بسم الله الرحمن الرحيم
السلام عليكم و رحمة الله و بركاته

هاو اريون جميعا
( اسمها who r u يا جاهل يعني عاملين ايه ... عليا النعمة ما في حد جاهل غيرك )

بعد غياب اجزاء سلسلة تعالوا نعرف عن القسم التعليمي
و كانت في قسم السوزوكي

 تعالوا نعرف مميزات و عيوب السوزوكي ماروتي
http://www.nilemotors.net/Nile/229742-a.html

تعالوا نعرف مميزات و عيوب السوزوكي التو
http://www.nilemotors.net/Nile/224984-a.html

تعالوا نعرف مميزات و عيوب السوزوكي سيلاريو
http://www.nilemotors.net/Nile/230408-a.html

اقدملكم انهاردة جزء جديد من سلسلة تعالوا نعرف في القسم التعليمي اللي عارف اني زهقتكم بيها معلش هي سلسلة طويلة شوية يعني تقدروا تقولوا ملهاش نهاية ههههه
و ضميري مازال راشق لكن عشان قرفان من اللي بيحصل في البلد فبينتقم فيا انا الواطي
( مين اللي واطي يا..... اخرس يا زفت مش من اولها طب اصبر لما ندخل في الموضوع شوية )
المهم سيبكم من الجاهل ده و خليكوا معايا

نبتدي ع بركة الله

طبعا كلنا اول ما نجيب العربية بنلاقي نورها ما شاء الله و لا الزينون في زمانه
و بعدين نلاقي النور ابتدي يقل يقل و المشكلة ان الكهربا مفيهاش حاجة و اللمبات لسه جديدة نوفي
و بيتضح ان السبب ان وش الفانوس او الفوجات ( سواء بلاستيك او ازاز.. غالبا بلاستيك ) مصفر و لونه غامق مش بيلمع زي زمان و مخلي الاضاءة تيت ( قولهم يغيروا كتاوت ....اولا اسمه كات اوت ثانيا اسكت )

فعشان نرجع وش الفانوس او الفوج لسابق عصر و اوانه فيه اكتر من طريقة
و انا عن نفسي استخدمت طريقة من الطرق ديه و منهم اصحابي استخدموها و كانت النتيجة مرعبة
و فيه طرق جربناها تانية قولنا نجرب ( منها معجون اسنان و منها ...و منها... ..الخ..الخ ) و فشلت فشل ذريع
فخلونا في اللي نجح بقي

بس انا مش مسئول عن فواتير المية اللي هتدفع ( كوع يا حلو كوع .... و انا مالي يا عم هو انا قولتلهم ينضفوه بالعافية )

و فهرس الموضوع كالآتي

اولا : تنضيف الوش من برة بس
ثانيا : تنضيف الفانوس جوة و برة


اولا : تنضيف الوش من برة بس سواء فانوس او فوجات

و عندنا طريقتين
الطريقة الأولي : الطريقة اليدوية المتعبة شوية
الطريقة التانية : الطريقة الشبه يدوية لكن اسرع

و هنا ممكن تنضف الفانوس و هو راكب لكن لو حاسس انك هتضايق و هتبقي متكتف ممكن تفكه و فكه بسيط هتشيل اللمبات و السلك و تفك المسامير المهم بس تكون عارف تحطهم ازاي تاني هههههه

الطريقة الأولي : الطريقة اليدوية المتعبة شوية

ادواتها :
-حتة ورق صنفرة ناعم (رقم -1000 او -1500 و رقم -2000 عشان دول ناعمين) او رملة ناعمة
- فوطة
- مية كتييييير خرطوم مية من الاخر او من الحنفية عالطول بقي لو هتفك الوش هههه
- و ممكن جلانس لو عندك مش عندك خلاص المية هتقوم بالواجب برده
- و ممكن تستخدم بلاستيك بولش و ده هتلاقيه كالمعتاد كارفور او سبنس او اي مكان بيبعهم

1- هتاخد الفوطة و تبلها حاجة بسيطة و تقعد تدعك في وش الفانوس بعد ما تخلص
2- هتجيب ورقة الصنفرة اللي هي -1000 او -1500 و تنقعها في المية و بعدين تاخدها و تفضل تدعك في الفانوس واحدة واحدة و اهم حاجة و انت بتدعك المية تفضل نازلة ع الفانوس عشان الفانوس ميتجرحش منك جامد

3- هتلاقي الصفار اللي علي الوش ابتدي يروح انقع ورق الصنفرة اللي هو بقي رقم -2000 عشان انعم من الــ1000 او 1500 و تنقه في المية برده و تديها برده ع الوش و المية نازلة برده
( يا مطرة رخي رخي ع قرعة مستر أكسلتي ... يا مطرة رخي رخي ع ضميري اللي قارفني )
و الرملة طبعا نفس الموضوع

4- هتلاقي االفانوس بقي انضف من الصيني بعد غسيله عايز بقي ترش جلانس و تنضف رش عايز بمية بس و تنضف نضف

و ممكن تستخدم البلاستيك بولش اللي قولت عليه بعد ما الصنفرة و تدعك بقي بس الكلام ده لو مستعصية اوي يعني الصفار اللي علي الوش

بس كده الطريقة الأولي نضفت وش الفانوس او الفوج في 4 خطوات
( كداب نسيت اخر خطوة و مرضتش ترقمها و بتضحك ع الناس .....اسككككككككككككككت يا غبي )

الطريقة التانية : الطريقة الشبه يدوية لكن اسرع

ادواتها :
- مكنة البولش العادية او الشنيور و تركب فيه الفرشة بتاعت المكنة ( اوعي تركب بوطنة و تقولي انت السبب ههههه ) احنا هنستخدمه شعان نلف بس
-بلاستيك بولش
-مية بس مش كتيير
- فوطة بس مش الفوطة البرتقالي فوطة تكون خشنة شوية

1- هتجيب البولش و تحط كام حتة ع الفرشة بتاعت المكنة او الفرشة اللي مركبينها ع الشنيور او تحطها ع الوش عالطول و توزعها ع وش الفانوس او الفوج

2- هتشغل المكنة او الشنيور و تفضل شغال بيهم ع الوش كله لحد ما تلاقيه نضف

3- هتجيب الفوطة و حتة بولش صغيرة و تكمل دعك في الوش و بعدين بحتة من الفوطة ميكونش عليها بولش و تنضف كويس و في الاخر بقي المية تنضف بيها الوش و شوف الفرق و ادعيلي

في حالات بقي متكونش مستعصية اوي ممكن بمكنة البولش او فرشة المكنة اللي مركبينها في الشنيور و اديها في الوش كله بس هتاخد معاك وقت و ممكن متدكش النتيجة المطلوبة اوي زي اللي قولناهم

بس كده يا شباب ديه الطريقتين عشان ننضف الوش الخارجي فقط للفانوس او الفوج

( انا اللي قايله عليها ع فكرة ..... محدش هيصدقك هع هع هع )
-----------------------------------------------------

ثانيا : تنضيف الفانوس جوة و برة

هنا بقي هتفك الفانوس هتفك الفانوس لا محل و لا مفر ( و لا بد و كان و اخواتها و ان و اخواتها..... اسكت ياض انا مصدقت اخلص من النحو تطلعلي انت )

هتشيل اللمبات و السلك و تفك المسامير

و هنفرق هنا بقي بين حالتين
الحالة الاولي : لو عايز تنضف الوش البلاستيك من برة و جوة بنفس الطريقة اللي فاتت
الحالة التانية : لو عايز هتنضف الوش من برة بنفس الطريقة اللي فاتت و من جوة بطريقة عادية


الحالة الأولي : لو عايز تنضف الوش البلاستيك من برة و جوة بنفس الطريقة اللي فاتت

هنا بقي هتضطر بعد ما تفك الفانوس انك تسيح اللحام
و تسييح اللحام بطريقة من تلاتة بالسيشوار او في الفرن او بجهاز كده بيطلع ضغط هوا سخن بيستخدموه في تصليح الالكترونيات عشان يفكوا اللحام
و انا لا افضل الفرن اساسا

1- نسيح اللحام اللي بين الفانوس و الوش
2- ناخد الوش ننضفه بطريقة من الطرق اللي قولناها فوق
3- الفانوس بمية و صابون و حتة فوطة
4- بعد ما تنضف الوش و الفانوس تسيبهم في الشمس لحد ما ينشفوا نهائيا
5- و بعد ما نشفوا تجيب لحام ( سيليكون ) و تلزق الوش في الفانوس تاني
6- تركب الفانوس

الحالة التانية : لو عايز هتنضف الوش من برة بنفس الطريقة اللي فاتت و من جوة بطريقة عادية

1- هتفك برده الفانوس
2- تنضفه من برة الوش زي مقولنا برده بطريقة من الطريقتين اللي فوق
3- بعدين مية و صابون جوة الفانوس و ترج ترج و بعدين بمية نضيفة و ترج و تنزلها و تحط تاني لحد ما الصابون يروح
4- برده تسيبه في الشمس ينشف و بعد ما ينشف ترجع تركبه تاني


و اللي فات زي ما بينطبق علي الفوانيس الامامية بينطبق علي الفوجات برده

و اعتذر عن عدم توافر الصور

و اتمني ان الموضوع يحوذ ع اعجابكم و تجربوا و تقوليلي ايه الاخبار معاكم بس اهم حاجة الذمة و الضمير ( مين بينده ...انت لسه هنا طرااااااخ .....اه يا قفايا ماشي يا اكسل بتتحامي في الاعضاء )

و انتظروا ان شاء الله باقي السلسلة لكن مش في القسم التعليمي فقط ممكن تكون في اي قسم انتوا و حظكم بقي

و بالتوفيق للجميع ان شاء الله


الموضوع غير منقول