الموضوع: البيرسونا والصنى

الف شكر ليكم يا جماعة وعقبال ما باقي المنتدى يخش يدينى رايه
اخى سيد طبعا البروتون معروفة ومافيش فيها شك ولكن زى ما قولت ليك بس خايف من موضوع محور العربية الضيق وكدا غير كدا ننحنى احتراما للشركة الماليزية
اخى تامر الفلوانس جامدة جدا بس فى حاجة الفرنساوى وبالذات الرينو الشغل فيها معقد زى الكهرباء مثلا مش اى حد يشتغل فيها الا التوكيل وفين وفين لاما تلاقى حد يكون فاهم فيها انما الكروز عربية حلوة وكل حاجة بس منه لله منصور منزل العربية بأسعار خيالية جدا يعنى سمعت ان الاسعار وصلت المانيوال ل 120 الف والاتوماتيك 130 وشوية ومافيهاش جنط مش حرام والنبى بس تغور لو من منصور وفى ناس قالت ان العربية لو 1800 سى سى او 2000 سى سى تبقي احسن بس مش مدى للنقطة دى اى اهمية
الأخ تاوتاو احييك على الروح الوطنية

أنا شايف الصني ......عربية تقريبا مفيهاش أي أعطال أو عيب ماعدا إستهلاك البنزين و اللي حلو مشكلته دلوقتي بتركيب حساس الأكسجين في الفئة اللي فيها فيميه اللي حضرتك إتكلمت عليها...العربية دي فيها طارة و فتيس و فرامل يد و التلاتة جلد طبيعي شيك جدا غير الوسع و الراحة مع هدوء صوت الموتور المتعارف عليه في كل العربيات الياباني

البيرسونا مركبتهاش بس ركبت الجين 2 أكتر من مرة و سقتها..هي فعلا ثباتها وهمي و موتورها حكاية لكن كان فيها عيب في علبة الدركسيون و الفرامل ده غير عيوب التقفيل و استهلاك البنزين و علو صوت الموتور و الكاسيت اللي التوكيل رفض يصلحهو كان عايز يبعتنا لواحد بره و بعناها في الآخر من كتر مشاكلها......فلو البيرسونا هتتطلع زيها يبقى مرشحهاش

ده رأيي الشخصي و ألف مبروك مقدما........

أولا أحب أقول لك إني لم تسنح لي الفرصة لقيادة أي منهم ولكني قرأت عنهم مقالات كثيرة جدا وقمت بفحصهم أكثر من مرة وبناء عليه هذه هي انطباعاتي :
-من حيث الشكل الخارجي للسيارة : أعتقد أن البيرسونا تتفوق في هذه النقطة نظرا للشكل الرياضي الذي تتمتع به بينما نجد أن النيسان صني أكثر كلاسيكية خاصة مع المصابيح الأمامية الجديدة ، ولكن أعتقد أن السياراتان تتمتعان بقوة معقولة في الهيكل علي الأقل فهما أقوي من جميع السيارات الكورية بلا استثناء "الصاج الخارجي" .
-أما من حيث الصالون الداخلي للسياراتان : أعتقد أن صالون البيرسونا أيضا أوسع بشكل ملحوظ من صالون النيسان صني فالنيسان ضيقة جدا من الخلف عكس البيرسونا واستكمالا للشكل الخارجي الكلاسيكي للنيسان نجد أنه قد انعكس علي كلاسيكيةصالون السيارة سواء من حيث شكل العدادات أو تقسيمة كراسي السيارة وشكلها بينما نجد علي الجانب الآخر أن البيرسونا قد انعكس المظهر الرياضي الخارجي لها علي الصالون الداخلي في كافة مفرداته سواء من حيث العدادات أو شكل الكراسي ، أما بالنسبة للخامات الداخلية فأعتقد أن السياراتان مصنعتان من مواد قليلة التكلفة من الداخل وإن كانت جودة التقفيل تقع أيضا في خانة البروتون . كما أن البروتون أوسع في شنطتها عن الصني
-من حيث العفشه : أعتد أن عفشة الصني أنشف قليلا من البروتون وأقل راحة منها أيضا ويساعد علي الشعور بمتاعب الطريق الصالون الأقل راحة للصني ، وإن كان ملاك السيارتان يعلقون علي العفشة بأنها نشفة ...........
- من حيث خشونة المحرك أعتقد أن لبروتون والصني لهما محركان متوسطي النعومة فهما ليسا بنعومة الكوري والياباني وإن كانا محركان يتمتعان بالاعتمادية والقوة.
- من حيث ناقل الحركة ياباني في السيارتان ففي الصني هو من صنع نيسان وفي البيرسونا هو من صنع ميتسوبيشي "كرستالة"
- من حيث الوكيل أعتقد الصني أفضل من عز العرب لبروتون ولكن في المجمل الإثنان متوسطين
- من حيث التقفيل أعتقد أنه متوسط الجودة في السيارتان وإن كان أفضل في البيرسونا
-من حيث إعادة البيع السياراتان توجد صعوبة في إعادة بيعهم وإن كانت الصني أكثر انتشارا وبالتالي هناك سهولة أكبر في إعادة بيعها .
- من حيث توافر قطع الغيار أعتقد تميل الكفة في مصلحة الصني نظرا لتصنيعها في مصر
- من حيث سعر قطع الغيار أيضا الصني أرخص
- من حيث الكماليات أعتقد الصني التي تقصدها بها مرايات ضم وزجاج فاميه زيادة عن البروتون والبروتون بها مثبت سرعة وإشارات في المرايات أكثر من الصني
- من حيث الدهان الخارجي أعتقد السيارتان الدهان فيهما ليس بجودة الكوري فهو سهل الخدش وإن كان هذه المشكلة تظهر في البروتون أكثر من الصني
بس ده كل اللي أعرفه ياريت أكون قد قدمت صورة إجمالية عن السيارتان:b4_611:

المشاركة الأصلية كتبت بواسطة taotao

بعيداً عن المواصفات والكلام المحترم الجميل ده، أنا كنت أخدت قرار لو ربنا وفقني ورزقني لسيارة في حدود 100 ألف إني اجيب النيسان صني لأنها تصنع محلياً ، تشجيع الافتصاد الوطني حاجة مطلوبة اليومين دول، والفلوس دي هايستفيد بيها اخواني من العمال والمهندسين المصريين والفلوس هاتدور داخل البلد بدل ما تخرج برة.
أظن الصني هاتديك اللي انت عاوزه وفي نفس الوقت هاتفيد الاقتصاد الوطني.

رأي عاطفي شوية وربنا يوفقك للي فيه الخير

1+1+1+1+1+1+1+1+1+1+1+++++

باشا أولاً ربنا يبارك لك فى أى سيارة من الاثنين فكلاهما جيد وإن شاء الله تكون السيارة جديرة بحضرتك.

أنا وقعت فى نفس حيرتك دى قبل كده وقرأت موضوعات كثيرة جداً فى المنتدى عن الاثنين ومن مالكى كل واحدة، وبعد الاستخارة ربنا لم يأذن بالبيرسونا ولكنها كسيارة ـ بصفة إجمالية ـ تلفت الانتباه فى أى مكان.

فلذلك قولى عن البيرسونا لن يكون واقعياً لأنى لم أركبها وإن كنت من أشد المعجبين بها، لكنى أسمحلى أقولك أن المقارنة اللى هاقولها ليك مش هتبقى ظاهرية فالشكل يعود إليك والمواصفات تحددها إنت وفقاً لظروفك العملية والاجتماعية والمادية ........ إلخ فنقطة الشكل دى نعديها وإن كانت البيرسونا، وبحق، أجمل وزى ما قلت لك تلفت الانتباه.

لكن من حيث الموضوع فالنسيان عربية اعتمادية جداً جداً بشكل كبير، يعنى بتشيل من دماغك حاجات كتيرة لو اشتريتها من ضمنها التصليح فممكن أى حد يصلحها بالإضافة إلى أن قطع غيارها متوفرة ورخيصة وأصلية يعنى مش هتحتاج تعمل احتمالات فتجرب فلتر نوبيرا، أو مساعد ولا فتيس متسوبيشى موديل قديم، أو تيل فرامل فيات برافا لا لا لا .... بتشيل كل الكلام ده من دماغك وبتشترى حاجة نيسان أصلية وزى ماقلت لك منتشرة؛ ودى ميزة كبيرة جداً جداً.

ثالثاً التوكيل بتاع نيسان كويس جداً وخدوم إلى أقصى درجة فإذا أخذنا فى الاعتبار أن العربية أعطالها ـ ولله الحمد ـ قليلة أو عادية وتحت السيطرة أو بمعنى أدق مفيش عيب عام كل أو معظم الملاك اشتكوا منه؛ يبقى دى نقطة تضاف لصالح نيسان.

فيه كمان حاجة مهمة مش كل الأراء بتذكرها وهى نقطة الضمان: بص يا سيدى نيسان ضمان ثلاث سنوات أو مائة ألف كيلو للعربية كلها ضد عيوب الصناعة أيهما أقرب إنما البيرسونا ستين ألف كيلو بس أو ثلاث سنوات، وده مش لكل العربية إنما الطنابير أقل من كده ممكن عشرين أو تلاتين ألف كيلو بالكتير بعدها بتخرج الطنابير من الضمان ودى نقطة ثانية لصالح النيسان.

فيه حاجة أخيرة عايز أقولها ليك موجودة فى النيسان ومش موجودة فى البيرسونا وهى إنها ولو حتى أتوماتك (أعنى النيسان) ممكن تركن صف ثانى وتسيبها ممورة وتقفل عربيتك ومفتاحك فى جيبك وتمام التمام ودى حاجة ـ رغم أنها بسيطة ـ مش موجودة فى البيرسونا المفتاح مش بيطلع إلا لو كان الفتيس على (p)، وأنا حسب اللى فهمته من كلامك أنك بتسافر القاهرة فدى ميزة كبيرة بجد.

النيسان عيوبها الشائعة (مش القاتلة) أن المساحة بين الكنبة الخلفية وكرسى السائق ضيقة ودى عايزة منك معاينة على الطبيعة لو تقدر تظبطه يبقى كويس جداً لو متقدرش يبقى ممكن تتعبك؛ الحاجة الثانية استهلاك البنزين عالى شوية (واخد بالك شوية) بس مش أوى بالنسبة لموتور قوى زى النيسان.

أخيراً عايز أقول لحضرتك أن العربية ميزات موضوعية شخصية فى المقام الأول فنصيحة ليك بلاش المقارنة على أساس المريات اللى بتضم زى النيسان ولا فيها إشارات زى البيرسونا ولا الجنوط الاسبور ........... إلخ كل ما تبحث عن الموضوع كل ما ترتاح أكثر، ولا تنسى الاستخارة وربنا يوفقك ويبارك لك مقدماً فى اللى تختاره.