ها أشترى بيتلز ومحتاج ارأكم

**ahmedg0g0** · 12-06-2011 12:03 AM

السلام عليكم اولا :
دى اول مشاركة ليا فى قسم الفولكس بصراحة عربيات محترمة جدا و معمرة
هو انا كان ليا استفسار صغير كده
انا معايا لادا 2105 طبعا هى مش بتاعتى دى بتاعت الحج المهم بعد ما زهق منى قدرت العب فى دماغه انه يجيبلى عربية لوحدى و كانت معركة بس الحمد لله مافيش خسائر فى الارواح طلعت سليم
المهم خد القرار انه هيجيبلى البيتل راسه و الف سيف مافيش غيرها يهديك يرضيك يا حج مافيش فايدة طب هزود انا الفرق فى اى عربية تانية مافيش يا دى يا بلاش عرفت انه مش عايزنى اجرى ,,, هو انا متهورش حبتين اه بس مش مجنون والله ( فين يا عم انت الاستفسار الصغير ده انت كتبت موضوع تعبير )
عشان ماطولش عليكم ( هوانت لسه ماطولتش,, اللهم طولك يا روح )
دلوقت بعد ما اتاكدت انه مش هيجيب غيرها عايز مساعدتكم بقى عايز اعرف مميزات و عيوب هذه الخنفساء
طبعا انا متعود على الادا يعنى ثبات عزم و مش بتقول لا معاك فى كل حاجة بتجرى هو مش اوى يعنى بس اهى ممكن تجيب 120 Km و اهم حاجة انها كانت بتستحمل طبيعة شوارعنا الجميلة اللى كلنا عارفنها طبعا ده زائد عيبها المنيل و هو التقل ف كل حاجة يعنى الواحد لازم يكون بيلعب حديد و الكلام ده عشان يتعامل
عايز اعرف بقى ايه الفرق اللى ممكن هحس بيه لما اركب البيتل (انا اصلا كل ماشوفها اقعد اضحك مش عارف هاسوقها ازاى دى ؟! )
اه معلش سؤال تانى انا عارف انى بقيت رخم اوى ( رخم و بس اتفضل اتنيل اسأل .......)
عايز نصايحكم فى الموديل اللى اجيبه و ياريـــت بقى تبقوا كرماء بجد لو السعر كمان ياااااه ده يبقى احلى واجب
..(ياعم اخلص بقى شلتنى هنقول كل حاجة خلص بقى الموضوع اللى مش عايز يخلص ده )
انا خلصت عايز اشوف بقى ردودكم السلام عليكم

**M.Mostafa80** · 12-06-2011 01:20 AM

بص لما تركب البيتلز هتعرف ان الادا كنبه ومتزعلش منى
بيتلز يعنى ثبات وسحب ممتاز واحلى منورات ولو اتعودت عليها مش هتعرف تركب حاجه تانى بعدها وبكره تجرب بنفسك وتقول عضو فى فولكس قال
بس اهم حاجه ربنا يكرمك بعربيه حاله كويسه ويفضل تجيب الموديل اللى رقمه 1300

**ahmedg0g0** · 12-06-2011 01:36 AM

الف الف شكر على الاهتمام ده
بس مش عارف ليه لما بشوف اى بيلتز بحس انها مش قادرة تمشى ؟ !! انا ناس كتير قالتلى انى راكب كنبة فعلا مش عارف ليه نفس اللفظ ده بظبط بيتقال دايما على الادا مع انها مش مزعلانى والله
بس خلاص الحج خد قرار هى البيتل انا عايز اعرف حاجة دلوقت سعرها كام فى السوق عشان ميتضحكش عليا و 1300 ده ال cc صح ؟
اه و سؤال تانى معلش هى التوب سبيد بتاعها كااام دى مهمة اوى بالنسبة لى ؟

**SYD** · 12-06-2011 01:44 PM

البيتل عربيات حلوة اوي سواء 1300 او 1333
عيبها الي هتلاحظه ان انت والي جمبك هتبقوا حاجة واحدة، الكتف في الكتف كأنكو بتصلوا، لذلك ينصح بركوب الرجال او المحارم

لعلمك علي قد الزيطة الي بتعملها لكن وانت جوة هادية ولو الميكانيكي محترم بتبقي كمان صوتها ناعم
ربي سوالفك والبس شارلستون وارجع للزمن الجميل بعربيتك الجديدة الي بجد هتستمتع بيها وبتجربة الالماني
مانصحكش تجرب فولكس جولف 1 (موديلات 78- 83) العربية دي قلت اوي في السوق وقطع غيار الاستيراد بتاعها بقي اغلي من البولو

والله المستعان
،
،

**SYD** · 12-06-2011 02:37 PM

المشاركة الأصلية كتبت بواسطة semam

البيتل عندك 3 موديلات

بيتل موديل 1300 ودى بتكون عفشتها على دنجل يعنى خدمة شاقة وكل بيها مطبات زى ما انت عاوز

بيتل موديل 1302 ودى اللى معايا انا والعضو المحترم احمد احسن عفشتها على مساعدين راحة ورفاهية

بيتل موديل 1303 ودى الفرق بينها وبين ال 1302 الزجاج البومبية والتابلوة فقط

معلومات جامدة اوي
اول مرة اسمع الكلام دة
مشكورر

**ahmedg0g0** · 12-06-2011 04:30 PM

المشاركة الأصلية كتبت بواسطة syd

البيتل عربيات حلوة اوي سواء 1300 او 1333
عيبها الي هتلاحظه ان انت والي جمبك هتبقوا حاجة واحدة، الكتف في الكتف كأنكو بتصلوا، لذلك ينصح بركوب الرجال او المحارم

ربي سوالفك والبس شارلستون وارجع للزمن الجميل بعربيتك الجديدة الي بجد هتستمتع بيها

،
،

ههههههههه طب بالنسبة لو حد فكر يقعد ورا موقفو هيبقى ايه ؟

**beetleMOSH** · 13-06-2011 05:32 AM

كل الناس اللى ردت دى طبعا
ردودها مفيده جدا جدا جدا
و زى العسل جدا جدا جدا
هييييييييي بقولك انت هههههه
بص يا سيدى البيتل كده باختصار هاتغير مفهومك عن العربيات تماما
و لو انت دماغك حلوه و غاوى ترويق كده و جرى و غرز و الجو ده
احب اقولك ان السيد الفاضل والدك
حطك على اول طريق الانحراف
هههههههه
طبعا فاكرنى بهزر
بس مسيرك تجيب و تعرف
اولا انصحك بموتور 1600 سى سى
عشان تحس بالجرى الصح
ثانيا انصحك برضه بالموديل 1303
هو اه العفشه بتاعتها غاليه
بس اكتر رفاهيه و راحه
من الموديل ال 1300
اللى عفشته ناشفه اوى
بس بتتميز برخص اسعار قطع غيار العفشه
و فى نفس الوقت
حماله اسيه اكتر
انصحك كمان تخليك فى الموديلات الحديثه
يعنى اول حاجه تفكر فيها
موديلات 70 و انت طالع

طبعا اهمممممممم حااااجه فى العربيه دى الحاله
و لازم ثم لازم ثم لازم ثم لازم ثم لازم
انا علقت ولا ايه هههههههه
تكشف عليها عند ميكانيكى متخصص فى البيتل
و متروحش تكشف عند اى حد
لان محدش هايفهم فيها حاجه
او بمعنى اصح محدش هايفهم حاله العربيه و يقدر يشخصها صح
ممممم فى ايه تانى
انصحك برضه تدور على عربيه بيتى
يعنى تكون بتاعت واحد فاهم يعنى ايه بيتل
مش واخدها استعباد و خلاص
و اخيرا و ليس اخرا
اعمل حسابك انك بتقتنى سياره المانيه اصيله مأصله
تهتم بيها و تعتنى بيها هاتروقك اوى اوى اوى
هاتهملها و تعذبها
هاتوريك النجوم فى عز الظهر

و كفايه كده بقى

اه على فكره انا كنت زىحلاتك كده و الحج كان مصمم على بيتل برضه
و انا مكنتش راضى تماما
دلوقتى بيقولى غيرها
و انا اللى مش راضى
لان بجد العربيه دى جمييييييييييله اوى
و فيها عفريت d:
طبعا لما ربنا يكرمك و تشترى هاتعرف العفريت ده بيطلع امتى
هههههههههه

بالنسبه ل رنج الاسعار
ف ممكن تقول ان البدايه 7000 جنيه
و دى هاتبقى موديل قديم اوى و حالتها تعبانه
و اخر سعر ممكن توصله
20 الف و ممكن تعدى ال 20 بس دى نوادر و تبقى العربيه حاجه كده تحفه فنيه

بس المتوسط و اللى هايبقى كويس نسبيا
من 11 الى 15- 16
ممكن تزيد حاجه بسيطه
و ما تنساش المكنه ال 1600
هههههههه

**smsmxxxxxx** · 13-06-2011 09:14 PM

البيتل بالنسبة لشاب ممتازة بكل موديلاتها

لكن لعائلة هتواجه طبعا صعوبات ديقة الصالون وعدم وجود شنطة كبيرة

بالنسبة للشكل ال 1300 و ال 1302 شبه بعض بس ال 1302 شنطتها اعرض يعنى بوزها عريض

1303 هى احلى شكل خصوصا لو مركب جنوط سبور

بالنسبة للعفشة كل الموديلات قوية بس ال 1300 على دنجل يعنى لو دخلت فى مطب صناعى بسرعتك العربية بتطير وبتنزل تمشي تانى عادى جدا ودى حصلت معايا والله كذا مرة

بالنسبة للمناورة يعنى الغرز او اللف فى مكان ضيق فالافضل ال 1302 وال 1303 لان زاوية كسر الدريكسيون اكبر من 1300

اما السرعة انا معايا اصغر موديل للموتورات الالمانى 1200 سي سي بجيب 120 بسهولة والمواتير ال 1600 بيجيب 160 بسهولة

فانتا افضلك هات 1303 بتعمل من اول 15000 جنيه
ومتستعجلش وخللي ميكانيكي كويس يشفهالك ويكون تخصصه بيتلز

وجرب العربية بنفسك قبل ما تشتريها يعنى شوف السحب والتوازن والكلام اللى انتا اكيد عارفه علشان انتا بتسوق

وان شاء الله ربنا هيوفقك فى عربية كويسة

------------
محمد سالم

الموضوع: ها أشترى بيتلز ومحتاج ارأكم

LinkBack

أدوات الموضوع

عرض

-

-

-

-

-

المواضيع المتشابهه

عايز أشترى عربية ومحتاج نصائحكم الكريمه

عايز أشترى مازدا 3 ومحتاج شوية معلومات عنها ومحتاج مساعدة الوحوش

محتاج ارأكم و اقتراحتكم ضرورى

عايز أشترى ساعة جديدة ومحتاج مساعدة ..

ناوى أشترى تيريوس ومحتاج مساعدة

الكلمات الدلالية لهذا الموضوع

المفضلات

المفضلات

ضوابط المشاركة