الحلقة الخامسة
انفلوانزا الصقور
الحلقة دي من عصر ما قبل التيدا
ومن عصر ما قبل الشاهين
وبالتحديد في عصر الموتوسيكل الصيني
هي الحلقة ممكن في الأول تحسوا إنها مالهاش علاقة بالموضوع
بس في الآخر هتعرفوا العلاقة اللي بينهم
بداية الحلقة دي في يوم 2-1-2008
وبعد صلاة العصر بشوية .. فجأة .. بدأت أحس بصداع خفيف
وبعدين زاد شوية .. وبعدين زاد أكتر .. وبعدين بقى صداع تقيل .. وبعدين بقى صداع لا يطاق
لحد ما وصل لدجة إني مش شايف قدامي من شدة الألم .. والمسكنات مبتعملش أي تأثير
وكنت بجيب اللي في بطني كل شوية "أعزكم الله" لدرجة إني لو شربت ميه برجعها
خدوني وأنا مش حاسس بالدنيا من حواليا لدكتور عندنا في البلد
علقلي محلول وحطلي فيه 14 نوع دوا وروّحت
واحدة واحدة بدأ الأم يخف .. على بالليل لحد ما انتهى تماما
تاني يوم روحت الإعادة للدكتور وأنا فايق وكأني أول مره أشوف وشه
لأني المره اللي فاتت كنت فعلا مش حاسس بالدنيا مع إني كنت مفتح عينيا
سألته إيه اللي كان عندي؟
موصلتش لإجابة شافية
تالت يوم .. صحيت من النوم
وحسيت بصداع خيف
وبعدين زاد شوية .. وبعدين زاد أكتر .. وبعدين بقى صداع تقيل .. وبعدين بقى صداع لا يطاق
واتكرر نفس اللي حصل أول امبارح وبردو المسكنات معملتش أي تأثير
بس من غير ما اروح للدكتور
وعالعصر واحدة واحدة بدأ الأم يخف لحد ما انتهى تماما
بعدها بيوم صحيت من النوم
كنت كويس مفيش أي حاجة
بس قررت أروح لدكتور كبير ومشهور في طنطا عشان أعرف إيه احكاية
كشف عليا بالسماعة وقاس الحرارة .. كله تمام
كشف بالسونار وطلب تحاليل .. كله تمام
قالي مفيش حاجة .. والموضوع ده انتهى
وبعدها بيوم .. صحيت من النوم
وتكررت المأساه
على ما جا معاد الإعادة بعد العصر كان الألم راح
كشف عليا تاني .. مفيش أي حاجة
قلتله يا دكتور أنا والله مش من النوع اللي بيوهم نفسه بالعكس دا انا عمري ما بحط حاجة في دماغي
قالي متهكما: يبقى بسم الله الرحمن الرحيم يعني ولا إيه؟!!! ياعم قوم مفيش حاجة
قلت ياريت يكون فعلا مفيش حاجة وميحصلش حاجة تاني لأني فعلا بتعذب
تاني يوم .. صحيت من النوم
وبدأت أحس بصداع خفيف
عرفت إن المأساه هتشتغل تاني
وفعلا .. لحد العصر في العذاب لحد ما بدأ يختفي تدريجيا
وفضلت على كده .. يوم طبيعي ويوم عذاب .. ومش لاقي حد يعرفني إيه الحكاية؟؟؟؟؟؟؟
لحد ما جا يوم زاد التعب فيه جدا جدا جدا .. لدرجة إني كنت بخرف من شدة الألم
جا اصحابي وخدوني في عربية لانسر ومعاهم والدي وقعدوا يلفوا بيا عالمستشفيات
وبعدين راحوا لأكبر دكتور مخ وأعصاب في طنطا .. دخلوا يحجزوا لقوا قدامي 14 يوم لحد مايجي دوري
طب والمستعجل؟!! يبقى قدامي يومين
يعني المفروض الواحد يعمل حسابه ويروح يحجز قبل ما يفكر يتعب بـ 14 يوم
المهم اتصرفوا وجابوا واسطة ودخلوني
طبعا أنا كنت مفتح عينيا وبمشي على رجلي لكن حاسس إني في بلد تانية خالص .. لدرجة إن الدكتور ده كان في الدور الخامس وكان الأصانسير عطلان راح واحد صاحبي شايلني على كتفه وطلعني الخمس أدوار ونزلني وأنا مش حاسس بالدنيا .. وهواللى حكالي بعد كده .. ومكنتش بتكلم غير في حاجتين كل شوية أكررهم
الحاجة الأولانية : الحمد لله على كل حال
الحاجة التاني: هي الساعة كام؟
اشمعنى السؤال ده؟ مش عارف .. دا حتى اصحابي ماسكنهالي لحد انهارده
كان من ضمن اصحابي واحد في امتياز طب
لما سألوه عن حالتي قالهم في حاجة نادرة درسناها بتحصل فجأة وبتضرب جزء في المخ والمريض مبيخفش تاني
ساعتها اصحابي قعدوا يعيطوا على إيهاب اللي راح منهم في شربة ميه وبقى بيخرف ومش هيرجع تاني
المهم الأستاذ الدكتور الكبير ده قالهم لازم يروح مستشفى فورا
ودوني مستشفى خاصة وجا الدكتور ده وحقني حقنة منوم
وقالهم التشخيص بتاعه لحالتي اللي هو عبارة عن التهاب فيروسي حاد في المخ، وكتبلي على علاج مستورد غالي جدا وطلب أشعة مقطعية على المخ
تاني يوم .. صحيت من النوم
لقيت نفسي في المستشفي .. بس الحمد لله زي الفل
روحت عملت الأشعة عالمخ .. وبردو طلعت زي الفل
تاني يوم .. صحيت من النوم
بس المره دي
تمام ومفيش أي حاجة
روحت للدكتور في الإعادة
أول ما دخلت بصلي وابتسم وفرح بانتصاره وإنجازه وسألني متفشخرا: انت شوفتني قبل كده؟
طبعا المفروض إني شوفته وكلمته .. بس عشان كنت مش حاسس بالدنيا ساعتها فعلا كأني أول مره أشوفه في حياتي
قالي انت بقيت تمام وانسى موضوع الصداع والترجيع والكلام ده خالص
طلعت من عنده وأنا طاير من الفرحة .. أخيرا رجعت وبقيت طبيعي
تاني يوم .. صحيت من النوم
بس اللي صحاني المره دي
الصداع بذات نفسه
لأ بقى لأاااااااااا أنا استويت
خدوني اصحابي بنفس الانسر وكان الألم لا يطاق لدرجة إن الدموع كانت بتنزل من عيني بشده من غير ما اعيط .. بس المره دي فايق وحاسس باللى حواليا
طب يروحوا بيا فين؟ ولمين؟ مفيش حد عارف يشخص صح عشان يدي علاج صح
آخر ما غلبوا ودوني الحميات لأن والدي بيقتنع بيها جدا .. مع إني مسخنتش ولا مره
لقينا دكتور من ضمن اللي كشفوا عليا قبل كده
أول ما شافني قال: هو انت لسه؟
استدعى دكتور تاني وتالت ورابع وسألوا إيه الأعراض .. صداع شديد جدا وترجيع شديد جدا
في سخونية .. لأ
في كحة .. لأ
في عطس .. لأ
النظر فيه حاجة .. لأ
الأذن فيها حاجة .. لأ
وطبعا التحاليل كلها زي الفل
والسونار زي الفل
والأشعة المقطعية عالمخ .. زي الفل
احتاروا وبقوا مش عارفين يعملوا إيه
سألوني بتشتغل إيه؟ قلتلهم دكتور بيطري
ماصدقوا سمعوا الكلمة عشان يلاقوا حجة يقولوا إن التشخيص اشتباه في انفلوانزا الطيور "ميعرفوش إني في المستقبل هبقى صقر من صقور نيسان"
مع إن مفيش أي عرض من أعراض المرض ده .. وأنا عارف كده كويس
حجزوني في عنبر الإنفلوانزا قسم الديوك .. قصدي الرجال
وطبعا في قسم تاني للبرابر .. قصدي السيدات
وقالولي هناخد عينة نبعتها تتحلل في فرنسا .. لو طلعت سلبية هناخد عينة تاني نبعتها لندن
والموضوع ده هياخد أسبوع
وأنا عارف إنهم لو خدوا ميت عينة وبعتوها كوكب زحل هيلاقوها سلبية بردو
طبعا الصداع خد وقته المعتاد وراح .. وكانوا علقولي محاليل وأدوية واشتغالات
والدنيا اتقلبت عليا في المستشفى من اصحابي وحبايبي اللي جايين يزوروني
وكل يوم يدخل عليا دكتور شكل .. أقوله الأعراض .. يستغرب إيه اللي جابني هنا في عنبر الانفلوانزا
أسأله طب عندك حل؟ ميعرفش يرد
لحد ما بقيت مبسألش حد
وبعد كشوفات وكشوفات .. ودكاترة وعيادات .. ولف عالمستشفيات .. وأدوية وروشتات .. ومصاريف بالألوفات
عرفت أصل الحكاية .. ورسيت على كل الرواية
وفهمت أساس الموضوع .. وعالجت دماغي الموجوع
ودماغي بقى 100 100 .. والحل كان .. في جركن ميه
وبعد اعتزال عرق الغلاسة .. ظهر على أرض الملعب نجم جديد .. وهو عرق الرزالة .. اللي وصل لأعلى درجات النقح
والمسكنات ماكنتش نافعة معايا في أول الحلقة .. عايزينها تنفع في آخرها
أشوفكم في الحلقة الجاية
واللي هتكون بعنوان
كفارة يا معلم
المفضلات