كان نفسك تطلع اية

**pendodo2002** · 23-04-2008 01:38 PM

كان نفسي اكون مبرمج ذكاء صناعي
بس للاسف و الحمد لله ... دخلت طب بشري
اشوف فيهم 80 سنه إلا اربع ايام بتوع التنسيق

**Nader** · 23-04-2008 01:40 PM

المشاركة الأصلية كتبت بواسطة MMamdouh

هى فين الواو ؟ :D

MMamdouh

ما هو مفيش واو، يعني اي كلام علشان مطلعتش مبرمج:D

**hamedo0** · 23-04-2008 02:00 PM

المشاركة الأصلية كتبت بواسطة onna

انا منفسيش اطلع اى حاااااااجة:D

انا طول عمرى عايزة اجوز و اخلف و اربى العيال بس:p

بس مشكلتى انى لما بعمل حاجة لازم اعمل احسن حاجة فيها..يعني لو هذاكر لازم اذاكر صح و دة اللى

دخلنى الهندسة بس انا عن نفسي حتى طموحاتى مكنتش الهندسة خااالص بس لمجرد انها احسن حاجة

فى علمى رياضة و كمان عشان بكره ال bilology

لكن شغل و طموح و بتاع لأ مليش فى الليلة دى

:D:D

ياريت كل البنات بتفكر كده كانت نسبه البطاله بقت في المستوى الطبيعي

**pointer** · 23-04-2008 02:46 PM

كان نفسي اطلع وخلاص :) بس كل اما الواحد يطلع عشره يكعبلوه :D
علي اي حال الحمد لله

**Moh.Abdelbaset** · 26-04-2008 02:30 PM

انا فى كلية الحقوق
ونفسى اتعين فى النيابة او فى السلك الدبلوماسى

**araberphilosoph** · 26-04-2008 05:40 PM

انا ماشي في الطريق اللي نفسي فيه
يعني في الدعوه والمناظرات في الخارج
بس نفسي نفسي ابقي شيخ ازهر
وان شاء الله لو حصل هارجع للمنصب ده هيبته
بدل اللي في بالي اللي ممرمطنا

**casperinoo** · 27-04-2008 06:19 PM

كان نفسي اطلع صياد ..وكل يوم الصبح...اخد الرجاله ونطلع علي المركب...ونيجي بعديها بكام اسبوع ولا حاجه...تخيل تبقي انت والبحر والسما..ولا دخان ولا دوشه ولا اي حاجه تعكنن عليك...

**sss** · 27-04-2008 08:58 PM

اخوكو من وهو صغير كان لعيب كورة فكان في دماغي اني اكون لاعب كورة و ايامها مكنش في دماغي طبعا موضوع الفلوس و الشهرة و الكلام ده
شوية و طلعت في دماغي اني اطلع طيار حربي و كانت دي امنيتي لكن"العتب على النظر" و مازلت حابب موضوع الطيران ده جدا
لكن لما ملأتش فايدة نويت اني لازم اشتغل شغلانة اساعد بيها الناس و بما ان والدي طبيب و انا كنت بعشق الطب نويت على الطب وانا دلوقتي في خامسة طب و الحمد لله
اهم حاجة ان ربنا يعيني اني احقق نيتي لان من اللي احنا فيه و شايفينه اعتقد ان الطب في مصر محتاج شغل بعد الضهر لحد ميبقى مهنة انسانية و الله المستعان

**TaoTao** · 28-04-2008 03:29 AM

ما قبل الحضانة كان نفسي اكون قرصان :d
باتكلم جد، راجل فريد كدة، مخبي عينه بعصابة وعنده إيد خطاف وفوق كل ده عنده بغبغان بيتكلم، وطول النهار صايع في البحر يغلس على مخاليق ربنا، شغلانة عنب يعني :)

لما كنت في ابتدائي كنت باحب الزراعة، وقلت لوالدي اطلع مهندس زراعي، قاللي "وماله" واستطرد "بس المهندس الزراعي ده فلاح مثقف، والنفر في البلد يعلم 10 مهندسين و و و و" طبعا مع الاحترام لهذه المهنة المتميزة والتي مازالت حلم بالنسبة لي. بس اللي يخللى الصيدلي "عطار افرنجي" مش مشكلة لما المهندس الزراعي يبقى "فلاح مثقف" ده حتى ع الاقل مثقف :d
أهالينا لما يحبوا يكرهونا في حاجة بينجحوا دايما :) بس هم أكيد خايفين على مستقبلنا وعاوزين لنا الأحسن من وجهة نظرهم

في إعدادي، حبيت جدا عالم البحار، برامج ومجلات ورحلات كونتيكي ورحلات "كوستو" ونشأ داخلي حب دفين لهذا العالم الساحر، وعند تنسيق الثانوية العامة صرحت بأنني عاوز ادخل كلية "العلوم البحرية" جامعة قناة السويس، والدي قاللي "وماله" واستطرد "وهاتطلع ايه؟" قلت "عالم، زي الدكتور عبد الفتاح جوهر" قاللي "يعني شغلتك ايه؟ هاتكون في نقابة ايه؟ هاتتوظف فين؟" أنا: "....."

وبعدين مكتب التنسيق حدفني هندزة القاهرة، وطلع عندي ميول هندسية دفينة وانا مش واخد بالي، ودخلت وتخرجت من قسم هندسة الحاسبات.

بالمناسبة بقيت اول ماسمع كلمة "وماله" من بابا أعرف إن الإجابة هي الرفض :d

-

الموضوع: كان نفسك تطلع اية

LinkBack

أدوات الموضوع

عرض

-

-

-

-

المواضيع المتشابهه

متحرمش نفسك من العربية اللي نفسك فيها (هو انت هاتعيش كام مرة؟)

النترا تطلع من بورش!!!!!!!!

ال Cd مش عايزة تطلع من الكاسيت

افيدووووونى ال سى دى مش عاوزة تطلع

و دي تطلع كيا ايه دي؟؟؟

الكلمات الدلالية لهذا الموضوع

المفضلات

المفضلات

ضوابط المشاركة