الموضوع: انها حقا سياره محترمه عن البوما 2008 بعد 177,777 كيلو نتحدث

بصراحه مشفتش عربيه محترمه زى البوما فى اقتصاديه التشغيل على مدى ال 177777 كيلو متر اللى قضيتهم ومازالت بتقضيها فى الشغل بتاعنا على مدى 3 سنين (اشغال شاقه 12 ساعه كل يوم داخل البلد وجرى فى الطرق السريعه ومشى فى حتت مكسره ومايعلم بيها الا ربنا)



العربيه تخص راجل محترم مشغلها معانا فى الشركه وانا طبعا متابعها من اول ماجت عندنا لحد دلوقتى
بجد ياجماعه اشك ان فيه عربيه تسد فى مصر زى البوما وكمان العربيه دى اثبتت ان صيانات التوكيل دى كلها حوارات فاكسه لاستنزاف الفلوس على الفاضى وانا لو مكان صاحب العربيه هعمل زيه بالظبط (مدرسه العربيه جايبها علشان تصرف عليا مش علشان اصرف عليها)
العربيه بوما 2008 اوتوماتيك 1600 (عاديه لاسوبر اكشن ولا حاجه)
دايما بنزين 92 من اول ماجابها-زيوت شل الجركن الاصفر ساعات بيتغير على 4000-اى تيل بيتحط ساعات تركى واسبانى المهم ميزدش عن 80 جنيه

ماتم اصلاحه وتغييره فى العربيه من ساعه الشراء:
-البطاريه ماتت على 105 الف وحط acdelco ال جافه 55 من بيومى
- مجموعه السيور والبليه وفلتر بنزين وبوجيهات (اشترى الحاجات دى من التوكيل وطبعا التركيب بره) على 120 الف كيلو
ملاحظات :السيور كانت متفرتكه خصوصا الكاتينه كان مشقق جامد والبوجيهات الاصليه طلعت مفحمه وحالتها صعبه بس فلتر البنزين كان لسه فيه الرمق ويدى كمان بصراحه
-تغيير زيت الفتيس على 120 الف ب4 علب تقريبا من موبيل زيت فتيس احمر زى الكركديه وطبعا الزيت اللى كان نازل حالته زفت الزفت
-اول تربيطه للعفشه على 120 الف!!!


-تغيير الكاوتش الاصلى على 135 الف بعد مالخوابير كلتهم بكوموهو سولاس بتاع الغلابه -3 كاوتشات بس لان الاستبن كان محافظ عليه- من بيومى الفرده كانت ب 320

-على 150 الف تغيير قواعد الفتيس والموتور وجاب قنطره خلفيه اصليه من الرواس ب 341
وجاب من المنير قاعده ب 100 جنيه اندونيسى تقريبا وقاعده اماميه ب 40 جنيه وميكانيكى 80 جنيه لانه ظبط حاجات تانيه بالمره


-160 الف تغيير علب الراديتير السودا لانها بقت بتسرب والحراره عليت مرتين بسبب الموضوع ده ونضف الراديتير لاول مره ودوره التبريد طلعت بلاوى بس مش فاكر بكام
-على 165 الف تغيير الطنابير بعد ماتمسوا مرتين بطنابير يابانى من عند المنير مش فاكر السعر بصراحه بس مش اكتر من 380

- على 175 الف البطاريه ماتت تانى بعد سنه ونص وركب acdelco 55 تانى من بيومى ودفع 360 على القديمه


دلوقتى كف المرايه اليمين اتخبط من واحد متخلف ومكسور حد يعرف مكان رخيص بيبيع المرايات دى ؟ واللمد الواطيه محروقه من 7 شهور واتغيروا واتحرقوا بعدها بيومين ولسه محروقين

فعلا الموديل ده بسم الله ماشاء الله عليه اثبت كفائه تشغيل عاليه فى مصر واقل معدلات استهلاك رغم الاهمال وشغل الفحت والردم بيه
ومن الاخر زى ماتعود العربيه هتديك هتدلعها هتقرفك هتهينها هتشيلك على دماغها ده اللى اتعلمته من البوما
ادعو للعربيه وصاحب العربيه انها تكمل تمنها على خير (كلها 6 شهور ويخلص اقساطها)

المشاركة الأصلية كتبت بواسطة moustafa_saad

مش للدرجه دية
الراجل مخلى العربيه مشرحه
انا مختلف معاك فى مقولتك وشايف ان العربيه زى الستات
حتدلعها حتظبطك حتبهدلها حتطلع عينيك وعين ال.............

لو صرفت عليها الكلام ده بس وحققت بيها الكيلومترات دى كلها من غير اى مشاكل تذكر يبقى العربيه ممتازه والراجل مش مخليها مشرحه ولا حاجه هو بيشقيها فى الشغل بس وبيغير بعد المعدلات المعترف بيها والعربيه زى الفل ولسه بخيرها والحمد لله

المشاركة الأصلية كتبت بواسطة moustafa_saad

عموما العربيات اليابانى محترمه جدا وبتاعت شغل وفعلا توكيلات العربيات بيبالغوا فى تغيير قطع الغيار قبل موعدها بس برده انا شايف ان الراجل ده بيبالغ فى تغيير قطع الغيار بعد موعدها

قسطها يخلص بس ويروق لها شويه

المشاركة الأصلية كتبت بواسطة mohamed1979

بصراحه العربيات الانسر بأختلاف مودلاتها معمره جدا
عندا فى الشركه عربيات كرستاله 99 عامله 700000الف و معمرتش خالص
و عربيات بومه 2007 عامله 500000الف بدون عمره
بس العربيات دى كانت صيانتها بأنتظام
الانسر عربيات معمره جدا جدا

البوما والكريستاله زى ال504 نزلوا غلطه ومش هتتكرر

المشاركة الأصلية كتبت بواسطة Ahmed A.Maksoud

ههههههههه

أنا عاوز أقولك أنه راح يغير السير و الميكانيكى سأله أنت عامل كام قاله.....الميكانيكى سأله تانى يعنى أنت غيرت السير ده أربع مرات لحد دلوقتى......الراجل أتكسف و راح قايله أيوه

الميكانيكى بحسن نيه مبصش على السير و راح قايله يبقى لسه شوية عليه :)


لو كان بص بصة على السير كان هيصعب عليه.

نفس اللى حصل ساعه تغيير الكاوتش الواد قاله الكاوتش ده مهرى قوى هى مشيت قد ايه ؟فالراجل اتكسف وقاله 85 الف رد عليه وقاله يدوبك كده عليها كتر خيره وهو ميعرفش انها ماشيه 135 الف

المشاركة الأصلية كتبت بواسطة Survival

ايه يا جماعة الكلام ده هو فى حد بيعمل كده فى عربيته حتى لو مأجرها!!!!!!!!!!!!!!
و مش اى عربية دى لانسر بومه يعنى مش عربية رخصية عشان يهملها. دى الريتمو اللى مع اخويا عاملها اجندة للصيانة وانا كذلك مع الاكسيل.
انا صحبى كان معاه نيو أكسنت 2008 كانت عاملة 230 الف كيلو و العربية من جوه و من بره فابريكه و الصيانات فى مواعيدها و كل قطع الغيار أصلية و فعلا العربية دى تركبها اكنها زيرو بالظبط
لكن اللى يجيب عربية و يهملها يستحمل بقى لان العربية كمان هتهمله وهتاخد حقها منه و بزيادة.

كتير بيعملوا كده بس انت مش واخد بالك اللى بيعمل كده بيكون مضطر علشان القسط بيدبح الايجار اللى بياخده
وانا شايف ان مش ده الاهمال الشنيع على الاقل شوف وفر تمن كام صيانه لحد دلوقتى والعربيه ماشاء الله عليها

المشاركة الأصلية كتبت بواسطة AutoTycoon

انا اعرف ناس كتير مهملين في البوما بالذات و الحمد لله ربنا ساترها معاها

بس انا اول مرة اعرف ان الطنابير ليها عمر معين ؟؟ ... قد اية بقى؟

حسب التيل اللى بتحطه واستخدامك للفرامل
مثلا العربيه المذكوره بيتحط لها تيل رخيص واتمست الطنابير مرتين واخيرا اتغيرت على 165 الف بعد الطنابير اتنحل وبرها

المشاركة الأصلية كتبت بواسطة Hesham Hamza

عندى واحد صاحبى عامل 147 ألف ونفس النظام

العربيه خليجى ومبيروحش التوكيل خالص ومغيرش حاجه نهائى غير الزيت والفلتر

( أعتقد غير تيل مره )

أنا عايز أقولك بدون مبالغه العربيه زيرو يعنى ولا بتشخلل ولا بطلع دخان أبيض :)

عربيه محترمه خاصه الخليجى بس اعمل فيه معروف وخليه يلحق سير الكاتينه والبوجيهات

المشاركة الأصلية كتبت بواسطة amrelsaqqa

يا راجل ده حتى البوجيهات ما رحمهاش وغيرها على 120 الف

ونفس الكلام على سير الكاتينة وده كان هيزعله جامد لو كان اتقطع خصوصا انه مغيره بعد ضعف عمره الافتراضى تقريبا

ربك بيسترها وهو ناوى يبدر بتغيير البوجيهات والسيور المره دى ويغيرهم على 200 الف