السلام عليكم يا جماعة

انا الحمد لله معايا لوجان 2011 فول اوبشن وعاملة حوالى 20 الف كيلو ولسة عاملها صيانة ال20

دعونا بس الاول نتفق انى بأمانة ربنا لحد دلوقتى العربية مش قابلها .... يمكن علشان العربية عالية وانا مش بحب العربيات العالية (طبعا ده ميزة علشان هضاب مصر العظمى) وكمان وانا راكب لا شايف كابود ولا شنطة ومقضيها تخمين ابعاد

المهم .... دلوقتى العربية عندى فيها حاجات كده مش عارف ده عندى انا بس ولا كل اللوجان كده :

1- اول حاجة العربية فيها حاجة غريبة ... ان لو حصل موقف ورحت فارك بالعربية من الثبات .... بلاقى العربية حدفت يمين بطريقة بشعة والدركسيون بفقد التحكم فيه ... الموقف ده حصلى مرتين ... مرة حصلت حادثة قدامى والحمد لله لميت نفسى قبل لما البس فى الناس وبعد شوية الناس زنقت عليا فروحت فارك لاقيت العربية حدفت يمين بطريقة بشعة والدركسيون فقدت التحكم فيه .... وحصلى موقف تانى برضه وحصلت نفس الظاهرة ده

2-الدركسيون بتاع العربية غريب جداااا .... تقيل وانا ماشى على السرعات البطيئة (اقول يا واد استحمل ده بيديك ثبات) .... وعلى السرعات العالية بلاقيه خفيف جداااا ... وكمان لما ماشى على سرعة مثلا 100-120 والارض اللى تحتيك مش منتظمة والاسفلت متعرج ... بلاقى الدركسيون بيمشى مع الاسفلت مش مع ايديا وطبعا ده خطر على السرعات ده وبيخلى العربية عاوزة تعوم

3- فيه حاجة عندى شمال العربية ورا فى الشنطة .... كل لما بمشى بسرعة بلاقيها طقت بصوت عالى جدا لدرجة انى بشك ان الكاوتش حصله حاجة ... والموضوع ده اتكرر اكتر من مرة ومش عارف ايه السبب ( انا مش بزود عن 140 كحد اقصى )

4-تكيف العربية كان تلاجة بصراحة ربنا فى الاول .... ولما العربية كملت ال10 الاف فضت شحن .... وشحناها فى التوكيل ... ومن ساعتها التكيف مش بيسقع زى الاول والمهندس اللى هناك لما روحت اعمل صيانة ال20 بيقولى انه شغال بكفاءة

5-سحب العربية بعد صيانة ال20 بقى وحش جدا وبالذات مع التكيف العربية بقت بطة... مش عارف ايه اللى حصل وايه اللى ممكن اعمله .... انا خايف لايكون عملوا حاجة فى التوكيل غلط

6-الفرامل عندى بتصفر ولما روحت صبانة ال20 قالولى ان فيه شوية طين على الطنبورة ونضفناها ..... وطبعا الصفارة لسة شغالة ... وده بتحصل لما بفرمل بالراحة مش جامد .... وكفاءة الفرامل عندى لما بشغل التكيف بتضيع وبحس ان العربية مش عاوزة تقف

7-حاجة اخيرة .... عندى الصالون بيطقطق دايما مش عارف ليه ... وده بيجبلى احباط وبيحسسنى انى مركب طابلوه عمولة مش عارف ازاى يعنى والعربية تقريبا زيرة

بجد يا جماعة الموضوع ده سرد لعيوب فردية بتواجهنى فى العربية بتاعتى .... عاوز بس ماشورتكم فيها لانى بدأت اقفل من العربية وانا حاسس ان العربية كويسة بدليل انها منتشرة انتشار جامد ما شاء الله

بالتوفيق ان شاء الله