أنزل مصر ..... ولا أستمر في الغربة ؟؟ ... أشيروا علي.

**aif** · 13-06-2011 01:36 AM

ان شاء الله مش ح تبقى محتاج تسافر برة مصر
لكن الكلام ده بعد فترة تقدر بحوالي 5 سنوات
ان شاء الله بعد كدة ح تلاقي جنسيات تانية بييجو يشتغلو في مصر زي زمان
لكن دلوقت البلد في مرحلة حرجة جدا والدنيا مكهربة والاستثمارات شحيحة والشغل قليل
اكيد خليك في الامارات لغاية ما ربنا يفرجها والفترة الانتقالية دي تعدي وتبدأ العجلة في الدوران والامور تتحسن

**Gelgel2004** · 13-06-2011 01:37 AM

المشاركة الأصلية كتبت بواسطة yousef1978

السلام عليكم

أنا يا جماعة شغال في الإمارات - بلاد البترول الذي لا ينضب والمعمار الذي لا يضاهي - والنظام الذي لا يقارن
والحر واللهب الذي لا ينتهييييييييييييييييييييي ي

أديلي ثمانية سنوات تقريبا وأنا متغرب
وبأمانة تقريبا لم يمر علي يوم وشعرت فيه براحة نفسية

كان سفري للإمارات إبتعادا من مشاكل إجتماعية كان البعد هو الحل الوحيد لمداواة جروحها

عملت أول سنوات بوظيفة أقل واتبهدلت جسمانيا ونفسيا

وفي السنوات الأخيره ربنا أكرمني وأخذت مكانة جيده في عمل

كل ما أحاول ان أستقيل من عمل أجدهم يزودو راتبي لكن أصمم على موقفي وأستقيل وأدعوا الله أن أنزل
ولكن أجد شيئا يعيق نزولي وبمنعني بشدة

لدرجة إني أول مرة نزلت بعد سنة لقيتهم تاني يوم بيتصلوا علي في شغلانه قدمت عليها من حداشر شهر وبيقولولي الموافقة عليك طلعت تعالى استلم الشغل

آخر مرة كانت من سنتين لما الكفيل اللي انا على إقامته قرر إنه لا ينتظر أكثر من ذلك ويلغي لي الإقامة لأني تركت العمل معه من سنة وعملت في شركة أخرى

وفرحت وحمدت الله كثيرا - لكن كنت أعمل في جزيرة وظللت أسبوعا أنتظر أن تهدأ الرياح وتتحرك السفن حتى أرجع وآخذ حاجتي وأرحل - يعني إمشي - فوجدت واحد بيتصل علي ويقولي فيه واحد محتاج مهندس يعمله كفالة ويسيبه يشتغل براحته

فضلت أشترط على الراجل وهو يوافق لغاية ما عملي إقامه وقالي اشتغل بره براحتك

كل ما تيجي مشكلة وأقول هانت ربنا أراد إني أمشي وأذن أن يكون رزقي في مصر ألاقي المشكلة إتحلت

كل ما أنوي خلاص ألاقي عقبة ليست بالهينة

يعني مرة كل ما املك وهو تحويشة سنة ونصف طارت مرة واحدة في تجربة تجارية فاشلة وبقى علي فلوس

مرة منتظر لما أكمل نصيبي في بيت علشان يكون عندي ملك عقبال عندكم جميعا

مرة السفينه والرياح

وأخيييييييييرا حصلت المفاجأة السارة التي كنت أتوقعها وثار الشعب المصري

وفي أول فرصة لميت حالي وقدمت على إجازة ونزلت أنا وأولادي علشان ألحق الإستفتاء

وبعد أسبوعين لقيتني خلصت فلوس فقلت مش مهم أرجع ألم حاجتي وأستقيل وكفى الله المؤمنين القتال

ولغيت إقامة أولادي تماما حتى لا يفكروا في الرجعة بتيتا

فوجئت بمشكلة هيتعرض لها أخويا ولازم أكمل ثلاثة أشهر وبعد كده اقدم استقالتي

قلت في بالي أستمر شهر وبعدين أقدم على إجازة بأي طريقة وتكون مشكلة أخويا اتضحت

زميلي في العمل استأذني وقدم على إجازة وقاللي اسبوع وأرجع علطوووووووووول
فضل مأخر إجازته وبعد شهر نزل وقعدلي شهر هناك كمان وانا على نار

قبل ما يرجع بيوم لقيت قرار جاي من المدير العام في أبو ظبي بإلغاء جميع الإجازات لأجل غير محدد وحاولت وحاول مدير الفرع يشوفلي حل وفي الآخر بعتلي إيميل بيقول فيه يا جماعة ما حدش يحرجني لأن ممنوع حد ينزل إجازات اليومين دول

الثلاثة أشهر أوشكوا على الانتهاء وأنا كل يوم بيمر على كأني في سجن بورتو الخانكة

من أسبوع لقيتهم بعتولنا العقود الجديدة وكان أول واحد يتبعتوله هو العبد لله
وزودوا المرتب كمان والحمد لله ومطلوب ردي أوافق ولا أرفض والمنتظرين كثرررررررر

مش عارف حاسس بمغناطيس بيشدني للبلد دي كل ما احاول أبعد عنها

وغير كده كل ما أكلم الهانم زوجتي المصون تحكيلي عن - حادثة قبل النوم - وحوادث إيه من اللي قلبكم ما يستحملهاش من قتل وتمثيل جسس وفين في المنيا مش في الليثي ولا العتبة ولا شارع عبد العزيز - عبد العزيز بيه لحسن يكون معرفة حد فيكم -
ده غير الخطف والإغتصاب والسرقة بالإكراه
وإخواتي يقولولوي أوعى تنزل بري
وألاقي واحد صاحبي بيكلمني يقولي إوعى تنزل طيران
واحد تاني يقولي لو المغرب أذنت عليك في الطريق نام مكانك وما تتحركش
وكل شوية واحد يقولي على شغل في الإمارات
وواحد يبعتلي على سلف لأن الحال واقف

مش عارف حسسوني كأن البلد في الضياع والحرب قامت خلاص والناس بتاكل في بعض وما حدش بيعرف أخوه

طب إيه الحل - دلواكيييييت عاد - بالصعيدي

أستقيل وأقول مصر أمامكم والكنسلة خلفكم

ولا أستمر ولا أعمل إيه

علما باني لو نزلت ممكن أخلي الإقامة شوية من غير ما ألغيها لكن الوظيفة هتروح مني ودلوقتي الحصول على فرصة عمل مناسبة في الإمارات كالحصول على لبن العصفور

أنا خلاص كرهت حياتي ومنك لله يا مبارك ضيعت شبابنا وحياتنا وانت في السلطة وانت براها - ربنا يورينا فيك يوم لا ينسى من ذاكرة التاريخ

أنا الصراحة طبيعتي عاطفي جدا ورومانسي شويتين وعندي حنين للشارع الزبالة اللي كنت عايش فيه وأنا صغير وللمدرسة الغبية اللي كنت بأنضرب فيها وأنا طفل وللترعة المعفنة دلوقتي اللي كنت بأعوم فيها من ورا أهلي

أنا حاسس زي ما أكون سمكة قرموط كانت عايشه في مجراية ميه راكده وعكره فخدوها حطوها في بحر مالح بين شعاب مرجانيه
وبعدين رجعوها تاني
فالسمكة لو قعدت في البحر تحس إنها مخنوقة لأنها مش متعودة على السمك ده وعلى الملح ده
ولما رجعوها للمجراية الحقيره حست بالإكتئاب من الفرق الشاسع بين المحيط الصافي والمجراية العكره

أفيدوني أيها الناس
أشيروا علي أيها الزملاء

بس يا ريت بالله عليكم اللي يقول رأيه يفكر فيه كويس لأن المستشار مؤتمن
وانا الصراحة مش بأحب التفكير التقليدي بتاع إن فاتك الميري اتمرغ في زبالته وعصفور في القفص خير من عشرة على السفرة والكلام ده

تحياتي للجمييييييييييييييع

السلام عليكم
مع احترامى لكافه الاراء
بلاش تنزل

**Angel_wolf** · 13-06-2011 02:07 AM

بص انا كنت عايش في الكويت طول عمري وانا صغير متعود على مستوى معين وعايشين عيشة سوبر
فجأه ابويا جاله نفس الفكرة اللي عند حضرتك وقرر يستقيل وينزل
طبعاً هو ممكن يرضى بأي حاجة لان ده قراره وهو كان فاكر انه مستريح على كدة ومرتبه هنا 1\20 من مرتبه هناك بس معلش يعني عيالك دول مش كلاب وليهم متطلبات ومستواهم اتعودو عليه هتظلمهم لو نزلتهم فيه وطبعاً في الاول بتبقى نازل معاك قرشين وعايش حياتك وعمال تصرف وبعد كدة خلاص بح مفيش فلوس والمرتب بيتصرف من نص الشهر وهتتمنى ترجع زي ما الحج هنا مبقاش طايق البلد دي وطبعاً فرق كبير بين اللي كنت فيه واللي بقيت فيه والمدرسة الانترناشونال بقت مدرسة حكومة مليانة عيال سبرسجية والتعليم النضيف بقى دروس وضرب وتعليم بالكوم وطبعاً حضرتك اتعلمت كدة ومش شايف فيها مشكلة لكن هل ده الأفضل؟؟
طبعاً ممكن تعيشهم في نفس المستوى بشرط ان يكون عندك مصدر دخل ثابت هنا يعوض شوية من اللي راح ودا اللي انقذنا وطبعاً في الوقت الحالي مفيش فرصة لحاجة من دي يبقى مش من الحكمة انك تغامر بمستقبلك ومستقبل ولادك
انما تعيشهم في الشارع الزبالة والترعة اللي مش عارف ايه وتجبرهم على كدة علشان حنين للماضي يبقى للاسف حضرتك ضيعت سنين الغربة ومستقبل عيلتك

لو تقدر تعيش في حتة محترمة ونضيفة ويكون عندك مصدر دخل محترم وتعلم اولادك تعليم محترم يبقى تعالى غير كدة يبقى هتندم أشد الندم
عايز اقول لحضرتك رغم اني كنت متفوق في الكويت وصلت لاعلى درجات الانحطاط العلمي من ساعة ما جيت البلد دي وعرفت طريق الدروس والحفظ ولم المادة قبلها بيومين ولغيت تفكيري نهائياً وفي نفس الوقت زمايلي اللي كانو معايا زمان كلهم دخلو جامعات في كندا وبقو حاجة تانية خالص

اقسملك بالله انت بتوصف الى حصلى بالملى والله العظيم وبردوا كنت فى الكويت و الحج هبت معاه ينزل واهو بيندم فى ساعة لا ينغع فيها الندم

**Angel_wolf** · 13-06-2011 02:09 AM

أخي الكريم ..يوسف
الحقيقة أنا مقدرة كل حرف ذكرته عن المعاناة النفسية اللى بتمر بيها وإنك محتاج ترجع بلدك وسط أهلك ..لأني أنا كمان بدبي من 11 سنة ومليت واتخنقت من الغربة
ومن الجو ومن فقدي للإحساس بأي مناسبة ..لكن خلاص اتعودنا على مستوى معيشة معين ولما بننزل أجازة هو الشهر الأول اللى بيكون جميل وحلو خالص والدنيا وردية لكن بعد كدة بتبدأ تلقائيا تعترض وتشوف اشياء مش أخدت بالك منها بالشهر الأول ..وتبدأ تحس بمعاناة كل الناس حواليك وإنك كدة اتمردت على رزق ربنا ليك
وإن كان فيه آلاف بيحلموا بس بفرصة من اللى انت فيها...
إنت محتاج تنزل أجازة وتغير جو وتشوف الوضع بعدها إنت من نفسك هتقول عايز أرجع تاااااااني ..
نقطة مهمة بقى إذا كان لحضرتك أولاد في مراحل دراسية مختلفة فهنا المشكلة الكبرى
المناهج المحتلفة واسلوب الدراسة كله فعلا مختلف عن مصر يمكن لينا ناس أصحابنا هنا
قرروا كدة فجأة زي حضرتك النزول بس قالوا نقسم البلد نصين ..يعني الزوج يفضل
والمدام تاخد الولاد وتنزل بيهم مصر يمكن التكلفة تقل عليهم ويمشوا فى الدراسة ..
اقسملك بالله بعد شهرين بس بيصوتوا ومستوى الولاد بقى فى النازل ..
كلنا هنا محتاجين ننزل بلدنا وكلنا هنا شايفين معاناة أهلنا فى الشغل وكلنا نفسيتنا تعبانة
كفاية الرطوبة وجهنم اللى عايشين فيها والروح اللى بنفتقدها عن مصر....
بس العقل بيقول خليك واوعى تقفل باب رزق ربنا فاتحه ليك وكل ده مكتوب ومقدر ليك
ربنا يهون علينا جميعا غربتنا ويرجعنا لآهالينا سالمين غانمين ,, وربنا يجعلك تسلك
الطريق السليم والتفكير الصائب
كل ودي واحترامي
totaa

++++++++++++++++++++++1111111111111111111111111111 11

**ramy01011** · 13-06-2011 11:23 AM

السلام عليكم :
الاستاذ الفاضل انا عايش في دبي داخل علي 5 سنوات دلوقت الشركة بتاعتنا ليها الفرع الرئيسي في القاهرة مع بداية الازمة ابتدت تنزل ناس فرع مصر و فيه ناس طلبوا من المدير العام انهم ينزلوا بمزاجهمعايز اقول لحضرتك انهم دلوقت في قمة اليأس و الاحباط و ندمانيين اشد الندم علي القرار ده. نصيحة خليك في شغلك احسن هنا و ارجع اعمل الاقامات للمدام و الاولاد

**memo_p910** · 13-06-2011 12:52 PM

استحمل شويه وممكن تعمل ريستارت لحنينك للوطن بشوية اجازات

لكن بلاش ترجع بدون قدم ثابته انا رجعت من السعوديه وندمت

دلوقت انا متبهدل

**AshTurbo** · 13-06-2011 06:45 PM

كل الردود اللي أتقالت مفيدة لحضرتك خاصة من الأعضاء اللي سافروا وأتغربوا وعرفوا يعني أيه غربة ولما رجعوا ندموا على كدة ليس لسبب غير أنهم أتعودوا على مستوى معيشة مرتفع وهو شيء غير متوفر في مصر حالياً للأسف ولي عتب على الأعضاء المتشائمين من مصر ومستقبلها وعاوز أقولهم يا أخواني مصر في أي حال هتبقى أحسن مليون مرة من عصر الفرعون المخلوع وحاشيته المهم أننا كلنا نقف أيد واحد ومقدمناش غير الأمل ومفيش حاجة أسمها مستحيل .....

للأخ العزيز صاحب الموضوع تعالى نحسبها بالورقة والقلم :

هترجع مصر + هتعيش بنفس المستوى + مفيش عندك أي أستثمار في البلد يضمنلك دخل ثابت = هترجع الأمارات

هتفضل في الأمارات كام سنة + هتعيش بنفس المستوى + تحاول وأنت هناك تدخل في أي مجال أستثماري في مصر ( ويكون مضمون وحط تحتها مليون خط ) لحد ما يبقى عندك دخل ثابت يعادل فرق مستوى المعيشة بين مصر والأمارات = تقدر ترجع مصر

أي خلل في المعادلتين دول هيساوي مشاكل ووجع دماغ وبهدلة أنت في غنى عنها خاصة أنك مش لوحدك وأنك مسؤول عن أسرة .

من أفضل الآراء اللي قرأتها في الموضوع هنا هو أنك لازم تحاول تتأقلم مع الجو هناك تشوف أصدقاء محترمين وتتعرف عليهم وتعرف أولادك على أولادهم وتخرجوا سوا ويبقى نشاط أجتماعي جميل للأولاد والمدام وليك والحياة مش كلها عمل حبة لربك وحبة لقلبك يعني حاول على قد ما تقدر تخلق نقاط جذب هناك حتى لو ماكانتش موجودة دي هتفرق معاك كتير صدقني .

آخر حاجة أنا عايش في مصر ومأشترتش سلاح والحمد لله ربنا كارمني وعايش فأمان وأن كانت المشكلة الكبرى فعلاً في أيجاد عمل مناسب بدخل كويس عشان كدة نصيحتي ليك توكل على الله في العقد الجديد ربنا يبارك لك فيه ويوسع في رزقك وخد بالك أن ربنا بيرزقك برزق أولادك ففكر فيهم قبل ما تفكر في نفسك على الأقل لحد ما تعدي بيهم لبر الأمان .... تحياتي لحضرتك .