الموضوع: التيدا .. ومسلسل المؤامرة

الحلقة السابعة

يوضع سره في .... حتة وردة

من يوم ما روحت التوكيل آخر مرة يوم 25 سبتمبر ورجعت لقيت صوت النقرة لسه موجود .. قررت إني أنفض واعمل نفسي مش سامعه .. لأني روحت بسببه التوكيل كذا مرة .. وكل مرة أجرب العربية هناك في المنصورة أليقها بقت تمام .. وأول ما ارجع بلدنا .. النقرة ترجع تاني

فماكنش في غير حل من اتنين .. يا إما أطنش واكبر دماغي .. وده حل صعب

يا إما مارجعش بلدنا .. وده حل أصعب

فضلت عالحل الأولاني وأنا مش متظبط .. والمشكلة إن الصوت كان بيزيد كل شوية

لغاية أول يوم العيد .. حصل تحول استراتيجي في الموضوع

بدأت الحكاية برسالة وصلتني من فودافون .. بتقولي إن الرقم الفلاني حاول يتصل بيك أثناء غلق المحمول

عارفين الرقم ده بتاع مين ؟!!!

بتاع الراجل الذوق .. المهندس مصطفى المحلاوي

فرحت والله إن الراجل فاكرني وبيعيد عليا كمان .. وده رفعه في نظري أكتر

قمت متصل بيه وعيدنا على بعض .. وبعدين سألني عن العروسة

قلتله لسه صوت النقرة موجود وبيزيد كمان

قالي يبقى احتمال من القنطرة .. ممكن يكون الجلب فيها شوية بوش بسيط

قلتله والحل؟

قالي بنفك ونحط تحت الجلبة وردة حديد عشان تعوض البوش ده

قلتله ماشي .. إمتى بإذن الله؟

قالي ممكن نستنى صيانة الستين .. ولو عايز بعد العيد ماشي

قلتله لأ بعد العيد أحسن .. مش هاستنى صيانة الستين "وعلى فكرة العربية عاملة 56.5"

وفعلا روحت يوم الاتنين اللي فات .. مشيت بدري وكان يوم جميل .. مع نسيم الصباح العليل .. والشمس تشرق في الأصيل .. وتصحبنا على الطريق الطويل .. بين الأسفلت والمطبات وأوراق النخيل ............. "يا سلام عليا .. حلوة تشرق في الأصيل دي"

وصلت الساعة 9 صباحا بتوقيت المنصورة وقالي هانحط الوردتين .. وكمان هنعزل السوست من فوق ومن تحت عشان السوست دي مش بتيقى معزولة في التيدا .. أما الصني فبتبقى معزولة .. ومع الوقت الرمل والأتربة بتدخل مع بين السوست والطبق اللي فوق واللي تحت فيعمل صوت تزييق

والعزل ده بيكون عبارة عن خرطوم بيدخل في أول السوست من فوق ومن تحت

قلتله ماشي أهم حاجة بقى هياخد وقت أد إيه ؟

قالي ساعتين مع القنطرة وساعتين مع السوست عشان الفك والتركيب

طبعا صدمة بالنسبة ليا .. 4 ساعات !!!!

أولا كان ورايا مواعيد

ثانيا وماخبيش عليكم .. مكنتش فطرت .. والتانك عندي كان عالاحتياطي

بس قلت مش مشكلة أهو يوم وانتهي .. بس يارب يكون على خير

طلعت الاستراحة وعشت مع الاب توب لحد قبل الضهر بشوية .. وفجأة لقيت الدنيا اتغيرت

والجو إتقلب .. والغيوم اشتغلت .. والسما اتخرمت .. والمشكلة الأكبر .. الكهربا قطعت

ولا عاد في نسيم عليل ولا شمس أصيل .. و
نهار أبويا بقى طويل

المركز كله وقف بسبب الكهربا ومفيش مولد احتياطي

والعربية كانت مرفوعة وبتنزل .. وبينها وبين الأرض 20سنتي

وماكانش فاضل فيها غير نص ساعة شغل

قعدت منتظر الكهربا .. والقعدة طولت .. ولمبة تانك المعدة نورت .. والمركز في حتة بره البلد .. يعني مفيش حد أروح أفوّل عنده

طبعا حاجة تزهق .. بس عشان خاطر الناس المحترمة اللي هناك الواحد يستحمل إي حاجة

وفييييييين بقى على قبل العصر بحاجة بسيطة الكهربا جت

وكملوا شغل .. ومرة تانية .. جربنا العربية .. على أرض ترابية .. وكله بقى تمام .. وآخر انسجام

وقالي إبقى اعمل ضبط زوايا

خدت العربية ومشيت عالطريق وأنا مروح .. وفجأة لقيت صوت تااااااااااااااااااااني

قلبي طب في معدتي

ركزت مع الصوت .. لقيته جاي من تحت الكرسي اللي جنبي

بصيت تحت الكرسي .. لقيت إزازة ميه نصها مليان والميه هي اللي بتلؤ جواها وبتعمل الصوت

ياااااااه .. الحمد لله

بعد كد عملتلها أصعب إختبار .. اللي هيحدد إن كانت اتصلحت بجد ولا لأ .. "روحت بيها البلد" .. والحمد لله عدت الاختبار بامتياز

تاني يوم روحت توكيل بريدجستون في طنطا وعملت ضبط زوايا .. وكله بقى قشطة بالبندق

وأخييييرا التيدا بقت عال العال .. يارب ديمها نعمة واحفظها من الزوال

والحمد لله على كل حال