الموضوع: إن شاء الله مسافر مطروح ومحتاج نصايحكوا........

المشاركة الأصلية كتبت بواسطة gebreel

لسة راجع من الساحل امبارح الطريق زي الفل الحمد لله بس سافر بالنهار
خلي بالك ركبوا رادارين او 3 مش فاكر بالظبط على اسكندرية الصحراوي و مشفتش ولا واحد على العلمين
عربيتك لسة جديدة اخرك 130 و عدد لفات 3.5 من الكاتلوج و شغل تكييفك عادي جدا مفيش فيها مشكلة و توصل بالسلامة و يا رب تنبسط

تقصد ردار ثابت الى مخالفاته بتيجى على مع تجديد الرخصه
ولا ردار عادى الى بيبقى بعديه لجنه تحصل المخالفة

اصل كلمة ركبوا اديتنى ايحاء بأن الردار ثابت فمش عارف حضرتك تقصد كده فعلا ؟

انا جاى من مطروح الاسبوع الى فات والطريق رائع وامان ومفيش اى مشاكل

المشاركة الأصلية كتبت بواسطة gebreel

ايوة يا باشا ثابتين مش عارف ان كانو شغالين ولا لأ لأني كنت مسافر بالنهار و هما واضحين جدا و ال2 او 3 دول انا شفتهم لحد طريق العلمين معرفش ان كان فيه بعدو كمان ولا لأ

بس طريق العلمين مفيش عليه اييييي حاجة بالرغم من ان الgps كان بيقول على اماكن الرادارات اهدي و ابص ملاقيش حاجة

الف شكر يا باشا
انا كنت مسافر مطروح الاسبوع الى فات وكنت طوال الوقت تقريبا متجاوز السرعه ما عدا الجزء الى من طريق العلمين لغاية القاهرة كنت ماشى مظبوط بأذن الله ربنا يسترها

لسه راجع من مرسى مطروح امبارح والبحر هناك ممتاااااااااااااااااااز غير اسكندرية خالص والمية رائعة والشواطىء جميلة ونظيفة جدا فعلا المسئولين هناك عاملين احلى شغل بس مازالت مشكلة مياه الشرب قائمة ، انما الاداء بصفة عامة رائع
وبخصوص الطريق فالطريق ممتاز واحسن وقت للسير فيه قبل شروق الشمس وحتى الساعة 9 صباحا بعد كده الجو بيبقى حار جدا ولابد من تشغيل التكييف والانتباه للطريق مطلوب طول الوقت لمرور سيارات نقل ثقيل وقبل اسكندرية بحوالى 100-110 كم لابد من الانتباه الشديد لمداخل ومخارج القرى السياحية على جانبى الطريق فالشباب متهور جدا جدا هناك
مع اطيب امنياتى للجميع بقضاء مصيف جميل واجازة سعيدة

المشاركة الأصلية كتبت بواسطة meeezo333eg

السلام عليكم و رحمة الله و بركاته
انا اخوك معتز من مطروح و معايا تاكسى فى مطروح
اهلا و سهلا بيك فى مطروح
الطريق زى الفل و مفيش مشكلة و ارجو منك الالتزام بالسرعة القانونية علشان نبقى متحضرين مش لازم نلتزم علشان فيه رادار و ان شاء الله ربنا يستر من الحوادث و متلزقش فى اى عربية خليك بعيد عن العربيات (مسافة الامان)
اى عربية نمرها من ليبيا او جمرك السلوم فى الغالب سواقتهم شديدة التهور و لا ينظرون فى المرايا و خلافه احترس منهم بشدة
بالنسبة لمشكلة المياه دى على حسب المنطقة اللى هتنزل فيها و مياه الحنفية نظيفة و تتشرب و زيت الزيتون هاته من معصرة مديرية الزراعة و اللب من عند نصر المسيحى و النصر الاسلامى دول احسن اتنين على الترتيب
اما الشواطئ عجيبة و الابيض و روميل و كليوباترا و الغرام و لازم تشترى نظارة غطس (حوالى 35 جنيه) و تروح شاطئ الرميلة و مينا حشيش
عندنا معارض صينى و سوق ليبيا و شارع اسكندرية للتسوق
مش عارف ايه تانى ممكن اقوله ده اللى فى دماغى دلوقت
ارجو منك احترام اتجاهات الشوارع و اشارات المرور فى اى مكان مطروح او غيرها ( فيه 800 مصرى استشهدوا فى الثورة من اجل تصحيح مسار حياتنا ده غير ان النبى محمد صلى الله عليه و سلم يقول اماطة الاذى عن الطريق صدقة فما بالك بوضع الاذى فى طريق الناس و اذا كان هذا الاذى بحجم سيارة تقطع الشارع فى اتجاه خاطئ و خلافه و يقول ايضا لا ضرر و لا ضرار اى لا تضر نفسك او تضر غيرك)
لو احتجت اى حاجة كلمنى 0165566198 (انا مش سمسار اى حاجة مش هطلب منك فلوس )

الاخ الفاضل معتز
اقل مايقال عنك أنك إنسان محترم ويعتز الانسان بمعرفته وصداقته حتى ولو عبر الفضاء الالكترونى فأشكرك لتفاعلك ونصائحك حتى ولو لم استفد منها شخصيا ولكن كلامك اكثر من رائع ونصائحك فى محلها فلك الشكر كل الشكر
ودمتم بود فأهل مطروح أهل كرم وجود وبارك الله فيكم وجزاكم خير الجزاء

اخوك طارق الجيزاوى