الموضوع: أفكار ذكية تخلى صيانة اللوجان إقتصادية

المشاركة الأصلية كتبت بواسطة gebreel

هو ممكن صورة ليه و مكانو في الكابوت؟

مش هتعرف تشوفه لأنه فوقه غطاء ألومنيوم فضى شبه مثلث مربوط بثلاث مسامير موجود فى مقدمة الكبوت تحت مكان تركيب شمعات الاحتراق ( البوجيهات ) فى وش الماكينه ، لازم ينفك الغطا علشان تشوفه لكن حاولت أرفع صورته للأسف ما عرفتش ، أوعدك هأحاول مره تانيه .

السلام عليكم ، لو حضراتكم فاكرين إقتراحى إننا نعمل مع بعض موضوع مشترك لمشاكل الصيانه المكلفه والحلول الاقتصاديه للمشاكل دى ، وسبق وعرضت المشكله رقم ( 1 ) بخصوص اصلاح فلانشة الشكمان ، ودا الرابط ليها على الموقع < http://www.nilemotors.net/Nile/228617-a.html > ...

هأدخل فى الموضوع علشان ما أطولش على حضراتكم ، لكن من فضلكوا إقرأوا الموضوع للآخر علشان أخد رأيكم فى إقتراحى بعد ما أعرض تجربتى رقم (2) ، (3).

المشكله رقم (2) : استبدال الزجاج الأمامى - تكلفة تغييره فى التوكيل أكتر من 2000 جنيه.

قبل سبع شهور كنت راكن العربيه تحت البيت ولقيت الانتركم بيدق ، ولاد الجيران بلغونى إن بنوته بتلعب رمت زلطه شرخت الزجاج الأمامى شرخ يوجع القلب ، اللى زاد الموقف سخونه إنى كنت المفروض أجدد رخصة العربية فى خلال شهر ، وطبعا حضراتكم عارفين المرور كان أد إيه حبوب ومتعاون قبل الثوره ، يعنى حاره سد لازم أغير الزجاج الأمامى ،

بالفعل الفحص ادانى مهله شهر لتغيير زجاج أمامى ، وطبعا أسعار التوكيل معروفه كانت أكتر من 2000 جنيه فى الوقت ده ، وعنها وسألت وعرفت إن أفضل زجاج محلى هو د / جريش وطبعا أتأكدت من جودته وطرق تصنيعه قبل ما أخد قرار وأشتري ، ممكن تراجوا الموضوع بعنوان " كل ما تريد معرفتة عن زجاج السيارة " على الرابط < http://www............com/vb/showthread.php?t=23482 > ، وكده إطمنت على جودة الزجاج البديل وباقى أعرف مين يركبه ، سألت وعرفت( محلات الحاجه لتجارةزجاج السيارات ) 142 ش حسن الانور ، مصر القديمه ،
التليفون: 02-25321154, 012-0010103

أخدت العربيه ورحت بعد ما اتصلت بيهم وأكدولى إنهم جابوا زجاج اللوجان ، لكن السعر المطلوب كان 700 جنيه ، وتم التركيب بعد الاتفاق النهائى على سعر 450 جنيه ، وصدقونى حضراتكم أنا حاسس أنه أحسن من الأصلى .

المشكله رقم (3) : استبدال زجاج وش الفانوس الخلفى - تكلفة تغييره فى التوكيل 275 جنيه .

واحد من الاعضاء المحترمين كان بيسأل على امكانية تغيير وش الفانوس الخلفى بدل ما يغير الفانوس كله ، وأنا سبق وسألت عن الموضوع ده ، وأنا رديت عليه وهأنقل الرد هنا لحضراتكم علشان نتعاون كلنا ونساعد بعض ،

أنا قولتله " ان الوش لوحده ممكن يتفصل عند الشركه المصرية اللى فى شارع زكى فى التوفيقيه ، بس هيطلب منك تفك الفانوس كله علشان ياخد مقاساته ، وبعدين يديك معاد بعد يوم أو إتنين لحد ما يبعته المصنع و يرجعله متفصل ، لو سألت فى شارع زكى هتلاقيه على الصف المقابل للمول إللى فيه جمال البدرى (رقم 7 ) ، سعره ممكن يكون 30 : 40 جنيه ، مش عارف بالظبط ، بس دا مجرد وش بلاستيك ما أفتكرش يزيد عن كده ، التفصيل والمقاس بيطلع نسخه من الأصل بس العيب ممكن يكون فى خامة البلاستك يعنى محتمل بعد فتره لونه يبهت شويه ، بس مش دايما الوش التفصيل بيبهت يعنى مش قاعده . ".

للآمانه أنا ما ركبتش وش متفصل أنا بس سألت وشفت العينات عند الشركة دى ، كانت فاترينة الشركه مميزه لأنها كلها فوانيس اشاره خلفيه لكل المقاسات والانواع ، معلش أنا مش فاكر رقم التليفون ومش متأكد من الأسعار علشان محصلش تعامل ، بس للأمانه كان لازم أقولكم على المعلومه لأن معظم الأعضاء المحترمين بيضطروا يغيروا الفانوس كله علشان مجرد كسر بسيط .

.................................................. .................................................. ............*
اسمحولى أضيف حل المشكله رقم (1) لأى حد يحب يراجعها :

المشكله رقم (1) : إصلاح فلانشة الشكمان - تكلفة تغييرها فى التوكيل 6000 جنيه .

حجزت علشان أعمل صيانة ال60.000 كم ، وكانت العربيه صوتها عالى عشان فيه تسريب فى العادم من الشكمان ، وبعد الكشف على العربية فى المقطم كانت المفاجأه إن إصلاح الشكمان تكلفته 6000 جنيه ، لأن الفلانشه ( مأخذ توزع و سحب وتفريغ العادم من الماكينه ) كانت متآكله ولازم تتغير ، طبعا حضراتكم عارفين إن صيانة ال 60000 هى صيانه كبرى يعنى أصلا مكلفه ( حوالى 2500 ) لأنك بتغير كاتينه كامله وطلمبة الميه وجميع الوصلات والسيور والفلاتر و شمعات الاحتراق و كوع الميه وغالبا الترموستات ، غير الضريبه + أنا كمان غيرت موتور مروحة الرادياتير ، من الآخر كان مستحيل أدفع كمان 6000 جنيه ( الفلانشة جديده بس أكتر من 4300 بدون الضريبه والمصنعيات ) ، لكن أكتر حاجه كانت مستفزه إن العيب ده بدأ يظهر فى لوجان تانيه مع واحد صاحبى وكنا عاوزين نشوف حل لأنه بيأثر على سحب العربيه + الناس كلها بتتفرج عليك وأنت ماشى طبعا رد فعل لا إرادى للصوت المزعج إللى العربيه بتعمله .

* طبعاً كنت مضطر إنى أسأل أكتر من واحد و أشغل عقلى رغم إنى ما بأحبش ، وكانت الاختيارات انحصرت معايا فى واحده من إتنين ، ده طبعا بعد ما مريت على أهم ناس أعرفهم شغالين فى قطع غيار وصيانة اللوجان:

1 - تفصيل الجزء المطلوب ( شغل مخرطه ) عن طريق صنايعى شكمان يكون معلم ، الاختيار ده كانت صعوبته إن محدش كتير إشتغل الموضوع لأن العربية لسه جديده فى السوق المصرى و ده يعنى عربيتى هتكون أول تجربه وعلشان كده لازم أشدد على إن الصنايعى يكون شكمانجى محترم ومفتح .

2 - الحل البديل التانى هو إنى أشترى الجزء المطلوب استيراد أو متقطع من أى عربيه عملت حادثه ، وده مشكلته إن الجزء اللى هيتركب حتى لو عرفت ألاقيه عند حد ، هيكون مستعمل يعنى كفائته مشكوك فيها وممكن يكون فيه نفس العيب حتى لو نسبته أقل + سعره مش هيكون رخيص لأن التاجر هيسأل على سعر الجديد قبل ما يبعلى وبعدين ممكن يدينى المستعمل ب 50:60 % من سعر الجديد ، طبعاً كانت مخاطره كبيره .

أستخرت ربنا وقررت أروح لمعلم الشكمان ، بس الجزء الأهم هو الجوان اللى بيركب ما بين الفلانشه والفرن ( مابين جزء تفريغ العادم و منطقة خروجه من الماكينه ) وهو ده الدرس التانى اللى إتعلمته ، الفلانشه ممكن تعيش 100 سنه لو الجوان ( الأولسيه ) اللى راكب مظبوط وقافل أى فراغ يعنى ما فيش تسريب للعادم لأن تسرب العادم هو اللى سبب تآكل الفلانشه ، تعرفوا الجوان اللى بأتكلم عليه تمنه كام ؟؟؟؟ ( فقط عشرة جنيهات مصرية لاغير ) وصناعنه تركى ، تخيلوا 10 جنيه سببت خسائر كانت ممكن توصل إلى 6000 جنيه + التعطيل والازعاج وفرجة الناس.

* اشتريت الجوان ( الولسيه ) وفصلت الفلانشه مخرطه وركبتها شغاله زى الفل ليها أكتر من 25 يوم من غير صوت ولا نفس وكمان وفرت تمن الأفيس بتاع الشكمان لأن التوكيل بيغيره كل ما يفك الشكمان وتمنه 180 جنيه من غير الضريبه ومصنعيات التركيب ، وكانت التكلفة الاجماليه شامله المصنعية ( 280 ) جنيه لاغير .

....*دلوقتى هأعرض على حضراتكم فكرتى مره تانيه إننا نعمل مع بعض موضوع عباره عن مرجع صيانه شامل لكل مشاكل اللوجان النادره وإللى بتحتاج تكالف مرتفعه لإصلاحها ، طبعاً أقترح إن المرجع ده يكون متخصص فى الأفكار الجديده ، والأفكار اللى بتظهر نتيجة تجارب واقعيه + يشمل عناوين ومصادر الأماكن والورش والمحلات والناس المتميزه اللى ساعدت صاحب أى مشكله نادره فى حل مشكلته ، وطبعا بدأت بنفسى وعرضت حل المشاكل اللى واجهتنى وادتها أرقام (1) ، (2) ، (3) وهأضيف مع تجربتى عنوان وتليفون أشهر مصدر لبيع قطع غيار اللوجان الجديده بالتوفيقيه و هو جمال البدرى ( 7 ش زكى التوفيقيه - الدور الثانى ت: 25752633 ، محل رقم 18 ، موبايل 0182099061 - 0110451620 ) + ورشه متخصصه فى إصلاح وبيع قطع غيار اللوجان المتقطعه ( استيراد ) + جديد ودا اسمه رينو المعادى - خالد ويحي ‘ ومحله فى صقر قريش ( المعادى 85 مساكن صقر قريش الأوتوستراد - الحرفيين ش تبارك أمام بلوك 6 - موبايل 0101718206 ، 0124746102 ) .

أتمنى أسمع تعديلاتكم واقتراحاتكم فى أقرب وقت ومتشكر على صبركم معايا .

موضوع متميز بارك الله فيك

عفوا رابط موضوع الزجاج يحذف تلقائى ، هأنقل نص الموضوع من موقع مصرموتورز :

كل ما تريد معرفتة عن زجاج السيارة ( اهداء لأاحلي منتدي )

السلام عليكم
بداية انا من داخل مجموعة مصانع د.جريش للزجاج و لم اطرح هذا الموضوع لغرض او لاخر كما قد يراة البعض
فالمجموعة غنية عن التعريف و مصنفة من أكبر 3 شركات في العالم في مجالها و جودتها أيضا تسير في نفس الاتجاة و التصنيف
ولكن اردت طرح الموضوع هنا كخدمة لاعضاء المنتدي الكرام و بصفتي أكثر خبرة في الامور الفنية التي تهم المستخدم العادي و يريد التعرف عليها من مصدر موثوق و ليس من مصدر يهدف الي التجارة قد لا يثق البعض في معلوماتة بصفة كاملة كعادتنا كمصريين اذا اتت المعلومة من تاجر نعتبرها نوع من التسويق و ليست خالصة
لذلك اردت تثقيف الناس في هذا الاتجاة و جعلهم علي ثقة و دراية و هم يذهبون الي اي تاجر زجاج لاستبدال الزجاج لدية
اولا نوع الزجاج

1- زجاج سيكوريت و يسمي زجاج سيفتي او الزجاج االآمن



و يعتقد الجميع بانة زجاج درجة ثانية و ليس الاصلي و هذا مفهوم خاطئ تماما فهو زجاج اصلي و اكثر قوة و تحمل من الزجاج التربلكس و لكن فقط تختلف تكنولوجيا تصنيعة بحيث يكون من زجاج ( طبقة واحدة ) و سمكها 5او 6 مم و يكون في الوان من الابيض الي الاخضر الي الازرق الي البرونز الي الرمادي و يكون اللون هو لون الزجاج نفسة
و يخضع هذا الزجاج الي عمليات تقسية بالحرارة برفع درجة حرارتة الي ما يقرب من 300 درجة ثم تبريدة فجأة بتكنولوجيا معينة ليكون قاسي جدا و يتحمل الصدمات الافقية بقوة و ليس الرأسية بمعني اخر اذا قمت بضرية من ناحية (الحد او السيف ) من ناحية سمك الزجاج فانة ينكسر الي قطع كثيرة و صغيرة جدا تشبة السكر و لكن بحجم حبات اكبر قليلا

و يخضع الزجاج الي اختبارات كثيرة منها اختبار الزغللة و اختبار النفاذية و عدم عكس الضوء او تشتيت الرؤية

و اهم اختبار هو اختبار الكسر و يجب ان لا يقل عدد الكسر في قطعة مقاسها 5 سم في عرض 5 سم عن 250 كسرة لانة لو قل عن ذلك يعني ان الكسر في الزجاج كبير و يؤدي الي اصابات عند كسرة و يكون خطرا علي السائق او من هم حولة وبمعني اخر كلما زاد عدد القطع المكسورة كان الزجاج افضل

كما يتم وزن اكبر كسرة في هذا الاختبار لمعرفة ان كانت كبيرة بما يكفي لاحداث اصابة ام لا و عند اجتياز الاختبار يكون الزجاج جيد و يتم الانتاج وفقا لهذة العينة
و لكي تقتنع بان السيكوريت هو زجاج اصلي و لكن لة هدف و مهمة اخري هو ان جميع زجاج السيارة يجب ان يكون سيكوريت فيما عدا الزجاج الامامي يمكن ان يكون سيكوريت ( طبقة واحدة ) أو تربلكس ( عدة طبقات كما سنشرح لاحقا )

و الحكمة من ذلك هو حماية و امان من هم بالسيارة في حالة الحوادث او انقلاب السيارة او غرقها او حدوث حريق يمكن كسر هذا الزجاج لانقاذ الناس و خروجهم سالمين و عند كسر الزجاج لانقاذهم لا يضرهم كسر الزجاج أيضا بعكس التربلكس الذي يصعب كسرة جدا و قد يضر ذلك و يكون خطرا كبيرا علي من بالسيارة عند الحوادث او قد يكون عامل مساعد لعدم انقاذهم في احيان كثيرة لعدم قابليتة للكسر بسهولة
اذن فالامر هو اختلاف وظائف و ليس اختلاف جودة او ان هذا اصلي و هذا مصري كما يحلو للبعض تسميتة

نرجع للسيكوريت بيكون فية خط اسود يحيط بالزجاج اسمة بلاك باند و دة ملوش اي تاثير في جودة الزجاج غير منظر جمالي و كمان علشان لو الزجاج بيتلصق باستخدام سيليكون لا يظهر السليكون من خلف الزجاج بصورة تؤدي اي تشوية صورة الزجاج علي السيارة

ينتشر الزجاج السيكوريت كثيرا لانة لرخص في تكنولوجيا تصنيعة مقارنة بالتربلكس و لانة طبقة واحدة
و يقبل كثيرون علي شراءة لانة اكثر تحملا من التربلكس و ارخص ايضا و لكن يعيبة شئ واحد هو انة اذا انكسر منك لا تستطيع اكمال المشوار و يجب عليك تغييرة عند اقرب مكان بعكس التربلكس الذي تكمل بة مشوارك و تغييرة في يوم اجازتك اخر الاسبوع مفيش مشكلة

>

موضوع متميز بارك الله فيك

الف شكر على الموضوع الجميل ده