الموضوع: العربية مش عايزة تدور النهاردة الصبح

السلام عليكم ورحمة الله وبركاته

انا النهاردة الصبح وانا نازل للشغل ادور العربية مش بتدور وبيحصل صوت تعتيلة كده ومش بتدور ولمبة البطارية والزيت نورهم كده خفيف اوى وانا بدور الاول كان نورهم بيبقى قوى وانا بدور دلوقتى خفيف اوى .
على فكرة ده اول مرة تعملها العربية انا شاريها من سنة واربع شهور تقريبا ده اول مرة تعملها راكاب فيها بطارية جافة كلوريد فيها لمبة بيان كده ولون الإشارة فيها اخضر البطارية انا مغيرتهاش من ساعه ما اشتريتها ومعرفش كانت مع الى قبلى من قد اية .


ملاحظات :

1. صوت تعتيلة النهاردة الصبح وانا بدورها ومش بتدور .
   
   
2. نور لمبة البطارية والزيت نورهم خفيف اوى بردة النهاردة وهى بتعتل ومش بتدور .
   
   
3. لما فتحت كبوت العربية لقيت على قواطيش البطارية كمية هائلة من الشحوم والزيوت مش عارف جتلها منين .
   
   
4. انا بقالى فترة النور الواطي مش بيشتغل على طول امشي مشوار بالعربية والقيه اشتغل لوحده لكن النور العالى كان بيبقى شغال عادى من اول ما دور العربية واشغل العالى يشتغل وبعد شوية اطفى العالى الاقي النور الواطي اشتغل مش عارف اية العلاقة بس ده الملاحظات الى قابلتنى فى الفترة الاخيره قلت اذكرها جايز يكون ليها علاقة بالموضوع ، اه وكمان عندى زجاج باب واحد من العربية مش بيفتح هى الزجاج كله الاربع ابواب كهرباء فيهم واحد ادوس على زراره مش بينزل لكن الباقى تمام والحمد لله .
   
   
5. انا كنت راجع بالعربية إمبارح بليل وكانت زي الفل مافيهاش أى حاجة .

التصرف :

1. مياه مغليه وفرشة ونظفت البطارية كويس جدا ، حاولت برده ادور ما فيش فايدة .
   
   
2. واحد زق العربية وانا دورت دارت على طول والحمد لله .
   
   
3. بس يا ترى اية التصرف دلوقتى علماً بانى اول مرة يحصل معايا الموقف ده من تقريبا سنة واربع شهور

العربية موديل 1994 1400 سي سي مسقط لسه الموتور من اول السنة بواحد استيراد فاكينه من نص عربية وجايبينه كامل .

عايز اعرف اية هو الامبير المناسب للبطارية بالنسبة للعربية الايبيزا او بطاريتها امبيرها بيبقى كام ؟

وهل ده له علاقة بالدينمو والمارش ولا اية الموضوع ؟