الموضوع: التيدا .. ومسلسل المؤامرة

المشاركة الأصلية كتبت بواسطة ehabvet

الحلقة الثالثة



موقعة الطرمبة





أعزائي السادة المشاهدين

نعتذر عن قطع هذا الجو المليء برائحة السمن البلدي

ونرجو تجهيز المناخير لاستقبال رائحة البنزين

فقد حان الآن موعد الحلقة الثالثة من مسلسل .. المؤامرة

نكمل معاكم مسلسل الحسد اللي حصل معايا في التيدا

وخصوصا بعد الفضيحة اللي عملتهالها عالمنتدي بتاعنا وعالفيس بوك والصور والسعر و ... الخ

ومش المقصود بكده إني أقول إن إخواني عالمنتدى هما اللي حسدوا العربية

لا والله .. بالعكس ربنا لوحده إللي يعلم مدي حبي ليكم

لكن بردو المنتدى كبير جدا .. وبيدخل عليه جميع فئات الشعب

اللي عينه واسعة واللي عينه ضيقة .. واللي عينه مدورة واللى عينه مؤورة

ومفيش جهاز كشف العين عشان يمر عليه كل واحد هيدخل عالمنتدى

لكن الأغلبية الحمد لله نحسبهم على خير ونحبهم في الله ونسأل الله أن يجمعنا بهم في الآخرة في الجنة

وفي الدنيا في أي أرض زراعية .. أو صحراوية حتى

الحلقة دي بقى أطول حلقة في المسلسل

ومع ذلك فهي هتبقى أقصر حلقة في المسلسل

وده ببساطة لأنها حلقة محروقة .. ومعظمكم اتفرج عليها قبل كده

فاكرين موقعة طرمبة البنزين الشهيرة اللي حصلت معايا في التوكيل

وده اللينك بتاعها عشان اللي ماتفرجوش عليها

ملحوظة : ممنوع المشاهدة في الحلقة دي بالذات لضعاف القلوب أو اللي عمرهم أقل من 18 سنة .. عشان بطل المسلسل –اللى هو انا طبعا- كنت زي الأسد وبهدلت الدنيا وافتريت وكان في أكشن ودم وقطع غيار بشرية بتطير في كل حته .. يااااه عليا .. لما باتنرفز ببقى مفتري قوي .. أعوذ بالله

http://www.nilemotors.net/nile/228543-a.html


طبعا اللي حصل معايا في طرمبة البنزين ده كان موضوع غريب جدا

يعني إزاي باظت لوحدها فجأة كده

وازاي اتصلحت لوحدها فجأة بردو

بتهيألي الموضوع ده هيفضل سر .. أعجب من سر كورة البنج بونج


.
.
.




وبكل سلاسة هتنتهي الحلقة دي .. لأن عرق الغلاسة قرر إنه ماينقحش عليا تاني

وخصوصا بعد الحقنة اللى كلكعت في الحلقة اللي فاتت

أشوفكم على خير في الحلقة القادمة اللي هتكون بعنوان



الرفرف .. خلى القلب يرفرف









.

هههههههههههههههه ...... جامدة تنين :))))
تسلم الايادي يادوك هع هع هع

الحلقة الرابعة



الرفرف .. خلى القلب يرفرف





الحلقة دي تبدأ مع نهاية الحلقة اللي فاتت بالظبط

يعني مفيش فاصل بينهم نهائي .. إزاي؟؟؟

وأنا في آخر يوم من أيام التوكيل بتاع الحلقة اللي فاتت وبعد ما خلصت موضوع الزيت وراجع بقى وأنا فرحان

وأنا ماشي عند نزلة كوبري المعرض وقبل باب حديقة الطفل بشوية صغرين كان الطريق شبه واقف من الزحمة

وفجأة .. لقيت مكروباص كسر من الحارة بتاعته على الحارة بتاعتي وعايز يدخل قدامي

بس بدل مايدخل قدامي .. دخل فيا أنا ورشق في الرفرف اليمين اللي قدام

طبعا كأنه رشق في رفرف قلبى اللي قعد يدق يدق يدق .. لحد ما عداد الـ RPM بتاع قلبي كان هيفرقع

الصراحة أكتر حاجة كنت خايف عليها هي الفانوس أبو 1112 بدون ضريبة ومصنعية .. وخصوصا إنه فيه شرخ عندي في الفانوس اليمين يعني مش مستحمل لمسة

نزلت من العربية وهي في نص الشارع وأنا كل تركيزي في سؤال واحد

ياترى إيه اللي هشوفه؟؟؟









بصيت لقيت 3 حاجات مهمة جدا:


أولا: الفانوس سليم والحمد لله

ثانيا: الرفرف اليمين فيه حته صغيرة أتطبقت لجوه .. وفيها حتت بيضة كتير زي ماتكون خرابش في البوية

ثالثا: المكروباص منه لله .. هرب

طبعا قلنا الحمد لله على كل حال

رجعت على حمادة السمكري ووريتله الرفرف عشان يرده عالبارد .. وفعلا رده

وجاب كومباوند وحطه على الحتت البيضة اللي كنت مفكرها خرابيش

لقيتها طلعت كلها ما عدا حتة صغيرة

أتاريها كانت بوية من المكروباص لزقت في الرفرف

ورجع الرفرف زي ما كان .. والحمد لله الكريم المنان

بس هنا ممكن واحد من صقور منتدى نيسان يقوم فجأة ويسأل سؤال استراتيجي .. ويقول:

في المره الأولانية لما الإزاز الأصلي انشرخ من شوية ميه كانت حاجة عجيبة وقولنا يمكن بسبب العين

وفي المرة التانية لما طرمبة البنزين عطلت فجأة واتصلحت فجأة .. كانت حاجة أعجب من العجب .. وبردو قولنا يمكن عين

طيب المره دي حاجة طبيعة وممكن تحصل لأي حد فينا .. إيه العجيب فيها يعني يا عم الحج؟!!!

الإجابة على هذا الصقر تكون على النحو التالي:

أولا أحب أحييك يا إبني على هذا السؤال المحوري اللي انت فاجئتني بيه الصراحة

ثانيا الإجابة علي السؤال ده هتجرجرنا لقصة في عصر ما قبل التيدا

وبالتحديد يوم الإتنين اللي بعد جمعة الغضب على طول

كنت ماشي بالشاهين بتاعتي وبالتحديد عند نزلة كوبري المعرض وبردو قبل باب حديقة الطفل بشوية صغيرين عملت حادثة مع تروسيكل وبردو خبط الرفرف اليمين





والفانوس اليمين











والاكصدام

والكابوت









والصدر











والفانوس الشمال













والريداتير













والمروحة











وكفاية بقى



وإليكم فيديو بالواقعة القديمة

[youtube]http://www.youtube.com/watch?v=Oftqrd_FcZU[/youtube]


طبعا بعد ما حصل اللي حصل للتيدا في نفس المكان وفي نفس الإحداثيات وخطوط الطول ودوائر العرض بتاعة الحادثة اللي فاتت .. ده اللي خلاني أقول سبحان الله

وبردو أقول الحمد لله إنها ماكانتش زي الحادثة اللي فاتت

لأنها في الشاهين كلفتني حوالي 3 آلاف جنيه

أما لو كانت حصلت في التيدا لا قدر الله كنا حطينا صفر جنب التلاتة كمان

وقانا الله وإياكم شر الاصفار .. وأعاذنا وإياكم من كل مكروباص وتروسيكل وعربية بحمار

ونلتقي في الحلقة القادمة بإذن الله

واللي هتكون بعنوان





انفلوانزا الصقور










.