الموضوع: عاوز أجرب العدسات اللاصقة

السلام عليكم ياشباب انا بقالى خمس سنين بلبس عدسات لما خلاص مبقتش بشوف
ولسة امبارح مجددها وطبعا عندى استيجماتيزم المهم انى جربت دكاترة كتير وجربت مراكز طبعا كتير
لكن اخيرا اتعاملت ولاول مرة مع مستشفى النور للعيون اللى فى اخر احمد عرابي فى المهندسين
اعتقد دى من انضف الاماكن اللى اتعاملت معاها سواء فى الدكاترة او فى العدسات وكدا
عموما انا انصحك بيها طبعا .
اما بقى بالنسبة للاستيجماتيزم فهو فعلا ليه عدسات مخصوصة وهى اللى اسمها توريك دى ودى بتيجي بالطلب ( يعنى عمرى ما روحت لحد ولقيتها عنده موجوده لا مركز ولا دكتور حتى النور للعيون )
طبعا اتضحك عليا كتير فى موضوع السنوى والشهرى واليومى والجو ده لكن اخيرا فى مستشفى النور للعيون قالولى ان عدسات الاستيجماتيزم مفيش منها اى نوع يقعد اكتر من 4 الى 6 شهور ( وعتقد ان دى معلومة صحيحة جدا لانى بتجربتى فعلا العدسات التوريك دى بتقعد تقريبا مش اكتر من 6 شهور وبتبدء تعمل مشاكل )
بالنسبة للاسعار فى المستشفى هو سعر الكشف 30 جنيه والعدسات ب 160 جنيه ( بتستلم تانى يوم طبعا او نفس اليوم بليل ) وبس
ملحوظة اخيرة انت بتعقد من ساعة لاتنين علشان تكشف وتقيس نظر وتطلع تحجز العدسات وكدا يعنى ( اصلى كنت مزوغ من الشغل وكنت فاكر انى هخلص فى نص ساعة فلما روحت لقيت بشر ربنا يسامحنى بقى )
ارجو انى اكون وفقت فى شرح الموضوع ولو فى اى استفسار انا جاهز

المشاركة الأصلية كتبت بواسطة centurion

السلام عليكم،

أنا زهقت من النضارة و كنت بفكر أعمل ليزك بس قلت بلاش منها دلوقت لغاية لما أسأل عنها وأفكر كويس

وعقبال لما أخد قرار نهائي فكرت ان أنا أجرب العدسات اللاصقة أهو على الأقل أعرف ألبس نضارة شمس عدلة

فكنت عاوز أسأل هل الأحسن ان أنا أروح لعيادة خاصة ولا مركز كبير زي المغربي؟

والكشف تقريبا هيكلف كام هو والعدسات والمحلول؟

أنا سمعت ان في عدسات دلوقت ممكن تلبسها علطول بس مش عارف الأنواع دي موجودة في مصر ولا لأ؟

وعاوز أسأل برضو أنا عندي استجماتيزم خفيف كده -1 تقريبا في العينين فهل هتنفع العدسات عادي ولا لأ؟

ياريت ياخونا تحكولنا تجاربكم

اهلا بيك يا زميل فى جروب ضعاف النظر وذوى الاستجماتزم

انا معرفش اوى فى موضوع العدسات ... بس نصيحة مني اوعى تجيب العدسات الدائمة دى على الاقل فى الاول لان فية ناس مش بتمشى معاهم موضوع العدسات دة وكمان في ناس بيجلها حساسية جامدة من العدسات ومش بتقدر تستعملها وهتكون خسرت تمنها على الفاضى
دة بالاضافة ان العدسات مش بتصلح موضوع الاستجماتزم خالص .

وبخصوص الليزك ..انا اعرف انة لا يفضل طالما ضعف النظر مش رهيب يعنى انك تعملها قبل سن 40 سنة ..معك ربنا

على الله اكون فيدتك فى اى حاجة
على فكرة انا غالبا هاحتج قريب فى موضوع شراء الشنيور والصاروخ ...يا تري لسة فاكر ؟؟؟

المشاركة الأصلية كتبت بواسطة ahmedarab

على فكرة انا غالبا هاحتج قريب فى موضوع شراء الشنيور والصاروخ ...يا تري لسة فاكر ؟؟؟

انا اسف الجملة الاخيرة دى خطا مطبعي .. جت هنا غلط ..اسف لحضرتك جداً.

المشاركة الأصلية كتبت بواسطة musiccairo

مالها النضارات اكتر من 20 سنه بلبسها ومريحه والحمد لله
انا بقلق من العدسات جدا لان شكلها مش مريح اطلاقا اثناء التركيب
مقرأتش بتتركب ازاي عالعين ومعرفش عنها اي حاجه نظرا لاني فعلا بكرهها
متحاولوش تقنعوني لالالالالا

مع حضرتك قلبً وقالبً ... ولو عملوا اية مش هالبسها ....
حتى لو لغوا النظارات خالص ..انا عندى احسن انى اعمل عملية الليزك ومش استعمل عدسات

المشاركة الأصلية كتبت بواسطة funnymickey

طب ياجماعه مفيش حد خبره يقدر يقولنا نفرق بين الاصلي والمضروب ازاي

بعد استشارة المتخصصين
اهم فرق بين الاصلي والمضروب فى السعر ....
يعنى لو العدسة فى مكان ب 100 جنية مثلا ..يبقى لو لقيتها فى مكان ب 50 او 60 .. اكيد دى المضروبة
الفرق فى السعر فى الاصلي من مكان لمكان ممكن يتراوح من 15 - 20 % بحد اقصى

على فكرة انا غالبا هاحتج حضرتك قريب فى موضوع شراء الشنيور والصاروخ ...يا تري لسة فاكر ؟؟؟:b4_611:

المشاركة الأصلية كتبت بواسطة obadsoma

السلام عليكم ياشباب انا بقالى خمس سنين بلبس عدسات لما خلاص مبقتش بشوف
ولسة امبارح مجددها وطبعا عندى استيجماتيزم المهم انى جربت دكاترة كتير وجربت مراكز طبعا كتير
لكن اخيرا اتعاملت ولاول مرة مع مستشفى النور للعيون اللى فى اخر احمد عرابي فى المهندسين
اعتقد دى من انضف الاماكن اللى اتعاملت معاها سواء فى الدكاترة او فى العدسات وكدا
عموما انا انصحك بيها طبعا .
اما بقى بالنسبة للاستيجماتيزم فهو فعلا ليه عدسات مخصوصة وهى اللى اسمها توريك دى ودى بتيجي بالطلب ( يعنى عمرى ما روحت لحد ولقيتها عنده موجوده لا مركز ولا دكتور حتى النور للعيون )
طبعا اتضحك عليا كتير فى موضوع السنوى والشهرى واليومى والجو ده لكن اخيرا فى مستشفى النور للعيون قالولى ان عدسات الاستيجماتيزم مفيش منها اى نوع يقعد اكتر من 4 الى 6 شهور ( وعتقد ان دى معلومة صحيحة جدا لانى بتجربتى فعلا العدسات التوريك دى بتقعد تقريبا مش اكتر من 6 شهور وبتبدء تعمل مشاكل )
بالنسبة للاسعار فى المستشفى هو سعر الكشف 30 جنيه والعدسات ب 160 جنيه ( بتستلم تانى يوم طبعا او نفس اليوم بليل ) وبس
ملحوظة اخيرة انت بتعقد من ساعة لاتنين علشان تكشف وتقيس نظر وتطلع تحجز العدسات وكدا يعنى ( اصلى كنت مزوغ من الشغل وكنت فاكر انى هخلص فى نص ساعة فلما روحت لقيت بشر ربنا يسامحنى بقى )
ارجو انى اكون وفقت فى شرح الموضوع ولو فى اى استفسار انا جاهز

وعليكم السلام،

30 جنيه كشف حلو قوي ، أنا كده هكشف هناك ان شاء الله

بس انت بتلبس العدسات كام ساعة في اليوم تقريبا ؟ وهل في فرق كبير يستاهل يعني بين العادية والتوريك لو الاستجماتيزم صغير -1 ؟