انطباعى عن الالنترا 2011- بعد 8000 كم النترا
[SIZE="7"][SIZE="6"]احبائى وزملاء الالنترا.. آسف على عدم المراسله طول المده الماضيه لكن اللع اعلم بحال البنى آدم مننا واللى بيحصله ف الدنيا
المهم.. ما صدقت لقيت وقت فاضى علشان ارجع اكتبلكم مره تانيه واحكيلكم على قصتى لغاية دلوقتى مع عربيتى
علشان افكركم بنفسى انا اشتريت الالنترا 2011 بتنجانى اول فئه ف الاوتوماتيك، ورخصتها واحد يناير اللى فات ودلوقتى عديت بيها حاجز الـ 8000 بشويه وعملت صيانة الالف وصيانة الـ 5000كم
طبعا مش هانتكلم على النعومه لانها فعلا عربيه ناعمه جدا والباور هايل هايل وبدون اى هرتله ولا عدم ثبات والكلام الفارغ اللى الناس اللى ما تعرفش بتفتى فيه.. اؤكد ان العربيه ناعمه وثابته على الطريق مع السرعات (انا لغاية 180 كم على الصحراوى ماكنتش قلقان ولا حاسس بأى عدم ثبات)
التكييف كويس جدا لكن لغاية النهارده مش حاسس انه تلاجه
السحب مش عاجبنى اوى لانها اوتوماتيك فالتسارع فيها فى البدايه بيكون تعبان.. اما بقى لو شغلت التكييف فبحس انى راكب عربيه قديمه وتعبانه، لكن بعد مابتجمع سرعه .. يبقى حصل الف خير والدنيا بترجع تمام
البنزين ماشتكتش منه نهائى وحاسس انها بتستهلك معدلات معقوله جدا زيها زى 1600 تانيه (طبعا باستثناء الصنى اللى ربنا يصبر اللى راكبينها) لكن برضه مع التكييف معدلات الاستهلاك بتختلف لكن برضه مش بتوصل لمعدلات سيئه.. معقول يعنى
الفرامل بقى هى اللى مضايقانى.. للاسف الحلو مايكملش بحس اوقات كتير انها مش نمره واحد وحصل كتير انى اضطر اضغط فرامل بعنف رغم انى مابجريش بتهور.. العادى بعنى
اشتريت عدد 2 كلابش واحد اللى بيمسك التاره بالفرامل وبعدين اشتريت اللى بيمسك التاره وتبقى العصايه ناحية زجاج الباب بتاع السواق.. طبعا باستخدم دى فى اليوم العادى (((((( حاولت فى البدايه اعوّد نفسى على تركيبه بمجرد مغادرة السياره حتى ولو لوقت بسيط ولو نازل اجيب حاجه من السوبر ماركت ونصيحة لنفسى ولكل اللى معاه عربيه خصوصا فى الظروف المنيله اللى بنمر بيها ارجوكم ماحدش يكسل فى استخدامه)))))) ونادرا ماباستخدم التانى لكن لو بايت فى مكان بره البيت (سفر يعنى او مكان سايب فيه العربيه فتره طويله ومش امان باستخدم الاتنين وربنا سبحانه وتعالى هو الحافظ اولا واخرا)
اتأخرت فى صيانة الالف الاولى (صادف وقت الثوره وقفل البلد كلها) وبرضه فى الصيانه اللى بعدها (عملتها على 6000 مش 5000) وبالمناسبه انا رحت ابو رواش رغم كل تحذيرات حضراتكم لان كان ليا واحد صاحبى قريبه شغال هناك وده كان فى صيانة الالف... اما فى الـ 5000 رحت ابورواش برضه لكن فى المكان المخصص لعملاء الاليت (elite -VIPs) يعنى ,والموضوع مختلف خالص يا جماعه هناك من حيث عدم الزحمه والروقان والخدمه
حطيت زيت 10.000 كم تخليقى زى نصيحة حضراتك
نيجى بقى للجزء اللى يوجع القلب.. طبعا 6 اشهر من السواقه فى شوارع كايرو كفيله انى اخدت 4 خبطات منهم اتنين بموتسيكلات الديليفرى وده ادى الى خربشه وتطبيق وازالة اجزاء م البويه.. بالاضافه لخبطه جامده انا اللى عملتها بس ان شاء الله تترد ع البارد.. بالمناسبه لو حد عنده وسيله لاعادة دهان البوية اللى اتقشرت يبقى كتر الف خيره لو يوجهنى اليها انا قريت قبل كده ان فيه حاجه زى القلم الفلوماستر على حسب لون العربيه لكن مش لاقى الموضوع ده دلوقتى
شنطة العربيه حكايه فى وسعها .. العربيه عاليه طالما ماحدش قاعد ورا... والا هاتبصم على كل مطب
لسه لغاية دلوقتى سايب البلاستك على الفرش لانى ماكنش معايا فلوس اجيب فرش علشان عايز اجيب حاجه محترمه مش حاجه رخيصه وخلاص.. حد عنده نصيحه فى موضوع الفرش ده.. اجيب جلد ساده ولا جلد وستوفه؟
على العموم واقدر بعد الفتره دى اقيم العربيه دى بأنها كان توفيق كبير جدا من ربنا انه وفقنى لشراءها فعلا عربيه الحمد لله والشكر لله محترمه شكلها حلو واسعه خاماتها حلوه تكييفها وصالونها وكمالياتها واتزانها وثباتها حلو قوى.. فراملها مش نمره واحد.. استهلاك البنزين معقول واكتر كمان من معقول.. التوكيل غالى ف اسعاره لكن انا احب ادى العيش لخبازه واريح دماغى على الاقل اول 30/ 40000 كم.. بس انا كنت فاكر انها اقوى من كده لكن انا ساكن ف القاهره الجديده والطرق عندنا مش كلها مسفلته وحتى المسفلت مرقّع فلاقيت انى حاسس بكل ده وسألت زميل النتراوى قاللى ماهو برضه انت مش راكب بى ام لولا مرسيدس...
ايه تانى؟؟ تقريبا غطيت كل المواضيع لو حد من حضراتكم عايز يسأل فى اى حاجه فأنا تحت الامر
اللهم اسألك ان ترزقنى خيرها وتصرف عنى شرها اسألك من خيرها وخير ماهو لها واعوذ بك من ششرها وشر ماهو لها.. اعوذ به من شر الطريق وحوادث الطريق.. ربنا يسترها عليا وعليكم جميعا
تحياتى
عملت غلطه فى كتابة لفظ الجلاله فى الجمله الاولى (الله اعلم بحال..
احبائى وزملاء الالنترا.. آسف على عدم المراسله طول المده الماضيه لكن الله اعلم بحال البنى آدم مننا واللى بيحصله ف الدنيا
