حدث قبل منتصف الليل:: جواز صالونات

**X_MM_X** · 18-05-2011 06:17 AM

بص يا باشا قابلها وشوف ايه الكلام وبعد كده نفكر تاني

**m7nsh** · 18-05-2011 06:54 AM

خليك زى مانت .. طول مانت لسه بتفكر و تحور مع نفسك كده يبقى البنت مش ماليه دماغك من الأخر ...
رأيى طالما محستش بانجذاب مفيش داعى للاحتكاك كتير .. انت شبه واخد قرار بس هى ممكن تتعلق بيك .

بالمناسبه لمحت عربيتك عند كافتريا حسونه اللى جمب كليه طب .. بس كانت مقفوله وملقتكش .. اعمل حسابك بقى المره الجايه هناملك ع السقف لحد ماتيجى واتعرف عليك :)

**lonedoctor** · 18-05-2011 07:10 AM

المشاركة الأصلية كتبت بواسطة a7med_pharma

السلام عليكم

بعد إستراحة طويلة في إوضة الفيران لاند..قررت(كالعادة)الرجوع عن خطاب التنحي
ونعود بقصة
من كام يوم
واحد قريبنا..جايبلي عروسة
مواصفات مثالية جداااا كالعادة..حلوة وبنت ناس ودكتورة وسن مناسب(نفس سني)إلي هو موديل 84 هاي لاين
رحت
ودي أول مرة ليا أروح حاجي زي كده
المهم
الناس رحبوا بيا بشكل كبير جداااا
ماخبيش عليكم طبعا..أنا قاعد ودني محمرة ويدوبك ببتسم بطرف بقي ومش بفتح بقي
البنت جت
حاولوا يفتحوا كلام ويدخلونا في حوار أنا وهي
مانفعش علشان العدد كبير
دخلت أوضة منفصلة أنا وهي
وقعدنا
بادئ ذي بدء
البنت على مستوى فوق المتوسط من الجمال
دكتورة ..ستاف جامعة
وبتشتغل في مكان مرموق كشغل خارجي
متحدثة جدااااا..وذكية طبعا جدااا
لاتخلو من سمات البنت المصرية..يعني دكتورة وكل حاجة..لكن تحسها بنت في الأخر
يعني مش زي المعيدات بتوع الجامعة إلي كانوا فاكرين نفسهم حاجة فول أوبشن ماحصلتش
المهم
فضلنا نرغي..وأنا عيني ماترفعتش فيها طول ماحنا قاعدين
عجبها جداااا موضوع إني((بين قوسين مكسوف))
لكن المفاجأة
إنها أكبر مني بــسنتين وكسور
أوبااا..أوبااا
طبعا ماحاولتش أحسسها إني النقطة دي تفرق معايا..حفاظا على ثقتها بنفسها
ومشيت على وعد إني هرد عليهم
وبعت الرد إن الجماعة مش موافقين(والدي ووالدتي)
كلمتني النهاردة..وعاوزة تشوفني بكره

البنت كويسة جداااا
بس شئ من الأساسيات مفقود
وهو التوافق السني
غير إني(بأمانة)ماحستش إنها ممكن تخليني أنزل من عرش العزوبية إلي (بتفشخر )بيه على طوووووووووووول

موضوع السن ده موش مشكلة اوى احسب عمرك بالتقويم الهجرى واحسب عمرها بالتقويم الميلادى هتقرب المسافات وهتبقوا تقريبا نفس السن
موش سعادتك كنت استقلت من المنتدى واعلنت الرحيل؟
ياترى جد فى الامور امور؟

**ahmed ismail** · 18-05-2011 07:49 AM

بص يا دكتور
موضوع السن ده مبيتحلش الا لما تكون دايب فى دباديبها لو مش دايب فى دباديبها فكك من لموضوع و خدها من قصيرها و اخلع

**cyborg_ift** · 18-05-2011 09:56 AM

مش هقولك غير محلاهه عيشة الحريه زي الهوا ما يهوا المايه .... كمل انتا بأه

**رزق** · 18-05-2011 10:13 AM

عودا أحمد

**eng/muhamad** · 18-05-2011 10:17 AM

مع كامل احترامى لجميع الاراء اللى بتقول تكمل الموضوع
كلامهم صح جدااااااااااااا بس لو بيتكلموا فى شخصين فى بدايه العشرين من العمر يعنى مثلا يكون هو 21 و هى 22 او 23
لكن لما يكون الموضوع 27 و هى على مشارف ال 30 يبقى لا
لو حصل و الموضوع كمل بعد كام سنه 5 سنين مثلا هتشعر بالفرق

**human** · 18-05-2011 10:22 AM

لا انزل
ديه زى الفل

**ahmed2y** · 18-05-2011 11:23 AM

الاول حمد الله على السلامة يا دكتور

ثانيا الموضوع يبدا بانك ناوى تتجوز او عاوز تتجوز ولا لا

ثالثا موضوع السن دة ممكن ميكونش مشكلة كبيرة بس هى حاجة تتاخد فى الاعتبار على الاقل ما دام ذكرتها يبقى فى بالك لكن عارف هيبقى مش مهم امتى

( لما تكون حاسس انها مناسبة وبنت حلال وافكاركو متقاربة والاهم التقارب المادى والاجتماعى لانك مش هتتجوز البنت بس انت هتتجوز العيلة كلها وصدقنى دى اهم حاجة عشان متتعبش فى حياتك وعينك على حماتك لانها مراية للبنت لو الام كويسة يبقة البنت كويسة )

**mailo** · 18-05-2011 12:01 PM

المشاركة الأصلية كتبت بواسطة ahmed ismail

بص يا دكتور
موضوع السن ده مبيتحلش الا لما تكون دايب فى دباديبها لو مش دايب فى دباديبها فكك من لموضوع و خدها من قصيرها و اخلع

المشاركة الأصلية كتبت بواسطة ahmed2y

ثانيا الموضوع يبدا بانك ناوى تتجوز او عاوز تتجوز ولا لا
( لما تكون حاسس انها مناسبة وبنت حلال وافكاركو متقاربة والاهم التقارب المادى والاجتماعىكويسة )

اولا حمدلله الى السلامة

ثانيًا إنت فكرتني بمسلسل بتاع عايزة أتجوز :)

ثانيًا "تاني" الكلام اللي فوق ده تمام قوي لو فيه قبول من التعرفين الصنميش هيكون مشكلة قوي يعني
يعني من الآخر لازم البنت تكون تستاهل فالمقابل
وكمان لازم تكون البنت من النوع اللي إنت تقدر تعيش معاها ممكن تبقى واحدة صاحبتك 10 سنين ومتربيين مع بعض بس ماينفعش تعيشوا مع بعض وفرأيي دي أهم حاجة + إنها تكون دي اللي تنفع تربي اولادك لما ييجو إن شاء الله

وربنا يكرمك إن شاء الله

الموضوع: حدث قبل منتصف الليل:: جواز صالونات

LinkBack

أدوات الموضوع

عرض

-

-

-

-

-

-

المواضيع المتشابهه

حدث قبل منتصف الليل .. بالشلووووت

حدث قبل منتصف الليل.....قصة كل يوم

حدث قبل منتصف الليل::::أخوياااااااااا

حدث بعد منتصف الليل

حادثه منتصف الليل

الكلمات الدلالية لهذا الموضوع

المفضلات

المفضلات

ضوابط المشاركة