غبور اتصل بيا بخصوص الشكوى

**MazdaFan** · 10-07-2011 11:08 PM

أولا كل الشكر لكل الزملاء الأفاضل اللي شاركوا وبعتوا الميل وكانوا بيتفاعلوا معانا ، والحمد لله وصلنا لمرحلة كويسة ، بس لازم مانفرطتش فيها ونتقل كده عشان مايضحكش علينا :))

فكرة انه يعرض علينا انه يعمل خصومات لينا ويسيب الناس التانية على نفس حالها ؟ معلش يعني فكروني تاني كده هو كان ايه الهدف من اننا نبعت الميل اصلا ؟؟

أكيد مش الهدف اننا ناخد خصومات وحال العربية يفضل واقف زي ماهو في السوق ، لما تيجي تبيعها تلاقي سعر إعادة البيع ضايـع ، تلاقي محدش عايز يشتريها ، ممكن تاخد خصومات دلوقتي ، وبعد كده في موديلات تانية او كمان سنة او اتنين ترجع نفس مشكلة قطع الغيار تاني ، برضه عندنا شكوى من الإهمال و ردائة المعاملة في مراكز الصيانة ، ليه العربية مش قادرة تنافس وتكتسح السوق وليه مافيش خطة تسويق أفضل من كده ؟ نقطة سعر العربية كمان ، العربية اصلا مبالغ في سعرها مقارنة بالكماليات اللي فيها مع سعر نفس العربية بكماليات اكتر وأعلى في دول تانية ؟ زي ماكنا شفنا العربية بتبقى 2500 سي سي مش 1600 وفيها أنظمة زي DCS و Traction Control و bluetooth , BOSE sound system , GPS, 6 AirBags , heating seats, Adaptive Xenon headlights,
كل ده والعربية بره تمنها يعمل حوالي 25 الف او 26 الف دولار ، وهنا بتتباع من غير الكماليات دي و 1600 سي سي وتمنها 27 الف دولار (162 الف جنيه)؟؟؟؟ مش معقول الجمارك والضرايب تعمل كل ده !! العربية بسعرها ده مع الكماليات اللي فيها هنا في مصر مش بتخلي الناس تبصلها او تقبل عليها

مش عايزنهم يضحكوا علينا ويدونا حاجة "تسكتنا" (مش عايز أقول رشوة ) وننسى المشكلة الحقيقة للعربية ، ياريت كلنا نفتكر احنا كنا عايزين نبعت الشكوى ليه من الأساس ،

وزي ماوحدنا كلامنا في الميل اللي اتبعت لليابان ، تعالوا نوحد كلامنا قبل مانروح المقابلة معاهم في غبور، كل واحد يقول مشكلته ، ونرد على بعض ونحط نفسنا مكان غبور لو سمع مننا المشاكل دي ممكن يرد يقول ايه ؟ عشان يبقى النقاش معاهم مثمر، لأن أكيد هايظبطونا وهايكلونا في الكلام ، دي شغلتهم

الرسالة الرئيسية : العربية سوقها وااااقف ليه ؟؟ مافيش عليها إقبال من الناس ليه ؟؟ والدليل سعر إعادة البيع المنخفض !! سعر إعادة البيع هو أقوى مؤشر لنجاح خطة تسويق العربية !!! أزاي غبور يكسب ثقة الناس في العربية دي؟؟ ازاي تخليني اشتري مازدا وانا راضي ومش مقلق ؟؟ مش بالكلام الحلو ، لازم يكون بأرقام و حقايق على أرض الواقع.

عايزين حلول تخلي مازدا دي تبقى منتشرة زي السيراتوا كده كل 10 متر تلاقي منها اتنين ،
وده مش هايحصل إلا لو الناس وثقت فيها وحست انها تستاهل الفلوس اللي بتدفع فيها ( مش معنى كده ان العربية وحشة) بس عوامل زي عدم ثبات اسعار قطع الغيار والتفاوت الكبير فيها ، سعر إعادة بيع منخفض، خدمة عملاء على مستوى غير محترف كل ده بيقلل من نجاحها، بنفس الأسعار دي ممكن نجيب عربية أحسن ، أو أوحش بس لتوكيل معاملته أفضل و بلاقي معاه راحة بالي !

مشكلة زي مشكلة الانترا بتاعت مهندس ياسر المهدي ، بجد خلتني أقفل من غبور كتوكيل مع اني بعشق المازدا !! لكن لما الاقي مهندسين يلعبوا في العربية ويبهدلوها وهي لسه زيرو كده !!! ماتطلبش مني أثق فيك كتوكيل !

والكلام ده مش كلام ساذج ، ده كلام في صميم صفقة البيع والشرا لأي عربية !!! اي حد فينا لما يسمع ان عربية عليها مشاكل مع انها ممكن تكون كويسة ،أو التوكيل فيه مشاكل ، بيقفل من العربية وبيكون مقلق يشتريها مهما كانت كويسة !

أنا عايز الناس مثلا تمسك كل الشكاوي اللي قلتها دي ، ويحطوا نفسهم مكان غبور ويردوا عليا ويحاولوا يفحموني ( نعمل simulation للمقابلة )

**Frozen_Pain** · 11-07-2011 10:24 AM

المشاركة الأصلية كتبت بواسطة amrelsisi

انا اقولك ممكن يعملوا معاكوا ايه

ممكن ياخد ارقام عربيتكوا و ارقام الشاسيه و يعملها نسبة خصم معينه فى كل مرة تيجى فيها التوميل
يعنى يعملكوا نسبه خصم على قطع الغيار و المصنعيات و كده

بس مفتكرش انه ممكن ينزل اسعار قطع الغيار للناس كلها

ما هو ده برضه ما ينفعش يا عمرو احنا لازم نعمم الموضوع علشان الكل يستفيد

المشاركة الأصلية كتبت بواسطة pioneerahmed

مهو احنا لازم يبقى كلامنا واحد و نتفق

طبعا لازم يكون كلامنا موحد

المشاركة الأصلية كتبت بواسطة himaz

طيب يا حودة ظبط معاد وقولنا عليه

المشكلة انى مسافر يوم الخميس وهاجى السبت بليل ان شاء الله

المشاركة الأصلية كتبت بواسطة amrelsisi

للاسف انا مش هقدر اجى
انا من اسكندريه و عندى شغل (( بعيد عنك دكتور امتياز )) يعنى مرمطه طول ايام الاسبوع

حاول تيجى يا عمرو ده القعدة مش هتبقى حلوة من غيرك

**Frozen_Pain** · 11-07-2011 10:31 AM

يا جماعة احنا لازم نتفق على كلام واحد والكل يتمسك برأيه،،،، ولازم لم نروح هناك اكيد هنقابل ناس كتير معاهم مازدا نقولهم احنا بنعمل وهنعمل ايه

وكل ما يكون العدد كبير واحنا بنقابل مندوب غبور هيكون أحسن وهيعرف ان الموضوع مش سهل

لو حد قابل حد فى الشارع او وهو بيشترى قطع غيار يقوله ويعرفه ويحاول يخليه يجى المقابلة

على فكرة كمان المهندس رزق وانا بكلمه قولتله على المنتدى وقولتله ان الموضوع ابتدى من هنا من نايل موتورز اللى ليه الفضل بعد المولى عز وجل فى اللى احنا وصلنا ليه لان من غير نايل موتورز عمرنا ما كنا هنتجمع ابدا

والراجل عرض عليا انه يبقى موجود ويكون عضو فى المنتدى علشان يرد على اى اسئلة او شكوى

كمان قالى بخصوص الشكوى : واحد لسه مشترى العربية من 5 أيام ليه عامل شكوى
قولتله تضامناً معانا وحس انه هيقابل مشكلة فى شراء قطع الغيار
طبعا معرفش يرد عليا

انا نفسى اعرف من اللى مشترى العربية من 5 ايام وعمل معانا الشكوى والله راجل 10/10 وكفاءة

**levelpower** · 11-07-2011 11:46 AM

تمام انا معاكم و انا اتكلمت معاه اكتر من نص ساعه و هو بيحاول يأكد ان قطع الغيار سعرها نزل و بقيت فى مستوى قطع غيار هيونداى ماتركس و طبعا انا قولتله ليه قطع الغيار ملهاش سعر مواحد و كل واحد ليه سعر و طبعا قالى ان قطع الغيار البره مضروبه وانا قولتله انا هجبلك معايا فلتر هواء و تقولى ده مضروب ولا اصلى ز
وطبعا انا ان شاء الله معاكم فى اى حاجه

**Frozen_Pain** · 11-07-2011 12:30 PM

بغض النظر عن موضوع اننا نروح غبور طبعا انا نفسى اشوفكم كام

ايهاب حبيب قلبى اللى واحشنى جدا
هيما صديقى العزيز
أحمد بايونير
عمرو
الجزار
مازدا فان
ماندو
أمين سرور

طبعا مع حفظ الالقاب ويارب مش اكون نسيت حد
ايوة كده الواحد ابتدى يحس بالونس فى القسم بدل ما هو كان عامل زى الكهف

**himaz** · 11-07-2011 12:48 PM

انا بداد احس بالانشكاح

كدة القسم بدا يفوق

والفضل بعد ربنا يرجع لحودة البرنس واحشنى والله

عايزين فعلا نركز على الاسعار وتوافر القطع عندهم كمان

وياريت فى اى وقت نحدد المقابلة دى

**Frozen_Pain** · 11-07-2011 01:03 PM

يا هيما الفضل لله طبعا وبعد كده نايل موتورز وبعد كده محمد اللى كتب الموضوع وبعد كده باقى الاعضاء اللى ساهموا فى كتابة الشكوى واللى اشتركوا بفاعلية فى الموضوع وانا ليا كل الشرف انى اتعرفت على الناس الجميلة دى هنا ويارب تكون معرفة خير يارب

تصدق هيبقى منظر جميل لما 10 اعضاء معاهم 10 عربيات لمازدا وماشين ورا بعض على الطريق والله حاجة تفرح بجد

**Frozen_Pain** · 11-07-2011 01:06 PM

المشاركة الأصلية كتبت بواسطة frozen_pain

بغض النظر عن موضوع اننا نروح غبور طبعا انا نفسى اشوفكم كام

ايهاب حبيب قلبى اللى واحشنى جدا
هيما صديقى العزيز
أحمد بايونير
عمرو
الجزار
مازدا فان
ماندو
أمين سرور

طبعا مع حفظ الالقاب ويارب مش اكون نسيت حد
ايوة كده الواحد ابتدى يحس بالونس فى القسم بدل ما هو كان عامل زى الكهف

معلش يا جماعة نسيت اكتب اسم أخونا محمد صاحب موضوع الشكوى

**mohamed456** · 11-07-2011 01:13 PM

انا مع الصديق العزيز مازدا فان
اولا ان نأخد خصومات انا بعتبرها رشوه ....................................
اه رشوه عشان نسكت على حق اصحابنا
الشكوى كانت بسبب 1- قطع الغيار
2- الخدمة
3-مبعات السيارة و الغش فيها
4- الاهتمام ب هيونداى عن مازدا و دا المواضيع ال ح نتكلم عليها
و حنمكس المهندس رزق نتكلم معاه بكل احترام و بس انا شايف ان مهندس الصيانه مش هوا اليلبسها لوحد لالالالالالالالا
دا كمان قسم المبيعات و و رئيس مجلس اداره غبور
لازم يعرف هوا كمان

**Thebutcherr** · 11-07-2011 01:25 PM

اتقلوا يا بشر احنا هنروح سوا بس لازم نتقابل و نتكلم قبلها ظبطوا بقى و انا معاكم فى اى حاجة

الموضوع: غبور اتصل بيا بخصوص الشكوى

LinkBack

أدوات الموضوع

عرض

-

-

-

-

-

-

-

-

-

المواضيع المتشابهه

غبور استجاب للطلبات ( موضوع الشكوى ) ولا ليسه ؟؟؟؟؟؟؟

تم ارسال الشكوى (عرض محتويات ملف الشكوى) ....لا يبقى غير الصبر

الكلمات الدلالية لهذا الموضوع

المفضلات

المفضلات

ضوابط المشاركة