العربية بتسخن وهى مطفية وواقفة!!!

**beshomilan** · 10-07-2011 12:26 AM

دلوقتى العربية عندى لما يكون مؤشر الحرارة فى النص بعد مشوار عادى ومطفي العربية بس المفتاح جواها وشغال تانى تكة اللى هى تكة الكهربا بلاقى المؤشر بيفضل يطلع مع مرور الوقت ناحية العلامة الحمرا كأنها شغالة وبتسخن جدا رغم ان الماتور مطفى اصلا!!!

ادور العربية المؤشر ينزل فى النص عادى ولا كأن فى حاجة!!ولما اطفيها خالص واشيل المفتاح المؤشر لتحت خالص يعنى لمكانه الطبيعى

سألت الكهربائى قاللى عادى المفروض المؤشر يوصل للاخر فوق وبعدين ينزل للاخر تحت بعدها بفتره!!!وقاللى انت تهتم لما تسخن وانت ماشى وقاللى ان مؤشر الكهربا ده يرتفع برضه لو انت مشغل تكة الكهربا بس لان الموبينه بتكون سخنة فبيعلى المؤشر..ياترى ده كلام صح؟؟
انا اعرف ان المؤشر ده بيقيس درجة حرارة الماتور بس؟؟ايه علاقة الموبينه بالمؤشر؟؟

ملحوظة:
الترموستات متشالة والعربية مبتسخنش اطلاقا والمؤشر مبيعديش النص وانا ماشى ووانا واقف ومشغل العربية كمان..فالمشكلة فين؟؟

سؤال اخر ممكن يكون ليه علاقة بالموضوع

قلت اجرب اشغل مروحة الريداتير فى تكة الكهربا وجربت كمان والعربية دايره ولقيت فتحات التابلوه طلعت هوا عادى وفتحت الكبوت لقيت مروحة الريداتير مش شغالة ولا هى ولا بتاعت التكييف!!!

امال الهوا اللى جايلى ده جاى منين؟؟؟

شغلت التكييف لقيت المروحتين اشتغلوا..طفيت التكييف فضلت مروحة الريداتير شغالة كام دقيقة وطفت لوحدها

السؤال دلوقتى
الهوا اللى طالع من فتحات التابلوه جاى منين اما مروحة الريداتير والتكييف واقفين؟؟؟وكده فى مشكلة فى المراوح علما انها بتشتغل عادى بعد اى مشوار ليا

**beshomilan** · 10-07-2011 02:47 AM

محدش عارف ولا ايه؟؟الموضوع غريب اوى للدرجادى؟؟

**ahmedhawas** · 10-07-2011 04:27 AM

شكلك كده الإكسل دي هتجننك فعلا !!
بالنسبة لحساس الحرارة : هو بيقيس درجة حرارة مية التبريد.
الهوا اللي جايلك من فتحات التكييف وانت طافي التكييف : ده هوا المروحة ال blower اللي ورا التلاجة evaporator اللى بتكون في نص التابلوه
ودي ملهاش علاقة بالمروحتين اللي في الردياتير.

**ahmedhawas** · 10-07-2011 05:03 AM

بالنسبة لسخونة المؤشر والعربية عالكونتاكت - فدي غير واقعية ولا يعتد بها.
والله أعلم.

**beshomilan** · 10-07-2011 11:49 AM

هههههههههههههه هى فعلا جننتنى بجد..انا مشكلتى انى مركز معاها
بس اشكرك لردك معايا دايما استاذ احمد :)

بالنسبة لحساس الحرارة : هو بيقيس درجة حرارة مية التبريد.

حساس الحرارة بيقيس درجة حرارة مية التبريد مش درجة حرارة الماتور؟؟؟معلومة جديده جدا

الهوا اللي جايلك من فتحات التكييف وانت طافي التكييف : ده هوا المروحة ال blower اللي ورا التلاجة evaporator اللى بتكون في نص التابلوه
ودي ملهاش علاقة بالمروحتين اللي في الردياتير.

معلومة قيمة فعلا وكنت اجهلها

بالنسبة لسخونة المؤشر والعربية عالكونتاكت - فدي غير واقعية ولا يعتد بها.

ممكن تكون كده فعلا بس اللى اعرفه ان العربية لما تتطفى وهى سخنة بتبرد مش تسخن اكتر!!!!!!
بس معنى انها مش واقعية يعنى مش صحيحة..بس عمر ما العربية كانت بتعمل معايا كده ابدا كانت لما تتطفى وهى حتى على تكة الكهربا المؤشر بيفضل ينزل تدريجى لتحت يعنى بتبرد
سؤال بس..هو تعليه وتوطية كهربة العربية ليه علاقه بموضوع المؤشر اللى بيزيد ده؟؟اصل المشكلة ظهرت لما وطيت كهربة العربية..مش عارف ليه علاقة ولا دى تهيؤات بس

**ahmedhawas** · 10-07-2011 06:03 PM

يا باشا انت تؤمر.
حساس الحرارة بيحس بدرجة حرارة مية التبريد اللي طالعة من الموتور - مش اسمه coolant sensor - وغالبا بيكون قرب كوعة الثرموستات.
http://www.nilemotors.net/Nile/146757-a.html

**beshomilan** · 11-07-2011 01:29 AM

اشكرك استاذ احمد للموضوع الجميل :)

بس برضه عايز اعرف ليه العربية وهى مطفية المؤشر بيعلى رغم انه المفروض يحصل العكس..واعتقد اللى بيحصل معايا ده مبيحصلش مع حد ومكانش بيحصل معايا سابقا

وان كلام الموبينه سخنه ده وده بيسخن العربية لما بكون طافيها وانا مشغل الكهربا ده كلام مش مقنع

عايز رد مقنع عشان اعرف انام :d
كده انا هتجنن فعلا

**amrelsaqqa** · 11-07-2011 01:59 AM

طبيعى وبتحصل معايا ومنطقية كمان على فكرة

عشان المروحة بتقف والموتور بيقف فجأة وهو لسه سخن ، فلما يكون الموتور سخن والمروحة واقفة والعربية واقفة ومفيش هوا فـطبيعى ان المية تسخن شوية من الحرارة الكامنة في الموتور والمؤشر يطلع شوية ، بس في الاخر طبعا هتبدأ تبرد والمؤشر ينزل

**samehlila** · 11-07-2011 11:10 AM

بسم الله الرحمن الرحيم
1 - حاول تفك العدادات عند اي كهربائي كويس و قول له يدور علي اي تهريب كهربا او ارضي في تراكات العدادات لان هتلاقي غالبا الارضي بتاع التابلوه بيفوت لما حاجه مرتبطه بالدوارة تقف زي مثلا عداد لفات الموتور يحصل تهريب فب الارضي ينتج عنه ان العداد الخاص بالحرارة بيبقي فيه اتنين كهربا واحد مباشر و التاني عي الحساس و ده بيكون بسيط فبيرفع العداد طالما مفيش ارضي يرجعه لمكانة الفعلي علي حسب درجة الحرارة

2 - عند نفس الكهربائي خليه يوصل لك المروحة علي الكهربا المباشر و ليس الكونتاك علشان حتي لو انتا جاي من مشوار و العربية سخنة مايحصلش ان المية تفضل سخنة فترة و انما المروحة تبرد الرادياتير لغاية مايحصل تبادل حراري للمية الموجوده في الرادياتير و الموتور لغاية مايبرد و ده احسن للموتور

**beshomilan** · 11-07-2011 03:50 PM

طبيعى وبتحصل معايا ومنطقية كمان على فكرة

عشان المروحة بتقف والموتور بيقف فجأة وهو لسه سخن ، فلما يكون الموتور سخن والمروحة واقفة والعربية واقفة ومفيش هوا فـطبيعى ان المية تسخن شوية من الحرارة الكامنة في الموتور والمؤشر يطلع شوية ، بس في الاخر طبعا هتبدأ تبرد والمؤشر ينزل

راى منطقى جدا ومقنع الصراحة..احييك

بسم الله الرحمن الرحيم
1 - حاول تفك العدادات عند اي كهربائي كويس و قول له يدور علي اي تهريب كهربا او ارضي في تراكات العدادات لان هتلاقي غالبا الارضي بتاع التابلوه بيفوت لما حاجه مرتبطه بالدوارة تقف زي مثلا عداد لفات الموتور يحصل تهريب فب الارضي ينتج عنه ان العداد الخاص بالحرارة بيبقي فيه اتنين كهربا واحد مباشر و التاني عي الحساس و ده بيكون بسيط فبيرفع العداد طالما مفيش ارضي يرجعه لمكانة الفعلي علي حسب درجة الحرارة

2 - عند نفس الكهربائي خليه يوصل لك المروحة علي الكهربا المباشر و ليس الكونتاك علشان حتي لو انتا جاي من مشوار و العربية سخنة مايحصلش ان المية تفضل سخنة فترة و انما المروحة تبرد الرادياتير لغاية مايحصل تبادل حراري للمية الموجوده في الرادياتير و الموتور لغاية مايبرد و ده احسن للموتور

اخاف افك العداد المشكلة تكبر :(
انا نفسى من زمان اعمل موضوع المروحة ده..بس كده المروحة مش هتخرب اسرع؟؟