دلوقتى من مرشحين الرئاسة الاسلاميين : العوا و ابو الفتوح (اللى هو اساسا اخوان ) و حازم ابو اسماعيل
بعد الثورة مش عارف ايه اللى حصل للعوا , انا مش مصدف انه وصف اللى بيطالبوا بالدستور اولا بشياطيين الانس !!
اللى فوجئت تماما بموقفه هو حازم ابو اسماعيل , انا لما سمعت عن ترشحه و شوفت انه واخد 10% فى استطلاع الرئاسة اترعبت , قولت مبن دا لان اول مرة اسمع عنه , كنت فاكر الناس بتهزر فى الاول لما بتشرحه , قولت معقوله واحد بفكر السلفيين اللى هو الخروج على الحاكم حرام و الكلام دا يمسك البلد لو مسكها ههاجر علطول , سمعت الفيديو اللى كان محطوط هنا ليه 6 دقايق قال كلام ممتاز فعلا بيدل على اد ايه الراجل دا واعى و مثقف و فاهم كويس اللى بيحصل و فكره مختلف تماما عن اللى انا كنت متخيله!! تحليله حتى لموضوع الدستور اولا و لا لأ انه حاجة علشان يلهونا بيها و انا متفق معاه تماما فى الراى و الوحيد اللى انتقد المجلس العسكرى صراحة كدا و غيره قال كلام كويس و مقتنع ان البلد دلوقتى مش ماشية فى الطريق الصحيح و ان لو كملنا كدا كل حاجة هترجع زى الاول يعنى مش زى اشكال نازلين الميدان بالعافية لما لقوا اجماع و كل الناس نازلة و عايزين السلطة و خلاص و يقولك لا منعتصمش كانهم مش مصريين اساسا (ايوه هما الاخوان) .
عبد المنعم ابو الفتوح عاجبنى كلامه جدا برده من بعد الثورة و لما اترشح للرئاسة , لحد دلوقتى كل كلامه كويس اوى و معتدل جدا و بيحلل الامور بشكل كويس جداااا بس انا شخصيا منتخبوش علشان انا ضد ان الرئيس يبقى رجل دين , انا عايز الرئيس يبقى ادارى ممتاز و ديموقراطى و يعرف ازاى يقوم البلد اقتصاديا و ينضف مؤسسات الدولة و القطاع الحكومى كله يعيد هيكلته و دا رايى انا الشخصى .
الاخوان : بعد الثورة مش عارف فعلا ايه اللى حصلهم , و هما معارضين كانوا ممتازين و كنت بتعاطف معاهم جدا بسبب اللى كان بيتعمل فيهم و فى قياداتهم , كان بيتنكل بيهم و يلفقولهم قضايا و كدا , و كان فكرهم و طريقتهم معتدلة و متزنة فى كل حاجة
متفهمش ايه اللى حصلهم بعد الثورة : يسموا مظاهرة يوم جمعة "جمعة الوقيعة" , يقولوا اللى عايزين الدستور الاول صهاينة و فلول و كانوا بيوزعوا ورق ايام الاستفتاء و لوحات بيقولوا العلمانيين بيقولوا لا احنا هنقول نعم علشان الدين , يرفضوا ينزلوا اى مظاهرة غير بالعافية زى يوم 1 ابريل علشان محاكمة الفسدة يقولك لا اصل عندنا يوم اليتيم!!! المظاهرة دى نازلنها على مضض و مشيوا الساعة 6 , واحد محامى منهم كان فى لجنة اعداد التعديلات مع انه مش فقيه دستورى!! مصممين على الانتخابات الاول قبل الدستور و فى اسرع وقت ممكن مش فاهم ليه , انا عندى انتخابات الرئاسة تبقى الاول احسن لو عايزين استقرار مثلا , بجد الاشكال دى فى رايى اكبر خطر على مصر مش علشان نيتهم سيئة معتقدش علشان لو كانت كدا مكانوش اتعذبوا و اتبهدلوا ايام مبارك و طبعا مكانوش يتخيلوا ان هيحصل ثورة , انا اعتقد ان فكرهم كدا يعنى مش سوء نية لا دا عن جهل و دى حاجة بتغيظنى اكتر من سوء النية!!!
المفضلات