإلتصاق بالحارة اليسرى في الطرق في مصر والتي تسمى بحارة التجاوز

المشاركة الأصلية كتبت بواسطة شاهين - بنز

الموضوع دع قارفني جدا خصوصا إني كنت عايش في السعودية ومش متعود على الهرجلة دي لكن في برضه بقدر أروض الناس إللي بتمشي على الشمال بكون مثلا ماشي على طريق المحور على 140 كم وآجي من على الشمال ألاقي عربية وأرعشلها النور وصاحبها طبعا بيكون ماشي على 60 بالكتيير ومديها الإبتسامة البلهاء ولازق الكرسي قدااام عند الدركسيون وطبعا أما بشوفني في المراية داخل عليه بسرعة بيخاف وبيضطر يوسعلي غصب عنه زي البوبي
أما إتك تمشي على الشمال وراه زي المحترم وترعشله النور وتزمرله من هنا لبكره الصبح مش حيوسعلك

الماشي على ٦٠ غلطان و الماشي على ١٤٠ وشايف إن الحولية كلاب بردو غلطان

شكراً على إضافتك القيمة يا بشمهندس amrico

المشاركة الأصلية كتبت بواسطة amrico

ياجماعة موضوع القيادة على اليمين ده لو مكانش قانون، ده فى العالم كله وعند الشركات الكبرى اللى عندها عربيات كتير بيكون اسمه (القيادة الوقائية)

انا مهندس فى شركة بترول وبشتغل خارج مصر
ومش ممكن حد يسوق عربيات الشركة من غير مايكون معاه رخصة قيادة وقائية من الشركة بعد إمتحان صعب جدا وبياخد أيام على إيد مدربين أجانب
ومعنى القيادة الوقائية ان لا يوجد أى حادث لا يمكن تجنبه وإزاى تسوق بدون اخطاء مع تجنب أخطاء الغير
واللى هايقاوح وهايقول اصل ده حصل فجأه يبقى هو اللى غلطان
مفيش حوادث بتحصل فجأة غير للى مش متوقعها
داخل على تقاطع توقع أى حد يخرج فجأة من الشارع حتى لو كانت الإشارة مقفولة عليه ومفتوحه عندك فيبقى الأحسن انك تهدى لحد ماتتأكد ان الشارع فاضى
ماشى ورا ميكروباص ولا تاكس يبقى ماتلزقش فيه وسيب مسافة كافية عشان لو وقف لأى حد تقدر تبعد عنه او على الأقل تقف وراه بسلام لو مقدرتش تتجاوزه بشل صحيح عشان محدش يطبق عليك القاعدة العبقرية المصرية(اللى جاى من ورا هو اللى ياخد باله ولو خبط هو اللى غلطان)
وأمثله كتيرة جدا جدا

القيادة فى الحارة اليمين طبعا مطلوبة للقيادة الوقائية ومش معنى انك تكون ماشى 100 مثلا على طريق السرعه فيه 100 يبقى تمشى شمال واللى جاي يخبط راسة فى الحيط غالبا بيكون شخص متهور وساعات غبى برضه وممكن يفتكرك عاوز تشد معاه ويحاول يديك درس فى السواقة، ودول هم طبعا الطيارين اللى بيتجاوزوا السرعة ومابيهدوش غير عند الرادارات هاييجى ويعمل غرزة من جنبك ويمكن مايكونش شايف توكتوك ولا حجر ولا حد بيعدى وتحصل المصيبة

وحسب تصنيف الخبراء يوجد أربع أنواع من السواقين

1- السائق اللطيف الودود
2- السائق الطائش المتهور
3- السائق البطئ (ممكن جديد أو كبير فى السن)
4- السائق الوقائى

إختار شوف تحب تبقى من أى نوع فى دول

احسنهم طبعا الوقائى وحتى اللطيف الحبوب ده وحش
عارفين ليه
لأن مثلا ممكن شارع 3 حارات وماشى فيه سائق من العينة دى وعشان هو لطيف ومحترم وقف عشان الناس اللى واقفين يعدوا
لكن الناس لما تعدى لقوا واحد من النوع التانى المتهور مابيقفش لحد راح جاى وشايلهم

ربنا يستر وأسف للإطالة

كلام سليم و مظبوط 100 %
بس للآسف أغلب سواقين مصر خصوصا ولا الأيه ...ولاد 60 ***70
سواقين الميكروباص و الشباب بتاع الغرز هما السواقين من النوعية رقم 2 أي المتهورين
حاجة يعني تجيب الضغط
و تكلمهم يقولك أصل أنا سواق 100 ** و متحكم في عربيتي و هو أهبل و مش عارف أن لو كاوتش ضرب على السرعة دي
هايموت في ستين داهية بس المشكلة أنه بيأخد ناس تانية برئية في رجليه !!
و الحل
هو تشديد العقاب زي أوروبا
تجاوز السرعات يجب أن يتم بحزم شديد و مش غرامات بس
يجب أن يتم تطبيق قانون النقاط على الرخص
علشان اللي عاملين فيها شوماخر يتقوا ربنا في الناس اللي في الطريق

يعني كل رخصة يطلع عليها 16 نقطة مثلا
و كل تجاوز للسرعة يتم خصم 5 نقاط ( تجاوز 10 كم على الأقل عن السرعة المحددة )
و مع 3 مرات ........يروح بقى حبيب ماما يعيطيلها تطلعله رخصة من كوكب المريخ
و يجب بعد فقدان الرخصة ........ عدم السماح بإسترخاج رخصة جديدة إلا بعد مضي عامين كاملين على الرخصة القديمة المنتهية الصلاحية و يتم تحديد السرعات لهؤلاء ب 10 كم أقل على كل طريق حسب سرعته القانونية
علشان الناس تتعلم الأدب زي برة
برة معليمنهم الأدب و مخلينهم يمشوا زي الساعة علشان موضوع النقط ده
و صدقوني الشعب المصري هايستجيب قوي و هاتلاقي الطرق بقيت جميلة قوي و الحوادث هاتقل جدا .... أصل أحنا شعب نخاف ما نختشيش على رأي المثل البلدي
و السلام عليكم