الموضوع: رابطة مالكي وعشاق التمبرا (الجزء الخامس)

السلام عليكم كيف الحال وكل عام وانتم بخير ازيك ياكبير عامل ايه وايه اخبار الرابطه علي حسك --النهارده وانا بتصفح موقع كونتكت كار لقيت اعلان عن سياره فيات موديل 1979 وهي 132 والغريبه انها اوتوماتيك ومكيفه وعند السؤال عرفت انه في منها اوتو بس مش منتشر وعرفت ان شركه فيات من الشركات المحترمه الي كانت سايقه عصرها -والموقف ده حصل معايا كتير كل ما اقول لواحد ان معايا تمبرا اوتو متيك يستغرب ويقولي هو في منها اوتو ماتيك --انما بعد ال132 موديل ال79 اظن مفيش حد حيستغرب بعد كده مع العلم ان سيارتي موديل 94 يعني اكيد في حاجات كتير اتغيرت من ناحيه التكنلوجي --بس بصراحه الي يركب الاوتوماتيك بيبقي صعب عليه يسوق عربيه تانيه خصوصا في بلدنا الجميله اهو نوع من الرفاهيه الي مش واخدين عليها --وفي النهايه تقبلوا مروري ولكم جزيل الشكر والمحبه اخوكم اسامه

المشاركة الأصلية كتبت بواسطة heshamzaky

أزيك يا باشا عامل اية يا استاذ فينك من مدة

موجود ياكبير بس شويه مشاغل عموما احنا داخلين علي موسو البيات الشتوي كل سنه وانتم طيبين

السلام عليكم ورحمة الله وبركاته

إزيكم يا أحلى منتدى في مصر
يارب تكونوا بخير وبصحة وسعادة

---------------
كنت عايز أحكي لكم القصة اللي العربية عملتها معايا اليومين اللى فاتوا يمكن حد يفيد أو يستفيد
وربنا يسترها مع كل واحد ماشي على طريق

القصة كلها تتلخص في جزأين
أنا مش عارف في حد بص للعربية بصة مش حلوة ولا ايه بالظبط / بقالها كام يوم كده مكشره عن أنيابها

في يوم كده كنت راكنها في الجراج وكنت ممورها عشان لو حد عايز يطلع ولا حاجه يبقا يزقها ويطلع
روحت تاني يوم علشان أدورها وأطلع بيها لقيت صوت فظييييييييييييع ولا كأني راكب جرار زراعي - طبعا الصوت ده جاي من الشكمان
أتـاري في حد - الله يسامحه - كان زق العربية جامد وخبط الشكمان من خلف العربية في الرصيف

المهم أخدت العربية وروحت لبتاع شكمانات وقال لي جوان المشترك اتكسر والمسامير اللي في الفرن اتكسرت
طبعا عشان الحاجات دي تتصلح دخلت في دوامة من عند بتاع الشكمانات للميكانيكي علشان يفك الفرن
وللخراط علشان يركب مسامير جديدة في الفرن وبعد كده الميكانيكي تاني عشان يركب الفيلم ده تاني ولبتاع الشكمانات عشان يغير المشترك.

الموضوع ده كله اتكلف حوالي 130 جنية غير الحاجات الصغيرة من جوان وسليكون .....

80 جنية مشترك الشكمان
30 جنية مصنعية الميكانيكي
20 جنية تركيب 2 مسمار عند الخراط

كل ده بسبب واحد معندوش ضمير بيزق العربية وخلاص ومالوش دعوة بأنها تتخبط أو يحصل فيها حاجة

المهم الحمد لله عدت على خير وخلصت القصة دي

في نفس اليوم وبعد ما الشكمان اتصلح قولت أروح بيها مشوار
العربية راحت عادي وكله تمام والصوت بقا حلو والحمد لله صوت الجرار اختفى تماما

وأنا راجع لقيت العربية بتعمل حاجات غريبة - أكون ماشي عادي ألاقيها بطلت مره واحده
قولت خير اللهم اجعله خير
نزلت أشوف سلوك البوجيهات والاسبراتير والموبينا ولقيت كله تمام
قولت يمكن بنزين مش نضيف ولا حاجة - فبدلت سلكين بوجيه ودورت والعربية دارت وطلعت مدفعين ولا حاجه لغاية أما الكربراتير اتسلك
بعد كده رجعت السلكين مكانهم تاني زي الأول والعربية مشيت وكله تمام

بعد حوالي كيلو ولا 2 كيلو عملت نفس الحركة تاني وفصلت تاني
نزلت وعملت نفس القصة تاني لكن المره دي مش راضية تدور
فضلت أجرب وأجرب وأدور لكن مفيش فايدة
سيبتها خمسة كده وبجرب تاني لاقيتها دارت واتحركت بيها

بعد شوية كده حصل نفس الموضوع تاني
وأنا واقف محتارررررررر - يمكن طرمبة بنزين - يمكن تقفيل الميكانيكي فيه حاجه غلط - ...........
وكل ده وأنا مش لاقي حل

المشكلة الأكبر أني كنت على الدائري والساعة 3 الفجر

سيبتها شوية كده وفضلت أدعي ربنا يسترها ووالعربية تدور وتعدي الدائري وتوصلني لأقرب مكان في عمار

شوية كده وبجرب أدور
لاقيتها دارت والحمد لله
ومشيت وعديت الدائري ووصلتني لغاية بنزبنة في زهراء مدينة نصر

والعربية فصلت تاني وعملت حركتها تاني
قولت مش مشكلة

أهم حاجة أني وصلت لمنطقة صاحية شوية وعديت الدائري
وقفت عند البنزينة والعربية حلفت بعد كده ما هتتحرك خطوة واحدة تاني

عدى حوالي نص ساعة ولقيت تاكسي معدي ساعة أذان الفجر بالظبط وسحب لي العربية ووصلنى

لما وصلت قولت الحمد لله أنها عدت على خير ووصلت بيتنا

تاني يوم جبت ميكانيكي يشوف العربية فيها ايه

الميكانيكي كشف عليها وفضل يجرب وفي الأخر اكتشف أن الموبينا بتجيب كهربا ضعيفة وحساس الكرنك اتلسع من حرارة الشكمان

روحت أنا والميكانيكي نشتري الموبينا والحساس من عزبة شلبي
واشتريناهم ب 170 جنية

والميكانيكي ركبهم والعربية دارت وبقت تمام والحمد لله

حسبي الله ونعم الوكيل في أي حد يتسبب في أي ضرر أو أذى لشخص تاني

الحمد لله قدر الله وما شاء فعل

ازيك يا هشام بيه
ازيك يا أسامة باشا