الموضوع: التيدا .. ومسلسل المؤامرة

الجزء الثاني
الحلقة الأولى

### في المقص ###


هبدأ الرواية من البداية .. عشان تعرفوا أصل الحكاية
فكرت في يوم إني أروح .. واطلع طلعة على مطروح
قلت أقضّي هناك كام يوم .. أغير جو وانط واعوم
مع إني عمري ما روحت مطروح قبل كده .. ومعرفش الطريق .. ومبحبش أصلا أروح المصايف عشان زحمة الناس والمناظر اللي بتكون هناك وقلة الحياء عند كتير من الناس
بس سمعت إن البحر هناك فاضي والواحد بياخد راحته
بصراحة الفكرة نطت في دماغي فجأة بالليل .. قمت واخد العيال ومسافر الفجر "أحلى حاجة فيا .. التأني في اتخاذ القرارات"
المهم وأنا في الطريق حصلت شوية حاجات غريبة "كالعادة"
أول حاجة حصل معايا موضوع الفتيس اللي حصل مع بيشوي .. نقلت من على الـd الى الـr عن طريق الخطأ وأنا على سرعة 80 تقريبا
بس الحمد لله لحقت نفسي قبل ماشيل إيدي من على زرار الأمان اللى في الفتيس
بس ساعتها كأنك عملت كيك داون لقلبي .. معدل تسارع نبضاته حطمت الرقم القياسي .. والـrpm بتاعه كان متقفل
وقعدت سرحان بعدها .. قلت لو مكنتش لحقت نفسي ياترى كان إيه اللي ممكن يحصل
دا كان زمان الفتيس ضرب .. طب كنت هسيب العربية فين؟؟؟
طب أقرب توكيل فين؟؟؟
طب هانقل العربية ازاي؟؟؟
طب دا أنا رايح اتفسح ولا رايح أتنكد؟؟؟
وأنا سرحان مع أحلام اليقظة دي .. فوقت على كمين من بعيد قبل مارينا
أنا الحمد لله عمري ما حد طلب مني الرخصة في حياتي قبل كده .. غير مره واحدة كنت سايق فزبة من غير خوذة
قربت على الكمين لقيت ظابط بيبتسم ابتسامة جميلة وبيقولي: حمدا لله على سلامة حضرتك
استغربت وقلت في نفسي هي الثورة عملت شغل ولا إيه .. المهم قلتله: الله يسلمك
قالي: ممكن تركن بعد إذنك
قلت: ماشي
بعد ما ركنت قالي: حمدا لله على السلامة مره تانية
قلت : الله يسلمك مره تانية
قالي: ممكن الرخصة لو سمحت
طلعت الرخصة واديتهاله
بص فيها وبعدين بصلي وابتسم تاني وقالي: حضرتك متصور يا دكتور
قلتله هي السرعة المسموحة كام
قالي 100
قلتله وأنا متصور على كام
قالي 116
استغربت جدا وقلت في نفسي: إزاااي؟!!!
116 إزاااي؟!!!
بقى أنا كنت ماشي على 116 ... بس !!!
المهم دفعت وخدت الوصل ومشيت
بصراحة كان نفسي أقرأ الوصل .. بس للأسف وقع في إيد أحمد إبني اللي عنده 10 شهور .. واكله
يلا .. بالهنا والشفا
كل اللي فات ده ولسه مدخلناش في الموضوع .. مش عارف ساعات بحس إن أنا رغاي قوي .. لكن مع اللي بحبهم بس
بس مش مشكلة .. أدينا بنتسلى مع بعض .. أصل الرحلة كانت طويلة قوي
المهم .. بعد المخالفة احترمت نفسي ومشيت على 100
لكن العربية سحبها مغري ويخدع .. وسرعة 100 دي كأني واقف مكاني والطريق طويل
بعد ما احترمت نفسي فترة .. قررت إركن احترامي ده على جنب
وخصوصا إن من أسباب سفري مطروح إني أجرب العربية في طريق مفتوح زي طريق الساحل الشمالي
فتحت لحد 170 والعربية ماشاء الله .. ومرضيتش أزود بس عشان العيال
بردو كل اللي فات ملهوش علاقة بالموضوع
شكلكم اتخنقتوا مني
نخش في الموضوع
وأنا على السرعات العالية لاحظت إن العربية بتحدف يمين
كل ما أسيب إيدي من على الدريكسيون ألاقي الحاجة تيدا رايحة يمين
ياستي تعالي الناحية دي .. مصمصمة تروح يمين
ياحاجة ربنا يجعلنا من أهل اليمين .. بس انتي كده هتضيعينا
بردو مفيش فايدة .. اللي في دماغها في دماغها .. يمين يعني يمين
قلت ياترى في إيه؟
ضغط الهوا في الكاويتش متظبط
بس افتكرت إني كنت ساعات بسمع صوت نقرة من ناحية اليمين قدام
بس الصوت ده ماكانش قالقني قوي لسبب
إني كنت راكب قبلها شاهين لمدة سنتين وكانت بتطلع أصوات إنما إيه .. مزيكة حسب الله
بصراحة كانت بتسليني وبتصحصحني طول السكة .. خصوصا إن الكاسيت كان بايظ وكانت المزيكة دي قايمة بالواجب
فلما أسمع صوت النقرة دي في التيدا مش هحس بيه
وعلى فكرة الشاهين كانت بتحدف يمين بردو ... بس حدفة عن حدفة تفرق
الشاهين كانت عندها زمة في الموضوع ده
الله يرحمها .. ربتلي عضلات في دراعي اليمن
ده غير الواجب اللي عمله الدبرياج مع عضلات رجلي الشمال
بصراحة أنا لو كنت ذاكرت شوية في الثانوية ودخلت علاج طبيعي كنت وصيت المرضى بتوعي إنهم يركبوها نص ساعة 3 مرات يوميا قبل الأكل
المهم
قضيت المشوار .. وانبسطت
وغيرت الجو .. وزقططت
ونزلت البحر .. وبلبطت
وبعد يومين اتنين .. روحت
وبعد ما لفيت هنا كام لفة .. قلت اشوف موضوع الحدفة
روحت لواحد بتاع ضبط زوايا .. وقلتله على اللي حصل معايا
راح مدخل العربية دقيقيتن .. وطلعها ولف بيها لفتين
وقالي خلاص
قلتله عايز كام
قالي عشرين جنيه
اديتهاله ومشيت بالعربية .. لقيتها زي ما هي بالظبط ومفيش أي تغيير
رجعتله تاني .. راح منادي لواحد يفك العجلة كلها
وهو لسه بيفكها .. لقاها بتتحرك مع المفتاح الصليبة زي مايكون فيه شوية بوش
قالي دي بسبب جلب المقص عايزة تتغير
قلتله مالها؟
قالي بايظة .. هاتها وأنا أركبهالك
قلت في نفسي خلاص أروح التوكيل ومش مشكلة 200 أو 300 جنيه في موضوع الجلب ده
مع إني متوقع إني لو عملتها بره مش هتتكلف 50 أو 100 جنيه بس عشان أبقى مطمئن
إتصلت بالراجل بلدياتي اللي في التوكيل وقلتله أنا جايلك دلوقتي
روحت وبص عالعربية
قالي فعلا الجلب بايظة
قلتله ماشي غيرها
قالي بس في مشكلة
قلتله خير؟
قالي الجلب مبتتباعش وحدها .. لازم المقص بحاله
قلتله بكام يعني؟
قالي650 جنيه
قلت هاعمل إيه يعني .. ماشي
قالي بس في مشكله
قلته إيه تاني؟
قالي لو غيرت المقص اليمين لازم تغير معاه المقص الشمال كمان
قلتله ليه بس ياعم الحاج؟
قالي عشان المقص القديم هيبوظ المقص الجديد .. وعلى فكره المقصات مش تبع الضمان
قلت يعني 1300 غير الضريبة والمصنعية عشان جلبة كاويتش باظت
طبعا حاجة تعقد .. واللي يعقد أكتر إنه شككني في العربية اللي المفروض إنها عاملة 50 ألف كيلو بس
شكيت إني خدت فيها مقلب وإن العداد ممكن يكون ملعوب فيه
قلتله يعني مفيش حل تاني بيني وبينك كده بعيد عن التوكيل
قالي ممكن أجيبلك مقصات من بره التوكيل من القاهرة وهتكون أرخص
قلتله أنا بخاف من الحاجات اللى مش أصلية
قالي لا أنا هجيب أصلي بردو بس مش من التوكيل
قلتله إزاي؟
قالي ليا سكتي بقى
قلتله خلاص هتسافر إمتى؟
قالي لسه شويه .. بس لما هسافر هقولك قبل ما اشتري أي حاجة إنها تمنها كذا .. أجيب ولا لأ؟
قلتله ماشي اتفقنا .. ومنتظر مكالمتك
في الوقت ده فكرت في فكرة .. فتحت عليا باب الكنز الأول
الكنز اللي كسبني كتير .. كتير قوي
طبعا بعد الفترة الطويلة اللي قعدتها بعد الجزء الأول من المسلسل .. تأثير السكنات بتاعة د.عاطف بقت في الطراوة
وعرق الغلاسة إياه رجع للعمل تاني .. وبغلاسة
ولغاية ماحد يشوفلنا نوع مسكن تاني .. هنتظركم في الحلقة التانية .. اللي هتكون بعنوان:









### الكنز ###

.