الموضوع: التيدا .. ومسلسل المؤامرة

الجزء الثالث

الحلقة الثانية

إلبس بقى يا ريس

تاني يوم .. صحيت من النوم .. وروحت عالتوكيل الساعة 9 ونص

أول لما المهندس شافني قالي اللمبة نورت؟

قلتله هي كانت مطفية وزي الفل لحد المغرب كده وبعد كده نورت .. بس مش دي المشكلة

قالي أمال إيه المشكلة؟

قلتله المشكلة إني لما جيت أطلع من الركنة وكسرت الدركسيون لآخرة سمعت فيه صوت تكة .. جيت أجرب لقيت المالتي فانكشن مش شغال .. وبعدها بشوية الكلاكس فصل هو كمان

وبعدين قلتله أنا مش عايزكم تطفوا اللمبة .. أنا عايزكم ترجعولي العربية زي ما جبتها هنا

راح منادي للفني اللي ركب الشيلد .. قلتله سيادتك ركبته غلط

قالي لأ ركبته صح بس هو اللي بايظ

قلتله بايظ ازاي .. أنا جاي ولمبة الإير باج منورة .. وقعدتوا تجربوا في العربية واللمبة لسه منورة وكمان بوظتوا المالتي فنكشن والكلاكس

قالي مش احنا مجربين العربية مع بعض وكان كله تمام

قلتله بس واحنا بنجرب ماكسرناش الدركسيون لآخره .. ومش انت اللي قلت لزميلك امبارح إن الشيلد بتاعكم كان هيبوظ لو الدركسيون اتكسر لآخره لولا إنك لحقت نفسك وظبطه في آخر لحظة

نفس كلامك ده بالنص حصل معايا بعد ما ركبت الشيلد بتاعي

قالي طالما جربنا العربية واستلمتها سليمة ومشيت من عندنا يبقى مانعرفكش

قلتله يا سلام بقى هو كده .. عالعموم أنا متأكد إن إنت متأكد إنك ركبته غلط .. بس عمرك ماهتغلّط نفسك

وأنا مش جاي هنا النهارده عشان أسمع مبررات .. أنا جاي عشان آخد حقي .. وأنا عارف هجيبه إزاي

وبعد شوية شد وجذب المهندس قاله طب فك الشيلد

ماكانش راضي يفكه .. وبعد إلحاح من المهندس .. فك الشيلد

لما فكه كان شكله طبيعي من بره .. بس من جوه بقى الله أعلم

وقعد يقول للمهندس لو كان راكب غلط كان حصل فيه كذا وكذا

طبعا بيستغل عدم علمي في الحاجات دي .. وطبعا عمره ما هيطلّع نفسه غلطان

قعدوا يقنعوا فيا إن الشيلد كان بايظ بدليل إن اللمبة نورت تاني

قلتلهم ماهي كانت مطفية لحد المغرب ولو كنت ركبتوالجديد كانت هتنور بعد فترة بردو

وبعدين إشمعنى لما كسرت الدركسيون لآخره سمعت الصوت وساعتها على طول المالتي فانكشن باظت وبعدها اللمبة نورت وبعدها الكلاكس فصل

يعني من 2009 وهي شغالة تمام وأول لما جت عندكم وفكيتوا وركبيتوا كل ده حصل فجأة كده بقدرة قادر

قالي إحمد ربنا إنها شغالة من 2009 لحد النهارده

ردود مستفذة جدا

المهم .. قلتلهم طب والحل دلوقتي

قالوا هنركب الشيلد الجديد ونجربة مع بعض

قلتلهم ولو باظ بعد ماروحت

قالوا مفيش ضمان على الأجزاء الكهربائية

قلتلهم يا حلاوة .. أمال أنا جاي التوكيل ليه .. وبادفع أضعاف أضعاف المصنعية عن بره وأضعاف أضعاف التمن في قطع الغيار عن بره

ما أنا كنت روحت عملتها عند الأسطى بلية بقى أحسن

قالولي طب عاوز إيه ؟

وطبعا عشان أنا مابحبش كتر المناهدة ووجع القلب ومش فاضي للكلام ده

قلتلهم خلاص ركبوا الشيلد الجديد لأن القديم كده إدمر خلاص بس لو اللمبة نورت يبقى الشيلد بتاعي كان سليم وانتوا اللي بوظتوه .. وساعتها هارجع آخد فلوس الشيلد الجديد

المهندس قالي ماشي هنجربه مع بعض

قلتله ماهو ممكن تطفي لحد المغرب زي امبارح

قالي مفيش عليه ضمان .. قلتله خلاص لحد بكره بس

قالي خلاص ماشي

طبعا أنا قلت كده عشان كان عندي إحساس داخلي عميق ومتدفق إن اللمبة هتنور تاني لأن العيب ماكنش في الشيلد أصلا

وانتوا عارفين إن إحساسي الغويط ده لاممكن ينزل الأرض آآآآآببببببدا

بس ياسيدي .. واتفقنا على كده

وفك وركب يا جدع

والمفاجأة

اللمبة منورة ومش راضية تطفي .. بس طبعا الكلاكس والمالتي فانكشن اشتغلوا

جاب الكمبيوتر ووصله ويحاول .. وهي راسها وألف سيف ماهي مطفية

قلت للمهندس شكلي مش هاجي بكره زي ما اتفقنا

قالي ليه؟

قلتله عشان مش هامشي من هنا وهي مطفية أصلا

المهم بعد حوالي نص ساعة محاولات بالكمبيوتر اللمبة طفت

قلت عادي إمبارح كانوا كل شوية يطفوها بالكمبيوتر ترجع تنور تاني

وكان في فردة كاوتش عندي نايمة شوية قلتلهم كذا مره وأنا هناك زودوها بس قبل مانجرب ويقولوا ماشي ويطنشوا .. وفي مره الفني قالي هاتزود هوا كمان من عندنا

قلتله ياعم ماتخافش هدفع حقه

وبعد ماخلصنا وجينا نجرب قلتلهم للمره العاشرة زودوا فردة الكاوتش

قالولي خرطوم الهوا قصير .. قلتلهم طيب نطلع العربية وندخلها جنب الخرطوم

قالوا يعني لسه هنطلع وندخل .. عالعموم في واحد بتاع كاوتش على ناصية الشارع إبقى زود عنده

قلتلهم يعني هو كده يعني ماشي

وخدت العربية ومشيت وعيني على لمبة الأيرباج

مستني إنها تنور قبل اليوم مايعدي زي ما إحساسي الدفين المنهمر بيقولي

تتوقعوا إيه اللي حصل؟؟؟

اللمبة منورتش

إزاااااااااي؟؟؟

دا أنا إحساسي لا ممكن ينزل الأرض آآآبببدا

لكن ...

ينزل المره دي

فعلا اللمبة بقت طبيعية

والبس بقى يا ريس في تمن الشيلد 471 جنيه و32 قرش غير الـ66 جنيه بتوع اليوم اللي قبله عشان خاطر غسلة للعربية .... إبقي قابلي يا بنت التيدا لو غسلتك تاني

بس معقول الشيلد فعلا كان بايظ وأنا كنت ظالمهم

يمكن .. بس إزاي؟؟؟

طيب إشمعني المالتي فانكشن والكلاكس باظوا بعد الفك والتركيب؟

وإيه الصوت اللي سمعته ده قبل مايبوظوا مباشرة؟

طيب لو الشيلد كان بايظ فعلا مظهرش على الكمبيوتر ليه؟

طيب لما ركب الشيلد الجديد اللمبة ماطفتش في ساعتها ليه زي الكلاكس والمالتي فانكشن ما اشتغلوافي ساعتها وماحتاجوش كمبيوتر؟

وهل ممكن المشكلة كانت بعيدة عن الشيلد وكانت محتاجة تظبيطة صح عالكمبيوتر وده اللي اتعمل في آخر مره؟

وإيه علاقة الشيلد اللي تحت الدركسيون بغسيل العربية؟

أسئلة حائرة ومحيرة ومتحورة

مش لاقي ليها إجابات مقنعة

ياريت لو حد منكم عرف الإجابة علي أي سؤال من دول يتصل فورا على زيرو تسعمية من أي خط أرضي أو يبعت رسالة فاضية على أي رقم فاضي من أي موبايل من غير خط

وهتوصلك الجايزة لحد عندك .. "كبدة وقناصة بتاعة عجل بالحمى القلاعية"

بسبعة جنيه ونص بس + 341 جنيه و32 قرش مصاريف شحن + 10% ضريبة مبيعات مش عالكبدة ولا على القناصة ولكن عالشحن :)

بس في النهاية .. الحمد لله على كل حال

وربنا يستر واللمبة متنورش تاني

واللي يجي في الريش بقشيش

وفاصل .. ونواصل

مع الحلقة الجديدة اللي هتكون بإذن الله بعنوان:




















طلعلي لسانك يا تيدا